2 Kings 5 in Sunwar
1 नामान अराम ङा पिप आ लडाइ पाइब आन ठेयब मुर बाक्माक्त। मेको आ होव़पम मेको कली शुश दाक्बाक्माक्त। मेको शुश हिक्सीशो मुर का बाक्माक्त। मारदे हना मेकोम पतीकेन परमप्रभु यावेम अराम कली ग्रापाइश्शो बाक्माक्त। मिनु मेको थम सक्ति पाइश्शो लडाइ पाइब मुर यो बाक्माक्त। तन्न मेको कोव़र पशो बाक्माक्त।
2 मिनु अराम रे लडाइ पाइबपुकी लशा इस्राएल ङा मीश आल का कली ग्याइश्शा चाक्शो बाक्मा बाक्त। मिनु मेको नामान आ मीश आ गेय पाइब दुम्शो बाक्माक्त।
3 मिनु मेकोमी आ होव़पोक्म कली “आं होव़प, आं प्रभुमी सामरीयाम बाक्ब परमप्रभु यावे आ लोव़ पाइब कली ग्रुम्शो हना, मेकोमी आ कोव़र सापद वा” देंमाक्त।
4 मिनु नामान आ प्रभु पिप बाक्तीक लशा, मेको इस्राएल रे चाक्शो मीश आल आ देंशो लोव़ नेल्ल नेंपदा बाक्त।
5 मिनु अराम ङा पिपमी “दुम्ब, गे लावो। गो इस्राएल ङा पिप कली चिठी का ब्रेक्नुङ” देंमाक्त। मोपतीके नामान १० टलेन्ट चांदी, ६ हजार शेकेल सुन नु १० जोर फेक्तीक वा कुरशा लमाक्त। टलेन्ट का ३४ किलो बाक्ब। शेकेल का ११.५ ग्राम बाक्ब।
6 मिनु मेकोमी मेको चिठी इस्राएल ङा पिप आ बाक्तीक चाक्गा बाक्त। मेको चिठीम इस्राएल ङा पिप कली “गो एको चिठी नु आं गेय पाइब ठेयब मुर नामान कली इन बाक्तीक सोइक्ताक्ङ। गे मेको आ कोव़र सापतीन” दे ब्रेक्शो बाक्माक्त।
7 मिनु इस्राएल ङा पिपम मेको चिठी पढेवा चोटीन आ वा खाक्शा “मार, गो परमप्रभु नङा ङा? मिनु बेक्पाइक्ने नु सेंपाइक्ने चाप्नुङा? मेको मुरुम मारदे एको मुर कली आ कोव़र सापाइक्चा कली आं बाक्तीक सोइक्ता? मेकोम गो नु खुज्री माल्तु” देंमाक्त।
8 मिनु इस्राएल ङा पिपमी आ वा खाक्शो लोव़ परमप्रभु आ मुर एलीशाम नेना बाक्त। मिनु मेकोमी पिप कली “गे मारदे इन वा खाक्नी? मेको मुर कली एक आं बाक्तीक सोइक्तीन। मिनु मेकोमी इस्राएलमी परमप्रभु यावे आ लोव़ पाइब मुर का बाक्ब, दे तुइक्ब” दे लोव़ कुरब मुर सोइक्ता बाक्त।
9 मोपतीके नामान आ बग्गी नु शारापुकी चाक्शा जाक्माक्त। मिनु एलीशा आ खिं आ लाप्चोमी राम्माक्त।
10 मिनु एलीशाम मेको कली “गे लशा, यर्दन खोलाम ७ खेयप चिक्सीचा माल्नेवे। मिनु इन श्ये ङोंइती ङा खोदेंशो दुम्ब। मिनु गे ग्रांग्रा मदिशो दुम्नीनी” देंथ मुर का कली सोइक्ता बाक्त।
11 तन्न नामान गाइश्शा “गो मेको ग्रूशा राप्शा, थमा पा, परमप्रभु यावे, आ परमप्रभु आ नें थिशा पुंइशा, आं गार तार आ गुइ वोइश्शा, आं कोव़र सापाइक्ब, दे मिम्शो नङ।
12 मार, आबाना, फारपार नु दमस्कस ङा खोला मेर ङा ब्वाक्कु इस्राएल ङा ब्वाक्कु नेल्ल क्येङा रिम्शो ममाइ ङा? मार, गो मेकेर ङा ब्वाक्कुम चिक्शा साने मचाप्नुङा ङा?” दे गाइश्शा गाक्माक्त।
13 तन्न नामान आ गेय पाइबपुकी जाक्शा मेको कली “ए, आंइ आफ, मार परमप्रभु यावे आ लोव़ पाइबमी इन कली ‘श्येत ङा गेय का पने’ देंशो हना, गे मेको मपाइनीनी ङा? मेकोमी इन कली ‘ब्वाक्कुम चिक्शा ग्रांग्रा मदिशो दुमीन’ देंमेनु, मेको मारदे मपाइनीनी?” देंमा बाक्त।
14 मोपतीके मेको उइ ब्रुम्माक्त। मिनु परमप्रभु आ मुरुम देंशो खोदेंशो पा, यर्दन खोलाम ७ खेयप चिक्से बाक्त। मिनु मेको आ श्ये नु कुशुल ङोंइती ङा खोदेंशो पा ठिटा आन के खोदेंशो दुम्माक्त। मिनु मेको ग्रांग्रा मदिशो दुम्माक्त। लेवी १४:७-९; लूका ४:२७
