2 Chronicles 30 in Sunwar
1 मिनु हिज्कीयाहम इस्राएली नु यहूदा ङा मुर आन कली “यरूसलेमम बाक्शो परमप्रभु यावे आ खिंम परमप्रभु यावे, इस्राएली आन परमप्रभु कली पास्सा चाड मानेथ जाक्कीन” दे ब्रेत्ता बाक्त। मिनु मेकोमी एफ्राइम नु मनस्से ङा मुर आन कली यो चिठी ब्रेक्शा ब्रेत्ता बाक्त। २इतिहास ३५:१
2 मिनु पिप, आ सरकार ङा ठेयब मुर नु यरूसलेमम खुम्सीशो मुर नेल्लेम निक्शी महिनाम पास्सा चाड मानेचा कली लोव़ गारपदमे बाक्त।
3 मेकोपुकीम ङोंइती परमप्रभुम देंशो खोदेंशो पा मानेने मचाप्शो बाक्मा बाक्त। मारदे हना शुश चढ़ेबपुकीम आंम कली परमप्रभु यावे आ ङोंइती ठीक मसेल्सीशो बाक्मा बाक्त। मिनु मुरपुकी यो यरूसलेमम मदेल्शो बाक्मा बाक्त।
4 मिनु पिप नु खुम्सीशो मुर नेल्लेमी मेको चाड मानेतीक लोव़ आ पर्बम “ठीक बाक्ब” देंमा बाक्त।
5 मिनु मेकोपुकीम दक्खिन ङा बेयर-शेबा रे उत्तर ङा दान सम्म ङा इस्राएली नेल्ल आन कली परमप्रभु यावे, इस्राएली आन परमप्रभु आ पर्बम पास्सा चाड मानेचा कली यरूसलेमम जाक्चा माल्मा बाक्त। एको क्येङा ङोंइती इश्का मुर दुम्शा, एको चाड ममानेशो बाक्मा बाक्त।
6 मिनु पिप नु आ सरकार ङा ठेयब मुरुम ब्रेक्शो चिठी चोक्ब मुरपुकी पिप आ देंशो खोदेंशो पा यहूदा नु इस्राएलम लमा बाक्त। मिनु मेको चिठीम मार ब्रेक्शो बाक्माक्त देंशा हना “इस्राएली परमप्रभु यावे, इन किकी पिपी अब्राहाम, इसहाक नु इस्राएल आन परमप्रभु गे लेत्तीन। मेना मेकोमी अस्सुर ङा पिपम मलाइश्शो लीशो मुर आन कली लेंशा कोव़ब। इस्राएल याकूब आ नें बाक्ब।
7 गेपुकी इन किकी पिपी नु आंम मुर खोदेंशो मदुमीन। मेकोपुकीम परमप्रभु यावे, इन किकी पिपी आन परमप्रभु कली प्रोंइतेक्म। मोपतीके परमप्रभु यावेमी मेको आन कली खतम सेला बाक्त। मेको आंमा तशो बाक्नीनी।
8 गेपुकी इन किकी पिपी खोदेंशो पा काइ मटीब मदुमीन। तन्न परमप्रभु यावे कली आ अरेशो टिशा, आ बाक्तीकेम जाक्कीन। मिनु ‘मेको गेना हना यो आं बाक्तीकेम बाक्ब’ देंशो बाक्ब। गे परमप्रभु यावे कली गेय पने। मोपा इन पर्बम आ गाइश्शो बेक्बा, कों?
