Deuteronomy 1 in Sunwar
1 मोसामी एको ब्रेक्शो लोव़ इस्राएली नेल्ल आन कली शेंशो बाक्ब। मिनु मेना मेकोपुकी सुफ माइश्शो दिंम आ ओंथ हांबुम बाक्तेक्म। मेको बाक्तीके अराबाहम, पारान, तोफेल, लाबान, हसेरोथ नु दी-साहाब आन दातेमी यर्दन खोला आइक्ची हांबु ङा रागीम बाक्ब।
2 होरेब रे पा कादेश-बारनेआ सम्म, सेइर ङा लां रे लचा कली ११ नाक्त माल्ब।
3 मिनु परमप्रभु यावेमी मोसा कली मार मार शेंदा, मेको मोसामी ४० बर्स नु ११ महिना ङा ङोंइती ङा नाक्तीमी मेको इस्राएली नेल्ल आन कली शेंताक्व। गन्ती ३३:३८
4 ङोंइती मेकोपुकीमी हेश्बोन ङा एमोरी आन पिप सीहोन नु अश्तारोथ नु एद्रेइ सहरम बाक्ब बाशान ङा पिप ओग नु लडाइ पा ग्रातेक्म। गन्ती २१:२१-३५
5 मिनु यर्दन खोला आइक्ची हांबुम, मोआब रागीम बाक्शा, मोसामी परमप्रभु यावे आ अरेशो लोव़ शेंचा गोप्तु।
6 मिनु मोसामी “होरेब डांडाम बाक्शो परमप्रभु यावे, इं परमप्रभुमी ‘गेपुकी एको पहाडम शुश नाक्त बाक्तीनी। गन्ती १०:११-१२
7 मुल गे गाक्चा गोने। कनानी आन रागी लने। एमोरी आन पहाड नु दिंमम लने। मेको आ नेक्था ङा अराबाह माइक्तीके यो लने। मेको पहाड बाक्ब। मेको शेफेलाह, नेगेब नु समुन्द्र आ नेक्था ङा कनानी आन रागी बाक्ब। गे लेबानोन नु युफ्रेटीस माइश्शो ठेयब खोला सम्म लने’ देंत।
8 मिनु लेंशा परमप्रभु यावेमी ‘कोव़ङीन, मेको रागी इन ङोंइती बाक्ब। मेकेर ओव़शा, मेको रागी आंम के सेलीन। मारदे हना गो मेको रागी इन किकी पिपी अब्राहाम, इसहाक, याकूब नु आन चच युइ आन कली गेनुङ’ दे कसम जाता” देंत। उत्पत्ती १२:७; गन्ती ११:१४
9 मिनु गो इन कली “गो आं का ला इन कली कोव़ने मचाप्नुङ। प्रस्थान १८:१८
10 मिनु परमप्रभु यावे, इन परमप्रभुमी इन कली शुश सेल्शा, गे मुल सरीङ ङा सोरुल खोदेंशो पा शुश दुम्शो बाक्नीनी। ब्यवस्था १०:२२; उत्पत्ती १५:५
11 परमप्रभु यावे, इन किकी पिपी आन परमप्रभुमी इन कली का का पा हजार क्येङा शुश सेलल। आ देंशो खोदेंशो पा इन कली आसीक गेवल।
12 दोपा गो का ला इन श्येत तशा, इन जिशो खेशो नेल्ल गारपाइक्ने चाप्नुङा ङा?
