Acts 28 in Sunwar

1 मेको रागीमी ग्रूकानु, माल्‍टा नें पाइश्‍शो टापु बाक्‍माक्‍त, दे तुइक्‍ताक्‍क।

2 मेको टापुमी बाक्‍बपुकीमी आंइ कली तशा, शिशी पा शुश रिम्‍शो पा वारच पाम्‍तेक्‍म। मेकेर थम ग्‍यू पा रेउ यित। मोपतीके मेकोपुकीमी मी मुइश्‍शा थेरपाइक्‍तीकी। २कोरिन्‍थी ११:२७

3 मी थेरना थेरन बाक्‍कानु, पावलमी एर ओंथ ङा शी खुप्‍शा चाक्‍शा चोवानु, मीम होशा ग्रूशो बुस्‍स कामी आ गुइमी गिल्‍शा कोक्‍‍तु।

4 टापुमी बाक्‍बपुकीमी पावल आ गुइ बुस्‍सुम गिल्‍शो तशा “एको मुर मुर साइक्‍ब बाक्‍माक्‍त। समुन्‍द्रमी फश गिवार पा ग्रुम्‍शा हेररा बेक्‍शा यो ब्रोंइशा, रागीमी ग्रूशा यो बुस्‍सुमी कोक्‍शा बेक्‍ब दुम्‍त” देंमुम्‍तेक्‍म।

5 पावलमी आ गुइ थुर थुर पा बुस्‍स कली मीम हुम्‍ताक्‍व। मिनु आ कली मारेइ मदुम। मर्कूस १६:१८

6 मुरपुकीमी पावल कली कोव़स ङा कोव़स पाम्‍तेक्‍म। मारदे हना बुस्‍सुमी कोक्‍शो मुर इच्‍ची होम्‍शा बेक्‍ब, दे मिम्‍शो बाक्‍मा बाक्‍म। मिनु कोव़स ङा कोव़स बाक्‍मानु, मारेइ मदुम। मोपतीके आन थुं हिरशा “मुर साइक्‍ब मुर ममाइ, देवता कका बाक्‍माक्‍त, है” देंमुम्‍तेक्‍म। प्रेरित १४:११

7 मेको टापु ङा ठेयब मुर आ नें पुब्‍लीयस बाक्‍माक्‍त। आंइ जाक्‍दीत्‍तीके आ नेक्‍था पुब्‍लीयस आ रू, खिं बाक्‍त। मिनु पुब्‍लीयसमी आंइ कली ग्रुम्‍शा, आ खिं लाइश्‍शा, नाक्‍त सां सम्‍म बास जचा तूचा गेशा रिम्‍शो पाइक्‍तीकी।

8 पुब्‍लीयस आ खिंमी बा‍स बाक्‍कानु, आ आफ ख्‍युर पा जरो पा रोइ पशो बाक्‍त। मिनु पावलमी रोइ पाइब कली ग्रुम्‍थ लशा, आ गुइ मेको तारी वोइश्‍शा, प्रार्थना पा सापाइक्‍तु।

9 मोपा सापाइश्‍शो तशा, टापु ङा रोइ पशो मुरपुकी जाक्‍शा, आन रोइ सापांइसाक्‍म।

10 मिनु टापु ङा मुर नेल्‍लेमी ग्‍येरसीशा, आंइ कली मार मार चाक्‍शा गेम्‍तेक्‍म। गाक्‍चकानु लांमी जचा कली लाम्‍जी कुम्‍ज सेल्‍शा कुरपा सोइक्‍ताक्‍म।

11 मेको टापुमी महिना सां सम्‍म बाक्‍तक। अलेकजेन्‍द्रीया रे जाक्‍शो कस्‍तोर नु पोल्‍लुक्‍स माइश्‍शो जौंले आस नें पाइश्‍शो जहाज माल्‍टामी हिउंदमी बाक्‍बाक्‍माक्‍त। मिनु हिउंद लाक्‍शा, मेको जहाज ङोइश्‍शा गे लाइतक।

