2 Kings 9 in Sunwar

1 परमप्रभु यावे आ लोव़ पाइब एलीशामी परमप्रभु यावे आ लोव़ पाइब आन हुल ङा का कली ब्रेश्‍शा “इ किप्‍शुर किप्‍शा, एको तेल कुरशा रामोथ-गिलादम लावो।

2 मिनु मेक जाक्‍दीश्‍शा, निम्‍शी आ चच, येहो-शाफात आ तौ येहू कली मालो। मिनु मेको कली आ वारचपुकी रे फ्राशा, आगा ङा कोठाम लतो।

3 मिनु नोले मेको तेल मेको आ पियाम लुक्‍शा ‘परमप्रभु यावेम इ कली इस्राएल ङा पिप सेल्‍ता’ देंशो बाक्‍ब, दे मतो। मिनु लाप्‍चो ग्रु रोक्‍शा प्रोक्‍को। देश मपावो” दे मदा बाक्‍त। १राजा १९:१६

4 मोपतीके परमप्रभु यावे आ लोव़ पाइब, ठिटा रामोथ-गिलादमी लमाक्‍त।

5 मिनु मेको मेक जाक्‍दीम्‍मेनु, येहू लडाइ पाइब आन ठेयब मुरपुकी नु ग्रुम्‍शा काथा बाक्‍शो थिम्‍मी बाक्‍त। मिनु मेकोम येहू कली “लडाइ पाइब आन ठेयब मुरपुकी, गो इन नु लोव़ का पचा माल्‍‍नुङ” देंमाक्‍त। मिनु येहूम “गो आंइ दाते ङा सु नु लोव़ पचा माल्‍नेवे?” देंमाक्‍त। मिनु मेकोम “इन नु” देंमाक्‍त।

6 मिनु येहू बोक्‍शा, आगा ङा कोठाम ओव़माक्‍त। मिनु मेको ठिटाम येहू आ पियाम तेल लुक्‍शा “परमप्रभु यावे, इस्राएली आन परमप्रभुमी ‘गो इ कली आं मुर इस्राएली आन पिप सेल्‍तन।

7 गे इ होव़प आहाब आ खिं ङा मुर आन कली साइक्‍चा माल्‍नेवे। मिनु इजेबेलमी आं गेय पा आं लोव़ पाइबपुकी नु आं गेय पाइब मुर आन कली साइश्‍शो आ क्‍येक्‍क लेत्‍नुङ।

8 आहाब आ खिं ङा मुर नेल्‍ल बेक्‍चा माल्‍नीम। इस्राएलम मेको आ खिं ङा वोंइश मुर वाइल बाक्‍मल कि मबाक्‍मल, गो नेल्‍ल आन कली साइक्‍नुङमी। १राजा १४:१०

9 गो आहाब आ खिं कली नेबात आ तौ येरोबाम नु अहीयाह आ तौ बाशा आस खिं खोदेंशो सेल्‍नुङ। १राजा १५:२९; १राजा १६:३,११

10 इजेबेल कली चहिं येज्रेल ङा रू काम कुचुमम ब्‍वाइनीम। मेको कली सुइम मथिम्‍नीम’ देंशो बाक्‍ब” देंशा, मेको लाप्‍चो ग्रु रोक्‍शा दोरशा प्रोक्‍माक्‍त। १राजा २१:२३

11 मिनु येहू मेको नोले लडाइ पाइब आन ठेयब मुर आन बाक्‍तीक जाक्‍माक्‍त। मिनु मेकोपुकीम मेको कली “मार नेल्‍ल रिम्‍शोन बाक्‍बा? मेको आ निप्‍स ग्‍यशो मुर इ बाक्‍तीक मारदे जाक्‍म?” दे हिल्‍लो पामे बाक्‍त। मिनु येहूमी मेको आन कली “गे मेको मुर कली तुइक्‍नीनी। मिनु मेकोम मार देंबा, मेको यो तुइक्‍नीनी” दे माइक्‍मी बाक्‍त।

12 मिनु मेकोपुकीम “गे जोल पाइनीनी। आंइ कली थमा लोव़ पने” देंमा बाक्‍त। मिनु येहूम “मेकोमी आं कली मार देंत देंशा हना, परमप्रभु यावेमी ‘गो इ कली इस्राएल ङा पिप सेल्‍नुङ’ देंशो बाक्‍ब” दे माइक्‍मी बाक्‍त।

13 मिनु मेकोपुकीम रीब पा आन आ तार फेक्‍शो वा प्रुइश्‍शा, तला ङोइक्‍तीक थेंका ङा फुल्‍लु तार ब्रामे बाक्‍त। मिनु मेकोपुकीम तुराही ताप्‍शा, ठेयब सेंदा पा “येहू पिप दुम्‍त” देंमा बाक्‍त। मत्ती २१:७

14 मोपतीके निम्‍शी आ चच येहो-शाफात आ तौ येहूम येहोराम कली मरिम्‍शो पचा गोवा बाक्‍त। मिनु येहोराम नु इस्राएली नेल्‍ले अराम ङा पिप हजाएल आ जोरी सत्रु दुम्‍शा रामोथ-गिलाद कली खाल पामे बाक्‍त।

