2 Samuel 19 in Sunwar
1 मिनु योआबम “पिप दाऊद अब्सालोम आ पर्बम ङाक्ना ङाक्न रोंका पा बाक्शो बाक्ब” देंशो लोव़ नेना बाक्त।
2 मेको नाक्त ङा ग्राशो नेल्ल लडाइ पाइब आन कली रोंका पतीक दुम्माक्त। मारदे हना लडाइ पाइबपुकीमी पिप आ तौ आ पर्बम रोंका पशो बाक्ब, दे नेंन्मे बाक्त।
3 मेको नाक्ती लडाइ पाइबपुकी लडाइम ब्रुशा आन कुल कोंइने मचाप्थु, मुने दोक्शा प्रोक्शो मुर खोदेंशो पा सिक्सी पा सहर ओव़मा बाक्त।
4 पिप आ कुल सुम्शा ठेयब सेंदा पा ङाक्ना ङाक्ना “आं तौ अब्सालोम, अब्सालोम, आं तौ, आं तौ” देंमाक्त।
5 मिनु योआब पिप आ खिंम ओव़शा मेको कली “गे मुलाक्ती इन कप्तान नेल्ल आन कली मुने तोक्तीनी। मारदे हना मुलाक्ती मेकोपुकीमी इन कली प्रोंइतेक्म। इन तमी तौ, इन मीशपुकी नु इन नोले चाक्शो मीश आन कली यो प्रोंइतेक्म।
6 इन कली काइ मदाक्ब कली गे दाक्नीनी। इन कली दाक्ब आन कली गे काइ मदाक्नीनी। मुलाक्ती गो लडाइ पाइब आन कप्तान नु ठेयब मुर इन ङोंइती मारेइ मनकी, दे रुप्पाइक्तीनी। मुलाक्ती अब्सालोम ब्रोंइशा, गो नेल्ल बेक्शो नकी हना, गे ग्येरसीनी वा।
7 मुल रीब पा लशा, इन गेय पाइब आन थुं बारपतीन। गे मो मपाइतीनी हना, गो परमप्रभु यावे आ नेंमी कसम जशा ‘मुलाक्दो गे नु सुइ मबाक्नीम’ देंनुङ। मिनु ङोंइती इन तशो श्येत क्येङा मुलाक्त ङा श्येत ठेयब दुम्ब” देंमाक्त।
8 मिनु पिप बोक्शा, ठेयब लाप्चोम बाक्माक्त। मिनु पिप ठेयब लाप्चोम बाक्शो बाक्ब, दे लडाइ पाइब आन कली नेंपदमे बाक्त। मिनु लडाइ पाइब नेल्ल पिप आ ङोंइती जाक्मा बाक्त। मेना सम्म इस्राएली नेल्ल आन आन खिं प्रोक्ने थुम्शो बाक्मा बाक्त।
9 इस्राएल ङा थर नेल्ल ङा मुरुम आंम आंम लोव़ पा “पिपमी आंइ कली आंइ जोरी सत्रु रे प्रोंइतु। पलिस्ती आन गुइ रे यो प्रोंइतु। मुल अब्सालोमम पतीके आंम रागी रे प्रोक्शा गाक्शो बाक्ब।
10 मुल गो इं पिप सेल्शो अब्सालोम लडाइम बेक्त। मोपतीके गो मुल मारदे पिप कली लेश्शा मचाक्नया?” देंमुमा बाक्त।
11 मिनु पिप दाऊदमी सादोक नु अबीयाथार कली “यहूदा ङा खाल्पा आन कली ‘मारदे गे पिप कली आ खिंमी लेश्शा चाक्चा कली नेल्ल क्येङा नोले दुम्चा दाक्नीनी? इस्राएली नेल्लेम देंशो लोव़ पिपमी नेंने थुम्शो बाक्ब।
12 गेपुकी आं मुर ननी। आं हुश ननी। पिप कली लाइक्चा कली गे मारदे नोले दुम्नी’ मतीस। २सामुएल ५:१
13 मिनु आमासा कली ‘गे आं मुर नु आं हुश मनवे? गे योआब आ पा ङा गो बाक्ङा सम्म कप्तान दुम्नेवे। मो मपाता हना, परमप्रभुमी सजाइ गेवल’ देंत मतीस” देंमाक्त। २सामुएल १:२५
14 मिनु आमासामी यहूदा ङा मुर नेल्लेमी “दाऊद कली ब्रेत्चा माल्ब” दे थुं का सेला बाक्त। मिनु मेकोपुकीम पिप कली “गे नु इन गेय पाइब नेल्ल नु लेश्शा जाक्कीन” दे लोव़ सोइक्तमे बाक्त।
