2 Samuel 22 in Sunwar

1 परमप्रभु यावेमी दाऊद कली आ जोरी सत्रु नेल्‍ल नु सावल रे प्रोना नोले दाऊदमी परमप्रभु यावे कली कुम्‍सो पवा बाक्‍त।

2 मेकोमी “परमप्रभु यावे आं सेरथे फुल्‍लु, आं बोल्‍यो दरवार नु आं कली श्‍येत रे प्रोंइब बाक्‍ब।

3 आं परमप्रभु आं सेरथे फुल्‍लु आं ख्रुइक्‍तीके बाक्‍ब। मेको आं तेक्‍तीक नु आं ब्रोंइतीक बाक्‍ब। मेको आं बोल्‍यो दरवार नु आं फाम्‍सीतीक बाक्‍ब। मेको आं कली हुश ख्राक्‍श पोक्‍तीके रे प्रोंइब बाक्‍ब।

4 गो परमप्रभु यावे कली थोइ‍नुङ। मेको ठेयब सेल्‍चा पुंइसीब बाक्‍ब। मिनु मेकोम आं कली आं जोरी सत्रु रे प्रोंइब।

5 बेक्‍पाइक्‍बम आं कली ब्‍वाक्‍कु आ छालम खोदेंशो पा गिल्‍ती। खतम पोक्‍ब बारशो ब्‍वाक्‍कुम आं कली सुम्‍ती।

6 बेक्‍शो मुर आन बाक्‍तीकेम आं एर ओंथ नेल्‍ल रे गिल्‍ती। बेक्‍पाइक्‍ब आ ब्‍वारद आं ङोंइती बाक्‍ब।

7 मिनु गो आं श्‍येत आ पर्बम परमप्रभु यावे कली थोव़ता। गो आं परमप्रभु कली ‘वारच पने’ दे पुंइता। मिनु मेकोमी आ बाक्‍तीके रे आं सेंदा नेंतु। आं पुंइशो नेंतु।

8 मिनु रागीमी ख्रिनु कुत। सरीङ ङा जग हिम्‍साक्‍म। मारदे हना, परमप्रभु यावे गाइश्‍शो बाक्‍त।

9 मेको आ नें रे कुन ग्रूत। मेको आ शोव़ रे ग्राव ग्रु दाक्‍ब मी ग्रूत। मेकेर रे ब्रशो कोइला ग्रूतेक्‍म।

10 मेको सरीङ रे तोंइसाक्‍व। मेको आ खोइली आगा क्‍येर गोस्‍स बाक्‍त।

11 मेको करूब ङोइश्‍शा बेरत। फश के फ्रांम बेरशो तांइसाक्‍व।

12 मेको छिङछिङम सुम्‍साक्‍व। शुश ब्‍वाक्‍कु बाक्‍शो क्‍येर गोस्‍स आ एर ओंथ बाक्‍तेक्‍म।

13 मेको आ ङोंइती ङा छेङछेङ रे ब्रशो कोइला ग्रूतेक्‍म।

14 परमप्रभु यावेमी सरीङ रे बुंबु पाप्‍तु। नेल्‍ल क्‍येङा ठेयबम आ सेंदा नेंपाइक्‍तु।

15 मेकोम ब्रा आप्‍शा, एर ओंथ ब्रपाइक्‍तु। चिला आप्‍शा, सोइक्‍ताक्‍व।

16 समुन्‍द्र आ पुं तांइसाक्‍व। रागी आ जग हुक्‍साक्‍व। मेको परमप्रभु यावे आ हुइश्‍शो नु आ सास रे मोदेंशो दुम्‍त।

17 मेकोमी इर रे आ गुइ दिंशा ग्‍याइक्‍ताक्‍यी। आं कली ठेयब समुन्‍द्र रे कीशा ग्रुंइताक्‍यी।

18 मेकोमी आं कली आं बोल्‍यो जोरी सत्रु नु आं कली काइ मदाक्‍ब, रे प्रोंइती। मेको आं क्‍येङा शुश बोल्‍यो बाक्‍तेक्‍म।

19 मेकोपुकीमी गो हिंचा ङा श्‍येत जङा ना आं कली लडाइ तोम्‍तेक्‍म। तन्‍न परमप्रभु यावेमी आं कली तिक्‍ती।

20 मेकोमी आं कली लाङगा ङा ठेयब बाक्‍तीकेम ग्रुंइशा, श्‍येत रे प्रोंइती। मारदे हना मेको आं कली तशा ग्‍येरशो बाक्‍त।

21 परमप्रभु यावेमी आं कली आं ठीक पशो ङा इनाम गेती। आं गुइम हुश मशाइक्‍पाइक्‍तीके आं रिम्‍शो पशो ङा गेती।

22 मारदे हना गो परमप्रभु यावे आ लांम गाक्‍शो बाक्‍ती। गो आ अरेशो लोव़ मटीब खोदेंशो पा आं परमप्रभु रे ङोन मलङ।

23 मारदे हना आ ठीक पतीक लोव़ आं ङोंइती बाक्‍तेक्‍म। गो मेको आ फुल्‍लुम मुशा ब्रेक्‍शो लोव़ नेल्‍ल टिशा पाता।

24 मेको आ ङोंइ‍ती गो दोस मताइ‍ब बाक्‍ती। गो मरिम्‍शो पतीक रे ङोन बाक्‍ती।

25 मोपतीके परमप्रभु यावेमी आं कली आं ठीक नु रिम्‍शो पशो आ पा ङा गेती।

26 गे मप्रोंइब आन कली मप्रोंइब बाक्‍नीनी। दोस मताइ‍ब आन कली दोस मताइब बाक्‍नीनी।

27 गे रिम्‍शो पाइ‍ब आन कली रिम्‍शो पाइब बाक्‍नीनी। दूली पाइब आन कली दूली पाइब बाक्‍नीनी।

