2 Samuel 13 in Sunwar
1 मेको मो दुम्शो इच्का बर्स दुम्माक्त। मिनु दाऊद आ तौ अब्सालोम के थम दारशो समी का बाक्माक्त। मेको आ नें तामार बाक्माक्त। दाऊद आ अर्को तौ अम्नोनम मेको कली दाक्ता बाक्त। २सामुएल ३:२-३
2 अम्नोन आ सान्मा आ तमी तामार नु दाक्मुतीके, आ थुंम थम मरिम्शो दुम्माक्त। मिनु मेकोमी दाक्तीके मेको रोइ पवा बाक्त। मारदे हना मेको कन्ने मीश आल बाक्तीके, मेकोम मारेइ मरिम्शो पने मचबा बाक्त।
3 तन्न अम्नोन आ वारच का बाक्माक्त। मेको आ नें योनादाब बाक्माक्त। मेको दाऊद आ लोक्ब शिमेआह आ तौ बाक्माक्त। मेको मिक्च सिल्ब मुर का बाक्माक्त। १सामुएल १७:१३
4 मेकोम अम्नोन कली “ए पिप आ तौ, मारदे गे नाक्त किंत किंत मरिम्शो दुम्ना दुम्न लवे? मार दुमे आं कली देनो” दे मदा बाक्त। मिनु अम्नोनमी “गो आं लोक्ब अब्सालोम आ समी तामार कली दाक्नुङ” देंमाक्त।
5 मिनु योनादाबमी “रोइ पाता, देंखु पा इप्शा बाक्को। मिनु इ आफ इ कली कोव़थ जाक्त हना, गे मेको कली ‘आं समी तामारम आं कली जचा थोव़क सेल्शा गेयील। मेकोम जचा थोव़क आं ङोंइती सेलल। मिनु गो मेको आ सेल्शो कोव़नुङ। मिनु मेको आ गुइ रे जाइनुङ’ देंनो” देंमाक्त।
6 मोपतीके अम्नोन “रोइ पाता” देंखु पा इप्शा बाक्माक्त। मिनु पिप मेको कली कोव़थ जाक्माक्त। मिनु अम्नोनमी पिप कली “आं समी तामारम आं ङोंइती शोब्ले निक्शी चोशा गेयील। मिनु गो मेको आ गुइ रे जाइनुङ” देंमाक्त।
7 मिनु दाऊदमी खिंम लोव़ कुरब मुर का तामार आ बाक्तीक सोइक्ता बाक्त। मेकोमी “इ लोक्ब अम्नोन आ बाक्तीक लशा, मेको कली जचा थोव़क सेल्शा गेवो” दे लोव़ पथ सोइक्ता बाक्त।
8 मिनु तामार आ लोक्ब अम्नोन आ खिं लमाक्त। मिनु मेको कली इप्शा बाक्शो थिदा बाक्त। मिनु तामारमी फस निशा, आ ङोंइती शोब्ले चोशा गेवा बाक्त।
9 मिनु मेकोम तांइ शेशा अम्नोन आ बाक्तीक लशा, शोब्ले कुर पवा बाक्त। तन्न अम्नोन जने मबिस्से बाक्त। मिनु अम्नोनमी “नेल्ल आन कली लाङगा सोइक्तो” देंमाक्त। मिनु मुर नेल्ल लमा बाक्त।
10 मिनु अम्नोनमी तामार कली “मेको जचा थोव़क आं कोठाम पितो। मिनु गो इ गुइ रे जाइनुङ” दे मदा बाक्त। मिनु तामारमी आ चोशो शोब्ले आ लोक्ब अम्नोन आ कोठाम लदा बाक्त।
11 मिनु मेकोम शोब्ले गेवानु, अम्नोनम मेको कली ग्याइश्शा “आं समी पिवो। गो नु इपो” देंमाक्त। लेवी १८:९