15 मोपतीके पिप लेश्शा यर्दन जाक्माक्त। ङोंइती यहूदा ङा मुरपुकी गिल्गालम पिप ग्रुम्चा कली जाक्मा बाक्त। मेकोपुकीमी पिप कली यर्दन खोला शोक्पाइक्थ जाक्मा बाक्त।
16 बेन्यामीन आ थर ङा मुर बाहुरीम ङा गेरा आ तौ शिमेइ यो यहूदा ङा मुर नु रीब पा पिप दाऊद कली ग्रुम्थ जाक्माक्त।
17 मेको नु हजार का जना बेन्यामीन आ थर ङा मुर यो बाक्मा बाक्त। सावल आ गेय पाइब सीबा यो आ १५ जना तौ नु आ २० जना गेय पाइब नु मेकेर बाक्शो बाक्माक्त। मेकोपुकी पिप आ ङोंइती यर्दन खोलाम जाक्दीम्मा बाक्त। २सामुएल ९:२,१०; २सामुएल १६:१-४
18 मिनु मेको आइक्ची हांबुम लचा कली पिप आ खिं ङा मुर आन कली शोक्चा कली नु पिप आ माल्शो पचा कली मेकेर जाक्मा बाक्त। मिनु गेरा आ तौ शिमेइ पिप खोला शोक्ची ना पिप आ ङोंइती बाम्माक्त।
19 मिनु शिमेइमी पिप कली “आं प्रभु, पिप, गे यरूसलेम प्रोंइची ना आं मरिम्शो पशो आ पर्बम दोस मगेथु ममिम्तीन।
20 मारदे हना गो, इन गेय पाइबम पाप पाता, दे तुइक्नुङ। मोपतीके गो योसेफ आ खिं ङा मुर नेल्ल आन क्येङा ङोंइती आं प्रभु पिप इन कली ग्रुम्थ जाक्ती” देंमाक्त।
21 मिनु सेरूयाह आ तौ अबीशैमी “परमप्रभु यावे आ तेल लुक्शो कली सराप पतीके शिमेइ साइक्चा मपुंइसीबा ङा?” देंमाक्त।
22 तन्न दाऊदमी “सेरूयाह आ तौ, गे आं कली काइ मगारब मुर बाक्नीसी। गे मुलाक्ती आं जोरी सत्रु दुम्तीसी? मुलाक्ती इस्राएलमी तेकोइ मुर साइक्चा मदुम्ब। मुलाक्ती गो इस्राएल ङा पिप दुम्ती, दे गो मतुइक्नुङा ङा?” देंमाक्त। २सामुएल १६:१०
23 मिनु पिपमी शिमेइ कली “गे साइक्चा मपुंइसीनेवे” देंमाक्त। मिनु पिपमी मेको लोव़ थमा सेल्चा कली कसम जवा बाक्त। १राजा २:८-९
24 सावल आ चच मेफी-बोशेथ यो दाऊद पिप कली ग्रुम्थ उइ यिमाक्त। मेकोम पिप गाक्म रे ग्राशा मलेम्म सम्म आ खोइल ङा ग्ये यो मख्रोदा बाक्त। आ गल शोक्रे यो मप्रेक्गा बाक्त। आ वा यो ममुरशो बाक्माक्त। २सामुएल ९:६
25 मेको पिप कली ग्रुम्थ यरूसलेम रे जाक्मेनु, पिपमी मेको कली “मेफी-बोशेथ गे मारदे गो नु मगाक्ङे?” दे मदा बाक्त।
26 मिनु मेकोमी “आं प्रभु पिप, आं गेय पाइबम आं कली मरिम्शो पाप्तु। गो आं गधाम लगम पाइश्शा पिप नु गाक्चा ठीक दुम्शो नङ। मारदे हना गो इन गेय पाइब खोइल थेक्ने मचाप्ब मुर नङ।
27 मेको आ लोव़मी आं प्रभु पिप इन कली आं पर्बम मरिम्शो दुम्पाइक्तु। गे आं प्रभु पिप परमप्रभु आ स्वर्ग ङा गेय पाइब खोदेंशो बाक्नीनी। गे मार पचा दाक्नीनी मेको पने। २सामुएल १६:३; २सामुएल १४:१७
28 आं आफ आ खिं ङा मुर नेल्ल इन गुइमी बेक्चा ङा नकी। तन्न गो इन गेय पाइब आं कली इन नु जचा बाक्चा गेतीनी। मेको क्येङा लाक्शा, गो मार शिशी ताइक्नुङा ङा?” देंमाक्त। २सामुएल ९:७
29 मिनु पिपमी “मुल दुम्त। सीबा नु गे रू योक्सीस, देंती” देंमाक्त। २सामुएल ९:९-१०; २सामुएल १६:३-४
