2 Samuel 12 in Sunwar

1 परमप्रभु यावेमी आ लोव़ पाइब नाथान कली दाऊद आ बाक्‍तीक सोइक्‍ता बाक्‍त। मिनु मेको दाऊद आ बाक्‍तीक जाक्‍शा, मेको कली “सहर कामी मुर निक्‍शी बाक्‍सा बाक्‍त। मुर का शोंप पाइश्‍शो नु का प्रुङग बाक्‍माक्‍त। प्रस्‍थान २०:१७

2 शोंप पाइश्‍शो मुर के शुश क्‍यारश भेडा नु बी ब्‍यफ बाक्‍मा बाक्‍त।

3 मेको प्रुङग मुर के पाठी का ला बाक्‍माक्‍त। मेको कली ग्‍याप्‍शो बाक्‍माक्‍त। मेको पाठी कली थुल्‍शा, आ आलपुकी नु कोल्‍पदा बाक्‍त। मिनु मेकोमी मेको आ भाग जशा तूशा बाक्‍बाक्‍माक्‍त। मेको आ थुकुमीन इप्‍बाक्‍माक्‍त। मिनु मेको मुरुमी मेको पाठी कली आ तमी खोदेंशोन पाइक्‍बाक्‍माक्‍त।

4 काबु नाक्‍ती मेको शोंप पाइश्‍शो मुर आ खिंम पौना का जाक्‍माक्‍त। मेको शोंप पाइश्‍शो मुरुम आ पौना कली थुल्‍चा कली आ क्‍यारश भेडा रे मारेइ गेचा थुं मपवा बाक्‍त। तन्‍न मेको प्रुङग मुर आ पाठी चाक्‍शा आ पौना कली जचा ब्‍वचा थोव़क सेला बाक्‍त” दे मदा बाक्‍त।

5 मिनु दाऊदम मेको लोव़ नेंशा, मो पाइब मुर आ पर्बम थाम्‍पा गाइक्‍ता बाक्‍त। मिनु मेकोमी नाथान कली “परमप्रभु यावे ब्रोंइशा बाक्‍शो खोदेंशो पा मेको मुर साइक्‍चा पुंइसीब।

6 मेकोम मोपा शिशी मकोंइतीके मेको पाठी का के ४ ओटा पाठी गेचा माल्‍ब” देंमाक्‍त। प्रस्‍थान २१:३७

7 मिनु नाथानम दाऊद कली “मेको मुर गेन ननी। इस्राएली आन परमप्रभु यावेमी मार देंत देंशा हना ‘गो इ कली तेल लुक्‍शा, इस्राएल ङा पिप सेल्‍तन। सावल आ गुइ रे प्रोंइतन। १राजा २०:४०

8 गो इ कली इ होव़प आ खिं नु आ मीशपुकी गे‍तन। गो इस्राएल नु यहूदा ङा मुर इ कली गेतन। मोशोम मगाप्‍ते हना यो, गो अरु शुश गेन वा।

9 गे मारदे आं लोव़ मटिवी? मारदे आं ङोंइती मरिम्‍शो पवी? गे हित्ती उरीयाह कली तरवारम क्‍योरतीवी। मिनु मेको आ मीश लाइश्‍शा, आ वोंइश कली अम्‍मोनी आन गुइम साइक्‍पाइक्‍तीवी। २सामुएल ११:-; १राजा १५:५

10 मोपतीके इ खिं गेना हना यो तरवार रे नाइक्‍चा मताइब। मारदे हना गे आं लोव़ मटिथु, हित्ती उरीयाह आ मीश चाक्‍तीवी’ दें‍त। २सामुएल १३:२८-२९; २सामुएल १८:१४; १राजा २:२४-२५; २राजा २५:७

11 परमप्रभु यावेमी ‘गो इ कली इ खिं रे श्‍येत दुम्‍पाइक्‍नुङ। गो इ मीश आन कली इ ङोंइती इ नेक्‍था ङा मुर कली गेनुङ। मिनु मेकोमी नाक्‍तीन मुर नेल्‍लेम तचा ङा पा मेकोपुकी नु इप्‍ब। २सामुएल १६:२२; अय्‍युब ३१:९-१०

12 मारदे हना गे मेको ख्रुइश्‍शा पाप्‍तीवी। तन्‍न गो इस्राएली नेल्‍ल आन तचा ङा पा नाक्‍तीन पाइ‍नुङ’ देंशो बाक्‍ब” दे नाथानमी देंमाक्‍त।

13 मिनु दाऊदमी नाथान कली “गो परमप्रभु यावे आ ङोंइती पाप पाता” देंमाक्‍त। मिनु नाथानम मेको कली “परमप्रभु यावेमी इ पाप क्‍याम्‍ताक्‍व। गे मबेक्‍नेवे। २सामुएल २४:१०; भजन संग्रह ५१:३; इजीकीएल १८:२१-२३

14 तन्‍न गे एको पाप पा परमप्रभु यावे कली गाइक्‍पाइक्‍तीवी। मोपतीके इ थिशो आल चहिं बेक्‍ब” देंमाक्‍त। २सामुएल ११:२७

15 मिनु नाथान आ खिं लमाक्‍त। परमप्रभु यावेम उरीयाह आ मीश रे पा जरमेशो दाऊद आ आल कली रोइ पपदा बाक्‍त।

16 मोपतीके दाऊदम मेको आल आ पर्बम परमप्रभु कली पुना बाक्‍त। मेको मारेइ मजथु खिंङगा लशा खपीम गोल्‍शा नां सोंइदा बाक्‍त।

