Daniel 10 in Sunwar

1 मिनु पारसी रागी ङा कोरेस पिप दुम्‍शो बर्स सां दुम्‍‍मेनु, परमप्रभुमी बेल्‍त-शजर माइश्‍शो दानीएल कली लोव़ का तुइक्‍पाइक्‍तु। मेको लोव़ थमा बाक्‍त। ठेयब श्‍येत आ पर्बम बाक्‍त। मेको दानीएलमी मेको कोंइतीक तशा, रुप्‍तीक थुं यो ताप्‍तु। दानीएल १:२१; दानीएल १:७

2 मेना गो, दानीएल, हप्‍ता सां सम्‍म रोंका पाता।

3 मेको हप्‍ता सां सम्‍म गो ब्रोव़शो मारेइ जचा थोव़क मजङ। श्‍ये मब्‍वङ। अङगुर शांबु यो मतूङु। मिनु तेल यो मख्रेक्‍सीङ।

4 मिनु ङोंइती ङा महिना ङा २४ नाक्‍त टाइग्रीस माइश्‍शो ठेयब खोला आ नेक्‍था राप्‍शो बाक्‍ती।

5 मिनु गो इर गे कोव़ङुनु, सुती वा फेक्‍शो मुर का ताता। मेकोमी थम रिम्‍शो ओफीर ङा सुन के किप्‍शुर किप्‍शो बाक्‍त। दानीएल ८:१५; दानीएल १२:६; इजीकीएल ९:२; प्रकाश १:१३-१५

6 मिनु मेको आ रां बेरील माइश्‍शो हीरा खोदेंशो बाक्‍त। आ कुल चिला खोदेंशो बाक्‍त। आ मिक्‍च ब्रशो तोव़शी खोदेंशो बाक्‍त। मेको आ गुइ खोइली थाम्‍पा खुइश्‍शो कांसा खोदेंशो पा टल्‍केशो बाक्‍तेक्‍म। मेको आ सेंदा शुश मुर आन लोव़ पशो खोदेंशो नेंसाक्‍ब। इजीकीएल १:२७-२८

7 गो, दानीएलमी मेको कोंइतीक ताता। गो नु बाक्‍ब मुर सुइमी मतामे। तन्‍न मेकोपुकी हिंशा ख्रिंख्रि पा प्रोक्‍शा ख्रुंइसाक्‍म।

8 मिनु मेको ठेयब कोंइतीक तचा कली गो का ला बाक्‍ती। मिनु मारेइ पने मचाप्‍ब दुम्‍ती। मिनु आं कुल बेक्‍चा चिक्‍शो मुर के खोदेंशो दुम्‍शा, मारेइ बोल मपाइश्‍शो दुम्‍ती।

9 मिनु नोले मेकोमी लोव़ पशो नेंता। मिनु मेको लोव़ नेंनु चोटीन, गो खपीमी दिङ गोल्‍शा, थती।

10 मिनु गुइ काम आं कली थिती। मिनु गो गुइ नु पोक्‍च थेक्‍शा, बोक्‍ती।

11 मिनु मेकोमी आं कली “दानीएल, गे शुश दाक्‍चा पुंइसीशो मुर बाक्‍नेवे। आं देंशो लोव़ नोफा दाइश्‍शा नेनो। बोक्‍शा बाक्‍को। मारदे हना गो इ बाक्‍तीकेमी सोइक्‍चा पुंइसीशो बाक्‍नुङ” दे माइक्‍ती। मिनु मेकोमी लोव़ पवानु, गो आ ङोंइती ख्रिंख्रि पा राप्‍ती।

12 मिनु मेकोमी आं कली “दानीएल, महिंनो, गे रुप्‍चा माल्‍शा ङोंइती ङा नाक्‍ती रे इ परमप्रभु आ ङोंइती आंम कली ब्रेम्‍शो सेल्‍साक्‍वे, इ पुंइशो नेंतीके गो एक जाक्‍ती।

13 तन्‍न पारसी राज्‍य कली कोव़ब सैतान आ गेय पाइबमी गो नु २१ नाक्‍त सम्‍म लडाइ पा तेक्‍ती। मिनु परमप्रभु यावे आ स्‍वर्ग ङा ठेयब गेय पाइब मिकाएल जाक्‍शा, आं कली वारच पाइक्‍ती। मिनु गो जाक्‍चा ताता। यसैया २४:२१

14 नोले ङा नाक्‍त इ मुर आन कली मार दुम्‍बा, दे गो इ कली रुप्‍पाइक्‍थ जाक्‍ती। मारदे हना इ तशो कोंइतीक क्‍येङा नोले ङा नाक्‍त कली अर्को कोंइतीक का यो बाक्‍ब” दे माइक्‍ती।

15 मिनु मेकोमी आं कली लोव़ पवानु, गो आं पिया खुक्‍शा मारेइ लोव़ पने मचाप्‍ब दुम्‍शा बाक्‍ती।

16 मो दुम्‍मेनु, मुर खोदेंशो काम आं शोव़ थिप्‍तु। मिनु गो लोव़ पने चाप्‍ता। मिनु गो आं ङोंइती राप्‍शा बाक्‍ब कली “आं प्रभु, एको कोंइतीके आ पर्बम खाइक्‍ती। मिनु आं के मारेइ बोल मली। यसैया ६:७; येरमीया १:९

17 गो, इन वाइलम, गे नु दोपा लोव़ पने चाप्‍नुङा? मारदे हना गो ख्रिंख्रि पा, आं बोल नेल्‍ल लशा, आ सोक्‍त हेररा मली” देंती।

18 मिनु मेको मुर खोदेंशोमी आं कली लेंशा थिशा, बोल्‍यो सेल्‍ती। दानीएल ८:१८

19 मिनु मेकोमी आं कली “नेल्‍ल क्‍येङा दाक्‍चा पुंइसीशो, महिनो। इ कली मारेइ मदुम्‍ब। बोल्‍यो नु महिंब दुमो” दे माइक्‍ती। मेकोमी गो नु लोव़ पवा नोले, गो बोल्‍यो दुम्‍ती। मिनु गो “आं प्रभु, लोव़ पने। मारदे हना गे आं कली बोल्‍यो सेल्‍तीनी” देंती। प्रकाश १:१७

20 मिनु मेकोमी “गो इ बाक्‍तीकेम मारदे जाक्‍ङा, तुइक्‍नेवे? गो पारसी राज्‍य कली कोव़ब सैतान आ गेय पाइब नु लडाइ पचा कली लेत्‍चा माल्‍नुङ। गो ग्राङा नोले ग्रीस रागी ङा सैतान आ गेय पाइब जाक्‍ब।

21 मिनु गो थमा लोव़ ङा किताबमी मार ब्रेक्‍शो बाक्‍मे, मेको इ कली शोव़थ जाक्‍ती। मेकेर मिकाएल क्‍येङा लाक्‍शा, अरु वारच पाइब सैतान आ गेय पाइब नु लडाइ पचा कली सुइ मबाक्‍नीम। परमप्रभु यावे आ स्‍वर्ग ङा गेय पाइब, मिकाएल चहिं इस्राएली इन कली कोव़ब बाक्‍ब।