2 Kings 8 in Sunwar

1 तेको मीश मुर आ तौ कली एलीशाम बेक्‍शो रे सेंशो बाक्‍मे, मेको मीश मुर कली एलीशाम “इ खिं ङा मुर नेल्‍ल मेकेर रे गाक्‍कीन। मिनु इच्‍का नाक्‍ती कली ते दुम्‍बा, मेक लशा बाक्‍कीन। मारदे हना परमप्रभु यावेम एको रागीम ७ बर्स सम्‍म अन्‍काल दुम्‍पाइक्‍ब” दे माइश्‍शो बाक्‍माक्‍त। २राजा ४:३५

2 मिनु मेको परमप्रभु आ मुरुम देंशो खोदेंशो पा, मेको मीश मुरुम पवा बाक्‍त। मिनु मेको आ खिं ङा मुर नेल्‍ल लाइश्‍शा लमाक्‍त। मिनु लशा पलिस्‍ती आन रागीम ७ बर्स सम्‍म बाक्‍मा बाक्‍त।

3 मिनु ७ बर्स नोले मेको पलिस्‍ती आन रागी रे लेश्‍शा जाक्‍माक्‍त। मिनु मेको आ रू नु खिं लेश्‍शा तचा कली पिप आ बाक्‍तीक लमाक्‍त।

4 मेना पिप चहिं परमप्रभु आ मुर आ गेय पाइब गेहाजी कली “एलीशाम पशो ठेयब ठेयब गेय नेल्‍ल आं कली शेंदी” दे मेको नु लोव़ पना पन बाक्‍शो बाक्‍माक्‍त।

5 मिनु गेहाजीम एलीशाम बेक्‍शो मुर आन कली दोपा सेंपदा, मेको नेल्‍ल पिप कली शेंना शेंन बाक्‍शो बाक्‍माक्‍त। मेना मेको आ तौ बेक्‍शो रे सेंपाइश्‍शो मीश मुर आ रू नु खिं लेश्‍शा तङल, दे पिप आ बाक्‍तीकेम कागज ब्रेक्‍शा गेथ जाक्‍माक्‍त। मिनु गेहाजीम “ए आं प्रभु पिप, एलीशाम बेक्‍शो रे सेंपाइश्‍शो। एको मीश मुर आ तौ बाक्‍ब। मिनु बेक्‍शो रे सेंसीशो आ तौ एकोन बाक्‍ब” देंमाक्‍त।

6 मिनु पिपमी मेको मीश मुर कली मेको आ पर्बम हिल्‍लो पवा बाक्‍त। मिनु मेकोमी यो शोव़ङा बाक्‍त। मिनु पिपम आ गेय पाइब ठेयब मुर का कली “एकोम आ रागी प्रोंइशा गाक्‍म नाक्‍त रे मुल सम्‍म ङा मेको रू ङा मारेइ मारेइ एको कली लेश्‍शा गेने” देंमाक्‍त।

7 मिनु एलीशा दमस्‍कस लमाक्‍त। मेना अराम ङा पिप बेन-हादाद रोइ पशो बाक्‍माक्‍त। मिनु मुरपुकीम पिप कली “परमप्रभु आ मुर एक जाक्‍शो बाक्‍ब” दे नेंपदमे बाक्‍त।

8 मिनु पिपमी हजाएल कली “कोसेली लाइश्‍शा, परमप्रभु आ मुर कली ग्रुम्‍थ लावो। मेको रे पा परमप्रभु यावे कली ‘गो एको रोइ रे सा‍नुङा देय मसा‍नुङा’ दे हिल्‍लो पपतो” दे अरेवा बाक्‍त।

9 मिनु हजाएलम दमस्‍कसम बाक्‍शो रिम्‍शो रिम्‍शो मारेइ मारेइ कोसेली ४० ओटा दल‍ओंठम कुरपाइश्‍शा लमाक्‍त। मिनु मेको आगा ओव़शा परमप्रभु यावे आ लोव़ पाइब आ ङोंइती राम्‍माक्‍त। मिनु मेकोम “इन तौ, अराम ङा पिप बेन-हादादमी आं कली ‘गो आं रोइ रे सानुङा देय मसानुङा’ दे हिल्‍लो पथ सोइक्‍ताक्‍यी” देंमाक्‍त।

