Deuteronomy 15 in Sunwar

1 मिनु मोसामी “गे इन कली ७ बर्स नोले जेर क्‍याम्‍तीक बर्स बाक्‍ब। प्रस्‍थान २३:१०-११

2 मेको मथाप्‍तीक माफ गेतीक बर्स दोपा पचा माल्‍नीनी देंशा हना, सु सुमी आ वारच, दे लोक्‍ब आन कली जेर गेम्‍तेक्‍म हना, मेको गेबपुकीमी जेर ताक्‍ब आन कली गेशो जेर मथाप्‍पाइक्‍थु प्रोन्‍मेक्‍ल। मेकोमी आ वारच नु आ लोक्‍ब आन कली जेर आ पर्बम गेन कि गेन, दे पुंइचा मदुम्‍ब। मारदे हना परमप्रभु यावे रे पा जेर क्‍याम्‍तीक ङा बर्स बाक्‍ब। नेहेम्‍याह ५:१०; नेहेम्‍याह १०:३२

3 अर्को रागी ङा मुर आन कली चहिं गेन कि गेन, दे पुंइने चाप्‍नीनी। तन्‍न इन लोक्‍ब आन कली चहिं दोशो जेर बाक्‍मे मेको प्रोंइचा माल्‍नीनी।

4 इन दातेमी सुइ प्रुङग मबाक्‍म कों? मारदे हना परमप्रभु यावेमी योव़शा गेशो इन के सेल्‍शो रागीम इन कली शुश आसीक गेब।

5 गेपुकीमी परमप्रभु यावे, इन परमप्रभु आ देंशो होस पा टीतीनी हना, इन कली अरेशो नेल्‍ल पाइतीनी हना, सुइ प्रुङग मदुम्‍नीनी।

6 मारदे हना परमप्रभु यावे, इन परमप्रभुमी इन कली देंशो खोदेंशो पा इन कली आसीक गेब। मिनु गे शुश रागी रागी ङा मुर आन कली जेर गेब दुम्‍नीनी। गेपुकीम चहिं जेर पुंइचा ममाल्‍नीनी। मिनु गेपुकीमी शुश रागी रागी ङा मुर आन कली हुकुम पाइनीनी। तन्‍न मेकोपुकीमी इन कली हुकुम मपाइ‍नीम। ब्‍यवस्‍था २८:१२

7 मिनु परमप्रभु यावे, इन परमप्रभुमी इन कली गेशो रागीम, सहर कामी बाक्‍शो इन लोक्‍ब का प्रुङग बाक्‍त हना, इन थुं खकटा पा मबाक्‍कीन। ‘काइ मगेनुङ’ दे मदेनीन। १यूहन्‍ना ३:१७

8 तन्‍न गे शिशी पा मेको कली आ माल्‍शो नेल्‍ल जेर गेने। लूका ६:३४-३५

9 मिनु इन थुंमी ‘जेर क्‍याम्‍तीक बर्स जाक्‍चा चिक्‍ताक्‍व’ दे इन प्रुङग लोक्‍ब आ पर्बम गन गन पा, मेको कली वारच पा जेर गेचा मदाक्‍नीनी हना, होस पने। मेको प्रुङगुमी इन पर्बम परमप्रभु यावे कली पुंइब। मिनु गे पापी दुम्‍नीनी।

10 गेपुकीमी मेको कली हाइश्‍शो थुं पा गन गन मपथु गेने। मारदे हना ओं पतीकेन परमप्रभु यावे, इन परमप्रभुमी इन कली इन पशो नेल्‍लेमी आसीक गेब। २कोरिन्‍थी ९:६-७

11 मारदे हना रागीम श्‍येत जशो प्रुङगपुकी गेना हना यो बाक्‍नीम। मोपतीके गो इन कली इन रागीम बाक्‍शो श्‍येत जाइब इन लोक्‍ब नु प्रुङग आन कली तशा, हाइश्‍‍शो मुर दुम्‍शा गेन। मत्ती २६:११; यसैया ५८:७; याकूब २:१५-१६

