2 Kings 3 in Sunwar
1 आहाब आ तौ येहोराम सामरीयाम इस्राएल ङा पिप दुम्माक्त। मिनु मेकोमी १२ बर्स सासन पवा बाक्त। मेना यहूदा ङा पिप येहो-शाफात पिप दुम्शो १८ बर्स दुम्शो बाक्माक्त। २राजा १:१७
2 मिनु येहोराममी परमप्रभु यावे आ ङोंइती मार मरिम्शो बाक्मे, मेको पवा बाक्त। तन्न मेको आ आंम आफोम पशो खोदेंशो चहिं ममाइ। मेकोमी आ आफ आ सेल्शो बाल आ थामपुकी प्रेदा बाक्त। १राजा १६:३२
3 मो हना यो मेकोमी नेबात आ तौ येरोबामम इस्राएली आन कली पपाइश्शो पाप मप्रोंइथु, पवा बाक्त।
4 मोआब ङा पिप मेशामी भेडा थुल्बाक्माक्त। मिनु मेकोमी गेना हना यो इस्राएल ङा पिप कली लाख का पाठा नु लाख का सांड आन ऊन गेबाक्माक्त।
5 तन्न आहाब बेक्म नोले मोआब ङा पिपमी इस्राएल ङा पिप कली मटिवा बाक्त।
6 मोपतीके पिप येहोराम सामरीया रे जाक्शा, इस्राएली नेल्ल आन कली खुप्तीमी बाक्त।
7 मिनु मेकोमी यहूदा ङा पिप येहो-शाफात कली “मोआब ङा पिपम आं कली मटीयी। गे आं कली मोआब ङा पिप नु लडाइ पचा कली वारच पाइक्नीनी” दे लोव़ कुरब मुर सोइक्तीमी बाक्त। मिनु मेकोमी “गो वारच पाइनुङ। गो गे नु बाक्नुङ। आं मुर इन मुर नम। आं शारा नेल्ल इन के नम” देंमाक्त। १राजा २२:४
8 मिनु येहो-शाफातमी “गो ते रे लडाइ तोय?” दे हिल्लो पवा बाक्त। मिनु येहोराममी “एदोम ङा गोरशो रागी रे” देंमाक्त।
9 मोपतीके इस्राएल ङा पिप, यहूदा ङा पिप नु एदोम ङा पिप गारशा, लडाइ पथ लमा बाक्त। मिनु मेकोपुकी ७ नाक्त सम्म गाक्मानु, लडाइ पाइब नु आन लाइश्शो बी ब्यफ आन कली तूतीक ब्वाक्कु मबाक्माक्त।
10 मिनु इस्राएल ङा पिपमी “आबी, परमप्रभु यावेमी गो पिप सां इं कली मोआबी आन गुइमी जिम्मा गेचा कली एक चाक्शो बाक्त” देंमाक्त।
11 तन्न येहो-शाफातमी “मार एकेर परमप्रभु यावे आ लोव़ पाइब सुइ मबाक्नीमी? मेको रे पा गो परमप्रभु यावे कली हिल्लो पने चाप्नीक” देंमाक्त। मिनु इस्राएल ङा पिप आ गेय पाइब आन दाते ङा काम “एलीया आ गुइम ब्वाक्कु लुक्ब शाफात आ तौ एलीशा एक बाक्ब” देंमाक्त। १राजा २२:५,७; १राजा १९:१९-२१
12 मिनु येहो-शाफातमी “परमप्रभु यावे आ लोव़ मेको नु बाक्ब” देंमाक्त। मोपतीके इस्राएल ङा पिप, येहो-शाफात नु एदोम ङा पिप एलीशा आ बाक्तीक ब्रुम्मा बाक्त।
13 मिनु एलीशाम इस्राएल ङा पिप कली “गे नु गो इस के मार बाक्बा ङा? इन आम आफ आस नोले दुम्ब लोव़ पाइब आन बाक्तीक लने” देंमाक्त। तन्न इस्राएल ङा पिपमी मेको कली “ममाइ, परमप्रभु यावेमी गो पिप सांफा आंइ कली मोआबी आन गुइमी जिम्मा गेचा कली एक चाक्शो बाक्ब” देंमाक्त।
14 मिनु एलीशामी “गो आं गेय पशो, मुर नेल्ल आन परमप्रभु यावे ब्रोंइशा बाक्शो खोदेंशो पा यहूदा ङा पिप येहो-शाफात कली मान मपशो नङ हना, गो इन कली मसेत्तु वा, मारेइ मसुदु वा” देंमाक्त। १राजा १८:१५
