2 Kings 20 in Sunwar
1 मेना हिज्कीयाह रोइ पा बेक्चा चिक्ता बाक्त। मिनु आमोज आ तौ परमप्रभु यावे आ लोव़ पाइब यसैया हिज्कीयाह आ बाक्तीक जाक्शा, “परमप्रभु यावेमी इन कली मार देंत देंशा हना ‘इन खिं ङा मुर आन कली इन अरेचा माल्शो लोव़ अरेने। मारदे हना गे बेक्नीनी। मसानीनी’ देंत” देंमाक्त।
2 मिनु हिज्कीयाह गारो गे हिरशा, परमप्रभु यावे कली पुना बाक्त।
3 मेकोमी “परमप्रभु यावे, गो इन ङोंइती रिम्शो पा बाक्ती। गो इन कली गेनायो मप्रोंइथु आं थुं नेल्लेमी इन नोले खोइक्ता। इन ङोंइती मार रिम्शो बाक्मे, मेको पाता, मेको मिम्तीन” दे आ थुं खाइश्शा ङाक्माक्त।
4 मिनु यसैया दाते ङा लाङगा रे ग्रूचा क्येङा ङोंइती परमप्रभु यावेम मेको कली लोव़ पवा बाक्त।
5 मार लोव़ पवा बाक्त देंशा हना “लेश्शा लशा, परमप्रभु यावे इ किकी दाऊद आ परमप्रभुमी ‘आं मुर आन कली सासन पाइब हिज्कीयाह कली “गो इ पुंइशो लोव़ नेंता। मिनु इ प्रेक्कु ताता। गो इ कली सापाइक्नुङ। मिनु नाक्त सां नोले गे परमप्रभु यावे आ खिं लाइनेवे।
6 गो इ ब्रोंइतीक नाक्त १५ बर्स तेम्नुङ। मिनु इ कली नु एको सहर कली अस्सुर ङा पिप आ गुइ रे प्रोंइनुङ। गो आं पर्बम नु आं गेय पाइब दाऊद आ पर्बम एको सहर कली वारच पा प्रोंइनुङ” देंत’ देनो” देंमाक्त। २राजा १९:३४
7 मिनु यसैयामी “मेको कली सापाइक्चा कली आ कानम फोव़शी गेडा शेप्शा ख्रेक्तीन” देंमाक्त। मिनु मुरपुकीम मेको आ कानम फोव़शी गेडा शेप्शा ख्रेक्तमे बाक्त।
8 मिनु हिज्कीयाहमी यसैया कली “गो सानुङ, मिनु नाक्त सां नोले परमप्रभु यावे आ खिं लाइनुङ, दे परमप्रभु यावेमी आं कली दोपा तुइक्पाइक्बा?” दे हिल्लो पवा बाक्त।
9 मिनु यसैयामी “परमप्रभु यावेमी आ देंशो थमा पा पाइब, दे इन कली मार कोंइब देंशा हना, नां आ वांकु १० खेयप ङोंइती गे ग्रेल देय नोले गे लेल्ल?” दे हिल्लो पवा बाक्त।
10 मिनु हिज्कीयाहम “नां आ वांकु १० खेयप ङोंइती ग्रेचा दा आ गेयन बाक्ब। मेको १० खेयप नोले गे लेत्चा माल्ब” देंमाक्त।
11 मिनु परमप्रभु यावे आ लोव़ पाइब यसैयाम, परमप्रभु यावे कली पुना बाक्त। मिनु परमप्रभु यावेमी आहाज आ नां आ वांकु कोंइतीके १० खेयप नोले गे लेप्पदा बाक्त।
12 मेना बेबीलोन ङा पिप बालादन आ तौ मेरोदाक-बालादानमी हिज्कीयाह आ बाक्तीकेम कोसेली नु चिठी कुर पा मुर सोइक्ता बाक्त। मारदे हना मेकोम हिज्कीयाह रोइ पा साशो बाक्ब देंशो नेना बाक्त।
13 मिनु हिज्कीयाहम मेको चिठी चाक्ब मुर आन कली मान पाइक्मी बाक्त। मिनु मेको आन कली आ शोंप वोइक्तीकेम नेल्ल कोंइदा बाक्त। सुन चांदी, मस्ला, ब्रोव़शो रिना पाइश्शो ख्रेक्तीक तेल, आ यापुकी नु आ मार मार वोइक्तीकेम बाक्शो मारेइ मारेइ थोव़क कोंइदीमी बाक्त। हिज्कीयाह आ खिंम नु आ नेक्थाम बाक्शो मेको आन कली मकोंइशो मारेइ मलीमाक्त।
14 मिनु नोले परमप्रभु यावे आ लोव़ पाइब यसैया जाक्शा, पिप हिज्कीयाह कली “मेको मुरपुकीम मार देंमा? मेकोपुकी ते रे जाक्शो नमी?” दे हिल्लो पवा बाक्त। मिनु हिज्कीयाहमी “एकोपुकी ङोन रागी बेबीलोन रे जाक्शो नम” देंमाक्त।
15 मिनु मेकोमी “मेकोपुकीम इन खिंम मार मार तामे?” दे हिल्लो पवा बाक्त। मिनु हिज्कीयाहम “एकोपुकीम आं खिंम बाक्शो नेल्ल ताम्तेक्म। आं मार मार वोइक्तीक खिंम बाक्शो मतशो मारेइ मली” देंमाक्त।
16 मिनु यसैयाम हिज्कीयाह कली “परमप्रभु यावे आ लोव़ नेनीन।
17 परमप्रभु यावेमी ‘काबु नाक्त इ खिंम बाक्शो मारेइ मारेइ थोव़क नु इ किकी पिपी नु इन आंम तेल्शो थोव़क नेल्ल बेबीलोनम चाक्दीत्नीम। मारेइ मप्रोंइनीम। २राजा २४:१३-१४
18 मेकोपुकीम इन तौ का निक्शी यो लाइक्नीम। मिनु मेकोपुकी बेबीलोन ङा पिप आ दरवारमी गेय पाइब दुम्नीम’ दे परमप्रभु यावे देंत” देंमाक्त। दानीएल १:३-४
19 मिनु हिज्कीयाहम यसैया कली “इन देंशो परमप्रभु यावे आ लोव़ रिम्शोन बाक्ब” देंमाक्त। मारदे हना मेकोमी “आं पाला सम्म थुं नाइश्शा बाक्तीक दुम्ब” दे मिम्ता बाक्त। २राजा २२:२०
20 हिज्कीयाह आ पशो अरु गेय, मेको आ सक्ति, मेको आ दोम्ली नु ब्वाक्कु लतीके सेल्शो, सहर कली ब्वाक्कु चाक्शो, मार, मेको नेल्ल यहूदा ङा पिप आन इतिहासम ब्रेक्शो मबाक्बा ङा?
21 मिनु हिज्कीयाह बेक्माक्त। मिनु मेको आ पा ङा आ तौ मनस्से पिप दुम्माक्त।