2 John 1 in Sunwar

1 गो येसु ख्रीस्‍त कली थमा सुइक्‍ब आन शेंब खाल्‍पामी आ योव़शो मीश मुर नु आ आल इन कली चिठी ब्रेक्‍ताक्‍न्‍नी। गो इन कली थमा पा दाक्‍नन्‍नी। गो ला ममाइ, सु सुम परमप्रभु यावे आ पर्बम थमा शेंतीके तुइक्‍तमे, मेकोपुकीमी यो इन कली दाक्‍नीमी। ३यूहन्‍ना :१

2 मारदे हना परमप्रभु यावे आ थमा शेंतीके इं थुंम बाक्‍ब, मेको गेना हना यो लीब।

3 मिनु इं आफ, परमप्रभु यावे नु आ तौ येसु ख्रीस्‍तमी इं कली शिशी नु थुं नाइश्‍शा बाक्‍चा गेम्‍सेक्‍ल। परमप्रभु यावे आ थमा शेंतीके नु आ गेशो दाक्‍मुचा यो गोपुकी नु बाक्‍ल।

4 गो इन आल आन दाते ङा का निक्‍शी थमा लां खोइक्‍ब तशा, शुश ग्‍येरसीनुङ। मारदे हना इं आफोमी इं कली मोदेंशो अरेशो लोव़ गेशो बाक्‍ब।

5 मिनु गोमी “गोपुकी दाक्‍मुय” दे मीश मुर इन कली देंशो नक अरेशो लोव़ मब्रेक्‍नुङ। तन्‍न साइ ङोंइती रे दाक्‍मुचा, दे अरेशो लोव़ बाक्‍शो बाक्‍ब। १यूहन्‍ना २:७

6 मिनु आ अरेशो लोव़ पचा दाक्‍चा बाक्‍ब। मेको इन ङोंइती रे नेंशो अरेशो लोव़ बाक्‍ब। मेको अरेशो पने।

7 मिनु मुल रागीमी शुश मुर आन कली मरिम्‍शो लां कोंइब जोल्‍फेपुकी जाक्‍तेक्‍म। मेको मुरपुकीमी “येसु ख्रीस्‍त मुर दुम्‍शा रागीमी मजरमेसे” दे शेंनीम। मेको मोदेंशो शेंब चहिं जोल्‍फे नु नेल्‍ल क्‍येङा मरिम्‍शो पाइब बाक्‍नीम। १यूहन्‍ना २:१८; १यूहन्‍ना ४:१-३

8 गेपुकी मार कली गेय पनी, मेको मुल यो पना पन बाक्‍कीन। मो पाइतीनी हना, ठेयब इनाम ताइनीनी। गलाती ४:११

9 सुम चहिं ख्रीस्‍त आ थमा शेंतीके लोव़ प्रोंइबा, मेको परमप्रभु यावे नु थुं का मबाक्‍ब। सुम चहिं ख्रीस्‍त आ थमा शेंतीक लोव़ मप्रोंइबा, मेको आफ नु तौ निम्‍फा नु थुं का ङा बाक्‍ब। १यूहन्‍ना २:२३

10 सुइ मुर इन बाक्‍तीके जाक्‍शा, थमा शेंतीके लोव़ मपाप्‍तु हना, मेको कली खिं ओव़चा मगेने। मिनु मेको कली “रिम्‍शो बाक्‍को” दे यो मदेनीन। २थिस्‍सलोनिकी ३:६

11 मारदे हना सुमी मेको मोदेंशो मुर कली “रिम्‍शो बाक्‍कीन” देंबा, मेकोमी मेको आ दूली शेंतीके नु आ मरिम्‍शो गेय यो पाइब।

12 मिनु गोमी इन कली शुश ब्रेक्‍चा माल्‍ती हना यो, कागज नु मसीम मब्रेक्‍नुङ, इन कलीन ग्रुम्‍थ जाक्‍नुङ। मिनु कोव़मुशा लोव़ पाइनय, दे आस पाइनुङ। मोपा ग्रुम्‍तय हना, शुश ग्‍येरनय। ३यूहन्‍ना :१३

13 इन योव़शो समी आ तमी तौपुकीमी यो इन कली “रिम्‍शो बाक्‍कीन” दे ब्रेक्‍पाइक्‍तीमी।