Acts 8 in Sunwar
1 स्तीफानस कली साइश्शो तशा, सावलमी “एको कली साइक्चा माल्शो। मिनु साइश्शा ठीक पाइतीनी” देंमाक्त। स्तीफानस कली सादमे नाक्त रे यरूसलेम सहरम बाक्ब थमा सुइक्ब नेल्ल आन कली खेदा पा श्येत गेचा गोव़मे बाक्त। मिनु श्येत गेशा प्रोक्पदमेनु, मेकोपुकी ब्रशा गाक्शा, यहूदीया नु सामरीया रागीमी जाक्दीश्शा बाक्मा बाक्त। १२ जना येसु आ सोइश्शोपुकी ला यरूसलेम उइ बाक्मा बाक्त। प्रेरित १:८; प्रेरित ११:१९
2 परमप्रभु यावे कली मान पा हिंबपुकीमी स्तीफानस आ बेक्शो रां लाइश्शा, थिम्मे बाक्त। स्तीफानस कली साइश्शो तशा, थमा सुइक्ब नेल्ल शुश ङाक्मा बाक्त।
3 सावलमी चहिं “मेको आन थमा सुइश्शो क्याम्चा” दे खिं खिं हिरशा ओव़शा, थमा सुइक्ब वोंइश मुर, मीश मुर नेल्ल आन कली ग्याइक्पाइश्शा, फ्रेंशा लाइश्शा जेल्खानमी चोक्पाइक्बाक्माक्त। प्रेरित ९:१; प्रेरित २२:४; १कोरिन्थी १५:९
4 प्रोक्शा ब्राशा गाक्बपुकीमी येसु आ लोव़ तेइ तेइ शेंना शेंन गाक्बाक्मा बाक्त।
5 फिलीप सामरीया सहरमी जाक्दीश्शा, मेकेर बाक्ब मुर आन कली “परमप्रभु यावे आ सोइश्शो ख्रीस्त येसु बाक्ब” दे शेंदीमी बाक्त। प्रेरित ६:५
6 फिलीप आ शेंशो लोव़ नेंशा, आ पशो छक लाक्चा ङा गेय तशा, नेल्लेमी थम नोफा दाइश्शा नेन्मे बाक्त।
7 छक लाक्चा ङा गेय चहिं मार कोंइबाक्माक्त देंशा हना, वोलम तशो मुर आन कली वोल खेरशा सापाइक्बाक्माक्त। वोल खेरानु, वोलम तशो मुर वाइ ब्रेश्शा, वोल प्रोक्बाक्माक्त। गुइ खोइल मदुक्ब मुर शुश आन कली गुइ खोइल दुक्ब गाक्ब सेल्बाक्माक्त। मर्कूस १६:१७
8 मोपतीके मेको सहरमी सापाइक्चा पुंइसीब मुर नेल्ले ग्येरसीबाक्मा बाक्त।
9 मेको सहरमी सिमोन नें पाइश्शो मुर का बाक्माक्त। मेको ङोंइती रे सामरीया रागी ङा मुर आन कली चटक कोंइशा, ठेयब सुंइसीशो बाक्माक्त।
10 सहर ङा मुर नेल्लेमी एको मुर परमप्रभु आ सक्ति तशो बाक्माक्त, दे ठेयब सेल्शा, मान पशो बाक्मा बाक्त।
11 शुश बर्स सम्म सिमोनमी चटक पा छक लाक्पाइक्तीके मुर नेल्लेमी सिमोन आ देंशो नोफा दाइश्शा आ पशो कोव़शा बाक्शो बाक्मा बाक्त।
12 मिनु फिलीप जाक्शा, मुर आन कली येसु ख्रीस्तमी इं कली पाप रे प्रोंइब, दे परमप्रभु यावे आ राज्य ङा लोव़ नु येसु ख्रीस्त आ पर्बम नेंपाइक्ना पाइक्न, शेंना शेंन गाक्मेनु, मीश मुर नु वोंइश मुर शुशेमी थमा सुइश्शा, ब्वाक्कुम ख्रुम्शा ग्रुंइचा पुंइसमा बाक्त।
