Daniel 3 in Sunwar
1 मिनु पिप नेबुकदनेसरमी सुन के मूर्ति का सेल्तु। मेको मूर्ति ६० कुबीत ग्येत्थ लाइश्शो नु ६ कुबीत पित्थ ब्रेम्शो बाक्त। मिनु मेको कली बेबीलोन ङा दुरा माइश्शो दिंममी राप्पाइश्शा वोइक्तु। कुबीत का आधा मिटर खोदेंशो बाक्ब।
2 मिनु पिप नेबुकदनेसरमी मेको मूर्ति सेल्ने थुम्शा, पूजा गोतीके नाक्त मानेचा कली पारसी रागी ङा हुकुम पाइब नेल्ल, अर्ती गेब, क्येट कोव़शा हिक्ब, निसाफ पाइब, लल पिया आन ठेयब मुर नु सरकार ङा अधिकार ताइब नेल्ल आन कली ब्रेत्ताक्व।
3 मिनु मेको पारसी रागी ङा हुकुम पाइब नेल्ल, अर्ती गेब, क्येट कोव़शा हिक्ब, निसाफ पाइब, लल पिया आन ठेयब मुर नु सरकार ङा अधिकार ताइब नेल्ल पिप नेबुकदनेसर आ राप्पाइश्शो मूर्ति कली पूजा गोतीक नाक्ती बुक्तेक्म। मिनु मेकोपुकी मेको मूर्ति आ ङोंइती राप्शा बाक्मानु,
4 लोव़ पाइब मुर कामी ठेयब सेंदा पा “नेनीन, जात जात ङा, रागी रागी ङा नु आंम आंम लोव़ पाइब मुर नेल्ल, इन कली अरेतीके लोव़ का बाक्ब।
5 गे ग्रोव़, मुराली, ठेयब नु आइक्च तार पाइश्शो नु मार मार ताप्तीक ताप्शो नेंनीनु, पिप नेबुकदनेसरमी राप्पाइश्शो सुन के मूर्ति आ ङोंइती खुम्की पा बाप्शा, सेउ पचा माल्नीनी।
6 मिनु सु सुमी मोदेंशो मपाइनीमी, मेको ठेयब मी ब्रतीकेमी हुम्चा पुंइसीनीम” दे ठेयब सेंदामी तुइक्पाइश्शा देंत।
7 मोपतीके मुर नेल्लेमी ग्रोव़, मुराली, तार पाइश्शो ठेयब, आइक्च नु मार मार ताप्तीके ताप्शो नेन्मे चोटीन नेबुकदनेसर आ राप्पाइश्शो सुन के मूर्ति आ ङोंइती जात जात ङा, रागी रागी ङा नु आंम आंम लोव़ पाइब मुर नेल्लेमी खुम्की पा बाप्शा सेउ पाम्तेक्म।
8 मिनु मेना कल्दी का निक्शी पिप आ बाक्तीकेमी जाक्शा, यहूदी आन पर्बम लोव़ पा मेको आन कली दोस गेम्तेक्म।
9 मिनु मेकोपुकीमी पिप नेबुकदनेसर कली “पिप, गे गेना हना यो ब्रोंइशा बाक्कीन।
10 हजुर, गे ङोंइती ‘सुइ सुइमी ग्रोव़, मुराली, ठेयब नु आइक्च तार पाइश्शो नु मार मार ताप्तीक ताप्शो नेंनीनु, सुन के मूर्ति आ ङोंइती खुम्की पा बाप्शा, सेउ पचा माल्नीम। दानीएल ६:१३
11 मिनु सु सुमी खुम्की पा सेउ मपाइनीमी, मेको ठेयब मी ब्रतीकेमी हुम्चा पुंइसीनीम’ दे हुकुम पाइतीनी।
12 मिनु इन वोइश्शो बेबीलोन रागी कली सासन पाइब का निक्शी यहूदी बाक्नीमी। मेको आन नें शद्रक, मेशक नु अबेद-नेगो बाक्ब। मेकोपुकी इन कली काइ मटीब बाक्नीम। मिनु इन देवी देवता आन कली पूजा मपाइनीम। मिनु इन राप्पाइश्शो सुन के मूर्ति आ ङोंइती यो खुम्की पा बाप्शा सेउ मपामे” देंतेक्म।
13 मिनु मेको नेंशा, पिप नेबुकदनेसर शुश गाइश्शा, चुरशा “शद्रक, मेशक नु अबेद-नेगो आन कली आं ङोंइती चाक्कीन” दे हुकुम पाप्तु। मिनु मेको आन कली चाक्शा, पिप आ ङोंइती राप्पाइक्तेक्म।
14 मिनु नेबुकदनेसरमी मेको आन कली “शद्रक, मेशक, नु अबेद-नेगो, गेपुकीमी आं देवी देवता आन कली सेउ मपाइनीनी? मिनु आं सेल्शो सुन के मूर्ति कली यो सेउ मपनी देंशो लोव़ थमा बाक्बा?