12 तन्न तामारमी “ममाइ, आं लोक्ब, आं कली ओदेंशो मपने। इस्राएलम ओदेंशो गेय पचा मदुम्ब। ओदेंशो मरिम्शो गेय मपने।
13 गो आं मुनेम आं कुल ग्रुंइने मचाप्नुङ। गे यो इस्राएलम काइ मरिम्शो मुर दुम्नीनी। आं पर्बम पिप नु लोव़ पने। गो नु ग्युंबे पचा कली पिप बिप्ब” देंमाक्त।
14 तन्न मेकोम तामार आ लोव़ का यो मनेना बाक्त। मिनु मेको कली बोल पा ग्याइश्शा, मेको नु इम्माक्त।
15 मिनु नोले अम्नोनम मेको कली मदाक्ता बाक्त। अम्नोन आ ङोंइती ङा दाक्शो क्येङा नोले ङा ग्रांग्रा दिशो शुश बाक्माक्त। मिनु अम्नोनम मेको कली “बोक्शा लावो” दे मदा बाक्त।
16 मिनु तामारमी “ममाइ, आं लोक्ब, इ पशो गेय क्येङा यो आं कली ग्रुंइशा सोइक्चा थम मरिम्शो बाक्ब” देंमाक्त। तन्न अम्नोनम मेको आ लोव़ मनेना बाक्त।
17 मिनु अम्नोनम आ गेय पाइब वोंइश आल कली ब्रेश्शा “एको मीश मुर कली आं ङोंइती रे ग्रुंइदो। एको कली ग्रुंइशा आग्लो पतो” देंमाक्त।
18 तामारमी कन्ने मीश आल पिप आ तमीमी फेक्तीक लाइश्शो वा फेक्शो बाक्माक्त। मिनु अम्नोन आ गेय पाइब वोंइश आलम तामार कली ग्रुंइशा, आ नोले लाप्चोम आग्लो पदा बाक्त।
19 मिनु तामारमी आ पियाम पुलु फुंइसीशा, आ लाइश्शो वा खाक्गा बाक्त। मिनु आ पियाम गुइ वोइश्शा ठेयब सेंदा पा ङाक्ना ङाक्न लमाक्त।
20 मेको आ लोक्ब अब्सालोमम “मार, इ लोक्ब अम्नोन गे नु इम्मे? मुल आं समी सिक्सी पा बाक्को। मेको इ लोक्ब बाक्ब। सुर्ता मपावो” देंमाक्त। मोपतीके तामार आ लोक्ब अब्सालोम आ खिंमी प्रोंइचा पुंइसीशो मीश मुर खोदेंशो पा बाक्माक्त।
21 मिनु पिप दाऊदम मेको लोव़ नेंशा थाम्पा गाइक्ता बाक्त। तन्न अम्नोन कली सजाइ मगेवा बाक्त। मारदे हना आ दाक्शो ङोंइती ङा तौ बाक्माक्त।
22 अब्सालोमम अम्नोन कली रिम्शो मरिम्शो मारेइ लोव़ मपवा बाक्त। आ समी तामार कली बिथोलो सेल्तीके अब्सालोमम अम्नोन कली काइ मदाक्ता बाक्त।
23 बर्स निक्शी नोले अब्सालोमम आ भेडा आन ऊन प्रेक्चा कली मुर आन कली ब्रेत्ता बाक्त। मेको एफ्राइम आ नेक्था बाल-हजोरम बाक्माक्त। मिनु मेको भोजमी पिप आ तौ नेल्ल आन कली ब्रेत्तीमी बाक्त।
24 अब्सालोमम पिप आ बाक्तीक जाक्शा “गो, इन गेय पाइबम, ऊन प्रेक्तीक चाड मानेशो बाक्नुङ। पिप नु इन गेय पाइबपुकी यो गो नु गाक्कीन” देंमाक्त।
25 तन्न पिपमी “ममाइ, आं तौ, गो नेल्ल जाक्शा इ कली श्येत मगेनीकी” देंमाक्त। अब्सालोमम “जाक्कीन कि जाक्कीन” देंमाक्त। मिनु पिप मबिस्से बाक्त। तन्न आसीक गेशा सोइक्ता बाक्त।
