Acts 24 in Sunwar
1 मिनु ५ नाक्त नोले ठेयब चढ़ेब हनानीया, यहूदी आन जोक्ब तुइक्ब खाल्पा का निक्शी नु तेरतुल्लस नें पाइश्शो निसाफ पाइब का सिजरियामी जाक्मा बाक्त। मिनु हुकुम पाइब आ ङोंइती पावल कली दोस गेमे बाक्त।
2 मिनु कछडी बाक्मा नाक्ती पावल कली हुकुम पाइब आ ङोंइती राप्पदमेनु, तेरतुल्लस निसाफ पाइबमी दोस गेशा “माननीय फेलीक्स सरकार, हजुर, इन रिम्शो पा हुकुम पशोमी गो यहूदी नेल्ल थुं नाइश्शा बाक्चा ताइतक। आंइ रागी रिम्शो सेल्चा कली नक लां कोंइताक्नी। मिनु नेल्ल आंइ कली थम रिम्शो दुम्त।
3 इन पशो मारेइ मारेइ रिम्शो बाक्ब, दे गो नेल्लेमी तुइक्नीकी।
4 हजुर, कली शुश मक्योल्चा, दे मिम्नुङ। तन्न लोव़ का चहिं पचा गेयीनी।
5 मेको इन ङोंइती राप्पा वोइश्शो मुर कली गो रिम्शो पा तुइक्नीकी। मेको मुर थम हिंचा ङा रोइ खोदेंशो बाक्ब। रागी रागी हिरशा गाक्मेनु, यहूदी आन कली पोक्शा मरिम्शो पपाइक्बाक्त। एको नासरथ ङा दूली थमा सुइक्ब आन ठेयब मुर बाक्ब। प्रेरित १७:६
6 मोशो ला ममाइ, काबु परमप्रभु यावे आ खिं ग्रांग्रा पचशो बाक्त। मिनु गोपुकीमी ग्याइश्शा, मो पचा मगेक। गो आंइ धर्म ङा अरेतीक लोव़ कोव़शा, सजाइ पाइक्चा देंशो नकी। प्रेरित २१:२८-२९
7 तन्न लिसीयस लडाइ पाइब आन ठेयब मुरुम लोव़ पचा मगेथु, आ सिपाहीपुकी चाक्शा, आंइ कली हिंम हिंम पा आंइ गुइ रे रोइश्शा लाइक्तु।
8 मेकोमी आंइ कली ‘मेको मुर आ दोस मार बाक्मे, मेको लोव़ हुकुम पाइब फेलीक्स कली मतीन’ दे हजुर, इन बाक्तीके सोइक्ताक्की। मुल एको मुर कली गे आंमान हिल्लो पना पन आ दोस नेल्ल ग्रुंइने चाप्नीनी। मिनु आंइ गेशो दोस थमा बाक्माक्त, दे तुइक्नीनी” देंमाक्त।
9 मेकेर बाक्ब यहूदीपुकीमी यो “एको लोव़ थमा बाक्ब” दे निसाफ पाइब आ देंशो लोव़ थोक्शा देंमा बाक्त।
10 मिनु हुकुम पाइबमी पावल कली लोव़ पचा गेवा बाक्त। मिनु पावलमी “हुकुम पाइब, हजुर, एको रागीम शुश बर्स ङोंइती रे निसाफ पाइब बाक्नीनी, दे तुइश्शा, गो ग्येरसीशा ठेयब थुं पा आन गेशो दोस नेंशा लोव़ लेत्नुङ। मार लोव़ बाक्मे, मेको लोव़ नेल्ल देंनुङ।
11 परमप्रभु कली मान पथ, गो एसीया रे यरूसलेममी जाक्शो १२ नाक्त लाइ यो लाक्शो मबाक्ब। आं देंशो थमा मदाप्तीनी हना, सु कली हिल्लो पाइतीनी हना यो, नेल्लेमी देंनीम। प्रेरित २१:१७
12 गो यरूसलेममी बाक्ङानु, परमप्रभु यावे आ खिंमी, ग्रुम्तीक खिंमी, सहर तेइ तेइ हिरशा, सुइ कली जिचा पोक्चा ङा लोव़ मपङ। मुर आन कली पोक्शा मरिम्शो यो मपपदुमी। सुइमी मोदेंशो मरिम्शो पशो ताइतक देंने मचाप्नीम।
13 आं कली शुश अरु दोस यो गेतीमी। तन्न थमा पा ग्रुंइशा कोंइने मचबेम।
14 लोव़ का चहिं हजुर, इन कली रुप्पाइक्नन्नी, गो येसु ख्रीस्त आ लां खोइश्शा गाक्नुङ। मेकोपुकीमी मेको लां दूली बाक्ब, दे मिम्शो बाक्नीम। ख्रीस्त आ लां खोइश्शा, साइ आं किकी पिपी आन परमप्रभु यावे कली ठेयब सेल्नुङ। गो मोसा आ अरेशो लोव़ नु परमप्रभु यावे आ लोव़ पाइबपुकीमी ब्रेक्शो लोव़ नेल्ल थमा सुइक्नुङ।