30 मिनु मेफी-बोशेथमी पिप कली “नेल्ल मेकोम पांइसेक्ल। मारदे हना गे आं प्रभु पिप मारेइ मदुम्थु खिं लेश्शा जाक्तीनी” देंमाक्त।
31 मिनु गिलाद आ मुर बारजील्लाइ यो रोगेलीम रे उइ यिमाक्त। मिनु पिप कली यर्दन शोक्चा कली पिप आ नेक्था जाक्माक्त। २सामुएल १७:२७; १राजा २:७
32 बारजील्लाइ ८० बर्स दुम्शो थम खूशो बाक्माक्त। मेकोमी पिप महा-नाइमम बाक्मेनु, पिप कली जचा थोव़क गेशो बाक्माक्त। मारदे हना मेको थम शोंप पाइश्शो मुर बाक्माक्त।
33 पिपमी बारजील्लाइ कली “गो नुन खोला शोक्शा लय। गो इन कली यरूसलेममी कोव़शा थुल्शा वोइक्नुङ” देंमाक्त।
34 मिनु बारजील्लाइमी पिप कली “गो शुश बर्स मब्रोंइनुङ। दोपा गो पिप नु यरूसलेम लाइनुङ।
35 मुल गो ८० बर्स दुम्ती। मुल गो रिम्शो नु मरिम्शो दोपा तुइक्नुङा? आं जशो तूशो ब्रोव़शो नु मब्रोव़शो मारेइ मतुइक्नुङ। वोंइश मुर मीश मरुम कुम्सो पशो, गो नेंने मचाप्नुङ। मोपतीके गो आं प्रभु पिप इन कली मारदे श्येत तेम्नुङा?
36 गो इन गेय पाइब यर्दन आइक्ची हांबु इच्का सम्म पिप इन नु लाइनुङ। पिपमी आं कली मारदे ओदेंशो रिम्शो इनाम गेयीनी?
37 आं कली लचा गेयीनी। मिनु आं आंम सहरम आं आम आफ आस तुरस आ नेक्था आं लीशो नाक्त थुम्चा गेयीनी। तन्न इन वाइल किम्हाम एक बाक्ब। मेको कली आं प्रभु पिप इन नु आइक्ची हांबु लतीन। गे मार रिम्शो लाक्नीनी, मेकोन पने” देंमाक्त। येरमीया ४१:१७
38 मिनु पिपमी “मो हना किम्हाम गो नु आइक्ची हांबु गाक्ल। मिनु गे मार पचा दाक्नीनी, मेको इन देंशो खोदेंशो पाइनुङ। गे मार दाक्नीनी गो मेको पाइनुङ” देंमाक्त।
39 मिनु मुर नेल्ल यर्दन आइक्ची हांबु शोक्समा बाक्त। पिप यो शोक्से बाक्त। मिनु पिपमी बारजील्लाइ कली पुक्पु पा आसीक गेवा बाक्त। मिनु बारजील्लाइ आंम आ खिं लेम्माक्त।
40 पिप खोला शोक्शा गिल्गाल जाक्माक्त। किम्हाम मेको नु गाक्शो बाक्माक्त। यहूदा ङा मुर नेल्ल नु इस्राएल ङा उइक्थ मुरुम पिप कली इच्का आइक्ची सम्म चाक्दीत्मे बाक्त।
41 मिनु इस्राएल ङा मुर नेल्ल काथा दुम्शा, पिप आ बाक्तीक जाक्मा बाक्त। मिनु मेकोपुकीमी “मारदे आंइ लोक्ब यहूदा ङा मुरपुकीम इन कली खुइ पा लदमे? पिप, आ खिं ङा मुर नु इन मुर नेल्ल लाइश्शा यर्दन आइक्ची हांबु चाक्दीत्मे?” देंमा बाक्त।
42 मिनु यहूदा ङा मुर नेल्लेमी इस्राएल ङा मुर आन कली “पिप आंइ नेक्था ङा मुर बाक्ब। गे मारदे आंइ पर्बम गाइक्नीनी? मार, गो पिप आ शोंप जका? मार पिपमी गो आंइ कली मारेइ गेवा?” देंमा बाक्त। २सामुएल १९:१२-१३
43 मिनु इस्राएल ङा मुरपुकीम यहूदा ङा मुर आन कली “पिप इन क्येङा १० खेयप शुश आंइ पिप बाक्ब। गे मारदे आइक्च सेल्नीनी? पिप दाऊद कली लेश्शा चाक्ता, दे गोपुकीम ङोंइती देंशो बाक्नीकी, मेको मप्रेंदीन” देंमा बाक्त। तन्न इस्राएल ङा मुर क्येङा यहूदा ङा मुरपुकीमी ठेयब लोव़ पामे बाक्त। २सामुएल १९:१०-११