Deuteronomy 20 in Sunwar
1 मिनु मोसामी “गेपुकी लडाइ पथ लनीनु, शारा नु बग्गीपुकी तशा, इन जोरी सत्रु इन क्येङा शुश बाक्तेक्म हना, महिनीन। मारदे हना परमप्रभु यावे, इन कली इजीप्त रे ग्रुंइब इन परमप्रभु गेपुकी नु बाक्ब।
2 मिनु लडाइम लचा क्येङा ङोंइती चढ़ेबमी लडाइ पथ लाइब आन ङोंइती लशा
3 ‘इस्राएलीपुकी नेनीन, गेपुकी मुल लडाइ पथ लचा चिक्शो बाक्नीनी। मोपतीके आइक्च थुं मपने। महिनीन। मेको आन कली तशा, ग्रीचोक पा इन थुं ग्येत्थ लुक्च मदुमीने।
4 मारदे हना परमप्रभु यावे, इन परमप्रभु इन जोरी सत्रु नु लडाइ पा इन कली ग्रापाइक्चा कली गेपुकी नु लाइब’ देंचा माल्ब।
5 मिनु आन ठेयब मुरपुकीमी मुर आन कली ‘सु इन दातेमी नक खिं का सेल्शा, ओव़तीक चाड ममानेशो बाक्त हना, मेको आ खिं लेश्शा, लचा माल्ब। मेको लडाइम बेक्त हना, आ खिंम अर्को मुर चाड सेल्शा ओव़ब, मेको मदुम्ब। ब्यवस्था १:१५; ब्यवस्था १६:१८
6 सुइ इन दातेमी अङगुर रू ख्रुम्शा, जचा मतशो बाक्तीनी हना, इन खिं लेश्शा लने। मेको लडाइम बेक्त हना, आ अङगुर रू अर्कोम जाइब, मेको मदुम्ब। ब्यवस्था २८:३०; लेवी १९:२४-२५
7 सुइ इन दातेमी मीश आल का पुंइशा ग्युंबे पचा चिक्शो बाक्तीनी हना, मेको खिं लेश्शा लचा माल्ब। मेको लडाइम बेक्त हना, मेको मीश आल अर्कोम लाइक्ब। मेको मदुम्ब’ देंचा माल्नीम। ब्यवस्था २४:५
8 मिनु मेको ठेयब मुरपुकीमी लेंशा मुर आन कली ‘इन दातेमी सुइम हिंब नु आ थुं लुक्च लाइब बाक्त हना, मेको आ खिं लेश्शा लचा माल्ब। मेकेर बाक्त हना, आ लोक्ब आन थुं यो ग्येत्थ लुक्च लपाइक्ब’ देंचा माल्नीम। न्यायाधीस ७:३
9 मिनु ठेयब मुरपुकीमी मो देंने थुम्मे नोले, मेकोपुकीमी लडाइ पाइब आन ङोंइती गाक्चा कली, ठेयब मुरपुकी योव़चा माल्नीमी।
10 मिनु गेपुकी सहर का कली लडाइ पथ, आ नेक्था जाक्दीन्नी नोले मेको आन कली ‘लडाइ मपय, गुइ पोक्कीन’ देंचा माल्नीनी।
11 मिनु मेकोपुकीमी ‘दुम्ब’ दे गुइ पोक्तेक्म हना, मेकेर ङा मुर नेल्ले आन कली वाइलीम वाइल खोदेंशो पा गेय पाइब सेल्चा माल्नीनी।
12 तन्न मेको सहर ङा मुरपुकीमी इन देंशो मबित्थु लडाइ पचा दाक्ताक्म हना, मेको सहर कली पुम्दीन।
13 मिनु परमप्रभु यावे, इन परमप्रभुमी मेको सहर इन कली गेप्तु हना, गेपुकीमी मेकेर ङा वोंइश मुर नेल्ल आन कली तरवारम साइक्चा माल्नीनी। ब्यवस्था ३:६-७; गन्ती ३१:७,१४-१८
14 तन्न मीश मुर, आलपुकी, बी ब्यफ, क्यारश भेडा नु सहरम बाक्शो मारेइ मारेइ इन के दुम्ब। मोपा परमप्रभु यावे, इन परमप्रभुमी गेशो ग्राशो थोव़क तशा ग्येरसीन।
15 आंम नेक्था ङा रागी रागी कली ममाइ, तन्न ङोन ङा सहर कली मोदेंशो पचा माल्नीनी।
16 तन्न परमप्रभु यावे, इन परमप्रभुमी मेको जात जात ङा मुर आन सहर इन कली गेशो सहरम मार मार सेस बाक्मे, मेको साइक्चा माल्नीनी। गन्ती २१:१-३; यहोसु १०:४०
17 परमप्रभु यावे, इन परमप्रभुमी अरेशो खोदेंशो पा, हित्ती, एमोरी, कनानी, परिज्जी, हिव्वी नु यबुसी नेल्ल आन कली साइश्शा क्याम्चा माल्नीनी।
18 मो मपाइतीनी हना, मेको आन देवी देवता आन कली ग्रांग्रा दिचा ङा पतीके शेंसीनीनी। मोपा परमप्रभु यावे, इन परमप्रभु कली मरिम्शो पा पाप पाइनीनी।
19 मिनु गेपुकीमी सहर का कली लडाइ पा शुश नाक्त सम्म पुम्शा बाक्नीनु, मेको सहर ङा रवापुकी मतिम्चा। मारदे हना गेपुकीमी नोले मेको आन फल जने चाप्नीनी। मार, मेको एर ओंथ ङा रवापुकी मुर खोदेंशो बाक्नीमी ङा?
20 तन्न इन तुइश्शो जचा फल मसिप्ब रवा तिम्ने चाप्नीनी। मिनु मग्रानी सम्म मेको रे सहर ङा गारो ङोइक्तीके सेल्ने चाप्नीनी” देंत।