28 गे ब्रेम्‍शो मुर आन कली प्रोंइनीनी। तन्‍न ठेयब लेश्‍शो आन कली आइक्‍च सेल्‍‍नीनी।

29 परमप्रभु यावे गे थमा पा आं बत्ती खोदेंशो बाक्‍नीनी। परमप्रभु यावेमी आं कली छिङछिङमी छेङछेङ दुम्‍पाइक्‍ब।

30 इन पतीकेमी गो लडाइ पाइब आन कली ग्रानुङ। आं परमप्रभु गो गारो ख्राक्‍शा लाक्‍ने चाप्‍नुङ।

31 परमप्रभु आ लां ठीक बाक्‍ब। परमप्रभु यावे आ थोशा पशो लोव़ थमा बाक्‍ब। मेको आ बाक्‍तीकेम ख्रुंइसीब आन कली तेक्‍तीक बाक्‍ब।

32 परमप्रभु यावे क्‍येङा अर्को तेकोइ परमप्रभु मबाक्‍ब। आंइ परमप्रभु क्‍येङा लाक्‍शा अर्को तेकोइ सेरथे फुल्‍लु मबाक्‍ब।

33 परमप्रभुमी आं कली सक्ति गेती। आं गाक्‍तीक लां ब्रेम्‍शो सेल्‍तु।

34 मेकोम आं कली किश्‍श खोदेंशो पा दोरब सेल्‍ती। मेकोमी आं कली इर वोइश्‍शा कोव़ब।

35 मेकोम आं गुइ कली लडाइ पचा शेंब। मोपा आं गुइमी कांसा के लिब्रा खुक्‍ने चाप्‍ब।

36 गे आं कली इन तेक्‍शा ब्रोंइतीक गेतीनी। इन वारच पतीकेम आं कली ठेयब सेल्‍ती।

37 गे आं कली ठीक पा गाक्‍चा गेतीनी। मोपतीके आं खोइल गेनायो मग्रेक्‍ब।

38 गो आं जोरी सत्रु आन कली खेदा पा खतम पोक्‍तामी। गो मेको नेल्‍ल आन कली खतम मपोक्‍गुमी सम्‍म मलेङङ।

39 गो मेको आन कली खतम पोक्‍‍शा साइक्‍‍‍नुङमी। मिनु मेकोपुकी गेनायो बोक्‍ने मचाप्‍नीम। मेकोपुकी आं खोइली आगाम गोल्‍तेक्‍म।

40 गे आं कली लडाइ पचा कली सक्ति गेनीनी। आं जोरी सत्रु आन कली आं ङोंइती आइक्‍च सेल्‍तीनी।

41 गे आं जोरी सत्रु आन कली आं ङोंइती रे प्रोक्‍‍पाइक्‍नीनी। गो आं कली काइ मदाक्‍ब आन कली खतम पोक्‍‍तामी।

42 मेकोपुकीम कोव़ना कोव़न बाक्‍तेक्‍म। तन्‍न मेको आन कली प्रोंइब सुइ मबाक्‍ब। मेकोपुकीम परमप्रभु यावे कली पुंइतेक्‍म। तन्‍न मेकोमी मेको आन कली लोव़ मलेत्‍‍त।

43 गो मेको नेल्‍ल आन कली रागी ङा फुरक खोदेंशो पा फस पोक्‍तामी। गो मेको आन कली लां ङा हिलो खोदेंशो पा दिम्‍ताक्‍ङमी।

44 गे आं कली मुर आन जिचा पोक्‍तीक रे प्रोंइतीनी। गे आं कली रागी रागी ङा मुर आन ठेयब मुर सेल्‍शा वोइक्‍तीनी। आं मतुइश्‍शो मुरपुकीम आं कली गेय पाम्‍तेक्‍म।

45 अर्को रागी ङा मुर जाक्‍शा आं कली मान पाम्‍तेक्‍म। आं लोव़ नेंशा, मेकोपुकी आं देंशो टि‍म्‍तेक्‍म।

46 अर्को रागी ङा मुर हिंशा ख्रिंख्रि पा आन बोल्‍यो दरवार रे जाक्‍तेक्‍म।

47 परमप्रभु यावे ब्रोंइशा बाक्‍ब। आं सेरथे फुल्‍लु ठेयब बाक्‍ब। आं परमप्रभु मान ताइब बाक्‍ब। मेको आं कली प्रोंइब, सेरथे फुल्‍लु बाक्‍ब।

48 परमप्रभुम आं पर्बम क्‍येक्‍क लेत्‍ताक्‍व। मिनु मुर आन कली आं सासनम वोइक्‍तीमी।

49 मेकोम आं कली आं जोरी सत्रु रे प्रोंइती। गे आं कली आं जोरी सत्रु आन क्‍येङा ठेयब सेल्‍तीनी। गे आं कली हुश ख्राक्‍श पोक्‍ब रे प्रोंइतीनी।

50 मोपतीके परमप्रभु यावे, गो रागी रागी ङा मुर आन दातेमी इन कली ठेयब सेल्‍नुङ। मिनु इन कली ठेयब सेल्‍तीक कुम्‍सो पाइ‍नुङ।

51 परमप्रभु यावे पिप, आं ब्रोंइशा बाक्‍तीक बाक्‍ब। मेकोम आ तेल लुक्‍शो दाऊद कली नु आ चच युइ आन कली गेना हना यो दाक्‍तीक कोंइब” दे दाऊदमी परमप्रभु यावे कली ठेयब सेला बाक्‍‍त।