Daniel 8 in Sunwar
1 मिनु बेल-शजर पिप दुम्शो बर्स सां जाक्दीमेनु, गो, दानीएलमी लेंशा कोंइतीके ताता। दानीएल ७:१
2 मिनु मेको कोंइतीकेमी गो एलाम रागी ङा सुसा माइश्शो ठेयब सहर ङा उलाइ खोला आ नेक्था बाक्शो बाक्ती।
3 मिनु गो कोव़शा बाक्ङानु, ग्रोव़ निक्शी पाइश्शो सांड का ताता। मेको आ ग्रोव़ निम्फा दुइश्शो बाक्ताक्स। का चहिं अर्को क्येङा दुइश्शो बाक्त। मेको दुइश्शो ग्रोव़ नोले ग्रूशो बाक्त।
4 मिनु गो मेको सांडम पच्छिम, उत्तर नु दक्खिन गे ख्रुना ख्रुन पशो ताता। अरु जन्तु नेल्ल मेको आ ङोंइती राप्ने मचाप्बाक्तेक्म। मिनु सुइमी मेको आ सक्ति रे प्रोंइने मचाप्बाक्तेक्म। मेकोमी आ दाक्शो पशा, आ सक्ति बारत। दानीएल ८:४
5 मिनु गो मेको कोव़शा बाक्ङानु, पच्छिम रे बोका का फो ग्रूत। मेकोमी आ खोइल खप मथिथु, रागी नेल्ल लाक्तु। मिनु मेको बोका आ मिक्च आस दातेमी ग्रोव़ का बाक्त। दानीएल ८:२१
6 मिनु मेको बोका मेको खोला आ नेक्था बाक्शो ग्रोव़ निक्शी पाइश्शो सांड आ बाक्तीक जाक्त। मिनु मेको सांड कली ख्रुचा, दे शुश बोल पा दोरत।
7 मिनु गो मेको सांड गे दोरशो ताता। मेको थाम्पा गाइश्शा, मेको सांड कली ख्रुशा, आ ग्रोव़ निम्फा जिक्ताक्व। मेको सांड बोल मपाइश्शो दुम्शा, मेको बोका कली मारेइ पने मचब। मेको बोकामी मेको सांड कली खपीम तोक्शा, आ खोइलीमी दिम्ताक्व। मिनु सुइमी मेको सांड कली बोका आ सक्ति रे प्रोंइने मचबेम।
8 मिनु नोले मेको बोकामी ठेयब सक्ति ताप्तु। मिनु मेको नेल्ल क्येङा सक्ति पाइश्शो दुम्तीके मेको आ दुइश्शो ग्रोव़ जिक्त। मिनु मेको जिक्शो ग्रोव़ आ पा ङा अर्को ४ ओटा ग्रोव़ रागी आ पूर्ब, पच्छिम, उत्तर, दक्खिन गे हिरशा ग्रूतेक्म। दानीएल ११:४
9 मिनु मेको ४ ओटा ग्रोव़ आन दाते ङा का रे अर्को इम्चीली ग्रोव़ का ग्रूत। मिनु मेको नक ग्रूशो ग्रोव़ दक्खिन, पूर्ब गे नु दारशो रागी गे कोव़शा थाम्पा ठेयब दुम्शा कोल्त। दानीएल ७:८
10 मिनु मेको कोल्शा, स्वर्ग ङा लडाइ पाइब आन हुल बाक्तीक सम्म जाक्दीश्शा, लडाइ पाइब का निक्शी नु सोरुल का निक्शी आन कली तोक्शा खोइलीमी दिम्ताक्व।
11 मेकोमी लडाइ पाइब आन नेल्ल क्येङा ठेयब कली यो ठेयब लेश्शो लोव़ पा, नाक्त किंत किंत ङा चोशा चढ़ेतीक रोइश्शा, परमप्रभु यावे आ बाक्तीके खिं प्रेश्शा गेप्तु। दानीएल ९:२७
12 मिनु आ परमप्रभु कली काइ मटितीकेमी नाक्त किंत किंत ङा चढे़तीक मचढ़ेचा ङा पा गेय पाइब वोइक्तु। मिनु मेकोमी थमा पा शेंतीक कली खतम पोक्शा, आ मरिम्शो पतीक चहिं बारना बारन लपाइक्तु।
13 मिनु नोले गो स्वर्गम बाक्ब कामी लोव़ पशो नेंता। मिनु अरु स्वर्गम बाक्बमी मेको कली “नाक्त किंत किंत ङा चोशा चढ़ेतीक रोइक्तीके, आ मरिम्शो पतीकेमी परमप्रभु आ खिं श्येत्थ नु खतम सेल्तीक नु परमप्रभु आ लडाइ पाइब आन कली खोइलीमी दिप्शा, कोंइतीके गेना नुप्बा?” दे हिल्लो पशो नेंता।