15 मिनु मेकोमी “तन्न मुल आं कली तार पाइश्शो ताप्तीके ताप्ब का चाक्कीन” देंमाक्त। मिनु मेकोमी तार पाइश्शो ताप्तीक ताप्बमी तबानु, परमप्रभु यावे आ सक्तिम एलीशा कली सुमा बाक्त। १सामुएल १६:१६
16 मिनु मेकोमी “परमप्रभु यावेमी ‘गे एको खोल्सा ङा दिंमम दोम्ली नु शुश खाल्टा दोन’ ” देंमाक्त।
17 मारदे हना परमप्रभु यावेमी “गे फश गिवार नु रेउ यिशो मताइनीनी। मो हना यो एको दिंम ब्वाक्कुम ब्रीब। मिनु गे, इन बी ब्यफ नु इन शाराम ब्वाक्कु तूनीनी।
18 एको परमप्रभु यावे आ ङोंइती आइक्च गेय का ला बाक्ब। मेकोमी मोआबी आन कली यो इन गुइम गेब।
19 गेपुकीम गारो हिरशो सहर नेल्ल नु ठेयब दारशो सहर नेल्ल ग्रानीनी। गेपुकीम रिम्शो रवा नेल्ल तिम्नीनी। मिनु ब्वाक्कु यितीक नेल्ल तेक्नीनी। मिनु रू नेल्लेम फुल्लु तेल्नीनी, देंशो बाक्ब” देंमाक्त।
20 मिनु आ दीसा सुनी चढ़ेची ना छक लाक्चा ङा पा एदोम रे ब्वाक्कु शाइश्शा यिचा गोवा बाक्त। मिनु रागी नेल्ल ब्वाक्कुम ब्रीमाक्त। गन्ती २८:४-५
21 मेना मोआबीपुकीम पिप नेल्ल गोपुकी नु लडाइ पथ जाक्शो बाक्नीम देंशो लोव़ नेन्मे बाक्त। मोपतीके या चलेने चाप्ब वोंइश मुर, ठिटा नु खाल्पा नेल्ल आन कली ब्रेत्मे बाक्त। मिनु मेको आन कली लडाइ पचा कली ठीक पामे बाक्त।
22 मिनु मेकोपुकी आ दीसा सुनी कना बोक्मा बाक्त। मिनु मेना ब्वाक्कुम नां टल्केशो तांइसीशो बाक्माक्त। मिनु मोआबीपुकीम मेको आन ङोंइती ङा ब्वाक्कु नांम हुश खोदेंशो लल तामे बाक्त।
23 मिनु मेकोपुकीम “एको दा हुश बाक्त। मेको पिपपुकी आंम आंमा लडाइ पा साइक्मुमा बाक्त, थांका। मुल ए मोआबी, मार मार रोइक्थ लय” देंमुमा बाक्त।
24 मिनु मोआबी इस्राएली आन बाक्तीकेम जाक्मानु, इस्राएली ग्रूशा मेको आन कली मप्रोक्पदमे सम्म लडाइ तोव़मे बाक्त। मिनु इस्राएलीम मोआबी आन कली लडाइ तोस ङा तोस पामे बाक्त।
25 मिनु मेकोपुकीम मेको आन सहर प्रेश्शा श्येत्थ पोक्गमे बाक्त। मिनु मुर नेल्लेमी मेको आन रूम फुल्लु का का ताइश्शा, तेइ तेइ फुल्लुम प्रिंदमे बाक्त। मेकोपुकीम ब्वाक्कु यितीक नेल्ल तेक्गमे बाक्त। मिनु रिम्शो रवा नेल्ल तिम्मे बाक्त। मेकोपुकीम किर-हारेसेथ सहर ङा गारो ला हेंदमे बाक्त। तन्न मेको सहर कली हुरद आप्बपुकीम तेक्शा लडाइ तोव़मे बाक्त।
26 मिनु मोआब ङा पिपमी लडाइ ब्रुइनुङ, दे तुइश्शा, तरवार शेब लडाइ पाइब ७ सहे जना आन कली लाइश्शा, एदोम ङा पिप आ बाक्तीक ओव़चा कली लमाक्त। तन्न मेकोमी मो पने मचबा बाक्त।
27 मिनु मेकोमी आ पा ङा पिप दुम्ब आ ङोंइती जरमेशो तौ कली गारोम क्योरशा चोशा चढ़ेवा बाक्त। मिनु इस्राएली छक लाक्शा लेश्शा आन रागी लमा बाक्त।