15 गो नु अर्को यो ठीक पाइब नु ठीक मपाइब बेक्शो रे सेंसीचा पुंइसीनीम, दे थमा सुइक्नीकी। दानीएल १२:२; यूहन्ना ५:२८-२९
16 मोपतीके गो परमप्रभु यावे नु मुर आन ङोंइती रिम्शो पाइनुङ, दे आं थुं फ्रेंशा बाक्नुङ। प्रेरित २३:१
17 मिनु मुल मार देंनुङ देंशा हना, गो शुश बर्स मुर आन रागीमी हिरथ लशा, साबेर गाबेर यरूसलेम लेश्शा जाक्ती। आंम आंइ यहूदी मारेइ मथीब आन कली मार मार गेथ नु परमप्रभु यावे कली मार मार चढ़ेथ लेश्शा जाक्ती। रोमी १५:२५-२६; गलाती २:१०
18 गो चोव़खो दुम्शा, परमप्रभु कली मार मार चढ़ेङानु, मेकोपुकीमी परमप्रभु यावे आ खिंमी ततीमी। मेना गो आं का ला बाक्शो नङ। मुर आन कली पोक्शा, मरिम्शो यो मपङ। मोदेंशो एकोपुकीमी यो मतशो बाक्नीम। प्रेरित २१:२७
19 एसीया रे जाक्शो यहूदीपुकी यो परमप्रभु यावे आ खिंमी बाक्तेक्म। मेकोपुकीमी आं कली दोस गेचा गोम्तेक्म। गो दोस गेचा पुंइसीब मुर नङ हना, मेकोपुकी एकेर जाक्शा, हजुर इन ङोंइती देंचा माल्शो नमी।
20 साबेर यरूसलेममी कछडी पामेनु, मुल इन ङोंइती जाक्शोपुकी यो बाक्शो नम। आं कली मार दोस ग्रुंइदमे, मेको लोव़ हजुर, इन कली तुइक्पाइक्चा माल्शो नमी।
21 आं देंशो लोव़ का आ पर्बम दोस गेतीमी, दे तुइक्नुङ। मेको आं देंशो लोव़ मार बाक्ब देंशा हना ‘मुर बेक्शो रे सेंसीनीम’ दे थमा सुइक्नुङ। मेको आ पर्बम आं कली मुददा कोप्ताक्यीमी। मिनु इन ङोंइती राप्पाइय्यीनी, दे माइक्तामी। मिनु मुल इन ङोंइती राप्पाइक्तीमी” दे पावलमी देंमाक्त। प्रेरित २३:६
22 मिनु फेलीक्स, हुकुम पाइबमी, ख्रीस्त आ लां खोइक्चा आ पर्बम शुश लोव़ तुइश्शो बाक्माक्त। मोपतीके “लिसीयस, लडाइ पाइब आन ठेयब मुर, जाक्शा नोले ला इन लोव़ नेंशा, निसाफ कोव़शा ख्रोइश्शा गेनन्नी” दे बैठक पोक्शा सोइक्तीमी बाक्त। प्रेरित २३:२६
23 पावल कली कप्तान आ गुइमी जिम्मा गेशा “सिपाहीपुकीमी कोव़शा, एर ओंथ गाक्चा गेचा। आ वारच जाक्तेक्म हना, ग्रुम्चा गेचा” दे वोइक्पदा बाक्त। प्रेरित २७:३
24 इच्का नाक्त नोले हुकुम पाइब फेलीक्स नु आ मीश द्रुसील्ला जाक्सा बाक्त। आ मीश यहूदी तमी बाक्माक्त। मिनु पावल कली चाक्पाइश्शा, ख्रीस्त कली थमा सुइक्चा आ पर्बम लोव़ पपदसे बाक्त।
25 मिनु पावलमी “ठीक पशो नु ठीक मपशो मार बाक्बा, इं थुं नु रां कली दोपा अरेचा नु परमप्रभुमी मुर नेल्ल आन कली निसाफ पाइब” दे शेंदानु, फेलीक्स हिंशा “लो मोक्ल, मुलाक्ती ओशो ला लोव़ पय। इ लोव़ दीसा नित्थ लेंशा नेंनुङ” दे सोइक्ता बाक्त।
26 फेलीक्समी “पावलमी क्येट सुइक्बा कों” दे यो आस पशो बाक्माक्त। मिनु लेंशा ब्रेप्बाक्माक्त।
27 मोपा ब्रेत्ता ब्रेत्ता बर्स निक्शी योल्माक्त। मिनु फेलीक्स अर्को रागीमी याक्से बाक्त। आ पा ङा हुकुम पाइब पोरसीयस फेस्तस जाक्माक्त। फेलीक्समी यहूदी आन कली ग्येरपाइक्चा, दे पावल आ मुददा मख्रोइक्थु, चोक्स ङा चोक्स वोइश्शा गाक्माक्त।