14 मिनु अर्कोमी आं कली “हजार निक्शी सहे सां नाक्दो नाक्त सम्म मोदेंशो दुम्ब। मिनु नोले परमप्रभु आ खिं लेंशा सेल्नीम” देंत।
15 गो, दानीएलमी, एको कोंइतीके रे मार रुम्सीबा, दे तुइक्चा माल्ता। मिनु वोंइश मुर खोदेंशो का आं ङोंइती ग्रूशा, दोक राप्शो ताता।
16 मिनु गो उलाइ खोला रे “गाब्रीएल, एको मुर कली एको कोंइतीके रे मार रुम्सीबा, मेको शेंदो” देंशो मुर आ सेंदा का नेंता। दानीएल ८:२; दानीएल ९:२१; लूका १:१९,२६
17 मिनु मेको परमप्रभु यावे आ स्वर्ग ङा गेय पाइब आं राप्शा बाक्तीके आं नेक्था जाक्त। मिनु गो थाम्पा हिंशा खुम्की पा बाप्ती। मिनु मेकोमी आं कली “ए मुर, एको कोंइतीके नेल्ल क्येङा नोले ङा नाक्त आ पर्बम बाक्ब, दे रुपो” देंत। प्रकाश १०:६
18 मिनु मेकोमी आं कली लोव़ पवानु, गो खपीमी दिङ गोल्शा बाप्शा, थशो खोदेंशो दुम्ती। मिनु मेकोमी आं कली थिशा, पोक्शा राप्पाइक्ती।
19 मिनु मेकोमी “गो इ कली नोले ङा गाइक्तीक नाक्ती मार दुम्बा, तुइक्पाइक्नन। मारदे हना एको कोंइतीके नेल्ल क्येङा नोले ङा नाक्त कली बाक्ब।
20 इ तशो ग्रोव़ निक्शी पाइश्शो सांड मादी नु पारसी रागी ङा पिप बाक्नीस।
21 मिनु मेको बोका चहिं ग्रीस रागी ङा पिप बाक्ब। मेको आ मिक्च आन दाते ङा ठेयब ग्रोव़, मेकेर ङा नेल्ल क्येङा ङोंइती ङा पिप बाक्ब। दानीएल ११:३
22 मिनु गे मेको ग्रोव़ जिक्शा मेको आ पा ङा ४ ओटा ग्रोव़ ग्रूशो ताप्तीवी। मेको आ रागी ४ ओटा राज्य दुम्नीम। तन्न मेकोपुकी ङोंइती ङा राज्य खोदेंशो सक्ति पाइश्शो मदुम्नीम।
23 मिनु मेको आन सासन पतीक अधिकार नुप्ची ना मेको आन मरिम्शो पतीकेम ब्रीतीके खकटा थुं पाइश्शो, शुश मरिम्शो पाइब पिप का जाक्ब। दानीएल ११:२१
24 मेको शुश बोल्यो दुम्ब। मिनु मेकोमी मारेइ मारेइ खतम पोक्ब। आ पतीक मारेइ मारेइमी ग्राब। मिनु मेकोमी सक्ति पाइश्शो मुर नु थमा सुइक्ब आन कली खतम पोक्ब।
25 मेको आ निप्समी मुरुम मतुइक्चा ङा पा जोल पतीकेमी ग्राब। मिनु आंम थुंमी ‘गो नेल्ल क्येङा ठेयब नङ’ दे मिम्शा, शुश मुर आन कली साइक्ब। मिनु मेकोमी पिप आन पिप कली यो मरिम्शो पा बोक्ब। मिनु मेको खतम सेल्चा पुंइसीब। तन्न मुर आन गुइ रे ममाइ।
26 मिनु मेको इ कली कोंइशो नाक्दो नाक्त आ पर्बम कोंइतीके कोंइशो थमा बाक्ब। तन्न गे एको कोंइतीके कली इ थुंमी ख्रुइश्शा वोइक्चा माल्नेवे। मारदे हना एको शुश नोले दुम्ब लोव़ बाक्ब” दे माइक्ती। दानीएल ८:१४; दानीएल १२:४
27 मिनु नोले गो, दानीएल, काइ सोक्त मपाइश्शो खोदेंशो दुम्ती। मिनु का निक्शी नाक्त रोइ पा बाक्ती। मिनु नोले बोक्शा, पिप आ गेय पथ लती। मिनु मेको आं तशो कोंइतीके आ पर्बम हिंती। मारदे हना मेको कोंइतीके रुप्ब सुइ मबाक्ब।