13 शुशेमी थमा सुइश्शो तशा, मेको चटक पा गाक्ब सिमोन यो थमा सुइक्ब दुम्शा, ब्वाक्कुम ख्रुम्शा ग्रुंइचा पुंइसे बाक्त। मिनु फिलीप कली मप्रोंइथु, काथा गाक्बा दुम्माक्त। फिलीपमी चिन्ड नु छक लाक्चा ङा गेय कोंइदानु, सिमोन यो छक लाक्बाक्माक्त।
14 मिनु नोले यरूसलेममी बाक्ब सोइश्शोपुकीमी “सामरीया ङा मुरपुकीमी परमप्रभु यावे आ लोव़ थमा सुइक्ब दुम्तेक्म” देंशो नेंशा, पत्रुस नु यूहन्ना आस कली सामरीया सोइक्तमे बाक्त।
15 मिनु मेको निक्शीमी “परमप्रभु यावे आ सोक्त थमा सुइक्बपुकी नु लील” दे प्रार्थना पथ जाक्दीस्सा बाक्त।
16 मारदे हना सामरीया ङा मुर सुइ आन कली परमप्रभु यावे आ सोक्त मगेशो बाक्माक्त। प्रभु येसु आ नेंमी ब्वाक्कुम ख्रुम्शा ग्रुंइचा ला पुंइसीशो बाक्मा बाक्त।
17 मिनु पत्रुस नु यूहन्नामी आस गुइ थमा सुइक्ब आन तारी वोइश्शा, मेकोपुकी परमप्रभु यावे आ सोक्त तामे बाक्त।
18 मिनु सिमोनमी मेको सोइश्शो आस गुइ थमा सुइक्ब आन तारी वोइश्शा, परमप्रभु यावे आ सोक्त गेशो तशा, मेको आस कली “क्येट गेनुङ।
19 मोदेंशो सक्ति गेयी। गो गुइ वोइश्शा, पुनुनु, परमप्रभु यावे आ सोक्त मुरपुकीम तामेक्ल” दे पुंइदा बाक्त।
20 मिनु पत्रुसमी “इ क्येट गे नुन जाम्शा लल। मारदे हना गे परमप्रभु यावे आ गेशो सक्ति क्येट थाप्शा, ग्याप्चा तांइसीब, दे मिम्ताक्वी।
21 गे मेको गेय पने मचाप्नेवे। मारदे हना इ थुं परमप्रभु यावे आ ङोंइती मरिम्शो बाक्ब।
22 गे ओदेंशो मरिम्शो थुं पचा प्रोंइशा, इ थुं परमप्रभु यावे गे लेत्तो। मिनु परमप्रभुमी इ पाप क्याम्शा गेबा कों? दे पुनो।
23 मुल इ थुं चोशा पापमी ब्रीशो मरिम्शो बाक्ङे बाक्त, दे तुइक्ताक्ङ” दे पत्रुसमी मदानु,
24 सिमोनमी “इन देंशो खोदेंशो मदुम्ल, दे आं पर्बम प्रभु कली प्रार्थना पने, हजुर” दे सेउ पवा बाक्त।
25 मिनु पत्रुस नु यूहन्नामी प्रभु आ लोव़ नेंपाइक्ने थुम्शा, यरूसलेम लेस्सानु, सामरीया ङा गाउं लांमी शुश मुर आन कली ग्येरपाइक्ब लोव़ शेंना शेंन लेस्सा बाक्त।
26 काबु परमप्रभु यावे आ स्वर्ग ङा गेय पाइब कामी फिलीप कली “छुल बोक्शा यरूसलेम रे गाक्शा, गाजा लतीक लां लावो” दे माइश्शा, मेको लां सोइक्ता बाक्त। मेको लां गोरशो रागी लतीक लां बाक्माक्त।
27 परमप्रभु यावे आ स्वर्ग ङा गेय पाइब आ लोव़ नेंशा, फिलीप छुल बोक्शा, गाजा सहर लतीक लां लमाक्त। मिनु मेको लां गाक्मेनु, एथीयोपीया रागी ङा मुर का यो मेको लां लना लन बाक्माक्त। मेको एथीयोपीया ङा पिपीम कान्दाके रे शुश अधिकार तशो, ठेयब मुर बाक्माक्त। यरूसलेममी परमप्रभु यावे कली मार मार चढ़ेने थुम्शा, आ रागी लेश्शो बाक्माक्त।
