Daniel 5 in Sunwar

1 मिनु पिप बेल-शजरमी आ राज्‍य ङा ठेयब अधिकार ताइब हजार का मुर आन कली भोज का सेल्‍तु। मिनु मेकोमी मेको आन ङोंइती अङगुर शांबु तूतु।

2 मिनु मेको पिप शांबुमी दुक्‍शा “आं आफ नेबुकदनेसरमी यरू‍सलेम सहर ङा परमप्रभु आ खिं रे चाक्‍शो सुन नु चांदी के बोसपुकी एक चाक्‍कीन। गो, आं राज्‍य ङा ठेयब अधिकार ताइबपुकी, आं ग्‍युंबे पशो मीशपुकी नु आं अरु चाक्‍शो मीशपुकी गारशा, मेको बोसम तूनीकी” देंत। दानीएल १:२; २इतिहास ३६:१०; एज्रा १:७-११

3 मिनु परमप्रभु आ खिं यरूसलेम रे चाक्‍शो सुन नु चांदी के बोसपुकी मेकेर चाक्‍तेक्‍म। मिनु पिप, आ राज्‍य ङा ठेयब अधिकार ताइबपुकी, आ ग्‍युंबे पशो मीशपुकी नु आं अरु चाक्‍शो मीशपुकी गारशा, मेको बोसम तूतेक्‍म।

4 मिनु मेकोपुकीमी अङगुर शांबु तूशा, सुन, चांदी, कांसा, फलाम, शी नु फुल्‍लु के सेल्‍शो देवी देवता आन कली सेउ पाम्‍‍तेक्‍म।

5 मिनु मेना मुर आ गुइ का फो ग्रूशा, बत्ती आ नेक्‍था दरवार ङा सिल्‍‍शो गारोमी ब्रेक्‍ताक्‍व। मिनु पिपमी मेको गुइमी ब्रेक्‍ना ब्रेक्‍न पशो ताप्‍तु।

6 मिनु मेको तशा, पिप आ कुल लल गिग दुम्‍शा, शुश हिंत। आ खोइल ख्रिंख्रि पा आ पोक्‍च थोक्‍सीशा, खोइल ललाक लुलुक दुम्‍त।

7 मिनु पिपमी “बेबीलोन रागी ङा मन्‍तर तन्‍तर पाइब, सोरुल कोव़ब कल्‍दी नु चिन्‍ड आ अर्थ जोक्‍ब चाक्‍कीन” दे हुकुम पाप्‍तु। मिनु पिपम मेको बेबीलोन रागी ङा जोक्‍ब तुइक्‍ब आन कली “सुमी एको ब्रेक्‍शो पढेशा, आं अर्थ आं कली शेंने चाप्‍बा, मेको प्‍याजी रङ ङा वा फेक्‍पाइ‍श्‍शा, सुन के माला रेल्‍चा पुंइसीब। मिनु गो नु आं राज्‍य ङा ठेयब गेय पाइब आ नोले ङा हुकुम पाइब सेल्‍नुङ” देंत।

8 मिनु पिप आ जोक्‍ब तुइक्‍ब मुर नेल्‍ल दरवारम जाक्‍तेक्‍म। तन्‍न मेकोपुकीमी मेको ब्रेक्‍स पढेने मचबेम। मिनु मार रुम्‍सीबा, मेको यो देंने मचबेम।

9 मिनु पिप बेल-शजर शुश हिंशा, आ कुल लल गिगी जीत। मिनु आ राज्‍य ङा ठेयब अधिकार ताइबपुकी मार पचा ना, मार पचा दुम्‍तेक्‍म।

10 मिनु पिपीममी पिप नु आ राज्‍य ङा ठेयब अधिकार ताइबपुकी लोव़ पशो नेंशा, भोज जतीक कोठामी ओव़त। मिनु मेकोमी “पिप, गे गेना हना यो ब्रोंइशा बाक्‍कीन। गे हिंशा इन थुं ग्‍येत्‍थ लुक्‍च मपने। इन कुल लल गिगी मदुम्‍पतीन।