26 मिनु अब्सालोमम “गे जाक्ने मचाप्नीनी हना यो, आं लोक्ब अम्नोन कली गो नु लचा गेनीनी कों?” देंमाक्त। मिनु पिपमी “मारदे मेको गे नु लाइबा?” दे हिल्लो पवा बाक्त।
27 तन्न दाऊदम अम्नोन नु अरु आ तौ मसोइक्ता सम्म अब्सालोमम देंस ङा देंस पवा बाक्त। मिनु अब्सालोमम पिप आन कली गारचा ङा ठेयब भोज सेला बाक्त।
28 मेकोम आ गेय पाइब आन कली “रिम्शा बाक्कीन। अम्नोन अङगुर शांबुम दुक्त हना, गो ‘मेको कली सतीन’ देंनुङ। मिनु गे मेको कली सतीन। मारेइ हिंचा ममाल्नीनी। एको आं हुकुम बाक्ब। महिंथु बाक्कीन” दे माइक्मी बाक्त। लेवी २०:१७
29 मिनु अब्सालोम आ गेय पाइबपुकीम आ देंशो खोदेंशो पा अम्नोन कली पामे बाक्त। मिनु पिप आ तौ नेल्ल आन आन खच्चर ङोइश्शा डांडा रे खिं प्रोक्मा बाक्त।
30 मेकोपुकी लांम बाक्न बाक्ना पिप कली “अब्सालोमम पिप आ तौ नेल्ल आन कली साइक्तु। सुइ मब्रोंइम” देंशो लोव़ चाक्दीत्मे बाक्त।
31 मिनु पिप बोक्शा आ वा खाक्गा बाक्त। मिनु खपीम निस्से बाक्त। मेको आ एर ओंथ बाक्ब आ गेय पाइब नेल्लेमी यो आन वा खाक्गमे बाक्त।
32 मिनु दाऊद आ लोक्ब शिमेआह आ तौ योनादाबम “आं प्रभु, मेकोमी पिप आ तौ नेल्ल साइक्तु, दे ममिम्तीन। अम्नोन कली ला साइश्शो बाक्ब। अम्नोनम तामार कली बिथोलो सेला नाक्त रे अब्सालोम आ कुल राव किक्शो तांइसीशो बाक्ब।
33 आं प्रभु, पिप आ तौ नेल्ल आन कली साइक्तु देंशो जोल लोव़ मनेनीन। अम्नोन ला साइक्चा पुंइसाक्व” देंमाक्त।
34 मिनु अब्सालोम प्रोक्शा गाक्माक्त। मेना कोव़ब मुरुमी इर गे कोव़ङानु, होरोनाइम डांडा रे पा मुर आन हुल यिशो तवा बाक्त।
35 मिनु योनादाबम पिप कली “गो इन गेय पाइब, आं देंशो खोदेंशो पा पिप आ तौपुकी यिना यिन बाक्नीम” देंमाक्त।
36 मेकोम लोव़ पने थुमानु, पिप आ तौपुकी खिंङगा ओव़शा ठेयब सेंदा पा ङाक्मा बाक्त। पिप नु आ गेय पाइब मुरपुकी यो हुइ हुइ पा ङाक्मा बाक्त।
37 तन्न अब्सालोम प्रोक्शा गेशुर ङा पिप अम्मीहुद आ तौ तल्मै आ बाक्तीक लशा बाक्माक्त। दाऊद आ तौ आ पर्बम शुश नाक्त सम्म रोंका पवा बाक्त।
38 अब्सालोम गेशुरम प्रोक्म रे बर्स सां सम्म मेक उइ बाक्माक्त।
39 अम्नोन बेक्शो शुश दुम नोले, पिपमी आ थुं अब्सालोम गे हिरदा बाक्त। २सामुएल ३:३; २सामुएल १४:२३; यहोसु १३:११