2 Corinthians 9 in Sunwar
1 मेको क्येट पोक्चा आ पर्बम इन कली लेंशा शेंचा ममाल्नुङ।
2 साइ थोचे क्येट पोक्चा माल्ब देंशो नेंशा “पोक्नीकी की पोक्नीकी” दे प्रेक्तीनी। मिनु इन कली मोपा प्रेक्शो तशा, मासीडोनीयाम बाक्ब आन कली “आकाया ङा मुरपुकीम ग्येरसीशा क्येट पोक्नीम” दे लोव़ नेंपाइक्तामी। मिनु शुशेमी “गो यो पोक्नीकी” देंतेक्मे। २कोरिन्थी ८:१९
3 साइ थोचे ङा बोरशो लोव़ जोल मदुम्ल। मिनु गे ठीक बाक्शा, लोक्ब सां आन कली क्येट पोक्शा वोतीन, दे इन बाक्तीक सोइक्ताक्क।
4 मारदे हना गो इन बाक्तीके जाक्ङानु, मासीडोनीया ङा मुर आन ङोंइती गे क्येट मपोक्थु बाक्शा मुने मदोक्कीन, दे मेको सां आन कली इन बाक्तीक सोइक्ताक्ङ।
5 मोपतीके मेको सां आन कली आं क्येङा ङोंइती लने, दे सोइक्ताक्ङमी। मिनु गो जाक्ची ना “मुल क्येट पोक्कीन” देंशा, ग्रीचा ममाल्नुङ। सुइमी आन थुं मखाइक्थु ग्येरशा, आंम आ दाक्स पा, चाप्स पा गेने चाप्मेक्ल, दे लोक्ब सां आन कली आं क्येङा ङोंइती सोइक्ताक्ङमी।
6 आंम आन दाक्स पा, चाप्स पा, गेचा चहिं दोदेंशो रुम्सीब देंशा हना, वांचेर शोक्गमेनु, इच्का ला शोक्बमी, इच्का ला खुप्चा ताइब। तन्न शुश शोक्बमी शुश खुप्चा ताइब। हितोपदेस ११:२४-२५; हितोपदेस १९:१७
7 क्येट पोक्गु कों मपोक्गु, दे थुं निक्शी मपथु, सुइमी “गेव की गेव” माइक्चा मपुंइसीथु, आंम थुंमी मिम्शा, ग्येरसीशा गेचा माल्ब। ग्येरसीशा गेब कली परमप्रभु यावेमी दाक्ब। रोमी १२:८
8 परमप्रभु यावेमी इन कली माल्शो क्येङा शुश गेने चाप्ब। मिनु मारेइ मारेइम गाप्शा, मारेइ वारच पचा ङा गेय बाक्त हना यो, गे पने चाप्नीनी।
9 मार ब्रेक्शो बाक्त, देंशा हना “मेकोमी वांचेर ब्वारब, प्रुङग आन कली गेब। मेको आ ठीक पशो गेना हना यो लीब” दे ब्रेक्शो बाक्ब। भजन संग्रह ११२:९
10 शोक्ब कली वांचेर गेब। जचा दाक्ब कली जचा थोव़क गेबमी इन के बाक्शो यो बारपाइक्ब। मोपा इन ठीक पतीके ङा फल बारना बारन लाइब। इजीकीएल १०:१२
11 मिनु गे शुश थीब दुम्शा, हाइश्शा गेशो तशा, गो परमप्रभु यावे कली “गे रिम्शो पाइब बाक्नीनी” दे ठेयब सेल्नीकी।
12 मोदेंशो हाइश्शा गेशोमी श्येत जशो थमा सुइक्ब आन कली रिम्शो दुम्ब। मोशो ला ममाइ, शुशेमी परमप्रभु यावे कली ठेयब सेल्नीम
13 एको क्येट पोक्तीक गेय पशा इन टितीक नाक्सीशो बाक्ब। मिनु गे परमप्रभु यावे कली ठेयब सेल्शो बाक्नीनी। मिनु इन हाइश्शा मेको आन कली नु अरु आन कली गेशोमी गे ख्रीस्त आ ग्येरपाइक्ब लोव़ तुइक्ब बाक्नीनी, दे कोंइनीनी।
14 परमप्रभु यावे आ शिशी गे नु बाक्तीके मेकोपुकीम इन कली प्रार्थना पाइनीमी।
15 परमप्रभु यावेमी इन कली देंने मचाप्चा ङा ठेयब कोसेली गेप्तु। मेको आ पर्बम मेको कली “गे रिम्शो पाइब बाक्नीनी” देंचा मप्रोंइनीक।