2 Samuel 10 in Sunwar
1 मिनु नोले अम्मोनी आन पिप बेक्माक्त। मिनु मेको आ पा ङा आ तौ हानुन पिप दुम्माक्त।
2 दाऊदम “नाहाशमी आं कली रिम्शो पशो खोदेंशो पा गो नाहाश आं तौ हानुन कली रिम्शो पाइनुङ” दे मिम्ता बाक्त। मिनु मेकोमी आ आफ बेक्शो आ पर्बम लेम्शो लोव़ नेंपाइक्थ लोव़ कुरब मुर आन कली सोइक्ता बाक्त। मिनु दाऊद आ मुरपुकी अम्मोनी आन रागीम ओव़मानु, १सामुएल ११:१
3 अम्मोनी आन कली सासन पाइबम आन प्रभु हानुन कली “दाऊदमी इन आफ कली ठेयब सेल्चा आ पर्बम इन कली लेम्शो लोव़ नेंपाइक्थ सोइश्शो बाक्ब, दे थमा सुइक्नीनी? एको मुरपुकी क्यारी पाइब नम। दाऊदमी एको आन कली इन सहर दोपा ओव़चा, दे क्यारी पथ सोइश्शो बाक्ब” देंमा बाक्त।
4 मोपतीके हानुनमी दाऊद आ सोइश्शो मुर आन कली ग्याइश्शा, आन गल शोक्रे उइक्थ उइक्थ ख्रोइश्शा नु आन फेक्शो वा क्रातो सम्म ख्रोइश्शा सोइक्तीमी बाक्त।
5 मेको आन कली मो पशो दाऊदम नेना बाक्त। मिनु दाऊदमी मेको आन कली ग्रुम्थ मुर सोइक्ता बाक्त। मारदे हना मेकोपुकी थम मुने तोक्चा पुंइसमा बाक्त। मिनु दाऊदमी “मेको आन गल शोक्रे ङोंइती ङा खोदेंशो मदुम सम्म यरीको सहरमी बाक्मल” देंमाक्त।
6 मिनु अम्मोन ङा मुरपुकीमी दाऊद कली गाइक्पाइश्शो तुइक्तमे बाक्त। मिनु अम्मोन ङा मुरपुकीम बेथ-रेहोब, सोबाह ङा २० हजार मुर नु अराम ङा खोइलीम गाक्ब लडाइ पाइब आन कली गाल्च थाप्शा चाक्गमे बाक्त। मेकोपुकीम माकाह ङा पिप नु हजार का मुर नु तोब रागी रे १२ हजार मुरपुकी गाल्च थाप्शा चाक्गमे बाक्त।
7 दाऊदम मेको लोव़ नेंशा, योआब नु लडाइ पाइब नेल्ल आन कली सोइक्तीमी बाक्त।
8 अम्मोन ङा मुर जाक्शा सहर ओव़तीक ठेयब लाप्चोमी ठीक दुम्मा बाक्त। तन्न सोबाह, रेहोब सहर ङा, अराम ङा मुरपुकी नु तोब नु माकाह रागी ङा मुरपुकी चहिं दिंमम लडाइ पचा कली ठीक दुम्मा बाक्त।
9 योआबम आ ङोंइती नु नोले निम्फा पटटी रे लडाइ तोचशो तवा बाक्त। मिनु मेकोमी इस्राएल ङा योव़शो मुर आन कली अरामी आन ङोंइती वोइक्मी बाक्त।
10 लीशो मुर चहिं आ लोक्ब अबीशै आ हुकुममी गेमी बाक्त। मेकोपुकी अम्मोनी आन ङोंइती लडाइ तोचा कली ठीक दुम्मा बाक्त।
11 योआबम “अराम ङा मुरपुकीम आंइ कली ग्राना ग्रान पिम्तेक्म हना, आंइ कली वारच पने। अम्मोन ङा मुरपुकीम इन कली ग्राना ग्रान पिम्तेक्म हना, गो इन कली वारच पाइनीकी।
12 सक्ति पाइश्शो बोल्यो दुमीन। गो आंम मुरपुकी नु आंम परमप्रभु आ सहर आ पर्बम महिंथु, लडाइ पय। मिनु परमप्रभु यावेमी आ दाक्शो पवल” देंमाक्त।
13 मिनु योआब नु आ मुरपुकी अरामी नु लडाइ पामे बाक्त। मिनु अरामी मेको आन ङोंइती रे प्रोक्मा बाक्त।
14 मिनु अम्मोनीपुकीम अराम ङा मुर आन कली प्रोक्शो तशा, आं यो अबीशै आ ङोंइती रे प्रोक्शा, आन सहर ओव़मा बाक्त। मिनु योआब अम्मोनी नु लडाइ पचा प्रोंइशा, लेश्शा यरूसलेम जाक्माक्त।
15 तन्न अरामी इस्राएली नु ब्रुशो तशा, लेंशा बुक्मा बाक्त।
16 हादादेजेरमी युफ्रेटीस खोला आ आइक्ची हांबु रे अरामी आन कली ब्रेत्थ सोइक्तीमी बाक्त। मिनु मेकोपुकी हादादेजेर आ लडाइ पाइब आन ठेयब मुर शोबाक आ हुकुममी हेलाम सहरम जाक्मा बाक्त।
17 मिनु दाऊदमी मेकोपुकी लडाइ पथ पिशो लोव़ नेना बाक्त। मिनु मेकोम रीब पा इस्राएल ङा लडाइ पाइब नेल्ल आन कली खुप्शा यर्दन आइक्ची हांबु शोक्से बाक्त। मिनु हेलाम सहरम जाक्मा बाक्त। मेकेर अरामीपुकी दाऊद नु लडाइ पचा कली ठीक दुम्मा बाक्त। मिनु लडाइ पामे बाक्त।
18 तन्न इस्राएलीपुकीम मेको आन कली प्रोक्पदमे बाक्त। मेकेर दाऊदमी ७ सहे बग्गी ङोइक्ब नु ४० हजार शारा ङोइक्ब अरामी आन कली सदा बाक्त। लडाइ पाइब आन ठेयब मुर शोबाक कली बेक्चा ङा पा गार सेला बाक्त। मिनु मेको लडाइ पतीकेमीन बेक्माक्त।
19 मिनु हादादेजेर कली वारच पाइब पिप नेल्लेमी इस्राएली नु ब्रुशो, दे तुइश्शा, इस्राएली नु गारचा गोव़मे बाक्त। मिनु इस्राएली आन हुकुममी बाक्ने बिस्समा बाक्त। मेना रे अराम ङा मुरपुकीम अम्मोनी आन कली लेंशा गेनायो वारच मपदमे बाक्त।