15 गेपुकीमी मुल ग्रोव़, मुराली, ठेयब नु आइक्च तार पाइश्शो नु मार मार ताप्तीक ताप्शो नेंनीनु, आं सेल्शो मूर्ति आ ङोंइती खुम्की पा बाप्शा, सेउ पाइतीनी हना, मेको इन कली रिम्शो दुम्ब। तन्न खुम्की पा बाप्शा, सेउ मपाइतीनी हना, इन कली ठेयब मी ब्रतीकेमी बो हुम्चा पुंइसीनीनी। मिनु इन कली आं गुइ रे तेको परमप्रभुम प्रोंइबाक्म?” दे माइक्तीमी। प्रस्थान ५:२; २राजा १८:३५
16 मिनु शद्रक, मेशक नु अबेद-नेगोमी पिप कली “हजुर, पिप नेबुकदनेसर, गो मेको आ पर्बम इन कली मारेइ लोव़ पचा ममाल्नीकी।
17 गो आंइ परमप्रभु कली ठेयब सेल्नीकी। मेकोमी आंइ कली मेको ठेयब मी ब्रतीके रे प्रोंइने चाप्बा कों, मचाप्बा। तन्न इन गुइ रे प्रोनल। ब्यवस्था ४:२०; भजन संग्रह ६६:१२
18 तन्न आंइ कली मप्रोंइतु हना यो, हजुर, इन कली एको लोव़ तुइक्पाइक्चा दाक्नीकी ‘गोपुकी इन देवी देवता आन कली सेउ मपाइनीकी। मिनु इन राप्पाइश्शो सुन के मूर्ति आ ङोंइती खुम्की पा मबाप्नीकी’ देंतेक्म” दे पिप कली माइक्तेक्म। प्रस्थान २०:३-५
19 मिनु मेको नेंशा नेबुकदनेसर शद्रक, मेशक नु अबेद-नेगो आन कली तशा, थाम्पान गाइश्शा, आ कुल राव किक्पाइक्तु। मिनु मेकोमी “ब्रशो मी कली ङोंइती क्येङा ७ खेयप नाप्शो सेल्चा माल्ब” दे हुकुम पाप्तु।
20 मिनु मेकोमी आ लडाइ पाइब आन नेल्ल क्येङा बोल्यो मुर आन कली “शद्रक, मेशक नु अबेद-नेगो आन कली फ्रेंशा, मेको ठेयब मी ब्रतीकेमी हुम्चा” दे हुकुम पाप्तु।
21 मिनु मेकोपुकीमी मेको आन कली आन फेक्शो वा नु ताकी सुन्दा फ्रेंशा, ठेयब मी ब्रतीकेमी हुम्ताक्म।
22 मारदे हना पिपमी “रीब पा पने” दे हुकुम पाप्तु। मिनु मेको मीम शद्रक, मेशक नु अबेद-नेगो आन कली हुम्थ लाइक्ब आन कली ग्रु दाक्तु।
23 मिनु मेको शद्रक, मेशक नु अबेद-नेगो सांफा फ्रेंसीशा, ठेयब मी ब्रतीकेमी दोक्तेक्म।
24 मिनु पिप नेबुकदनेसर थाम्पान छक लाक्शा, छुल बोक्शा, आ अर्ती गेब आन कली “गोपुकीमी मुर सां आन कली फ्रेंशा, मीम हुम्शो मनकी ङा?” दे हिल्लो पाप्तु। मिनु मेकोपुकीमी “हुम्ताक्क, हजुर” देंशा, लोव़ लेत्ताक्म।
25 मिनु पिपमी मेको आन कली “तन्न कोव़ङीन, मफ्रेंसीशो ४ जना मुर मी ब्रतीकेमी एर ओंथ हिरना हिरन बाक्नीम। मीम मेको आन कली मदुप्शो तांइसीनीम। मिनु का आ कुल देवी देवता आस तौ आ कुल खोदेंशो तांइसाक्व” देंत। यसैया ४३:२
26 मिनु पिप नेबुकदनेसर मेको ठेयब मी ब्रतीके आ लाप्चो आ नेक्था लशा, मेकोमी “शद्रक, मेशक नु अबेद-नेगो नेल्ल क्येङा ठेयब परमप्रभु आ मुर ग्रूशा, एक पिन” दे ब्रेत्ताक्मी। मिनु शद्रक, मेशक नु अबेद-नेगो मेको मी रे ग्रूतेक्म।
27 मिनु मेको पारसी रागी ङा हुकुम पाइब नेल्ल नु पिप कली अर्ती गेब नेल्ल बुक्शा “मीम एको सां आन कली मारेइ मपव। आन चां यो मग्रोंइश्शो बाक्त। मिनु आन वा यो मग्रोइक्थु, मी आ रिना यो मबाक्शो बाक्त” देंतेक्म। हिब्रू ११:३३-३४
28 मिनु नेबुकदनेसरमी “शद्रक, मेशक नु अबेद-नेगो आन परमप्रभु नेल्ल क्येङा ठेयब बाक्ब। मेकोमी आ स्वर्ग ङा गेय पाइब सोइश्शा, आ कली थमा सुइक्ब आन कली प्रोंइतु। मारदे हना मेकोपुकीमी पिप, आं देंशो मबित्थु, साइक्चा पुंइसीब दुम्शा यो, आंम परमप्रभु कली ङा लाक्शा, अर्को तेकोइ देवी देवता आन ङोंइती बाप्शा सेउ मपामे। दानीएल ६:२३
29 मोपतीके गो ‘जात जात ङा, रागी रागी ङा नु आंम आंम लोव़ पाइब मुर नेल्ल, सु सुमी शद्रक, मेशक नु अबेद-नेगो आन परमप्रभु आ पर्बम मरिम्शो लोव़ पा शुक्शी पाइनीमी, मेको आन गुइ खोइल ख्रोइश्शा साइक्चा पुंइसीनीम। मिनु मेको आन खिं यो प्रेश्शा गेचा पुंइसीनीम’ दे हुकुम पाइनुङ। मारदे हना मेको आन परमप्रभु का ला बाक्ब। देवी देवताम मोदेंशो पा प्रोंइने मचाप्नीम” देंत। दानीएल २:४७
30 मिनु पिपमी शद्रक, मेशक नु अबेद-नेगो आन कली बेबीलोन रागी ङा ङोंइती क्येङा ठेयब मुर सेल्तु।