Amos 9 in Sunwar

1 गो परमप्रभु कली चढ़ेतीक आ नेक्‍था राप्‍शो ताता। मिनु मेकोमी आं कली “लाप्‍चो ङा शी शुश हिम्‍पाइक्‍चा कली थाम आन ङर तुपो। मिनु ब्रेश्‍शा मुर नेल्‍ल आन पिया तार दोक्‍नीम। मिनु ब्रोंइशा लीशो आन कली तरवारमी क्‍योरनुङमी। मेको आन दाते ङा का यो प्रोक्‍चा मताइनीम। का यो ब्रोंइचा मताइनीम।

2 मेकोपुकी बेक्‍शो मुर आन बाक्‍तीक लाम्‍तेक्‍म हना यो, मेकेर रे कीशा ग्रुंइनुङ। मिनु मेकोपुकी इर सरीङ गे ङोइश्‍शा लाम्‍तेक्‍म हना यो, गो मेको आन कली ग्‍याइश्‍शा लुक्‍च फ्रुप्‍नुङमी। अय्‍युब २६:६; भजन संग्रह १३९:८

3 मेकोपुकी कारमेल डांडामी ख्रुंइसाक्‍म हना यो, गो मेको आन कली माल्‍शा, ग्‍याइश्‍शा चाक्‍नुङमी। मेकोपुकी आं क्‍येङा ख्रुइश्‍शा समुन्‍द्र आगाम लाम्‍तेक्‍म हना यो, समुन्‍द्रम बाक्‍ब बुस्‍स कली ‘मेको आन कली कोक्‍मी’ दे अरेनुङ। मिनु मेकोमी मेको आन कली कोक्‍ब।

4 मेको आन जोरी सत्रु आन ङोंइती ग्‍याइश्‍शा लाइक्‍चा पुंइसाक्‍म हना यो, गो मेको आन कली क्‍योरशा साइक्‍चा कली तरवार कली अरेनुङ। मिनु मेकोमी साइक्‍ब। गो मेको आन कली रिम्‍शो पचा कली ममाइ, तन्‍न मरिम्‍शो पचा कली कोव़नुङमी” देंत।

5 मिनु मुर नेल्‍ल आन परमप्रभु यावेमी रागी कली थिप्‍तु हना, रागी याइब। मिनु मेकेर बाक्‍ब नेल्‍ल रोंका पाइनीम। मिनु रागी नेल्‍ल नील खोला खोदेंशो पा बारब। मिनु इजीप्‍त ङा नील खोला खोदेंशो पा सोव़ब। आमोस ८:८

6 मेकोमी स्‍वर्गम आ बाक्‍तीक सेल्‍ब। मिनु रागीमी मेको आ जग वोइक्‍ब। समुन्‍द्र ङा ब्‍वाक्‍कु कली ब्रेश्‍शा, रागीम मोइक्‍ब। मेको आ नें परमप्रभु यावे बाक्‍ब। भजन संग्रह १०४:३; आमोस ५:८

7 मिनु परमप्रभु यावेमी इस्राएल ङा मुर आन कली “गे आं कली एथीयोपीया ङा मुर खोदेंशो बाक्‍नीनी। गो इस्राएली आन कली इजीप्‍त रागी रे, पलिस्‍ती आन कली काफ्‍तोर रागी रे नु अरामी आन कली कीर रागी रे ग्रुंइशा चाक्‍शो मनङमी ङा?” देंशो बाक्‍ब। ब्‍यवस्‍था ७:७; येरमीया ४७:४

8 परमप्रभु यावेमी शुश पाप पाइब राज्‍य कली कोव़ना कोव़न बाक्‍ब। मेकोमी “गो मेको आन कली रागी रे क्‍याम्‍नुङ। मो हना यो गो याकूब आ खिं कली चहिं नेल्‍ल मक्‍याम्‍नुङ” दे परमप्रभु यावेमी देंत।

9 परमप्रभु यावेमी “गो मार हुकुम पाइनुङमी देंशा हना, इस्राएल आ खिं ङा मुर आन कली जात नेल्‍ल ङा मुर आन दातेमी ग्‍योलोमी मार मार क्राप्‍शो खोदेंशो पा, क्राप्‍नुङमी। मिनु इम्‍चीली फुल्‍लु का यो खपीम मदोक्‍ब।

10 मेकोपुकीम ‘हिंचा ङा श्‍येत आंइ तारी मजाक्‍ब। इं कली मेकोम मथिप्‍ब’ दे पाप पाइब, आं मुर नेल्‍ल तरवारमी साइक्‍चा पुंइसीनीम” देंत। आमोस ६:३

11 परमप्रभु यावे, इन परमप्रभुमी “गो मेको नाक्‍त दाऊद आ ब्रेश्‍शो खिं आन कली लेंशा सेल्‍नुङ। मिनु मेको आ ब्रेश्‍शो गारो आ पोव़ला सुइ‍नुङ। मिनु मोपा नेल्‍ल साइ ङोंइती ङा खोदेंशो सेल्‍नुङ। १राजा १२:१९; प्रेरित १५:१६-१७

12 मिनु मेकोपुकीम एदोम ङा लीशो नु आं नें पाइश्‍शो जात जात ङा मुर नेल्‍ल आन के दुम्‍नीम” दे मोदेंशो पाइब परमप्रभु यावेमी देंत।

13 मिनु परमप्रभु यावेमी “मेको नाक्‍त थमा पा जाक्‍ब। बाली नाली खुप्‍बमी ब्‍यफ वाक्‍ब कली ग्रुम्‍ब। मिनु वांचेर ब्‍वारबमी अङगुर ख्रुम्‍ब कली ग्रुम्‍ब। डांडा रे पा नक अङगुर रस याप्‍ब। मिनु डांडा नेल्‍ल अन्‍न बाला सित्‍‍नीम। लेवी २६:५; योएल ४:१८

14 गो आं मुर इस्राएली आन कली आन मार मार लेश्‍शा गे‍नुङमी। मिनु मेको आन ब्रेश्‍शो सहर कली लेंशा सेल्‍शा, मेकेर बाक्‍नीम। मेकोपुकीम अङगुर ख्रुम्‍शा, अङगुर शांबु तूनीम। मेकोपुकीम फल फुल ख्रुम्‍‍शा, मेको आन फल जाइनीम। ब्‍यवस्‍था ३०:३; यसैया ६५:२१

15 गो मेको आन कली गेनायो मखेरपांइसीचा ङा पा आन रागीमी वोइक्‍नुङ। आं गेशो रागी रे मेको आन कली सुइमी ग्रुंइने मचाप्‍नीम, दे इन परमप्रभु यावेमी देंशो बाक्‍ब” देंत।