2 Samuel 4 in Sunwar
1 सावल आ तौ इश-बोशेथम हेब्रोनम आब्नेर साइश्शो लोव़ नेंशा आ थुं लुक्च लमाक्त। मिनु इस्राएली नेल्ल हिंशा ग्येत्थ लुक्च दुम्मा बाक्त। २सामुएल ३:२७
2 सावल आ तौ के मार मार रोइक्ब आन हुल ङा कप्तान निक्शी बाक्सा बाक्त। मेको का आ नें बानाह नु अर्को आ नें रेकाब बाक्माक्त। मेको बेयरोथ सहर ङा बेन्यामीन आ थर ङा रिम्मोन आ तौ बाक्सा बाक्त। मारदे हना बेयरोथ यो बेन्यामीन आ रागीम बाक्माक्त। यहोसु ९:१७
3 मिनु बेयरोथ सहर ङा मुर गित्ताइम सहर प्रोक्शा लशो बाक्मा बाक्त। मिनु मेना रे मेकेर अर्को रागी ङा मुर दुम्शा बाक्मा बाक्त। नेहेम्याह ११:१३
4 मिनु सावल आ तौ योनाथन के यो तौ का बाक्माक्त। मेको खोइल निम्फा मदुक्ब बाक्माक्त। मेको ५ बर्स दुम्मेनु, सावल नु योनाथन बेक्ताक्स देंशो लोव़ येज्रेल रे नेंसे बाक्त। मेको लोव़ नेंशा आ खाल पाइब मीश मुरुमी मेको कली कुरशा प्रोक्मेनु, थिश्शा मेको आल आ खोइल मदुक्ब दुम्शो बाक्माक्त। मेको आ नें मेफी-बोशेथ बाक्माक्त।मेफी-बोशेथ आ नें मेरीब-बाल नु इश-बोशेथ देंनीम।२सामुएल ९:३; १इतिहास ८:३४; १इतिहास ९:४०
5 बेयरोथ सहर ङा मुर रिम्मोन आ तौ निक्शी रेकाब नु बानाह नाक्ती उइक्थ दुम्मेनु, इश-बोशेथ आ खिंम जाक्सा बाक्त। मेना इश-बोशेथ इप्शो बाक्माक्त। २सामुएल २:८
6 मेको निक्शी चेरब लाइक्चशो खोदेंशो पखु पा, खिं ओव़सा बाक्त। मिनु मेको कली कोव़जम तूशा सदसे बाक्त। मिनु रेकाब नु आ लोक्ब बानाह सुइम मतुइक्थु प्रोक्सा बाक्त।
7 मेको निक्शीमी इश-बोशेथ कली दोपा सदसे बाक्त देंशा हना, इश-बोशेथ इप्शा बाक्शो कोठा ओव़शा, मेको कली तूशा साइश्शा आ पिया ख्रोइश्शा लदसे बाक्त। मिनु नाक्दो रे अराबाह रे गाक्शा, हेब्रोन जाक्सा बाक्त।
8 मिनु मेको निक्शीमी मेको पिया दाऊद आ बाक्तीक हेब्रोनमी चाक्गसे बाक्त। मिनु पिप कली “सावल आ तौ इश-बोशेथ आ पिया एको बाक्ब। इन कली साइक्चा माल्ब इन सत्रु बाक्त। मुलाक्ती परमप्रभु यावेमी सावल नु आ चच युइ आन कली क्येक्क लेत्ताक्व” देंसा बाक्त।
9 मिनु दाऊदमी बेयरोथ सहर ङा रिम्मोन आ तौ रेकाब नु बानाह आस कली “परमप्रभु यावे ब्रोंइशा बाक्शो खोदेंशो पा, मेकोमी आं कली आं श्येत नेल्ल रे प्रोंइती।
10 ‘सावल बेक्शो रिम्शो लोव़ बाक्ब’ दे मिम्शा आं कली देंब मुर कली गो ग्याइश्शा सिकलागमी साइक्ता। मेको आ लोव़ आ इनाम बाक्त। २सामुएल १:१५
11 मिनु परमप्रभु यावे आ अरेशो मटीब मुरुमी ठीक पाइब मुर कली आ आंम खिंम बाक्शा, इप्तीकेम इप्शो मुर कली साइक्ब आस कली मेको क्येङा यो क्येक्क लेत्चा ममाल्नुङा ङा? मार, मुल गो मेको आ हुश आ क्येक्क लेश्शा इस कली साइश्शा, रागी रे मक्याम्नुङा?” देंमाक्त। २सामुएल ३:३२
12 मिनु दाऊदम ठिटा मुर आन कली “मेको आस कली सतीन” दे अरेवा बाक्त। मिनु मेको आस कली सदमे बाक्त। आस गुइ खोइल ख्रोइश्शा, हेब्रोन ङा दोम्ली आ नेक्था क्युक्गमे बाक्त। मिनु मुरपुकीमी इश-बोशेथ आ पिया लाइश्शा, आब्नेर आ तुरस हेब्रोनमी थिम्मे बाक्त। ब्यवस्था २१:२२-२३