15 तन्‍न पिप येहोराम चहिं आ गार सापाइक्‍चा कली येज्रेल लशो बाक्‍माक्‍त। मेको गार अराम ङा पिप हजाएल नु लडाइ पवानु, अरामीपुकीम सेल्‍शो बाक्‍मा बाक्‍त। मिनु येहूमी मेको लडाइ पाइब आन ठेयब मुर आन कली “गे गो नु बाक्‍तीनी हना, सुइ मुर रामोथ-गिलाद सहर रे एको लोव़ शोव़चा कली येज्रेल रे ग्रूचा मतामेक्‍ल” देंमाक्‍त। २राजा ८:२८-२९

16 मिनु येहू आ बग्‍गीम ङोइश्‍शा येज्रेल लमाक्‍त। मारदे हना येहोराम मेकेर नाइश्‍शा बाक्‍माक्‍त। मिनु यहूदा ङा पिप अहाज्‍याह यो येहोराम कली कोव़थ मेक उइ बाक्‍शो बाक्‍माक्‍त।

17 मिनु येज्रेल सहर कली कोव़शा खाल पाइबमी येहू नु आ मुर आन कली जाक्‍शो तवा बाक्‍त। मिनु मेकोमी ठेयब सेंदा पा “गो हुल का लडाइ पाइब मुर पिशो तातामी” देंमाक्‍त। मिनु येहोराममी “शारा ङोइक्‍ब का मेको आन कली ग्रुम्‍थ सोइश्‍शा ‘मार, गे रिम्‍शो पथ जाक्‍शो बाक्‍नीनी?’ दे हिल्‍लो पपतो” देंमाक्‍त।

18 मिनु मेको शारा ङोइक्‍ब मुर येहू कली ग्रुम्‍थ लशा “पिपमी इन कली ‘मार, गे रिम्‍शो पथ जाक्‍नी?’ दे हिल्‍लो पाप्‍तु” देंमाक्‍त। मिनु येहूम “रिम्‍शो पथ जाक्‍ङल कि मरिम्‍शो पथ जाक्‍ङल, गे मारदे माल्‍दे? आं नोले खोइय्‍यी” दे मदा बाक्‍त। मिनु मेको कोव़शा खाल पाइबमी पिप कली “मेको लोव़ कुरबम मेको आन कली ग्रुम्‍चा दा ग्रुम्‍तु, तन्‍न मेको लेश्‍शा मजा” देंमाक्‍त।

19 मिनु पिपमी अर्को शारा ङोइक्‍ब सोइक्‍ता बाक्‍त। मिनु मेको, मेको आन नेक्‍था जाक्‍दीश्‍शा “पिपमी ‘गे रिम्‍शो पथ जाक्‍नी’ दे हिल्‍लो पाप्‍तु” देंमाक्‍त। मिनु येहूम “रिम्‍शो पथ जाक्‍ङल कि मरिम्‍शो पथ जाक्‍ङल इ कली मारदे माल्‍दे, आं नोले खोइय्‍यी” दे मदा बाक्‍त।

20 मिनु मेको कोव़शा खाल पाइबमी “मेको लोव़ कुर‍बमी मेको आन कली ग्रुम्‍चा दा ग्रुम्‍तु, तन्‍न मेको यो लेश्‍शा मजा। मेरे बग्‍गी दोरपाइक्‍ब दा निम्‍शी आ चच येहू बाक्‍त। मारदे हना मेकोम निप्‍स ग्‍यशो मुरुमी दोरपाइश्‍शो खोदेंशो पा दोरपाइक्‍ब” देंमाक्‍त।

21 मिनु येहोराममी “आं बग्‍गी ठीक पने” देंमाक्‍त। मिनु मेकोपुकीम मेको ठीक पामे बाक्‍त। मिनु इस्राएल ङा पिप येहोराम नु यहूदा ङा पिप अहाज्‍याह आस बग्‍गी ङोइश्‍शा येहू कली ग्रुम्‍थ लसा बाक्‍त। मिनु मेको निक्‍शीम येहू कली “येज्रेल सहर नाबोथ आ रूम ग्रुम्‍से बाक्‍त। १राजा २१:१

22 मिनु येहोरामम येहू कली तशा, मेको कली ‘येहू, गे मार रिम्‍शो मिम्‍शा ग्रुम्‍थ जाक्‍ङे?’ दे हिल्‍लो पवा बाक्‍त। तन्‍न येहूम इ ममा इजेबेलम आ ग्रांग्रा दिशो मूर्ति पूजा पाइब, टुना मुना पाइब। मिनु मार रिम्‍शो पा ग्रुम्‍थ जाक्‍नुङा?” देंमाक्‍त।

23 मिनु येहोराममी आ बग्‍गी लेश्‍शा अहाज्‍याह कली “अहाज्‍याह मरिम्‍शो दुम्‍त” देंना देंन प्रोक्‍माक्‍त।