11 इन राज्‍यमी ठेयब देवता आन सोक्‍त पाइश्‍शो मुर का बाक्‍ब। इन आफ आ पालामी मेको नु देवी देवता के खोदेंशो पा सोक्‍त आ मिम्‍शो रुप्‍तीके तुइक्‍तीके नु जोक्‍ब तुइक्‍ब थुं बाक्‍त। मोपतीके इन आफ पिप नेबुकदनेसर मी मेको कली जादू, मन्‍तर तन्‍तर पाइब, सोरुल कोव़ब कल्‍दी नु चिन्‍ड आ अर्थ जोक्‍ब आन ठेयब मुर सेल्‍शो बाक्‍त। दानीएल ४:५; दानीएल २:४८

12 मिनु पिपमी मेको कली बेल्‍त-शजर, दे नें वोइश्‍शो बाक्‍त। मारदे हना मेको बेल्‍त-शजर माइश्‍शो दानीएल तुइक्‍तीक नु ङोमु आ अर्थ शेंतीक, ख्रुइश्‍शो लोव़ तुइक्‍ब नु मारेइ मारेइ ठेयब श्‍येत रे ग्रुंइने चाप्‍ब बाक्‍ब। मिनु मुल मेको दानीएल कली ब्रथ सोइक्‍तीन। मिनु मेकोमी मेको ब्रेक्‍स पढेशा, रुप्‍पाइक्‍ने चाप्‍ब” देंत। दानीएल १:१७

13 मिनु नोले दानीएल कली पिप आ ङोंइती चाक्‍तेक्‍म। मिनु पिपमी दानीएल कली “गे दानीएल नवे? आं आफोमी इ कली चाक्‍ङे? गे यहूदा रागी रे ग्‍याइश्‍शा चाक्‍चा पुंइसीशो नवे?

14 गो इ आगाम ठेयब देवता आन मिम्‍शो तुइक्‍तीक, रुप्‍तीक नु शुश जोक्‍ब तुइक्‍ब थुं बाक्‍ब, देंशो लोव़ नेंता।

15 गो एको ब्रेक्‍स पढेशा मार रुम्‍सीबा, आं कली देंमल, दे शुश जोक्‍ब तुइक्‍ब नु मन्‍तर तन्‍तर पाइब आन कली एक चाक्‍पाइक्‍ता, तन्‍न मेकोपुकीमी एको ब्रेक्‍स आ अर्थ शेंने मचबेम।

16 मिनु गे एको चिन्‍ड आ अर्थ मार रुम्‍सीबा, दे शेंने चाप्‍ब नु मारेइ मारेइ श्‍येत रे ग्रुंइने चाप्‍ब बाक्‍नेवे, देंशो लोव़ नेंता। मिनु मुल एको ब्रेक्‍स पढेशा, मार रुम्‍सीबा मेको आं कली शेंने चाप्‍तीवी हना, गे प्‍याजी रङ ङा वा फेक्‍पाइ‍श्‍शा, सुन के माला रेल्‍चा पुंइसीनेवे। मिनु गे आं राज्‍य ङा आं क्‍येङा नु आं ठेयब गेय पाइब आ नोले ङा ठेयब हुकुम पाइब दुम्‍नेवे” देंत।

17 मिनु दानीएलमी पिप कली “इन कोसेली आंमान वोंइसीन। मिनु अरु सुइ आन कली गेने। तन्‍न गो एको ब्रेक्‍स पढेशा, मार रुम्‍सीबा इन कली शेंनन्‍नी।

18 हजुर, नेल्‍ल क्‍येङा ठेयब परमप्रभुमी इन आफ पिप नेबुकदनेसर कली राज्‍य, ठेयब दुम्‍तीके, मान ततीके नु शुश शोंप गेशो बाक्‍त। दानीएल २:३७

19 मोपा परमप्रभुमी मेको कली ठेयब दुम्‍तीके गेतीके जात जात नु रागी रागी ङा आंम आंम लोव़ पाइब मुर नेल्‍ल मेको क्‍येङा हिंशा, ख्रिंख्रि पाम्‍तेक्‍म। मिनु मेकोमी सु कली साइक्‍चा दाक्‍ता, मेको कली साइक्‍तु। सु कली ब्रोंइचा गेचा दाक्‍ता, मेको कली ब्रोंइचा गेप्‍तु। मिनु मान बारपाइक्‍चा दाक्‍शो कली मान बारपाइक्‍तु। सु कली दिप्‍चा दाक्‍ता, मेको कली दिप्‍तु।