15 मिनु मेको नु आ मुर नेल्ल लेश्शा परमप्रभु आ मुर बाक्तीके जाक्मा बाक्त। मिनु मेको एलीशा आ ङोंइती राप्शा “इस्राएलम ङा लाक्शा, अर्को तेकोइ रागीम परमप्रभु मबाक्माक्त। मुल गो तुइक्ताक्ङ। इन गेय पाइब आं गुइ रे कोसेली का ताक्कीन” देंमाक्त। २राजा ५:५
16 मिनु परमप्रभु यावे आ लोव़ पाइबमी “गो आ गेय पशो, परमप्रभु यावे ब्रोंइशा बाक्शो खोदेंशो पा, गो मारेइ मब्राइनुङ” देंमाक्त। नामानम मेको कली ताक्कीन कि ताक्कीन देंमाक्त। मो हना यो मेको मबिस्से बाक्त।
17 मिनु नामानमी “गे एको मताक्नीनी हना, इन गेय पाइब, आं कली भारी निक्शी गधाम कुरतीक खप लाइक्चा गेयीनी। मारदे हना मुल गो इन गेय पाइबम, परमप्रभु यावे कली ङा लाक्शा अरु तेकोइ देवी देवता आन कली चोशा चढ़ेतीक नु अरु चढ़ेतीक मचढ़ेनुङ।
18 तन्न एको गेय काम ला परमप्रभु यावेम इन गेय पाइब कली माफ गेवल। मेको आं होव़प रिम्मोन कली पूजा पथ लमेनु, आं गुइमी ग्याइक्पाइश्शा आगा ओव़ब। मिनु मेकोमी मेकेर पूजा पवानु, गो यो बाप्चा माल्नुङ। मोपतीके मेको आ पर्बम परमप्रभु यावेमी आ गेय पाइब, आं कली माफ गेयील” देंमाक्त।
19 मेको नोले एलीशाम मेको कली “इ थुं नाइश्शा लावो” दे मदा बाक्त। मिनु नामान गाक्शा इच्का आइक्ची जाक्दीम्मेनु,
20 परमप्रभु आ मुर एलीशा आ गेय पाइब गेहाजी आ थुंमी “एको आं होव़पमी दा एको अरामी नामान आ चाक्शो मारेइ मब्रथु लेश्शा कका सोइक्ताक्व। मुल गो परमप्रभु यावे ब्रोंइशा बाक्शो खोदेंशो पा, गो मेको आ नोले लशा मारेइ थोव़क ताक्नुङ” दे मिम्ता बाक्त।
21 मोपतीके गेहाजी नामान आ नोले दोरशा लमाक्त। मिनु नामानम मेको कली आ नोनोले दोरशा पिशो तवा बाक्त। मिनु मेको कली ग्रुम्चा कली नामान आ बग्गी रे तोइश्शा “मार नेल्ल ठीक बाक्बा?” दे हिल्लो पवा बाक्त।
22 मिनु गेहाजीम “मारेइ मदुम। तन्न आं होव़पमी आं कली एफ्राइम पहाड ङा परमप्रभु यावे आ लोव़ पाइब आन हुल रे ठिटा निक्शी जाक्ताक्स। मिनु शिशी पा मेको आस कली ‘टलेन्ट का चांदी नु जोर निक्शी वा गेने’ देंथ सोइक्ताक्यी” देंमाक्त। टलेन्ट का ३४ किलो बाक्ब।
23 मिनु नामानमी मेको कली “थमा पा गे टलेन्ट निक्शी लतीन” देंमाक्त। मिनु नामानमी गेहाजी कली “लतीन कि लतीन” दे मदा बाक्त। मिनु मेको कली टलेन्ट निक्शी चांदी नु जोर निक्शी वा थैलो निक्शीम कुर पा, फ्रेंशा गेवा बाक्त। मेकोमी मेको आ गेय पाइब निक्शी आस कली मेको कुरपाइश्शा गेहाजी कली चोव़थ सोइक्ता बाक्त। टलेन्ट का ३४ किलो बाक्ब।
24 मिनु मेको गेहाजी डांडाम जाक्शा, मेको गेय पाइब आस गुइ रे ताक्शो थोव़क आ खिंम वोदा बाक्त। मिनु मेको आस कली चहिं सोइक्तीम्सी बाक्त। मिनु मेको गाक्सा बाक्त।
25 मिनु मेको आगा लशा, आ होव़प एलीशा आ ङोंइती राम्माक्त। मिनु एलीशामी “गेहाजी गे ते लवे” दे हिल्लो पवा बाक्त। मिनु गेहाजीम “इन गेय पाइब, गो तेइ मलशो बाक्नुङ” देंमाक्त।
26 तन्न एलीशाम मेको कली “मार, मेको मुर आ बग्गी रे तोइश्शा इ कली ग्रुम्थ पिमेनु, आं सोक्त गे नु मबाक्म ङा? मुल क्येट, वा, तेल रवा, अङगुर रू, भेडा, ब्यफ नु वाइलीम वाइलपुकी आंम के सेल्तीक ना बाक्बा ङा?
27 मुल नामान आ कोव़र पतीक रोइ गे नु इ चच युइ इन खिंम गेना हना यो खोक्शा लीब” दे मदा बाक्त। मिनु गेहाजी मेको आ ङोंइती रे लमाक्त। मिनु मेको फुं खोदेंशो पा बुश पा कोव़र मुमाक्त।