2 Kings 7 in Sunwar
1 एलीशाम “परमप्रभु यावे आ लोव़ नेनीन। परमप्रभु यावेमी ‘दीसा सामरीया ङा ठेयब लाप्चो आ ङोंइती शेकेल का चांदीमी सेआह माइश्शो पुक्तीक का रिम्शो फस नु शेकेल का चांदीम पुक्तीक निक्शी क्योव़ज लेयसीब’ देंशो बाक्ब” देंमाक्त। शेकेल का ११.५ ग्राम खोदेंशो बाक्ब।सेआह का आगा ७,३ लिटर रिक्शो ठेयब पाथी खोदेंशो पुक्तीके बाक्ब। २राजा ७:१६-१९
2 मिनु पिप कली कुक्ब लडाइ पाइब आन ठेयब मुरुम परमप्रभु आ मुर कली “परमप्रभु यावेमी आ सरीङ ङा झेल नेल्ल रोक्तु हना यो, मोदेंशो गेनायो दुम्ने मचाप्ब” देंमाक्त। मिनु एलीशाम “गे मेको इ मिक्चीमीन ताइनेवे। तन्न जचा चहिं मताइक्नेवे” देंमाक्त।
3 मिनु मेको सहर ङा लाप्चो आ ङोंइती ४ जना कोव़र पशो मुर बाक्मा बाक्त। मिनु मेकोपुकीम “गो मबेक्या सम्म मारदे एकेर बाक्नया? लेवी १३:४६
4 गो सहर ओव़तय हना, मेकेर ङा अन्कालम बेक्नय। एक उइ बाक्तय हना यो, शोव़लुम बेक्नय। मोपतीके गो अरामी आन लडाइ पाइब आन बाक्तीकेम लशा, जिम्मा गेसय। मिनु मेकोपुकीम इ कली प्रोंइतेक्म हना, गो ब्रोंइनय। साइक्तेक्म हना, यो बेक्य” देंमुमा बाक्त।
5 मिनु मेकोपुकी नाक्नाक्दो बोक्शा अरामी आन बाक्तीक गे लमा बाक्त। मिनु मेकोपुकी अरामी आन बाक्तीक आ नेक्था जाक्मानु, सुइ आन कली मतामे बाक्त।
6 मारदे हना परमप्रभुमी अरामी आन कली शारा बग्गी नु ठेयब लडाइ पाइब हुल आन रेयके नेंपाइश्शो बाक्माक्त। मिनु मेकोपुकीम आंम आंमा “इस्राएल ङा पिपम गोपुकी नु लडाइ पचा कली हित्ती नु इजीप्त ङा पिप कली क्येट थाप्शा ब्रेत्तीमी बाक्त, थांका” देंमुमा बाक्त। २राजा १९:७
7 मोपतीक मेकोपुकीम आन बाक्तीक ताम्बु यो मो हेंथे पा प्रोंइशा, शारा नु गधा यो प्रोंइशा, आन गिंम पोंइचा कली प्रोक्मा बाक्त।
8 मिनु मेको कोव़र पशो मुर अरामी आन बाक्तीक जाक्दीम्मा बाक्त। मिनु मेकोपुकी ताम्बु काम ओव़शा जशा तूशा बाक्मा बाक्त। मिनु सुन चांदी वापुकी एर ओंथ लाइश्शा ख्रुइश्शा वोदमे बाक्त। मेको नोले मेकोपुकी लेंशा अर्को बाक्तीकेम ओव़मा बाक्त। मिनु मार मार लाइश्शा ख्रुइश्शा वोदमे बाक्त।
9 मिनु मेकोपुकी आंम आंमा “गो मरिम्शो गेय पाइतय। मुलाक्ती रिम्शो लोव़ नेंपाइक्तीक नाक्त बाक्ब। गोपुकी चहिं सिक्सी पा बाक्शो बाक्नय। दीसा सम्म गो ओं पा बाक्तय हना, दोस ताइनय। मुल गो रीब पा लशा, पिप आ दरवारम एको लोव़ नेंपाइय्य” देंमुमा बाक्त।
10 मिनु मेकोपुकी लशा, सहर ङा ठेयब लाप्चो खाल पाइब आन कली ब्रेश्शा “गोपुकी अरामी आन बाक्तीक लाइतक। मिनु मेकेर मुर का यो मतक। मारेइ चाल चुल मबा। शारा नु गधापुकी पाइक्स ङा पाइक्स बाक्तेक्म। मिनु मुर आन ताम्बु यो मो प्रोंइशो बाक्तेक्म” देंमा बाक्त।
