Amos 4 in Sunwar

1 सामरीया ङा डांडाम बाक्‍ब, बाशान ङा बी खोदेंशो दोम्‍शो मीश मुर, गे प्रुङग आन कली दिप्‍नीनी। मारेइ मथीब आन कली फस पोक्‍नीनी। मिनु इन वोंइश आन कली “आंइ कली तूचा कली मार मार चाक्‍कीन” देंनीनी।

2 परमप्रभु यावेमी आ नेंम कसम जशो बाक्‍ब। मेकोमी “नेनीन, इन कली कोंङगुम कीशा लाइक्‍नीम। इन लीशो आन कली बोल्‍सीमी ब्‍वेक्‍शा लाइक्‍तीक नाक्‍त जाक्‍ब।

3 गे नेल्‍ल का का पा एर ओंथ मकोव़थु, गारो आ पोव़ला रे पा लाइनीनी। मिनु गे हारमोन मेर ताइक्‍चा पुंइसीनीनी” दे परमप्रभु यावेमी देंत। हारमोन हिब्रू लोव़ मार बाक्‍ब, दे मतुइक्‍नीम।

4 मिनु परमप्रभु यावेमी “बेथेल सहरम ल‍शा, मरिम्‍शो पने। गिल्‍गालमी लशा, मेको क्‍येङा यो शुश मरिम्‍शो पने। सुनी कुस कुस इन चढ़ेतीक चाक्‍कीन। नाक्‍त सां सांमी इन १० भाग ङा भाग का चाक्‍कीन। होसे १२:१२; ब्‍यवस्‍था १४:२८

5 आं कली ‘गे इस्राएल ङा मुर, रिम्‍शो पाइब बाक्‍नीनी’ दे बोरब ओख्‍ती सुप्‍शो शोब्‍ले चढ़ेपने। मिनु थुंम ग्‍येरशा चढ़ेतीक आ पर्बम ठेयब लोव़ पना पन गाक्‍कीन। मारदे हना गे मोदेंशो पचा दाक्‍नीनी” दे परमप्रभु यावेमी देंत। लेवी २:११

6 मिनु परमप्रभु यावेमी “इन कली, सहर नेल्‍लेमी श्‍येत्‍थ कोव़ज नु शोब्‍ले जचा मतशो सेल्‍तन्‍नी। मो हना यो गेपुकी आं गे मलेन्‍नी” दे परमप्रभु यावेमी देंत।

7 मिनु “गो इन अन्‍न खुप्‍चा क्‍येङा महिना सां ङोंइती रेउ मयिपदु। गो सहर का कली रेउ यिपाइक्‍ता, अर्को सहर कली मयिपदु। मिनु रू कामी रेउ यिपाइक्‍ता, अर्को रूम मयिपदु। मिनु मेको सोव़त। १राजा १७:१

8 मोपतीके मुरपुकी सहर सहर रे ब्‍वाक्‍कु तूचा कली सहर काम जाक्‍तेक्‍म। तन्‍न रूथ्री तूचा मताम। मो हना यो गेपुकी आं गे मलेन्‍नी” दे परमप्रभु यावेमी देंत।

9 मिनु परमप्रभु यावेमी “गो इन फल फुल रू नु अङगुर रूम सोव़तीक नु बुक्‍खी ङाइक्‍तीक रोइ सोइक्‍ताक्‍ङ। सल्‍हा मालेमी इन फोव़शी रवा नु तेल रवा आन कली नेक्‍पाइक्‍तामी। मो हना यो गेपुकी आं गे मलेन्‍नी। हाग्‍गै १:११; योएल १:४

10 गो इन दातेम इजीप्‍त रागी कली खोदेंशो पा बेक्‍चा ङा रोइ सोइक्‍ताक्‍ङ। गो इन ठिटा आन कली तरवारमी क्‍योरशा साइक्‍पाइक्‍तामी। इन शारा रोइक्‍पाइक्‍तामी। इन बाक्‍तीक ङा मरिम्‍शो रिना इन नें आगाम प्रिंताक्‍ङ। मो हना यो गेपुकी आं गे मलेन्‍नी” दे परमप्रभु यावेमी देंत। प्रस्‍थान ९:३

11 मिनु परमप्रभु यावेमी “गो इन दाते ङा का निक्‍शी आन कली सोदोम नु गोमोररा कली खोदेंशो पा खतम सेल्‍ता। गे ब्रशो मी रे पा ग्रुंइशो बुल्‍सी खोदेंशो बाक्‍तीनी। मो हना यो गेपुकी आं गे मलेन्‍नी” दे परमप्रभु यावेमी देंत। उत्‍पत्ती १९:२४-२५; जकरिया ३:२

12 मोपतीके परमप्रभु यावेमी “ए इस्राएल ङा मुरपुकी, गो इन कली मार पाइ‍नुङ देंशा हना, गे इन परमप्रभु, आं कली ग्रुम्‍चा माल्‍नीनी।

13 सुमी डांडा आन कली सेला, मेकोमी फश यो सेल्‍शो बाक्‍ब। मेकोमी मुर आन कली आ मिम्‍शो तुइक्‍पाइक्‍ब। मेकोमी सुनी कली छिङछिङ सेल्‍ब। मिनु रागी ङा लाइश्‍शो डांडा मेर गाक्‍ब। मेको आ नें मुर नेल्‍ल आन परमप्रभु यावे बाक्‍ब” देंत। मीका १:३