2 Samuel 5 in Sunwar
1 मिनु नोले इस्राएल आ थर ङा मुर नेल्ल दाऊद आ बाक्तीक हेब्रोनम जाक्शा, मेको कली “गो इन हुश नकी।
2 ङोंइती सावल आंइ पिप बाक्मेनु, गे लडाइ पाइब आन कली लाइक्तीक नु चाक्तीक पशो ननी। परमप्रभु यावेमी इन कली ‘गे आं मुर इस्राएली आन गोठला दुम्चा माल्नेवे। गे इस्राएली आन पिप दुम्नेवे’ देंशो बाक्ब” देंमा बाक्त। १सामुएल १८:१३,१६; १सामुएल १३:१४; १सामुएल २५:३०
3 मिनु इस्राएल ङा खाल्पा नेल्ल पिप आ बाक्तीक हेब्रोनम जाक्मा बाक्त। मेकेर पिप दाऊदमी मेकोपुकी नु परमप्रभु यावे आ ङोंइती कबल का पवा बाक्त। मिनु मेकोपुकीम दाऊद कली तेल लुक्शा, इस्राएल ङा पिप सेल्मे बाक्त। २सामुएल २:४; १सामुएल १६:१३
4 दाऊद ३० बर्स दुम्मेनु, पिप दुम्माक्त। मिनु मेकोमी ४० बर्स सासन पवा बाक्त। १राजा २:११; १इतिहास ३:४; १इतिहास २९:२७
5 मेकोम हेब्रोनम बाक्शा, यहूदा कली ७ बर्स ६ महिना सासन पवा बाक्त। मिनु यरूसलेम सहरमी बाक्शा ३३ बर्स इस्राएल नेल्ल नु यहूदा कली सासन पवा बाक्त।
6 नोले पिप दाऊद नु आ मुरपुकी, यरूसलेम सहरम बाक्ब यबुसी नु लडाइ पचा कली यरूसलेम लमा बाक्त। मिनु यबुसीपुकीम दाऊद कली “गे एक जाक्ने मचाप्नीनी। मिक्च मताइब नु खोइल मदुक्बम यो इन कली प्रोक्पाइक्नीम” देंमा बाक्त। मोपा दाऊद जाक्ने मचाप्ब, दे मिम्तमे बाक्त। यहोसु १५:६३; न्यायाधीस १:२१; न्यायाधीस १९:१०-१२
7 मो हना यो दाऊदमी गारो हिरशो सियोन ग्रामाक्त। मिनु मेको दाऊद आ सहर दुम्माक्त।
8 मेको नाक्त दाऊदमी “सुम यबुसी आन कली साइक्बा, मेकोम ब्वाक्कु यितीक रे जाक्शा, दाऊद कली ग्रांग्रा दीब मिक्च मताइब नु खोइल मदुक्ब आन कली सदमेक्ल” देंमाक्त। मोपतीके “मिक्च मताइब नु खोइल मदुक्ब पिप आ खिं ओव़चा मताइनीम” देंशो बाक्मा बाक्त।
9 मिनु दाऊद मेको गारो हिरशो सहरम बाक्शा, मेको आ नें दाऊद आ सहर वोदा बाक्त। मिनु दाऊदमी मिल्लो रे पा आगा एर ओंथ नेल्ल सहर सेला बाक्त।
10 मिनु दाऊद शुश ठेयब दुम्ना दुम्न लमाक्त। मारदे हना परमप्रभु यावे मुर नेल्ल आन परमप्रभु मेको नु बाक्माक्त। २सामुएल ३:३
11 टायर ङा पिप हीराममी आ लोव़ कुरब आन कली दाऊद आ बाक्तीके सोइक्ता बाक्त। हीरामम लेबानोन ङा लाइश्शो रवा आ शी नु शी सेल्ब नु गारो प्रोव़ब यो सोइक्ता बाक्त। मिनु मेकोपुकीम दाऊद कली खिं का सेल्मे बाक्त।
12 मिनु दाऊदमी “परमप्रभु यावेम आं कली इस्राएल ङा सक्ति पाइश्शो पिप सेल्यी बाक्त। मिनु आ मुर इस्राएली आन पर्बम मेको आन राज्य ठेयब सेला बाक्त” दे तुइक्ता बाक्त।
13 दाऊद हेब्रोन रे यरूसलेम याक्से नोले मेकोमी मेकेर शुश मीश चाक्गा बाक्त। मेको के अर्को तमी तौ यो जरमेसमा बाक्त। २सामुएल ३:२-५; १इतिहास ३:५-९
14 यरूसलेम सहरम जरमेशो दाऊद आ तौपुकी शम्मुआ, शोबाब, नाथान, सोलोमन, लूका ३:३१; मत्ती १:६
15 इभार, एली-शुआ, नेफेग, याफीया
16 एली-शामा, एली-आदा नु एली-फेलेत बाक्मा बाक्त।
17 पलिस्तीपुकीम दाऊद इस्राएल ङा पिप दुम्त देंशो लोव़ नेन्मे बाक्त। मिनु पलिस्ती नेल्ल लडाइ पाइब लाइश्शा, दाऊद कली माल्थ लमा बाक्त। तन्न दाऊदम मेको लोव़ नेंशा उइ ङा बोल्यो दरवार लशा बाक्माक्त। १सामुएल २२:१; २सामुएल २३:१४
18 मिनु पलिस्तीपुकी जाक्शा, रेफाइम ङा बेंसीम ब्रशा बाक्मा बाक्त। यहोसु १५:८; यहोसु १८:१६
19 मिनु दाऊदमी परमप्रभु यावे कली “गो पलिस्ती आन कली लडाइ तोतामी हना, गे मेको आन कली आं गुइमी गेनीनी?” दे हिल्लो पवा बाक्त। मिनु परमप्रभु यावेमी “लावो, गो थमा पा मेको आन कली इ गुइम गेनुङ” देंमाक्त। १सामुएल ३०:८
20 मिनु दाऊद लशा, बाल-पेराजीमम लडाइ तोमी बाक्त। मिनु मेको आन कली ग्रामाक्त। मिनु दाऊदमी “बारशो ब्वाक्कुम आ एर ओंथ प्रेश्शो खोदेंशो पा, परमप्रभु यावेम आं जोरी सत्रु आन कली फ्रुप्तु” देंमाक्त। मोपतीके मेकेर बाल-पेराजीम नें लीमाक्त। यसैया २१:२८
21 पलिस्तीपुकीम आन मूर्ति मेक उइ प्रोन्मे बाक्त। मिनु दाऊद नु आ मुरपुकीमी मेको लदमे बाक्त।
22 मिनु लेंशा पलिस्तीपुकी जाक्शा रेफाइम ङा बेंसीम ब्रशा बाक्मा बाक्त।
23 मिनु दाऊदम लेंशा परमप्रभु यावे कली हिल्लो पवा बाक्त। मिनु परमप्रभु यावेमी “मुल सोजो लडाइ मपावो। हिरशा, ठेयब रवा आ आइक्ची हांबु नोले रे लडाइ पावो।
24 रवा आन ङरम लडाइ पाइब आन दोरशो नेंनी चोटी होस पावो। मारदे हना परमप्रभु यावे पलिस्ती आन कली फ्रुचा कली इ ङोंइती गाक्ब” देंमाक्त।
25 मिनु दाऊदमी परमप्रभु यावेम आ कली देंशो खोदेंशो पा पवा बाक्त। मिनु पलिस्ती आन कली गेबा रे गेजेर सहर ङा लां सम्म शोल्मो पा सदमे बाक्त। न्यायाधीस १:२९