Acts 20 in Sunwar
1 मिनु मेको रेयके नाइक्तमे नोले पावलमी थमा सुइक्ब आन कली ब्रेश्शा खुप्शा “थमा सुइक्चा मप्रोंइथु, इन थुं बारपा बाक्कीन” देंशा आन कली मेक उइ प्रोंइशा मासीडोनीया लमाक्त। २कोरिन्थी २:१३
2 मासीडोनीयामी हिरना हिरन थमा सुइक्ब आन कली ग्रुम्शा शेंशा, आन थुं बारपाइक्ना पाइक्न गाक्शा, ग्रीस रागी जाक्दीम्माक्त।
3 मिनु ग्रीस रागीमी महिना सां सम्म बाक्शा “मुल जहाज ङोइश्शा, सिरीया गे लाइनुङ” दे लचावानु “यहूदीपुकीमी आं कली ग्याइक्चा कली लां बाप्शो बाक्नीम” दे तुइश्शा, जहाज ङोइश्शा मलथु, गाक्शा मासीडोनीया लमाक्त।
4 पावल नु काथा गाक्ब सु सु बाक्मा बाक्त देंशा हना, बेरोइया ङा पुरोस आ तौ सोपाटेर, थिस्सलोनीकी सहर ङा अरीस्तारकस नु सेकुन्दस, डेरबे ङा गायस, तिमोथी, एसीया ङा तिखीकस नु त्रोफीमस बाक्मा बाक्त। प्रेरित १७:१०; प्रेरित १९:२०; प्रेरित १६:३; एफिसी ६:२१; प्रेरित २१:२९
5 मेकोपुकी गो आंइ क्येङा ङोंइती लशा, त्रोआस सहरमी रिम्शा बाक्मा बाक्त।
6 बोरब ओख्ती मसुप्शो शोब्ले जची नाक्त लाक्शा, फिलिप्पी सहर रे जहाज ङोइश्शा, ५ नाक्त नोले त्रोआस सहरमी जाक्दीत्तक। मेकेर आंइ वारच आन कली ग्रुम्शा, ७ नाक्त मेक उइ बाक्तक।
7 आइतबार नाक्त प्रभु भोज जथ खुम्साक्क। मिनु पावलमी दीसा लचा माल्ब देंशा, नाक्दो उइक्थ दुम सम्म शुश लोव़ पाप्तु। मत्ती २८:१; प्रेरित २:४२,४६
8 आंइ बाक्शो तला तारी ङा कोठा शुश बत्ती दाशो बाक्त।
9 मेकेर युतीकस नें पाइश्शो ठिटा मुर का झेलमी निश्शो बाक्त। मिनु पावलमी शेंना शेंन शुश लाइश्शो लोव़ पवानु, युतीकस मुकु जिशा निन्द्रा पाप्तु। मिनु तला सां तार रे दोक्त। मिनु मुरपुकी कोव़थ लमानु, बेक्ने थुम्शो थित्तेक्म।
10 मिनु पावल यो यिशा बाप्शा आ रां मुप्शा, एर ओंथ बाक्ब आन कली “मबेक्शो बाक्त। मोपतीके महिनीन” दे माइक्तीमी। १राजा १७:२१
11 मिनु लेश्शा कुशा, प्रभु भोज जने थुम्शा नां दाप्ची सम्म शेंना शेंन बाक्त। मिनु गो आंइ लची जाक्मेनु,
12 मेको ठिटा कली सेस तशा, नेल्ल आंइ थुं नाइश्शा ग्येरसाक्क।
13 मिनु पावलमी “गे जहाज ङोइश्शा, अस्सोस सहर लने। गो चहिं गाक्शा इन कली ग्रुम्नन्नी” देंशा आंइ कली जहाजमी ङोइक्पाइश्शा सोइक्ताक्की। मिनु अस्सोसमी जाक्दीत्तक।
14 मिनु अस्सोस सहरमी ग्रुम्शा, पावल यो जहाजमी ङोइश्शा गो नेल्ल मितीलेनेमी सहर जाक्दीत्तक।
15 आ दीसा नाक्त खिओस हांबु जाक्दीत्तक। आ नित्थ नाक्त सामोसमी जाक्दीत्तक। मिनु आ सांबु नाक्त मिलेटस जाक्दीत्तक।
16 पावलमी “पेन्तीकोस चाड मानेचा कली यरूसलेम जाक्दीत्चा माल्ब। मोपतीके लांमी मग्योल्चा, एसीयामी मनाइक्चा। एफिससमी यो मनाइक्चा” देंतीके मनाइक्थु गाक्तक। प्रेरित १८:२१
17 मिलेटसमी जाक्दीश्शा, पावलमी एफिससमी बाक्ब थमा सुइक्ब आन शेंब खाल्पा आन कली “मिलेटसमी ग्रुम्थ जाक्कीने” दे ब्रथ सोइक्ताक्व।
18 मिनु मेकोपुकी जाक्मानु, पावलमी मेको आन कली “नेल्ल क्येङा ङोंइती इन एसीया रागी जाक्ङा रे मुल सम्म गेपुकी नु बाक्शा, गो मार शेंदन्नी दोपा लां कोंइदन्नी, दोपा गेपुकी नु बाक्ङा, मेको नेल्ल तुइक्नीनी। प्रेरित १८:१९; प्रेरित १९:१०
19 गो प्रभु आ वाइल दुम्शा, ठेयब मलेत्थु प्रभु आ गेय पना पन गाक्ती। मोपा गाक्ङानु, यहूदीपुकीमी खेदा पा शुश श्येत गेशा, आं थुं खाइक्पा ङाक्पाइक्तीमी।