11 मिनु लाप्चो खाल पाइबपुकीम ठेयब सेंदा पा मेको लोव़ पिप आ खिंम नेंपदमे बाक्त।
12 मिनु पिप नाक्दो कना बोक्शा, आ गेय पाइब मुर आन कली “गो इन कली लोव़ का पाइनुङ। अरामीपुकीम गो इं कली मार पामे? गो मेको इन कली देंनुङ। गोपुकी शोव़लु बाक्शो बाक्नय, दे मेकोपुकीम तुइश्शो बाक्नीम। मोदेंशो मिम्शा आन बाक्तीक प्रोंइशा, एर ओंथ लशा ख्रुइश्शा बाक्शो बाक्नीम। मेकोपुकीम ‘गोपुकी थमा पा ग्रूनीम। मिनु गो मेको आन कली सेसीन ग्याइश्शा, सहर ओव़नय’ देंशो बाक्नीम” दे माइक्मी बाक्त।
13 मिनु मेको आ गेय पाइब काम “इं सहर ङा ५ ओटा शारा आन कली कोव़थ सोइक्तीन। मेकोपुकी एको बेक्शो इस्राएली खोदेंशोन दुम्नीम। थमा पा मेकोपुकी एक बेक्ब इस्राएली खोदेंशोन दुम्नीम। मार दुम्शो बाक्मे, मेको तुइक्चा कली सोइक्तय” देंमाक्त।
14 मिनु मेकोपुकीम बग्गी निक्शी निक्निक्शी शारा ग्रुंइदमे बाक्त। मिनु पिपम मेको आन कली “अरामी लडाइ पाइब आन कली मार दुम्मे, मेको रुपीन” दे सोइक्तीमी बाक्त।
15 मिनु मेको यर्दन खोला सम्मन कोव़न कोव़न लमा बाक्त। मिनु अरामी नेल्लेम रीब पा प्रोक्मानु, लां नेल्ल मेको आन प्रोंइशो वासी नु यापुकी तामे बाक्त। मिनु क्यारी पथ लाइब मुरपुकी लेश्शा जाक्शा, मेको लोव़ पिप कली शेंदमे बाक्त।
16 मिनु मुरपुकी ग्रूशा, अरामी आन बाक्तीक ङा मार मार नेल्ल लदमे बाक्त। मिनु परमप्रभु यावे आ देंशो खोदेंशो पा सेआह पुक्तीक का रिम्शो फस शेकेल का चांदीम नु पुक्तीक निक्शी क्योव़ज शेकेल का चांदीम लेयङमे बाक्त। शेकेल का ११.५ ग्राम चांदी के क्येट बाक्ब।
17 मिनु पिप कली कुक्शा गाक्ब लडाइ पाइब आन ठेयब मुर कली लाप्चोम कोव़ब सेल्शा वोदमे बाक्त। मिनु मेको कली मुरपुकीम दिम्शा सदमे बाक्त। मिनु पिप मेको कली ग्रुम्थ आ खिंम लमेनु, परमप्रभु आ मुरुम देंशो खोदेंशो पा मेको कली मुरपुकीम ठेयब लाप्चोम दिम्शा साइश्शो बाक्मा बाक्त।
18 परमप्रभु आ मुरुम पिप कली “दीसा सेआह पुक्तीक का रिम्शो फस शेकेल का चांदीम नु पुक्तीक निक्शी क्योव़ज शेकेल का चांदीम सामरीया ङा ठेयब लाप्चो आ ङोंइती लेयसीब” देंशो बाक्माक्त।
19 मिनु मेको लडाइ पाइब आन ठेयब मुरुम परमप्रभु आ मुर कली “परमप्रभु यावेम आ सरीङ ङा झेल रोक्तु हना यो, मोदेंशो दुम्ने मचाप्ब” देंशो बाक्माक्त। मिनु परमप्रभु आ मुरुम “गे मेको मो पशो ताइनेवे, तन्न जचा चहिं मताइक्नेवे” देंशो बाक्माक्त।
20 मिनु मेको कली मोदेंशोन दुम्माक्त। मारदे हना मेको कली मुरपुकीम लाप्चोम दिम्शा सदमे बाक्त। मिनु मेको बेक्माक्त।