12 मिनु इन हिब्रू आन दाते ङा लोक्‍ब, मीश मुर वोंइश मुर, आंम कली इन गुइमी लेयसीनीम हना, मेकोमी इन कली ६ बर्स गेय पचा माल्‍नीम। मेको ७ बर्समी मेको आन कली प्रोंइशा लचा गेचा माल्‍नीनी। येरमीया ३४:१४

13 मिनु गे मेको प्रोंइनीनु, श्‍येत्‍थ गुइ मसोइक्‍तीन।

14 परमप्रभु यावे, इन परमप्रभुमी इन कली आसीक गेशो रे इन क्‍यारश भेडा इन अन्‍न नु अङगुर शांबु रे मेको कली शुश गेशा सोइक्‍तीन।

15 गेपुकी इजीप्‍त रागीमी वाइलीम वाइल दुम्‍शा बाक्‍तीनी। मिनु परमप्रभु यावे, इन परमप्रभुमी इन कली प्रोंइतु, मेको मिम्‍तीन। मोपतीके गो मुलाक्‍ती दोपा पचा, दे गो इन कली शेंनुङ। ब्‍यवस्‍था ५:१५

16 मिनु मेकोमी इन कली नु इन मुर आन कली दाक्‍शा, मेकोमी ‘गो इन कली मप्रोंइथु, एकेन गेय पाइनुङ’ देंत हना,

17 गे मेको मुर कली लाप्‍चोमी राप्‍पाइश्‍शा लूजे का लाइश्‍शा, मेको आ नोफा लाप्‍चो ङा शी तारी ख्रित्‍चा माल्‍नीनी। मिनु मेको मबेक्‍म सम्‍म इन वाइल दुम्‍ब। वाइलीम कली यो मोदेंशो पचा माल्‍नीनी।

18 गेपुकीमी मेको आन कली प्रोंइशा सोइक्‍चा श्‍येत मलाक्‍कीन। मारदे हना गाल्‍च ताक्‍शा गेय पाइब आन क्‍येङा निक्‍शी खेयप हिक्‍शो खोदेंशो पा मेकोमी ६ बर्सम गेय पने थुम्‍शो बाक्‍ब। गेपुकीमी इन प्रोंइशो वाइलीम वाइल कली रिम्‍शो पा गेतीनी हना, परमप्रभु यावे, इन परमप्रभुमी इन कली इन पशो नेल्‍लेमी आसीक गेब।

19 इन बी ब्‍यफ आ ङोंइती जरमेशो बाछा नु इन क्‍यारश भेडा आ ङोंइती जरमेशो पाठा परमप्रभु यावे, इन परमप्रभु कली गेचा माल्‍नीनी। इन ङोंइती जरमेशो ब्‍यफ लाइश्‍शा गेय मपचा। ङोंइती जरमेशो सांड आन कली ऊन मप्रेक्‍चा। प्रस्‍थान १३:२,१३-१६

20 मिनु बर्स बर्सम गेपुकी नु इन खिं ङा मुर नेल्‍लेमी परमप्रभु यावे आ बाक्‍तीकेमी परमप्रभु यावे, इन परमप्रभु आ ङोंइती ब्‍वचा माल्‍नीनी। ब्‍यवस्‍था १४:२३

21 तन्‍न मेको ब्‍यफ, सांड कली मारेइ दुम्‍शो बाक्‍त हना, कोङटे बोङटे बाक्‍त हना, नु मिक्‍च मताइब मारेइ दुम्‍शो बाक्‍त हना, गेपुकीमी मेको कली परमप्रभु यावे, इन परमप्रभु कली चढ़ेचा मदुम्‍ब। लेवी २२:२०

22 गेपुकीमी इन सहरमी किश्‍श नु रोकोश ब्‍वशो खोदेंशो पा परमप्रभु आ ङोंइती ग्रांग्रा दिशो नु मदिशो नेल्‍लेमी ब्‍वने चाप्‍नीम। ब्‍यवस्‍था १२:१५,२२

23 मेको आ हुश ला मब्‍वचा। मेको ब्‍वाक्‍कु खोदेंशो पा खपीम ताइक्‍चा माल्‍नीनी” देंत। ब्‍यवस्‍था १२:१६