20 मो पाम्तेक्म हना यो, गो इन खिं खिं हिरशा, इन कली ग्रुम्शा, का का पा शेंशा, इन कली रिम्शो दुम्ल, दे तुइक्पाइक्तन्नी। खिं खिं हिरशा ला ममाइ। गाउं सहरमी यो हिरशा, मुर आन बुक्तीकेमी जाक्दीश्शा, शेंना शेंन गाक्ती।
21 मोदेंशो शेंशा गाक्शा यहूदी, ग्रीक नु नेल्ल रागी ङा मुर आन कली ‘पाप पचा प्रोंइशा, परमप्रभु यावे गे लेश्शा, इं प्रभु येसु ख्रीस्त कली थमा सुइक्य’ दे शेंना शेंन गाक्ती।
22 मिनु मुल परमप्रभु यावे आ सोक्तीमी देंशो टिशा, यरूसलेम गे ङा लां खोइश्शा गाक्शो बाक्नुङ। यरूसलेममी जाक्दीश्शा, आं कली मार दुम्बा, दे मतुइक्नुङ। प्रेरित १९:२१
23 लोव़ का ला तुइक्नुङ। मारदे हना सहर गाउं तेइ तेइ हिरशा गाक्ङानु, परमप्रभु यावे आ सोक्त रे पा लोव़ पाइबमी ‘यरूसलेम जाक्दीश्शा, शुश श्येत जाइनेवे। जेल्खानमी चोक्चा पुंइसीनेवे’ दे नेंपाइक्तीमी। प्रेरित ९:१६; प्रेरित २१:४,११
24 गो साइक्चा पुंइसाक्ङ हना यो, एको आं गिंम मारेइ ममिम्नुङ। प्रभु येसुमी आं कली पपाइश्शो लोव़ ‘परमप्रभु यावेमी मुर आन कली शिशी पाइब’ आ ग्येरपाइक्ब लोव़ कली तुइक्पाइक्नुङ। प्रेरित २१:१३; २तिमोथी ४:७
25 गो इन कली परमप्रभु यावे आ राज्य ङा लोव़ नेल्ल तुइक्पाइक्ने थुम्तन्नी। मुल ङा मेरे मग्रुम्नय, दे तुइक्नुङ।
26 बेक्शा जाम्शा लाइतीनी हना यो, आं के मारेइ दोस मदुम्ब, इन कली थमा पा देंनुङ। इजीकीएल ३:१७-१९; प्रेरित १८:६
27 मारदे हना परमप्रभु यावेमी शेंपाइश्शो लोव़ का यो मख्रुइक्थु नेल्ल शेंताक्न्नी।
28 गे आंम कली कोव़ङीने। परमप्रभु यावे आ सोक्तीमी इन कली थमा सुइक्ब आन कली कोव़ब सेल्तु। गे परमप्रभु यावे आ मुर आन कली मुर आन कली कोव़ब रिम्शो गोठला दुमीन। मारदे हना मेकोपुकी आ तौ आ हुशेम ग्याप्शो बाक्नीमी। १तिमोथी ४:१६; १पत्रुस ५:२-४
29 गो इन कली प्रोंइशा वोइश्शा, गाक्ङा नोले फरमी बी क्यारश आन कली खेदा पशो खोदेंशो पा खेदा पचा पुंइसीनीनी। मत्ती ७:१५
30 गेपुकी नु काथा गाक्ब थमा सुइक्बपुकी यो मोदेंशो खेदा पाइब फर खोदेंशो दुम्नीम। मेकोपुकीमी दूली लोव़ शेंशा, थमा सुइक्ब आन थुं ग्येत्थ लुक्च क्याल्पाइश्शा, आन नोले खोइक्ब सेल्नीम, दे तुइक्नुङ। १यूहन्ना २:१८-१९
31 मोपतीके होस पांइसीने। बर्स सां सम्म श्येत पा ङाक्थ्री दुम्शा, गोमी इन कली शेंशो, वारच पशो काइ मप्रेंदीने।
32 मुल गो इन कली परमप्रभु यावे आ गुइमी जिम्मा गेनुङ। प्रभुमी इन कली शिशी पा आ लोव़ नेल्ल रुप्चा गेशा, इन थुं बारना बारन लपाइश्शा, आ मुर नेल्ल आन कली गेतीक आसीक गेब, दे तुइक्नुङ।
33 गेपुकी नु बाक्ङानु, इन बाक्शो सुन चांदी वा नेल्ल तशा मवाल्ङ। मारेइ मताक्गु।
34 गो आंम आं गुइमी गेय पना पन जाता। गो नु काथा गाक्ब आन कली यो गोन थुल्तामी। प्रेरित १८:३; १कोरिन्थी ४:१२; १थिस्सलोनिकी २:९
35 गो मार पाता हना यो, मचाप्ब आन कली वारच पाइक्चा नमी, दे गेय पा कोंइताक्न्न। प्रभु येसु आ शेंशो लोव़मी ‘ताक्चा क्येङा गेचा रिम्शो बाक्ब’ ” देंत।
36 मेको लोव़ पने थुम्शा, आ पोक्च थेक्शा मेकोपुकी नु प्रार्थना पाप्तु। प्रेरित २१:५
37 पावलमी “मुल ङा मेरे मग्रुम्नय” देंशो लोव़मी नेल्ल ङाक्तेक्म।
38 मिनु पावल कली “लेंशा मतांइसीब” दे मुप्शा पुक्पु पशा, जहाज सम्म चोव़तेक्म।