13 मिनु गे इन थर थर रे निप्स पाइश्शो, लोव़ रुप्ब नु मारेइ मारेइ तुइक्ब मुर योव़ङीन। मिनु गो मेको आन कली इन कली कोव़ब सेल्नुङ।
14 मिनु गेपुकीमी आं कली ‘इन देंशो लोव़ रिम्शो बाक्ब’ देंतीनी।
15 मोपतीके गो इन थर ङा निप्स पाइश्शो, तुइक्ब नु ठेयब मुरपुकी योव़शा, इन कली कोव़ब सेल्ता। मिनु इन थर थर ङा हजार का, सहे का, ५० नु १० जना मुर आन कली का का पा कोव़ब ठेयब मुरपुकी सेल्ताक्मी। आंम इन थर थर ङा मुरपुकी यो योव़ताक्मी। प्रस्थान १८:२५
16 मेना गो इन कली निसाफ पाइब आन कली ‘इन लोक्ब आन दातेमी जिशो खेशो रिम्शो पा नेंशा, ठीक पा निसाफ पने। इस्राएली नु रागी ङा मुर जिशो यो नेल्ल आन कली ठीक पा निसाफ पने। लेवी १९:१५
17 निसाफ पनीनु, मुर आन कुल मकोव़ङीन। गेपुकीमी आइक्च नु ठेयब मुर, नेल्ल आन लोव़ नेनीन। सुइ कली महिनीन। मारदे हना निसाफ परमप्रभु आ गुइमी बाक्ब। इन मचाप्शो निसाफ चहिं गो नेंनुङ। मेको कली आं बाक्तीक चाक्कीन’ दे माइक्ताक्मी। ब्यवस्था १६:१९; २इतिहास १९:६-७; प्रस्थान २१:६
18 मेना गो इन पचा माल्शो गेय नेल्ल अरेतन्नी।
19 मिनु नोले परमप्रभु यावे, इं परमप्रभुमी देंशो खोदेंशो पा गोपुकी होरेब डांडा रे पा एमोरी आन बाक्तीक पहाड लाइतक। गोपुकी एको हिंचा ङा ठेयब गोरशो रागी लकानु, गे मेको नेल्ल तुइक्नीनी। मोपा गो कादेश-बारनेआम जाक्तक। गन्ती २०:१
20 मिनु गो इन कली ‘परमप्रभु यावे, इं परमप्रभुमी इं कली गेशो एमोरी आन पहाड रागीमी जाक्तीनी।
21 कोव़ङीन, परमप्रभु यावे, इन परमप्रभुमी एको रागी इन कली गेशो बाक्त। मिनु परमप्रभु यावे, इन किकी पिपी आन परमप्रभुमी देंशो खोदेंशो पा मेकेर इर लशा, आंम के सेलीन। गेपुकी महिनीन। सुर्ता मपने’ देंती।
22 मिनु गे नेल्लेमी आं कली ‘मेको रागी ङा मारेइ मारेइ तुइक्चा कली आंइ ङोंइती क्यारी पाइबपुकी सोइक्तीन। मेकोपुकीम तेको लां गाक्चा नु तेको सहर जाक्दीत्नीकी, दे शेंने चाप्नीमी’ देंतीनी। गन्ती १३:२
23 मिनु गो मेको लोव़ ठीक लाक्ती। गो इन थर थर ङा का का पा १२ जना मुर योव़ताक्मी।
24 मिनु मेकोपुकी पहाड गे लशा, एश्कोल ङा दिंमम जाक्दीश्शा, क्यारी पथ लाम्तेक्म।
25 मिनु मेकोपुकीमी मेको रागी ङा फल फुल कुरशा चाक्शा, आंइ कली ‘परमप्रभु यावे, इं परमप्रभुमी गेशो रागी शुश रिम्शो बाक्ब’ देंतेक्म।
26 तन्न गेपुकी परमप्रभु यावे, इन परमप्रभुमी देंशो मटिथु, मेको रागी लचा मबिस्सीनी।
27 मिनु गे इन बाक्तीक ताम्बुमी गन गन पा ‘परमप्रभु यावेमी आंइ कली मदाक्तीके नु एमोरी आन गुइ रे पा साइक्पाइक्चा कली आंइ कली इजीप्त रे ग्रुंइशा, एक चाक्शो बाक्ब। गन्ती १४:-
28 मारदे मेकेर लचा? मेको क्यारी पाइबपुकीमी आंइ कली मेकेर ङा मुरपुकी आंइ क्येङा लाइश्शो नु बोल्यो बाक्नीम। मेको आन सहर आन गारो सरीङ थिचा ङा पा लाइश्शो बाक्नीम। मिनु मेकेर गोपुकीमी अनाकीम ङा मुर यो ताइतक, दे हिंच कोंइताक्म’ दे गन गन पाइतीनी। ब्यवस्था ९:१-२; गन्ती १३:३३
