Acts 27 in Sunwar

1 मिनु पावल कली सिजर बाक्‍तीके इटाली सोइक्‍ची जाक्‍माक्‍त। मिनु पावल नु अरु चोक्‍चा पुंइसीशो का निक्‍शी आन कली अगस्‍टस पल्‍टन ङा युलीयस नें पाइश्‍शो कप्‍तान आ गुइमी जिम्‍मा गेमे बाक्‍त। मिनु गो पावल आ वारच का निक्‍शी यो सासाक्‍क। प्रेरित २५:१२

2 सिजरिया रे लशा, अद्रामीत्‍तीयम जाक्‍दीश्‍शा, एसीया लाइब जहाज ङोइश्‍शा लाइतक। मासीडोनीया ङा थिस्‍सलोनीकी रे जाक्‍शो अरीस्‍तारकस पावल आ वारच का यो गोपुकी नु लत। प्रेरित २०:४

3 मेकेर रे लशा, आ दीसा नाक्‍त सीदोन जाक्‍दीत्‍तक। मेकेर जाक्‍दीक्‍कानु, कप्‍तान युलीयसमी पावल कली रिम्‍शो पा आ वारच आन कली ग्रुम्‍थ लचा गेप्‍तु। मिनु मेकोपुकीमी पावल कली रिम्‍शो पाम्‍तेक्‍म। प्रेरित २४:२३; प्रेरित २८:१६

4 मिनु लेश्‍शा जाक्‍शा, जहाज ङोइश्‍शा, लाइतक। मिनु साइप्रस आ नेक्‍नेक्‍था जाक्‍दीत्‍तक। मारदे हना फश गिवारमी आइदी लां लचा मगेव।

5 मिनु सिलीसीया नु पाम्‍फीलीया रागी आस दी ङा लां पा लिसीया रागी ङा मिरा सहरमी जाक्‍दीश्‍शा तोंइ‍साक्‍क।

6 मिनु कप्‍तानमी अलेकजेन्‍द्रीया रे जाक्‍शो इटाली लाइब जहाज थिश्‍शा, नेल्‍ल आंइ कली मेकोमी ङोइक्‍पाइक्‍तीकी।

7 मिनु लकानु, शुश फश गिवार पा तेक्‍तीके श्‍येत पा ओंखां ओंखां लशा, क्‍नीदोस रागी आ नेक्‍था जाक्‍दीत्‍तक। फश गिवार मलीथु, आइक्‍था रे पा साल्‍मोने नु क्रेट टापु आस नेक्‍नेक्‍था लां रे पा लाइतक।

8 मिनु श्‍येत पा क्रेट टापु ङा जहाज नाइक्‍तीके जाक्‍दीत्‍तक। मेको जहाज नाइक्‍तीके दारशो जहाज नाइक्‍तीक नें वोइश्‍शो बाक्‍त। मेको लासेया सहर आ नेक्‍था सेल्‍शो बाक्‍त।

9 फश गिवारमी तेक्‍तीके क्रेटमी जाक्‍दीत्‍चा यो शुश नाक्‍त लाक्‍शा, माइजा बाक्‍तीक लाइ यो लाक्‍तु। में ङा मेरे जहाज चलेचा हिंचा पाइब। २कोरिन्‍थी ११:२५-२६; लेवी १६:२९

10 मोपतीके पावलमी जहाज चलेब आन कली “हजुरपुकी, एक ङा लाक्‍शा लाइतय हना, फश गिवारमी योल्‍ब। जहाज नु जहाजमी कुर पशो थोव़क नेल्‍ल जाम्‍ब, गोपुकी यो ब्रोंइचा मताइनय दे तुइश्‍शो बाक्‍नुङ। मोपतीके मलचा” देंत।

11 कप्‍तानमी चहिं पावल आ देंशो लोव़ थमा मसुइक्‍थु, जहाज आ होव़प नु चलेब आन लोव़ नेंतु।

12 मेकोपुकीमी “हिउंदमी एकेर बाक्‍चा मदुम्‍ब” देंतेक्‍म। मो देंमानु, अरुमी यो “मो हना फोनीक‍स गे लचा” देंतेक्‍म। फोनीकसमी जाक्‍दीन्‍ने चाप्‍नय। मिनु मेकेरेन हिउंद लाक्‍चा रिम्‍शो दुम्‍ब देंतीके लाइतक। फोनीकस चहिं क्रेट टापु ङा नेल्‍ल क्‍येङा पच्‍छिममी बाक्‍ब।