10 मिनु एलीशाम मेको कली “लशा, पिप कली ‘गे थमा पा सानीनी’ दे मतो” देंमाक्‍त। तन्‍न एलीशाहमी “परमप्रभु यावेम आं कली ‘मेको थमा पा बेक्‍ब’ देंशो बाक्‍ब” देंमाक्‍त।

11 मिनु मेकोमी पर ङोशा, हजाएल कली कोव़स ङा कोव़स बाक्‍माक्‍त। मिनु हजाएल मुने पवा बाक्‍त। मिनु मेको परमप्रभु आ मुर ङाक्‍माक्‍त। लूका १९:४१-४४

12 मिनु हजाएलम “ए आं प्रभु, गे मारदे ङाक्‍नी?” दे हिल्‍लो पवा बाक्‍त। मिनु मेकोमी हजाएल कली “गेम इस्राएल ङा मुर आन कली काइ मरिम्‍शो पशो तुइक्‍नुङ। गे मेको आन दरवारम मी सुइक्‍नेवे। मिनु मेको आन ठिटा मुर आन कली तरवारम क्‍योरनेवे। मेको आन आइक्‍च आल आन कली खपीम राप्‍शा साइक्‍नेवे। मेको आन कोव़ज कुरशो मीश मुर आन कोव़ज पाक्‍नेवे” दे मदा बाक्‍त। २राजा १०:३२

13 मिनु हजाएलमी “गो महिक्‍शो, कुचुम खोदेंशो मुरुम ओदेंशो ठेयब गेय दोपा पने चाप्‍नुङ ङा?” देंमाक्‍त। मिनु एलीशाम “परमप्रभु यावेम गे अराम ङा पिप दुम्‍नेवे, दे आं कली कोंइशो बाक्‍ब” देंमाक्‍त। १राजा १९:१५

14 मेको नोले हजाएल एलीशा आ ङोंइती रे गाक्‍माक्‍त। मिनु आ होव़प बेन-हादाद आ बाक्‍तीक लेश्‍शा जाक्‍माक्‍त। मिनु बेन-हादादम “एलीशाम इ कली मार देंमे?” दे हिल्‍लो पवा बाक्‍त। मिनु मेकोमी “गे थमा पा सानीनी नें” दे मदा बाक्‍त।

15 तन्‍न आ दीसा हजाएलमी सुम्‍तीक वा का ब्‍वाक्‍कुम नुप्‍शा, पिप आ कुलुमी सुमा बाक्‍त। मिनु मोपा मेको पिप बेक्‍माक्‍त। मिनु बेन-हादाद आ पा ङा हजाएल पिप दुम्‍माक्‍त।

16 येहो-शाफात आ तौ येहोराम यहूदा ङा पिप दुम्‍शा, सासन पचा गोवा बाक्‍त। मेना इस्राएल ङा पिप आहाब आ तौ येहोराम पिप दुम्‍शो ५ बर्स दुम्‍शो बाक्‍माक्‍त। मेको निक्‍शी आस नें येहोराम बाक्‍त। मेको आस कली योराम यो देंमा बाक्‍त।१राजा २२:५१

17 येहोराम पिप दुम्‍मेनु, मेको ३२ बर्स दुम्‍शो बाक्‍माक्‍त। मिनु मेकोम यरूसलेममी ८ बर्स सासन पवा बाक्‍त।

18 मेको इस्राएल ङा पिप, आहाब आ खिं ङा मुर आन लांम गाक्‍माक्‍त। मारदे हना मेकोम आहाब आ तमी ग्‍युं‍वे पशो बाक्‍माक्‍त। मिनु मेकोम परमप्रभु यावे आ ङोंइती मार मरिम्‍शो बाक्‍मे, मेको पवा बाक्‍त।

