Amos 5 in Sunwar
1 मिनु आमोसमी “ए इस्राएल आ खिं ङा मुरपुकी, इन पर्बम आं रोंका पशो नेनीन।
2 आं मीश आल इस्राएल लेंशा गेनायो मबोक्चा ङा पा गोल्त। मेको आ रागीमीन प्रोंइचा पुंइसीशो बाक्ब। मेको कली पोक्ब सुइ मबाक्नीम” देंत।
3 मिनु परमप्रभु यावेमी “तेकोइ सहर रे इस्राएल आ पर्बम हजार का जना मुर ग्रूतेक्म हना, सहे का जना ला लीनीम। सहे का जना ग्रूतेक्म हना, १० जना मुर ला लीनीम” देंत।
4 मिनु परमप्रभु यावेमी इस्राएल आ खिं ङा मुर आन कली “आं कली मालीन। मिनु ब्रोनीन।
5 बेथेल कली ममालीन। मिनु गिल्गाल मलने। बेयर-शेबामी मगाक्कीन। मारदे हना गिल्गाल ङा मुर थमा पा ग्याइश्शा लाइक्चा पुंइसीनीम। मिनु बेथेल खतम दुम्ब। आमोस ४:४; होसे ४:१५
6 परमप्रभु यावे कली मालीने। मिनु ब्रोंइचा ताइनीनी। मो मपाइतीनी हना, मेको मी खोदेंशो पा गाइश्शा योसेफ आ खिंम मी सुइक्ब। बेथेल कली खतम पोक्ब। मेको मी कली काप्ब सुइ मबाक्नीम। आमोस ६:१२; यसैया ५:२०
7 गेपुकी ठीक निसाफ कली दूली सेल्नीनी। ठीक पतीक कली खतम सेल्नीनी।
8 सोरुल आन कली सेल्ब, हिंचा ङा छिङछिङ रे सुनी ङा हाम्सो सेल्ब, नाक्ती कली छिङछिङ सेल्ब नु समुन्द्र ङा ब्वाक्कु कली ब्रेश्शा रागीमी मोइक्ब। आं नें परमप्रभु यावे बाक्ब। अय्युब ३८:३१; आमोस ९:६
9 मेकोमी बोल्यो आन कली रीब पा खतम सेल्ब। मिनु आन बोल्यो दरवार खतम दुम्नीम।
10 मेकोपुकीम निसाफ पतीके लाप्चोम निश्शा अरेब कली काइ मदाक्नीम। मिनु थमा लोव़ पाइब आन कली ग्रांग्रा दित्नीम। यसैया २९:२१
11 मारदे हना गे प्रुङग आन कली दिम्नीनी। मेको आन कली गेन कि गेन, दे शुश अन्न थाप्पाइक्नीनी। गे ख्रोइश्शो फुल्लु के खिं सेल्तीनी। तन्न मेकेर बाक्चा मताइनीनी। रिम्शो अङगुर रू सेल्तीनी। तन्न अङगुर शांबु तूचा मताइनीनी। सेफन्याह १:१३
12 मारदे हना गो इन शुश मरिम्शो पशो तुइक्नुङ। गो इन पाप गिश ठेयब बाक्बा, मेको तुइक्नुङ। गे ठीक पाइब आन कली श्येत गेनीनी। घूस ताक्नीनी। निसाफ पतीकेमी मारेइ मथीब आन कली नेप्शा ग्रुंइनीनी।
13 मोपतीके निप्स पाइश्शो मुर सिक्सी पा बाक्नीम। मारदे हना इस्राएलम काइ मरिम्शो दुम्शो बाक्ब।
14 गे ब्रोंइशा बाक्चा कली रिम्शो पचा मालीन। मरिम्शो पचा ममालीन। मिनु मुर नेल्ल आन परमप्रभु यावे गे नु बाक्ब।
15 मरिम्शो पतीक कली काइ मदाक्तीन। रिम्शो पतीक कली दाक्तीन। ठेयब लाप्चोमी ठीक निसाफ पने। मिनु मुर नेल्ल आन परमप्रभु यावेमी योसेफ आ लीशो मुर आन कली शिशी पाइबा कों?” दे परमप्रभु यावेमी देंत। भजन संग्रह ३४:१५; रोमी १२:९
16 मोपतीके मुर नेल्ल आन परमप्रभु यावेमी “लां ङा मुर नेल्ल ङाक्शा, रोंका पचा माल्नीम। आबी आबी, देंचा माल्नीम। रूम गेय पाइब आन कली रोंका पचा कली ब्रेत्तीन। रोंका पस जोक्ब आन कली यो ब्रेत्तीन।
17 अङगुर रू नेल्लेमी रोंका पचा माल्नीम। मारदे हना गो इन दाते रे पा गाक्शा लाइनुङ” दे परमप्रभु यावेमी देंत।
18 मिनु परमप्रभु यावेमी “मारदे गे परमप्रभु यावे आ नाक्त जाक्शो दाक्नीनी? मारदे परमप्रभु यावे आ निसाफ पतीक नाक्त माल्नीनी? मेको नाक्त छिङछिङ दुम्ब, छेङछेङ मदुम्ब। योएल २:११
19 मेको नाक्ती मुर का गुप्स रे प्रोक्शा, वां कली ग्रुम्शो खोदेंशो बाक्ब। खिं लशा बाक्चा कली आ गुइ गारोम वोदानु, बुस्सुम कोक्शो खोदेंशो दुम्ब।
20 परमप्रभु यावे आ नाक्त छिङछिङ दुम्ब। छेङछेङ मदुम्ब। मेको छिङछिङमी छेङछेङ काइ मबाक्ब।
21 गो इन चाड नु इन ग्रुम्तीक आन कली काइ मदाक्नुङ। यसैया १:११-१५
22 गे आं कली चोशा चढ़ेतीक नु अन्न चढ़ेतीक चढ़ेतीनी हना यो, गो मेको मब्राइनुङ। मिनु इन नेल्ल क्येङा दोम्शो बस्तु दुशा बाक्चा आ पर्बम चढ़ेशो यो मकोव़नुङ। मीका ६:६-७
23 इन कुम्सो आन रेयके आं क्येङा ङोन वोतीन। इन तार पाइश्शो ठेयब ताप्तीके ताप्शो नेंचा मदाक्नुङ।
24 तन्न ठीक निसाफ पतीक ब्वाक्क खोदेंशो पा शाइक्पतीन। ठीक पतीक गेनायो मसोव़ब खोला खोदेंशो पा शाइक्पतीन।
25 गे इस्राएल आ खिं ङा मुरपुकी गोरशो रागीम ४० बर्स गाक्नीनु, आं कली चढ़ेनी ङा? येरमीया ७:२२-२४; प्रेरित ७:४२-४३
26 गेपुकीमी इन पिप देवता साकुथ नु इन सोरुल देवता काइवान आस कली कुरशा लतीन। मेको आंमा इन कली सेल्शो मूर्ति बाक्नीसी।
27 मोपतीके गो इन कली ग्याइश्शा, दमस्कस क्येङा ङोन लाइक्पाइक्नन्नी” दे परमप्रभु यावेम देंत। मेको आ नें मुर नेल्ल आन परमप्रभु यावे बाक्ब।