Amos 8 in Sunwar
1 मिनु परमप्रभु यावेमी आं कली मीशो फोव़शीम ब्रीशो डालो का कोंइताक्यी।
2 मिनु मेकोमी आं कली “आमोस, गे मार तवी?” दे हिल्लो पती। मिनु गो “मीशो फोव़शीम ब्रीशो डालो का ताता” देंती। मिनु परमप्रभु यावेमी आं कली “आं मुर, इस्राएली आन नाक्त गाप्त। मुल गो मेको आन नेक्था बाक्शा, मार मार पाइनीमी, मेको कोव़नुङमी। आमोस ७:८
3 मेको नाक्ती दरवारम कुम्सो पाइब आन कुम्सो रोंका पतीके दुम्नीम” दे परमप्रभु यावेमी देंत। मिनु मेकोमी “बेक्शो मुर शुश बाक्नीम। लाङगाम ग्रुंइशा ताइक्नीम। गे सिक्सी पावो” देंत। आमोस ६:१०
4 मिनु परमप्रभु यावेमी “गे मारेइ मथीब आन कली दिम्बपुकी नु रागी ङा प्रुङग आन कली खतम सेल्बपुकी, नेनीन। आमोस २:७
5 गेपुकीमी ‘औंसी गेना लाक्बा ङा? गो अन्न लेयचा ताइनीकी। नाइक्तीक नाक्त गेना लाक्बा ङा? गो चेरब लेयचा ताइनीकी। गो एफाह आइक्च सेल्शा, शेकेल कली हेल्शो सेल्शा नु दूली पा नाक्शा, शुश क्येट चेम्नीकी’ देंनीनी। एफाह का २२ लिटर लाइब पुक्तीक बाक्ब। शेकेल का ११.५ ग्राम ङा क्येट बाक्ब।नेहेम्याह १३:१५
6 गेपुकीम ‘प्रुङग आन कली चांदीम ग्याप्नीकी। मारेइ मथीब आन कली जोर का चेपलमी ग्याप्नीकी। मिनु मक्राप्शो चेरब लेयनीकी’ देंनीनी” देंत। आमोस २:६
7 परमप्रभु यावेमी याकूब आ सोशो बोशो मिम्शा, कसम जाप्तु। मार कसम जाप्तु देंशा हना “गो मेको आन पशो गेनायो मप्रेंनुङ।
8 मार, मेको आ पतीके रागी ख्रिंख्रि मपाइबा ङा? मेकेर बाक्ब नेल्लेमी रोंका मपाइनीमी ङा? रागी नेल्ल नील खोला खोदेंशो पा बारनीम। इजीप्त रागी ङा नील खोला बारशा ग्युम्शो खोदेंशो पा नुप्शा लाइनीम। आमोस ९:५
9 गो मेको नाक्ती नां कली नाक्ती उइक्थ दुम्मेनु, लाक्पाइक्नुङ। मिनु नाक्त बाक्ना बाक्न नां रिक्पाइक्नुङ। येरमीया १५:९
10 गो इन चाड कली रोंका पतीक सेल्नुङ। इन कुम्सो नेल्ल आन कली ङाक्तीक सेल्नुङ। गो नेल्ल इन कली अरन्डी फेक्पाइश्शा चां प्रेक्पाइक्नुङ। गो आंम का ला बाक्शो तौ आ पर्बम रोंका पशो खोदेंशो दुम्पाइक्नुङ। मेको चाड नुप्पतीक नाक्त कशो नाक्त दुम्ब” देंशो बाक्ब। येरमीया ६:२६
11 मिनु परमप्रभु यावेमी “गोम अन्काल सोइक्ची ना, थमा पा श्येत जतीक नाक्त जाक्ब। मेको अन्काल जचा नु तूचा के अन्काल ममाइ, तन्न परमप्रभु यावे आ लोव़ नेंतीक अन्काल बाक्ब। १सामुएल ३:१
12 मुरपुकी परमप्रभु यावे आ लोव़ माल्शा, समुन्द्र का रे अर्को समुन्द्र सम्म लाइनीम। उत्तर रे पूर्ब सम्म लाइनीम। मेकोपुकी एर ओंथ गाक्शा, परमप्रभु यावे आ लोव़ माल्नीमी। तन्न मथित्नीम।
13 मेको नाक्ती दारशो मीश आल नु बोल्यो वोंइश आल ब्वाक्कु तूचा मतथु, थाइनीम।
14 सु सु सामरीया ङा देवता अशीमाह आ नेंमी कसम जशा ‘ए दान, इ देवता ब्रोंइशा बाक्शो खोदेंशो पा’ नु ‘बेयर-शेबा ङा देवता ब्रोंइशा बाक्शो खोदेंशो पा’ देंशा कसम जाइब नेल्ल गेनायो मबोक्चा ङा पा गोल्नीम” दे परमप्रभु यावेमी देंत। न्यायाधीस १८:३०