20 तन्‍न मेको ठेयब लेत्‍तीके नु आ थुं खकटा दुम्‍पाइक्‍तीके पिप आ नित्‍तीक रे खेरचा नु आ छेङछेङ रोइक्‍चा पुंइसाक्‍व।

21 मिनु मुर आन बाक्‍तीके रे खेरचा पुंइसीशा, आ थुं जन्‍तु आन थुं खोदेंशो दुम्‍त। मेको ब्‍वाकी ङा गधा नु बाक्‍शा, ब्‍यफोम खोदेंशो पा घांस ब्‍वशो बाक्‍त। मिनु मेको नाक्‍दो ङा सीतमी जित्‍त। नेल्‍ल क्‍येङा ठेयब परमप्रभु मुर आन राज्‍य कली सासन पाइब बाक्‍ब नु मेको राज्‍य आ दाक्‍शो मुर आन गुइमी गेब, दे तुइक्‍पाइक्‍चा कली मोदेंशो दुम्‍शो बाक्‍त। दानीएल ४:२९

22 मिनु गे, मेको आ तौ, बेल-शजरमी, मेको लोव़ नेल्‍ल तुइश्‍शा यो, इन थुं मब्रेम्‍पाइक्‍नी।

23 ‘गो स्‍वर्ग ङा परमप्रभु क्‍येङा ठेयब नङ’ दे आंम कली ठेयब सेल्‍तीनी। मिनु गे परमप्रभु आ खिं ङा बोसपुकी चाक्‍पाइश्‍शा, गे नु इन राज्‍यम अधिकार ताइब, इन ग्‍युंबे पशो मीशपुकी नु इन अरु चाक्‍शो मीशपुकीमी मेको बोसम अङगुर शांबु तूतीनी। मिनु सुन, चांदी, कांसा, फलाम, शी नु फुल्‍लु के सेल्‍शो मिक्‍च मताइब, मनेंब, मरुप्‍ब देवी देवता आन कली सेउ पाइतीनी। तन्‍न इन कली ब्रोंइतीक सोक्‍त गेब नु इन लां कोंइब परमप्रभु कली मान मपनी।

24 मोपतीके मेकोमी मेको गुइ सोइश्‍शा, मेको ब्रेक्‍स ब्रेक्‍पाइक्‍तु।

25 मिनु मेको ब्रेक्‍शो मार बाक्‍ब देंशा हना ‘मेने मेने टेकेल पेरेस’ दे ब्रेक्‍शो बाक्‍ब। यसैया ४७:११

26 मेको आ अर्थ मार बाक्‍ब देंशा हना, मेने आ अर्थ ‘परमप्रभुमी इन सासन पतीक नाक्‍त हिक्‍शा, थुम्‍तु’ देंशो बाक्‍ब।

27 टेकेल आ अर्थ ‘गे नाक्‍तीकेम नाक्‍चा पुंइसीशा, सोपी दुम्‍तीनी’ देंशो बाक्‍ब।

28 पेरेस आ अर्थ, इन राज्‍य निक्‍शी दुम्‍शा, मादी नु पारसी आन कली गेशो बाक्‍ब, देंशो रुम्‍सीब। मेको आ अर्थ एको बाक्‍ब” दे दानीएलमी देंत।

29 मिनु पिप बेल-शजरमी “दानीएल कली प्‍याजी वा फेक्‍तीन। सुन के माला रेल्‍दीन। मिनु मुर नेल्‍ल आन कली ‘मेको राज्‍य ङा पिप, आं क्‍येङा नु आं ठेयब गेय पाइब क्‍येङा नोले ङा हुकुम पाइब बाक्‍ब’ दे मुर नेल्‍ल आन कली शेंदीन” देंत। दानीएल २:२८; उत्‍पत्ती ४१:४२-४३

30 मिनु मेको नाक्‍दोन कल्‍दी आन पिप बेल-शजर साइक्‍चा पुंइसाक्‍व।

31 मिनु मादी रागी ङा पिप दारामी राज्‍य ताप्‍तु। मेना पिप दारा ६२ बर्स दुम्‍शो बाक्‍माक्‍त। दानीएल ९:१; यसैया १३:१७