12 मिनु सिराकुसमी जाक्‍दीश्‍शा, नाक्‍त सां सम्‍म बाक्‍तक।

13 मेकेर रे लशा इच्‍ची हेरशा, रेगीयम जाक्‍दीत्‍तक। मिनु आ दीसा दक्‍खिन रे फश पशोमी नाक्‍त निक्‍शीमी पुटेओलीमी जाक्‍दीत्‍तक।

14 मेकेर जाक्‍दीश्‍शा, जहाज रे तोइश्‍शा, सहर लाइतक। मिनु थमा सुइक्‍ब लोक्‍ब आन कली ग्रुम्‍कानु, मेकोपुकीमी “बाक्‍कीन, बाक्‍कीन” देंतीके ७ नाक्‍त सम्‍म बाक्‍तक। मिनु रोम सहर गे लाइतक।

15 रोम सहरमी बाक्‍ब थमा सुइक्‍ब लोक्‍ब ते गुम्‍थ जाक्‍चाम्‍तेक्‍म देंशो नेंशा, सां-पाटी नु अप्‍पीयस बजारमी ग्रुम्‍थ जाक्‍तेक्‍म। पावलमी मेको थमा सुइक्‍ब आन कली तशा, आ थुं बारशा, परमप्रभु यावे कली “गे रिम्‍शो पाइब बाक्‍नीनी” दे ठेयब सेल्‍तु।

16 मिनु रोम सहरमी जाक्‍दीत्‍तक। जाक्‍दीश्‍शो रे पावल ते ते बाक्‍चा दाक्‍ता, मेक मेक बाक्‍चा गेम्‍तेक्‍म। आ कली कोव़ब सिपाही का वोइक्‍तेक्‍म। प्रेरित २७:३

17 रोम सहरम जाक्‍दीश्‍शो आ सांबु नाक्‍ती पावलमी रोममी बाक्‍ब यहूदी आन ठेयब मुर ब्रेश्‍शा खुप्‍ताक्‍मी। मिनु मेको आन कली “आं लोक्‍बपुकी, आं लोव़ का निक्‍शी नेनीन। इं यहूदी नु इं किकी पिपी आन पतीके पना पन बाक्‍ती हना यो, यरूसलेममी बाक्‍ब लोक्‍बपुकीमी आं कली दोस गेशा ग्‍याइश्‍शा, रोमी सरकार आन गुइमी गेतीमी। प्रेरित २३:१

18 मिनु रोमी निसाफ पाइबपुकीमी हिल्‍लो हिक्‍सी पशा ङा मिन, आं कली प्रोंइचा देंतेक्‍म। मारदे हना साइक्‍चा ङा सजाइ गेचा पुंइसीब मारेइ दोस ग्रुंइने मचबेम।

19 यहूदी लोक्‍बपुकीमी प्रोंइचा मदुम्‍ब देंना देंन बाक्‍मानु, गोमी सिजर कली आं मुददा कोव़चा गेने, दे पुंइता। पिप आ ङोंइती इं यहूदी सुइ आन कली मारेइ दोस मगेनुङमी। प्रेरित २५:११

20 इन कली एको लोव़ नेल्‍ल रुप्‍पाइक्‍थ ब्रेश्‍शा खुप्‍ताक्‍न्‍नी। आं दोस चहिं मार बाक्‍ब देंशा हना, इं इस्राएलीपुकीमी परमप्रभु यावेमी पाप रे प्रोंइब ख्रीस्‍त कली रागीमी सोइश्‍शो देंशो लोव़ थमा सुइश्‍शो आ पर्बम साङलो पाइक्‍चा पुंइसाक्‍ङ” दे माइक्‍तीमी। प्रेरित २६:६-७

21 मिनु मेकोपुकीमी पावल आ लोव़ नेंशा “इ पर्बम यहूदीया रे लोव़, चिठी का यो मजा। मेक रे एक जाक्‍शो लोक्‍ब सुइमी इ पर्बम मरिम्‍शो लोव़ पा दोस मगेम।