13 मिनु लना लन बाक्‍कानु, दक्‍खिन रे इचीची फश पवानु, मुल रिम्‍शो चलेसीब देंशा, जहाज तिक्‍तीके क्‍युक्‍शा वोइश्‍शा, क्रेट आ नेक्‍था लां लाइतक।

14 मिनु में चोटीन टापु रे फश गिवार यिशा सुम्‍तु। मोदेंशो फश गिवार कली उत्तर पूर्ब ङा फश, दे नें वोइश्‍शो बाक्‍ब।

15 मोपा सुम्‍कीनु, जहाज लतीक लां लाइक्‍ने मचबेम। मोपतीके फश गिवारमी तेइ योल्‍दल, दे चलेचा प्रोंइतेक्‍म।

16 मिनु कौदा माइश्‍शो टापु आ ता जाक्‍दीश्‍शा, टापुमी फश गिवार इचीची फारताक्‍व। मिनु शुश श्‍येत पा इम्‍ची डोंगा ब्‍वाक्‍कुम तोक्‍शा, मेको डोंगा रे गेय पा जहाज कली ठेयब ठेयब डोरीम फ्रेंशा बोल्‍यो सेल्‍तेक्‍म।

17 मिनु सिरतीस माइश्‍शो बाल्‍वा बाक्‍तीकेमी जहाज मओव़दील, दे जहाज कीब वा फ्रुप्‍शा, ओंखां ओंखां पा जहाज लचा गेम्‍तेक्‍म।

18 फश गिवार काइ यो मनाइक्‍थु पना पन बाक्‍त। मिनु आ दीसा जहाज सोपी दुम्‍ल, दे जहाजमी कुर पशो भारी शोल्‍शा ताइक्‍ताक्‍मे।

19 मिनु आ नित्‍थ नाक्‍ती जहाज कली माल्‍शो थोव़क यो ताइक्‍ताक्‍मे। मिनु शुश नाक्‍ती सम्‍म फश गिवार पना पन नां तास्‍ला सोरुल मारेइ मतांइसे।

20 मिनु गोपुकीम ब्रोंइचा मतांइसीबाक्‍त, बेक्‍सीबाक्‍त देंतक।

21 गो शुश नाक्‍ती सम्‍म मारेइ मजथु बाक्‍तक। मिनु पावलमी जहाज चलेब आन ङोंइती राप्‍शा “हजुरपुकी, साबेर आं देंशो लोव़ टिचा माल्‍शो ननी। गोमी क्रेट मलचा देंती। गेपुकीमी आं देंशो टिशो ननी हना, जहाजमी कुर पशो नु जहाज ङा थोव़क मारेइ ताइक्‍चा ममाल्‍द वा। गो यो ओदेंशो श्‍येत मजय वा।

22 मुल मोदेंशो दुम्‍त हना यो, इन थुं बारपा बाक्‍कीने। मारदे हना सुइ यो मबेक्‍नय। जहाज ला जाम्‍शा लाइब, दे तुइक्‍ताक्‍ङ।

23 दोपा तुइक्‍ताक्‍ङ देंशा हना, गो परमप्रभु यावे कली ठेयब सेल्‍नुङ, मेको आ मुर नङ। परमप्रभु यावेमी आ स्‍वर्ग ङा गेय पाइब का कली सोइश्‍शा, सिनाक्‍दो आं ङोंइती राप्‍शो ताता।

24 मेकोमी ‘पावल, महिनो। गे सिजर पिप आ ङोंइती राप्‍चा माल्‍‍नेवे। ब्‍वाक्‍कुम ग्रुम्‍शा मबेक्‍नेवे। परमप्रभु यावेमी गे नु बाक्‍ब नेल्‍ल यो मबेक्‍थु, इन कली गेप्‍तु’ दे माइक्‍ती। प्रेरित २३:११

25 मोपतीके इन थुं बार पा बाक्‍कीन, हजुरपुकी। परमप्रभुमी आ देंशो का यो मप्रोंइथु, नेल्‍ल खाप्‍ब, दे थमा सुइक्‍नुङ। प्रेरित २८:१

26 मुल जहाज टापु जाक्‍दीश्‍शा, ख्रा दिक्‍ब, दे तुइक्‍नुङ” दे माइक्‍तीमी।

27 मिनु १४ नाक्‍त मोपा योल्‍स ङा योल्‍स पा अद्रीया समुन्‍द्र लाक्‍शा, काबु नाक्‍दो जहाज चलेबपुकीमी तेक कका ङा रागी तांइसीशो खोदेंशो ताम्‍तेक्‍म।