29 मिनु गो इन कली हिंशा, ख्रिंख्रि मपने। मेको आन कली तशा महिनीन। प्रस्थान १४:१४-२५; यहोसु १०:१४
30 इन ङोंइती गाक्ब, परमप्रभु यावे, इन परमप्रभुमी इन पा ङा लडाइ पाइब। दोपा इजीप्त रागीमी इन ङोंइती मार मार पवा, मोपा पाइब।
31 मिनु गोरशो रागीम गेपुकी गाक्नीनु, आफोम आ तौ कली कुरशो खोदेंशो पा, परमप्रभु यावे, इन परमप्रभुमी इन कली एक जाक्ची सम्म कुरशो बाक्त। गे आंमा तुइक्नीनी। ब्यवस्था ८:५; प्रस्थान १९:४
32 मोदेंशो दुम्त हना यो गे परमप्रभु यावे, इन परमप्रभु कली थमा मसुइक्नी।
33 मेको इन ङोंइती इन कली बाक्तीके कोंइथ गाक्त हना यो, गे थमा मसुइक्नी। मिनु लां कोंइचा कली नाक्दोम मी नु नाक्तीम गोस्स दुम्शा इन कली लां कोंइताक्व। प्रस्थान १३:२१
34 मिनु परमप्रभु यावेमी इन रेयके पा लोव़ पशो नेंशा गाइश्शा
35 ‘एको मरिम्शो मुर आन दातेमी मुर का ला मेको आन किकी पिपी आन कली गेशो रिम्शो रागी लचा ताइब। गन्ती १४:२३-२४
36 मेको यपुन्ने आ तौ कालेब बाक्ब। मेको नु आ तौ चचम मेको आ थेक्शो रागी ताइनीम। मारदे हना मेकोमी आं कली, परमप्रभु यावे कली थमा पा नोले खोइश्शो बाक्त’ दे कसम जशा देंत।
37 मिनु परमप्रभु यावेमी इन पशो तशा, आं पर्बम यो गाइक्ताक्व। मिनु मेकोमी आं कली ‘गे यो मेको रागी ओव़चा मताइनेवे। गन्ती २०:१२
38 इ के गेय पाइब नून आ तौ यहोसु चहिं ओव़चा ताइब। गे मेको आ थुं बारपाइक्चा माल्नेवे। मारदे हना यहोसुमी इस्राएली आन कली मेको रागी योक्शा गेचा माल्ब’ दे परमप्रभुमी कसम जशा देंत। गन्ती ३४:१७
39 मिनु गेपुकीमी इन आल ब्रेप्च आन पर्बम ‘मेको गोरशो रागीमी बेक्नीम’ देंतीनी। तन्न मेकोपुकी ओव़चा ताइनीम। इन आइक्च तौपुकी ओव़चा ताइनीम। मेको रागी मेको आन कली गेनुङ। मिनु मेकोपुकीमी मेको रागी आंम के सेल्नीम।
40 मिनु गेपुकी चहिं लेश्शा गोरशो रागी लल समुन्द्र गे लने। गन्ती १४:२५
41 मिनु गेपुकीमी आं कली ‘गो परमप्रभु यावे कली पाप पाइतक। परमप्रभु यावे, इं परमप्रभुमी शेंशो खोदेंशो पा गो लडाइ पथ लाइनीकी’ देंतीनी। मिनु गे नेल्ले इन या पिम्साक्नी। मिनु गो ग्रानीक, दे मिम्शा, पहाडी रागी कली लडाइ तोचा, दे ग्येत्थ लाइतीनी। गन्ती १४:४०
42 मिनु परमप्रभु यावेमी आं कली ‘गेपुकी इन जोरी सत्रु रे ब्रुइनीनी, गे मेको डांडा ङोइश्शा मलने। लडाइ मपने। मारदे हना गो इन दातेमी मबाक्शो बाक्नुङ, दे मेको आन कली माइक्मी’ देंत।
43 मिनु गो इन कली मेको लोव़ पाता। तन्न गेपुकीमी नेंसीन मनेंनी। ठेयब लेश्शा, परमप्रभु यावे आ लोव़ मबित्थु मटिथु, गे डांडा ङोंइसाक्नी।
44 मिनु मेको डांडाम बाक्ब एमोरीपुकीमी गेपुकी नु लडाइ पाम्तेक्म। मिनु मेकोपुकीमी सुरब आन हुल खोदेंशो पा इन कली खेदा पाम्तेक्म। मिनु सेइर नु होरमा सम्म खेदा पा इन कली फ्रुम्तेक्म। गन्ती १४:४५
45 मिनु गेपुकी लेश्शा जाक्शा, परमप्रभु यावे आ ङोंइती ङाक्तीनी। तन्न मेकोमी इन ङाक्शो मनेन। इन पुंइशो लोव़ यो मगेवो।
46 मिनु नोले गे शुश नाक्त कादेशम बाक्तीनी। ब्यवस्था २:१४