19 मो हना यो परमप्रभु यावेमी आ गेय पाइब दाऊद आ पर्बम यहूदा कली मक्‍याम्‍दा बाक्‍त। मेकोमी दाऊद कली इ तौ चच का गेना हना यो पिप दुम्‍शा बाक्‍ब, दे कबल पशो बाक्‍माक्‍त। २सामुएल ७:११-१६; १राजा ११:३६

20 येहोरामम पिप पवा ना एदोम ङा मुरुमी यहूदा आ देंशो मटिथु, आंम आन पिप का सेल्‍मे बाक्‍त।

21 मोपतीके यहूदा ङा पिप येहोराम आ बग्‍गी नेल्‍ल लाइश्‍शा, आइक्‍ची हांबु जाइर सहरमी लमाक्‍त। मिनु एदोमीपुकीम येहोराम आ बग्‍गी नेल्‍ल नु आ लडाइ पाइब आन ठेयब मुर नेल्‍ल आन कली पुम्‍दमे बाक्‍त। मिनु मेको आ लडाइ पाइबपुकी चहिं प्रोक्‍शा, आन आन खिं लेम्‍मा बाक्‍त।

22 मोपतीके एदोम मुल सम्‍म यहूदा रे ब्राशो बाक्‍ब। मेना लिब्‍ना यो यहूदा आ देंशो मटिथु ब्रा‍शो बाक्‍माक्‍त।

23 मिनु यहूदा ङा पिप येहोराम आ पशो अरु गेय, मेको आ पशो नेल्‍ल, मार, मेको यहूदा ङा पिप आन इतिहासम ब्रेक्‍शो मबाक्‍बा ङा?

24 यहूदा ङा पिप येहोराम बेक्‍माक्‍त। मिनु मेको आ किकी पिपी नु दाऊद आ सहरमी थिम्‍चा पुंइसे बाक्‍त। मिनु मेको आ पा ङा आ तौ अहाज्‍याह पिप दुम्‍माक्‍त।

25 मिनु यहूदा ङा पिप येहोराम आ तौ अहाज्‍याह यहूदाम पिप दुम्‍माक्‍त। मेना इस्राएल ङा पिप आहाब आ तौ येहोराम पिप दुम्‍शो १२ बर्स दुम्‍शो बाक्माक्‍‍त।

26 अहाज्‍याह पिप दुम्‍मेनु २२ बर्स दुम्‍शो बाक्‍माक्‍त। मिनु मेकोम यरूसलेममी बर्स का सासन पवा बाक्‍त। मेको आ ममा आ नें अथाल्‍याह बाक्‍माक्‍त। मेको इस्राएल ङा पिप ओम्री आ चच बाक्‍माक्‍त। २राजा ११:१

27 अहाज्‍याह आहाब आ खिं ङा मुर आन लांम गाक्‍माक्‍त। मिनु आहाब आ खिं ङा मुरपुकीम खोदेंशो पा परमप्रभु यावे आ ङोंइती मार मरिम्‍शो बाक्‍मे, मेको पवा बाक्‍त। मारदे हना मेको आहाब आ चांइवा दुम्‍शो बाक्‍माक्‍त।

28 यहूदा ङा पिप अहाज्‍याह नु आहाब आ तौ इस्राएल ङा पिप येहोराम नु गारशा, अराम ङा पिप हजाएल नु लडाइ पचा कली रामोथ-गिलादम लमाक्‍त। तन्‍न अरामीपुकीम येहोराम कली गार सेल्‍मे बाक्‍त।

29 मिनु अराम ङा पिप हजाएल नु लडाइ पथ लमेनु, रामाहम गार दुम्‍शो रे साचा कली येहोराम येज्रेल सहरम लमाक्‍त। मिनु यहूदा ङा पिप येहोराम आ तौ अहाज्‍याह इस्राएल ङा पिप आहाब आ तौ येहोराम कली कोव़थ येज्रेल सहर लमाक्‍त। मारदे हना मेको कली गार दुम्‍शो बाक्‍माक्‍त। २राजा ९:१४-१६