24 मिनु येहूम आ लिब्रा कीशा येहोराम आ बला आ दातेमी आबा बाक्‍त। मिनु मेको ब्राम मेको आ लुङ‍गीर ख्रिदा बाक्‍त। मिनु मेको आ बग्‍गीमी गोल्‍माक्‍त।

25 मिनु येहूम आ लडाइ पाइब आन ठेयब मुर बिदकार कली “मेरे कली पोक्‍शा येज्रेली नाबोथ आ रूम ताइक्‍तो। गे नु गो मेको आ आफ आहाब नु शाराम काथ काथा लसानु, मेको आ पर्बम परमप्रभु यावेम लोव़ पशो गे तुइश्‍शो बाक्‍नेवे। १राजा २१:१९; यसैया १३:१; येरमीया २३:३३-४०

26 परमप्रभु यावेमी ‘गो सिनाक्‍ती नाबोथ नु मेको आ आल आन हुश ताता। मिनु गो थमा पा इ कली एको रूमी क्‍येक्‍क लेत्‍नुङ’ देंशो बाक्‍त। मोपतीके मेरे कली पोक्‍शा परमप्रभु यावे आ देंशो खोदेंशो पा मेको रूमीन ताइक्‍तो” दे मदा बाक्‍त।

27 मिनु यहूदा ङा पिप अहाज्‍याह मेको तशा, बेथ-हाग्‍गान लतीक लां गे प्रोक्‍माक्‍त। मिनु येहू मेको आ नो‍नोले खेदा पना पन लशा “मेरे कली यो सतीन” देंमाक्‍त। मिनु मेको कली इब्‍लाम ङा गुर ङा ग्‍येत्‍थ लतीक लांम आप्‍शा गार सेल्‍मे बाक्‍त। तन्‍न मेको प्रोक्‍शा मेगीददोम जाक्‍दीम्‍माक्‍त। मिनु मेक उइ बेक्‍माक्‍त। २इतिहास २२:७-९

28 मिनु मेको आ गेय पाइब ठेयब मुरपुकीम मेको आ बेक्‍शो रां यरूसलेमम लाइश्‍शा दाऊद आ सहरम मेको आ किकी पिप नु आ तुरसुम थिम्‍मे बाक्‍त।

29 आहाब आ तौ येहोरामम सासन पवा आ ११ बर्सम अहाज्‍याह यहूदा ङा पिप दुम्‍शो बाक्‍माक्‍त।

30 मिनु येहू येज्रेल सहरमी जाक्‍माक्‍त। मार मार दुम्‍मे, मेको नेल्‍ल इजेबेलम नेंशो बाक्‍माक्‍त। मिनु मेकोम आ मिक्‍चीम गाजल ख्रेक्‍से बाक्‍त। मिनु चां मिंसीशा झेल रे उइ लां गे कोव़ङा बाक्‍त।

31 मिनु येहू ठेयब लाप्‍चो रे ओव़माक्‍त। मिनु इजेबेलम “ए आंम होव़प कली साइक्‍ब जिम्री, मार, गे रिम्‍शो पथ जाक्‍ङे” दे मदा बाक्‍त। १राजा १६:९-१०

32 मिनु मेकोमी इर झेल गे कोव़शा ठेयब सेंदा पा “आं गे सु बाक्‍नी? सु बाक्‍नी?” देंमाक्‍त। मिनु का निक्‍शी दरवार ङा गेय पाइब मेको गे कोव़ङमे बाक्‍त।

33 मिनु येहूमी “मेको कली झेल रे ताइक्‍तीन” देंमाक्‍त। मिनु मेकोपुकीम इजेबेल कली उइ ताइक्‍तमे बाक्‍त। मिनु मेको आ हुश प्रेक्‍शा कोइ गारोमी नु कोइ शारा आन कली जुक्‍तमे बाक्‍त।

34 मेको नोले येहू आगा ओव़शा जचा तूचा थोव़क जवा तूङा बाक्‍त। मिनु मेकोमी “मेको सराप रशो मीश मुर कली लाइश्‍शा थिमीन। मारदे हना मेको पिप आ तमी बाक्‍ब” देंमाक्‍त।

35 मिनु मुरपुकी मेको कली थिम्‍चा कली उइ ब्रुम्‍मा बाक्‍त। तन्‍न मेकेर आ पिया, गुइ नु खोइल ङा लाक्‍शा अरु मारेइ मथिदमे बाक्‍त।

36 मिनु मेकोपुकी लेश्‍शा जाक्‍शा येहू कली शेंदमे बाक्‍त। मिनु मेकोमी “परमप्रभु यावेम आ गेय पाइब तिश्‍बे सहर ङा एलीया रे पा ‘इजेबेल कली येज्रेल सहरम कुचुमम ब्‍वाइनीम। १राजा २१:२३

37 इजेबेल आ बेक्‍शो रां येज्रेल सहरम मोव़ल खोदेंशो पा राक्‍ब। मिनु मेको कली एको इजेबेल बाक्ब, दे सुइम मतुइक्‍नीम’ देंशो बाक्‍ब” देंमाक्‍त।