28 मेको बग्गीम बाक्शा, परमप्रभु यावे आ लोव़ पाइब यसैयामी ब्रेक्शो पढेना पढेन बाक्माक्त।
29 मिनु परमप्रभु यावे आ सोक्तीमी फिलीप कली “मिरी लन लन पाइश्शो बग्गी आ नेक्था लावो” दे माइक्तीके फिलीप दोरशा, मेक जाक्दीम्माक्त।
30 जाक्दीश्शा, ठेयब मुर कली परमप्रभु यावे आ लोव़ पाइब यसैयामी आ ब्रेक्शो लोव़ पढेशो नेंशा “इन पढेशो लोव़ नेल्ल रुप्नी?” दे हिल्लो पवा बाक्त।
31 मिनु ठेयब मुरुमी “सुइमी मशेंथु, दोपा रुप्ने चाप्नुङा ङा?” देंशा, फिलीप कली बग्गीम ङोइक्पाइश्शा निप्पाइश्शा, किताब कोंइदा बाक्त।
32 ठेयब मुरुम पढेना पढेन बाक्शो लोव़ चहिं “भेडा कली क्योरपाइक्थ लाइश्शो खोदेंब पा मेको कली लाइक्तेक्म। भेडा पाठा आ ऊन प्रेक्गमेनु, ब्वालेइ पा बाक्शो खोदेंशो पा मेको ब्वालेइ पा बाक्त।
33 महिक्सीशो सेल्तेक्म। दोस गेशा ठीक निसाफ मपथु, दोसी सेल्तेक्म। आ खिं ङा मुर सु लीबा ङा? आल मथिथु साइक्चा पुंइसाक्व। मोपतीके आ खिं ङा मुर सुइ मली” दे ब्रेक्शो लोव़ बाक्माक्त। यसैया ५३:७-८
34 मिनु ठेयब मुरुमी फिलीप कली “परमप्रभु यावे आ लोव़ पाइबमी आंम आ पर्बम मोदेंशो देंमे देय अरु आन पर्बम मोदेंशो देंमे?” दे हिल्लो पवा बाक्त।
35 मिनु फिलीपमी मेको पढेशो लोव़ रे शेंचा गोशा, परमप्रभु यावे आ ब्रेक्पाइश्शो लोव़ शुश शेंशा, येसु आ पर्बम नेल्ल रुप्पदा बाक्त।
36 मोपा लसा लसा ब्वाक्कु बाक्तीकेमी जाक्दीस्सा बाक्त। मिनु ठेयब मुरुमी “एकेर ब्वाक्कु बाक्त, एको ब्वाक्कुम ख्रुम्शा ग्रुंइचा पुंइसीनुङ, दुम्बा?” देंमाक्त।
37 मिनु फिलीपमी “गे येसु कली थमा सुइक्तीनी हना, ब्वाक्कुम ख्रुम्शा ग्रुंइचा शिरनीनी” देंमेनु “गो येसु ख्रीस्त परमप्रभु आ तौ बाक्ब, दे थमा सुइक्ता” देंमाक्त।
38 मिनु बग्गी तिक्शा तोइश्शा, फिलीपमी ठेयब मुर कली ब्वाक्कुम ख्रुम्शा ग्रुंइदा बाक्त।
39 मिनु ब्वाक्कु रे ग्रूशा कुसानु, परमप्रभु यावे आ सोक्तीमी फिलीप कली लदा बाक्त। मिनु ठेयब मुरुमी मेको मतवा बाक्त। मो हना यो थाम्पा ग्येरसीशा, आ लां खोइश्शा गाक्माक्त।
40 नोले फिलीप अस्दोद सहरमी ग्रूदीम्माक्त। मिनु मेकेर रे गाउं गाउं सहर सहरम येसु आ लोव़ नेंपाइक्ना पाइक्न गाक्शा, सिजरिया सहर जाक्दीम्माक्त। प्रेरित २१:८-९