2 Samuel 8 in Sunwar
1 मिनु इच्का नोले दाऊदमी पलिस्ती आन कली लडाइ तोशा ग्रामाक्त। दाऊदमी मेथेग-आम्माह सहर आंम के सेला बाक्त।
2 दाऊदम मोआबी आन कली यो फ्रुवा बाक्त। मिनु मेको आन कली खपीम इप्पाइक्मी बाक्त। मिनु डोरी कामी थाप्शा भाग सां सेल्मी बाक्त। भाग निक्शी ङा मुर आन कली साइक्मी बाक्त। मिनु भाग का ङा मुर आन कली प्रोंइमी बाक्त। मिनु मोआबीपुकी मेको आ वाइल दुम्मा बाक्त। मिनु मेकोपुकीम दाऊद कली तिरो थाप्चा माल्मा बाक्त। १सामुएल २२:३
3 मिनु दाऊद युफ्रेटीस खोला आ नेक्थाम आ अधिकार वोइक्चा कली लमेनु, सोबाह सहर ङा रेहोब आ तौ पिप हादादेजेर कली यो लडाइ पा ग्रामाक्त।
4 दाऊदम मेको रे हजार का ७ सहे शारा ङोइक्बपुकी नु २० हजार जना खोइलीम गाक्ब लडाइ पाइब आन कली ग्याइक्तीमी बाक्त। मिनु दाऊदम बग्गी कीब शारा आन नारी ख्रोदा बाक्त। मिनु आंम कली सहे का शारा बग्गी कीचा कली वोदा बाक्त। यहोसु ११:९
5 मेना दमस्कस ङा अराम ङा मुर सोबाह सहर ङा पिप हादादेजेर कली वारच पाइक्चा कली जाक्मा बाक्त। मिनु दाऊदम मेको आन दाते ङा २२ हजार अरामी आन कली साइक्मी बाक्त।
6 मिनु दाऊदम मेको अराम ङा मुर आन रागी दमस्कसम कोव़ब मुर वोइक्मी बाक्त। मिनु मेकोपुकी दाऊद आ वाइल दुम्शा, तिरो थाप्चा माल्मा बाक्त। मोपा परमप्रभु यावेम दाऊद ते ते गाक्मे, मेक मेक ग्रापदा बाक्त।
7 हादादेजेर आ गेय पाइब आन कुरशो सुन के तेक्तीके दाऊदम आइक्के सेला बाक्त। मिनु मेको यरूसलेम सहरम चाक्गा बाक्त।
8 मेकोमी हादादेजेर आ सहर, बेताह नु बेरोथाइ सहर रे शुश कांसा चाक्गा बाक्त।
9 मिनु हमाथ ङा पिप तोइमी “दाऊदम हादादेजेर आ लडाइ पाइब नेल्ल आन कली फ्रुप्तु” देंशो नेना बाक्त।
10 मिनु पिप तोइमी आ तौ योराम कली दाऊद कली ग्रुम्थ सोइक्ता बाक्त। मिनु मेकोमी दाऊद कली “गे लडाइम हादादेजेर कली फ्रुशा रिम्शो पाइतीनी” देंथ नु मान पा ठेयब सेल्तीक लोव़ पथ सोइक्ता बाक्त। मारदे हना हादादेजेर नु तोइ आस दातेमी लडाइ दुम्ना दुम्न बाक्शो बाक्माक्त। योराममी सुन चांदी नु कांसा के ग्योंब यो चाक्गा बाक्त।
11 पिप दाऊदमी मेको यो परमप्रभु यावे कली गेवा बाक्त। आ फ्रुशो रागी नेल्ल ङा सुन चांदी मोपा गेबाक्माक्त।
12 एदोम, मोआब, अम्मोन पलिस्ती नु अमालेक रे चाक्शो सुन चांदी, सोबाह सहर ङा रेहोब आ तौ पिप हादादेजेर रे रोइश्शो मारेइ मारेइ परमप्रभु यावे कली गेवा बाक्त।
13 दाऊद लडाइ ग्राशा, आ नें चेम्शा लेम्मेनु, हिक्सी बाक्शो बेंसीम १८ हजार एदोम ङा मुर आन कली साइक्मी बाक्त। भजन संग्रह ६०:२
14 मेकोमी एदोम रागी नेल्लेम कोव़ब मुर वोइक्मी बाक्त। मिनु एदोम ङा मुर नेल्ल दाऊद आ वाइल दुम्मा बाक्त। मोपा परमप्रभु यावेम दाऊद ते ते लमे, मेक मेक ग्रापदा बाक्त। उत्पत्ती २७:४०; गन्ती २४:१८
15 मिनु दाऊदमी इस्राएल रागी नेल्लेम सासन पवा बाक्त। मिनु आ मुर नेल्ल आन कली ठीक निसाफ पवा बाक्त।
16 सेरूयाह आ तौ योआब लडाइ पाइब आन ठेयब मुर बाक्माक्त। अहीलुद आ तौ येहो-शाफात मेको आ ब्रेक्ब बाक्माक्त। २सामुएल २:२३-२६
17 अहीतुब आ तौ सादोक नु अबीयाथार आ तौ अहीमेलेक चढ़ेब बाक्सा बाक्त। सेरायाह ब्रेक्ब बाक्माक्त।
18 येहो-यादा आ तौ बेनायाह, केरेथी नु पेलेथी, पिप कली कोव़ब आन ठेयब मुर बाक्माक्त। दाऊद आ तौपुकी चहिं चढ़ेब बाक्मा बाक्त। २सामुएल १५:१८