28 मिनु ब्‍वाक्‍कु पुक्‍तीके ख्रुम्‍शा पुक्‍गमेनु, २० ओरग्‍या बाक्‍त। मिनु इच्‍ची नोले बारशा लशा लेंशा पुक्‍गमेनु, १५ ओरग्‍या बाक्‍त। ओरग्‍या का १,८५ मिटर बाक्‍ब।

29 मिनु सेरथे फुल्‍लुम थोक्‍सीशा, जहाज बिग्रेसीब देंशा जहाज तिक्‍तीके ४ ओटा तोक्‍शा, जहाज कली तिक्‍शा नाइक्‍पाइक्‍तेक्‍म। मिनु गेना नां सोव़बा, दे रिम्‍शा बाक्‍तक।

30 नां मसोव़थु जहाजम गेय पाइबपुकीमी जहाज तिक्‍तीके तोक्‍खु पा आइक्‍च डोंगा तोक्‍शा, जहाज प्रोंइशा प्रोक्‍चा माल्‍मे बाक्‍त।

31 मिनु पावलमी मेको आन मो पचशो तुइश्‍शा, कप्‍तान कली “मेकोपुकी प्रोक्‍शा गाक्‍तेक्‍म हना, गो नेल्‍ल ग्रुम्‍शा बेक्‍नय” दे माइक्‍तु।

32 मिनु सिपाहीपुकीमी डोंगा ङा डोरी ख्रोइश्‍शा तोक्‍शा, मेको आन कली प्रोक्‍चा मगेम।

33 मिनु नां सोव़मेनु पावलमी नेल्‍ल आन कली “मजशो, मइप्‍शो मुलाक्‍त १४ नाक्‍त दुम्‍त।

34 मोपतीके मुल इच्‍ची खोइ जय। मिनु बोल ताइनय। महिनीन। मारदे हना सुइ के चां का यो महेम्‍ब” दे नेल्‍ल आंइ थुं बारपाइक्‍तु। मत्ती १०:३०

35 मिनु शोब्‍ले आ गुइमी शेशा, प्रभु कली “गे रिम्‍शो पाइब बाक्‍नीनी” देंशा, जिक्‍शा नेल्‍ल आंइ कली योक्‍तु।

36 मिनु नेल्‍ल आंइ थुं बारशा जाइतक।

37 मेको जहाजमी २७६ जना मुर बाक्‍शो नकी।

38 मिनु रूथ्री जशा, जहाजमी कुर पशो चेरब ताइक्‍ताक्‍म।

39 मिनु नां सोव़मेनु, मेको ङोंइती तांइसीशो रागी मार रागी बाक्‍मे, दे मतुइक्‍तक। बाल्‍वा ला तांइसाक्‍व।

40 मेको बाल्‍वा बाक्‍तीके चाक्‍दीश्‍शा, जहाज तिक्‍तीके ख्रोइश्‍शा, ब्‍वाक्‍कुमी प्रोंइतेक्‍म। मिनु चलेतीके आ डोरी प्राक्‍शा, वा क्‍युक्‍शा वोइश्‍शा, फशेमी जहाज कली गाक्‍पा बाल्‍वा गे लाइक्‍तेक्‍म।

41 मो पामेनु, जहाज बाल्‍वामी ओव़दीश्‍शा, आ शोव़ ग्रुक्‍साक्‍व। आ मीलु चहिं ब्‍वाक्‍कुम आप्‍शा जिक्‍त।

42 एको चोक्‍सीशा लाइश्‍शोपुकी प्रोक्‍नीमी कोर में, दे हिंशा, सिपाहीपुकीमी मेको आन कली प्रोक्‍चा मगेथु साइक्‍चा, दे मिम्‍शो बाक्‍मा बाक्‍त।

43 कप्‍तानमी चहिं “पावल कली मसाइक्‍थु ब्रोंइचा गेचा” दे आ थुं फ्रेंशो बाक्‍माक्‍त। मोपतीके सुइ कली साइक्‍चा मगेव। दोम्‍ली ग्‍यारस जोक्‍ब आन कली दोम्‍ली ग्‍यारशा रागीमी ग्रूङीन, दे सोइक्‍ताक्‍मी।

44 दोम्‍ली ग्‍यारस मजोक्‍बपुकीमी चहिं जहाज ङा शी फलेक ग्‍याइश्‍शा ङोइश्‍शा रागीमी ग्रूमल देंत। मोपा सुइ मग्रुम्‍थु नेल्‍ल ब्रोंइशा रागीमी ग्रूतक। प्रेरित २७:२२-२५