22 गोपुकीमी एको नक थमा सुइक्‍तीके आ पर्बम चहिं लोव़ नेंतक। मेको लोव़ तेक तेक ब्रामे, मेक मेक जिचा पोक्‍ग्‍मे बाक्‍त, दे तुइश्‍शो नकी। मोदेंशो दुम्‍त हना यो, गो इ मिम्‍शो तुइक्‍चा दाक्‍नीकी, लेंशा ग्रुम्‍चा” दे लोव़सी थुम्‍शा गाक्‍तेक्‍म। प्रेरित २४:१४; लूका २:३४

23 मिनु ग्रुम्‍ची नाक्‍ती पावल आ बाक्‍तीकेमी शुश मुर खुम्‍साक्‍म। मिनु सुनी रे नाक्‍दो सम्‍म पावलमी मेको आन कली एको लोव़ नेल्‍ल रुप्‍पपाइक्‍तीमी। मोसा आ अरेशो नु परमप्रभु यावे आ लोव़ पाइब आन ब्रेक्‍शो लोव़ रे शेंशा, परमप्रभु यावे आ सोइश्‍शो ख्रीस्‍त चहिं येसु बाक्‍ब देंशा, परमप्रभु यावे आ राज्‍य ङा लोव़ शेंताक्‍व।

24 आ लोव़ नेंबपुकी का निक्‍शीमी आ देंशो थमा बाक्‍त, दे थमा सुइक्‍तेक्‍म। का निक्‍शीमी चहिं थमा मसुदेम।

25 थमा सुइक्‍ब नु थमा मसुइक्‍ब दुम्‍शा ब्रातेक्‍म। मिनु गाक्‍चामेनु, पावलमी थमा मसुइक्‍ब आन कली “परमप्रभु यावे आ सोक्‍तीम परमप्रभु यावे आ लोव़ पाइब यसैया इन किकी पिपी आन पर्बम ठीक लोव़ पशो बाक्‍त।

26 मेकोमी ‘मेको मुर आन कली ग्रुम्‍थ लावो। मेको आन कली “नेंचा दा नेंनीन। तन्‍न गे यो मरुप्‍नीनी। कोव़चा दा कोव़नीन। तन्‍न मताइनीनी।

27 मेको मुर आन थुं ग्‍याम्‍शो बाक्‍नीम। आन नोफा थांइशो बाक्‍नीम। आन मिक्‍च क्रिप्‍शो बाक्‍नीम। मोदेंशो मपशो नम हना, आन मिक्‍चीमी ताम वा, आन नोफाम नेंनेम वा, थुंमी रुबेम वा, आं गे ले‍म वा, गो सापदुमी वा” दे ब्रेक्‍शो बाक्‍त’। यसैया ६:९-१०

28 परमप्रभु यावेमी अर्को रागी ङा मुर आन, कली आ लोव़ नेंपाइक्‍ब। मेकोपुकीमी नोफा दाइश्‍शा नेंशा टीनीम, दे तुइक्‍तीन” दे माइक्‍तीमी।

29 पावलमी मेको आन कली मोदेंशो लोव़ पवानु, यहूदी लाम्‍तेक्‍म। का निक्‍शीमी “आ लोव़ थमा बाक्‍ब” देंतेक्‍म, का निक्‍शीमी “थमा ममाइ” देंतेक्‍म। मिनु हेरर हेररा जिशा बोक्‍तेक्‍म। प्रेरित १३:४६

30 मिनु पावल बर्स निक्‍शी सम्‍म मुर आ खिंमी क्‍येट थाप्‍शा बाक्‍मेनु, शुश मुर पावल कली ग्रुम्‍थ जाक्‍मा बाक्‍त। मेको ग्रुम्‍थ जाक्‍ब आन कली “निस्‍सीने, बाक्‍कीने, लोव़सी पय” दे शुश लोव़ शेंबाक्‍माक्‍त।

31 शेंचा मदुम्‍ब, दे सुइमी मदेंबाक्‍मा बाक्‍त। मिनु ठेयब थुं पा परमप्रभु यावे आ राज्‍य नु प्रभु येसु ख्रीस्‍त आ पर्बम शेंना शेंन बाक्‍माक्‍त। एफिसी ६:२०