Amos 3 in Sunwar
1 इस्राएल ङा मुरपुकी, परमप्रभु यावेमी इन पर्बम लोव़ का पाप्तु। मेको लोव़ नेनीन। मेकोमी “एको लोव़ इजीप्त रागी रे आं चाक्शो खिं ङा मुर नेल्ल आन पर्बम बाक्ब।
2 रागी ङा खिं खिं ङा मुर नेल्ल रे गो इन कली ला योव़तन्नी। मोपतीके गो इन मरिम्शो पशो आ पर्बम सजाइ गेनुङ। ब्यवस्था ४:३४
3 मार, मुर निक्शी मगारसा सम्म काथ काथा गाक्नीसी ङा?
4 मार, सिखार मथित्तु हना, ब्वाकीम गुप्स ग्रीबा ङा? मार, गुप्स आ चाइक्बम मारेइ मथित्थु मेको आ पुक्खीमी ङरर ङरर पाइबा ङा?
5 मार, खपीम ब्वारद मदाइक्थु, चिक्ब रेप्बा ङा? मार, ग्याइक्चा कली मारेइ मबाक्थु, थेम्लु खप रे ग्येत्थ बोक्नीमी ङा?
6 मार, तेकोइ सहरमी तुराही ताप्शोनु, मुर महिंनीमी ङा? मार, सहरम श्येत दुम्मेनु, मेको परमप्रभु यावे आ सोइश्शो ममाइ ङा? यसैया ४५:७; बिलाप ३:३७
7 थमा पा, परमप्रभु यावेमी आ लोव़ पाइब आन कली मदेंथु, मारेइ मपाइब। उत्पत्ती १८:१७
8 गुप्स ग्रीशो नेंशा, सु महिंबा? परमप्रभु यावे ब्वाक्मेनु, सुम आ लोव़ मपाइबा ङा?
9 ‘अश्दोद ङा बोल्यो दरवार नु इजीप्त रागी ङा बोल्यो दरवार ङा मुर आन कली गेपुकी सामरीया ङा पहाडमी बुक्कीन। मिनु मेको सहरम दुम्शो ठेयब रेयके नु मुर आन कली श्येत गेशा, दिप्शो कोव़ङीन’ दे मुर आन कली देनीन।
10 मेकोपुकी ठीक गेय पस मजोक्नीम। हुश ख्राक्श पोक्शा नु मार मार रोइश्शा खुइ पशो आन बोल्यो दरवारम खेक्शा वोइक्नीम” दे परमप्रभु यावेमी देंत।
11 मोपतीके परमप्रभु यावेमी “इ जोरी सत्रुमी इ रागी पुम्नीम। मेकोपुकीमी लडाइ तोव़मेनु, गे ब्रुइनीनी। मेकोमी इ बोल्यो दरवार नेल्ल रोइक्नीम” दे परमप्रभु यावेमी देंत।
12 मिनु परमप्रभु यावेमी “दोपा गोठलामी गुप्स आ शोव़ रे भेडा आ खोइल निक्शी कि नोफा आ टुक्रा का ला हना यो रोइक्बा, मोपा सामरीयाम नित्तीक आ कुना नु खाटम बाक्शा यो इस्राएल ङा मुर प्रोंइचा पुंइसीनीम” देंत।
13 मुर नेल्ल आन परमप्रभु यावेमी “नेनीन, याकूब आ खिं ङा मुर आन पर्बम सांकछी गेन।
14 गो तेको नाक्त इस्राएल कली आ मरिम्शो पशो आ पर्बम सजाइ गेनुङा, मेको नाक्त गो बेथेल ङा चढ़ेतीक कली यो सजाइ गेनुङ। मिनु चढ़ेतीक ङा ग्रोव़पुकी बेल्शा खपीम दोक्नीम।
15 गो हिंउदमी बाक्तीक खिं नु हुप्शोमी बाक्तीक खिं निम्फा प्रेत्नुङ। मिनु हात्ती आ दाराम दारशो सेल्शो खिं ब्रेत्नीम। मिनु ठेयब खिंपुकी यो खतम सेल्नुङ” दे परमप्रभु यावेमी देंत। १राजा २२:३९; भजन संग्रह ४५:९