17 खिं ङा खाल्‍पापुकीमी मेको कली “गे बोक्‍कीन” देंमा बाक्‍त। तन्‍न मेको मबिस्‍से बाक्‍त। मिनु मेकोपुकी नु जने यो मबिस्‍से बाक्‍त।

18 मिनु ७ नाक्‍त नोले आल बेक्‍माक्‍त। मिनु दाऊद आ गेय पाइबपुकीम “आल बेक्‍त” दे दाऊद कली देंचा हिंमा बाक्‍त। मारदे हना मेकोपुकीमी “आल सेस बाक्‍मेनु ला यो इं लोव़ मनेंन। मुल मेको कली ‘आल बेक्‍त’ दे दोपा देंचा? मेकोमी आंम आ कली मारेइ मरिम्‍शो पाइक्‍बा कों?” देंमा बाक्‍त।

19 तन्‍न दाऊदम आ गेय पाइ‍बपुकीम शिप शिप पा देंशो लोव़ नेंशा, आल बेक्‍माक्‍त, दे तुइक्‍ता बाक्‍त। मिनु दाऊदमी आ गेय पाइब आन कली “आल बेक्‍मे” दे हिल्‍लो पामी बाक्‍त। मिनु मेकोपुकीम “बेक्‍त” देंमा बाक्‍त।

20 मिनु दाऊद खप रे बोक्‍शा, चिक्‍सीशा, तेल ख्रेक्‍सीशा, अर्को वा फेक्‍से बाक्‍त। मिनु परमप्रभु यावे आ बाक्‍तीक लशा, परमप्रभु यावे कली ठेयब से‍ला बाक्‍त। मिनु नोले खिं जाक्‍शा, जचा थोव़क पुंइशा, जवा बाक्‍त।

21 मिनु मेको आ गेय पाइबपुकीम मेको कली “गे मार पनी? आल सेस बाक्‍म सम्‍म गे मेको आ पर्बम मारेइ मजथु ङाक्‍शा बाक्‍तीनी। तन्‍न आल बेक्‍म नोले बोक्‍शा जाइतीनी” देंमा बाक्‍त।

22 मिनु दाऊदमी “आल सेस बाक्‍म सम्‍म गो मारेइ मजथु ङाक्‍शा बाक्‍ती। परमप्रभु यावेमी आं कली शिशी पा, आल ब्रोंइबा, कों? दे मिम्‍ताक्‍ङ।

23 तन्‍न मुल मेको बेक्‍त। मारदे गो मारेइ मजथु बाक्‍नुङा? मार गो मेको कली लेश्‍शा चाक्‍ने चाप्‍नुङा ङा? गो मेको आ बाक्‍तीक लाइनुङ। तन्‍न मेको आं बाक्‍तीक लेश्‍शा मजाक्‍ब” देंमाक्‍त।

24 मिनु दाऊदमी आ मीश बाथ्‍शेबा कली लेम्‍दा बाक्‍त। मिनु मेको नु इम्‍माक्‍त। मिनु अर्को तौ का थि‍माक्‍त। मेको आ नें सोलोमन वोदमे बाक्‍त। मिनु परमप्रभु यावेमी मेको कली दाक्‍ता बाक्‍त।

25 मिनु मेको आ नें येदीदीयाह वोइक्‍चा माल्ब, दे आ लोव़ पाइब नाथान रे पा दाऊद कली लोव़ सोइक्‍ता बाक्‍त। येदीदीयाह आ अर्थ चहिं “परमप्रभु यावे आ दाक्‍शो मुर” बाक्‍ब।

26 मेको नोले योआबमी लडाइ पा अम्‍मोनी आन पिप आ रब्‍बाह सहर, ग्रामाक्‍त।

27 मेकोमी “गो रब्‍बाहम लडाइ पा मेको शुश ब्‍वाक्‍कु बाक्‍शो सहर ग्राती।

28 गेमी लीशो मुर आन कली खुप्‍शा, मेको सहर कली लडाइ तोशा ग्राङीन। मो मपाइतीनी हना, गो आं के सेल्‍नुङ। मिनु मेको सहर आं के दुम्‍ब” दे दाऊद कली लोव़ सोइक्‍ता बाक्‍त।

29 मोपतीके दाऊदम मुर नेल्‍ल आन कली खुप्‍तीमी बाक्‍त। मिनु रब्‍बाह सहर लमाक्‍त। मिनु लडाइ तोशा मेको आइक्‍के सेला बाक्‍त।

30 मेकोमी मिल्‍कोम आ पिया रे सिरपेच प्रुदा बाक्‍त। मेको टलेन्ट का सुन के बाक्‍माक्‍त। मेको तारी हीरा का यो क्‍येप्‍शो बाक्‍माक्‍त। मेको दाऊद कली गुक्‍त्‍मे बाक्‍त। मेकोम सहर रे शुश मार मार यो रोइश्‍शा चाक्‍गा बाक्‍त। टलेन्‍ट का ३४ किलो खोइ बाक्‍ब।

31 मेकोमी मेकेर ङा मुर आन कली लाइश्‍शा आरा, खन्‍ती नु खामी गेय पपदा बाक्‍त। मिनु इंटा सेल्‍तीकेम गेय पपदा बाक्‍त। मेको अम्‍मोनी आन सहर नेल्‍लेम मोदेंशो पवा बाक्‍त। मिनु नोले दाऊद नु आ मुर नेल्‍ल यरूसलेम लेम्‍मा बाक्‍त।