9 गे परमप्रभु यावे गे लेत्तीनी हना, ग्याइश्शा लाइक्चा पुंइसीशो इन खिं खिं ङा मुर नु इन आलपुकीम ग्याइक्ब मुर रे शिशी तशा, मेकोपुकी एको रागीम लेश्शा जाक्नीम। मारदे हना परमप्रभु यावे, इन परमप्रभु दाक्ब नु शिशी पाइब बाक्ब। गेपुकी मेको गे लेत्तीनी हना, मेको यो इन गे लेप्ब” दे ब्रेक्शो बाक्माक्त।
10 मिनु मेको चिठी चोक्बपुकी एफ्राइम नु मनस्से आस सहर सहर नेल्ल हिरशा जबूलून सम्म जाक्दीम्मा बाक्त। तन्न मुरपुकीम मेको आन कली रिश्शा शुक्शी पामे बाक्त।
11 मो हना यो आशेर, मनस्से नु जबूलून ङा मुर का निक्शी ब्रेम्शो दुम्शा यरूसलेम लमा बाक्त। २इतिहास ११:१६
12 परमप्रभु यावेमी यहूदा ङा मुर यो थुं का दुम्पदा बाक्त। मिनु मेकोपुकीमी पिप नु सरकार ङा ठेयब मुर आन कली देंशो, परमप्रभु यावे आ लोव़ खोदेंशो पा पामे बाक्त।
13 मिनु शुश मुर महिना निक्शीम बोरब ओख्ती मसुप्शो शोब्ले ङा चाड मानेचा कली यरूसलेमम जाक्मा बाक्त। मेकेर शुश मुर खुम्सीशो बाक्मा बाक्त।
14 मिनु मेकोपुकीम यरूसलेम आ एर ओंथ बाक्शो चढ़ेतीकपुकी नु धूप चोतीक प्रेश्शा, किद्रोन खोल्साम लाइश्शा ताइक्तमे बाक्त।
15 मिनु मेकोपुकीम महिना निक्शी ङा १४ नाक्ती पास्सा चाड मानेतीक पाठा क्योरमे बाक्त। मिनु चढ़ेब नु लेवी परमप्रभु यावे आ ङोंइती आंम कली ठीक मसेल्तीके मुने दोक्शो बाक्मा बाक्त। मिनु मुल आंम कली ठीक सेल्शा, परमप्रभु यावे आ खिंम चोशा चढ़ेतीक चढ़ेमे बाक्त। गन्ती ९:१०-१३
16 परमप्रभु आ मुर मोसा आ ब्रेक्शो अरेशो लोव़ खोदेंशो पा मेको आन गेय पतीकेम बाक्मा बाक्त। मिनु लेवीपुकीम चाक्शो हुश चढ़ेबपुकीम ताक्शा ब्रुइक्तमे बाक्त।
17 तन्न मेको शुश खुम्सीशो मुर परमप्रभु यावे आ ङोंइती आंम कली ठीक सेल्ने मचाप्शो बाक्मा बाक्त। मोपतीके लेवीपुकीमी मेको मुर आन पर्बम आन पास्सा चाड ङा पाठा क्योरचा माल्मा बाक्त।
18 मिनु एफ्राइम, मनस्से, इस्साकार नु जबूलून रागी रे जाक्शो शुश मुरपुकी परमप्रभु यावे आ ङोंइती आंम कली ठीक मसेल्सीशो बाक्मा बाक्त। मो हना यो मेकोपुकीम परमप्रभु यावे अरेशो मपथु, पास्सा चाड मानेमे बाक्त। प्रस्थान १२:-
19 तन्न हिज्कीयाहम मेको आन पर्बम “परमप्रभु यावे गे शिशी पाइब बाक्नीनी। सु सुमी आन थुं नेल्लेमी इन कली, परमप्रभु यावे, आन किकी पिपी आन परमप्रभु खोइक्चा दाक्बा नु इन देंशो खोदेंशो पा आंम कली ठीक सेल्ने मचाप्शो बाक्मा, मेको आन कली मारेइ मपन” दे पुना बाक्त।
20 मिनु परमप्रभु यावेम हिज्कीयाह आ पुंइशो लोव़ नेना बाक्त। मिनु मुर आन कली सापाइक्मी बाक्त। २इतिहास ७:१४
21 मिनु यरूसलेमम जाक्ब इस्राएली नेल्लेमी ७ नाक्त सम्म थाम्पा ग्येरसीशा बोरब ओख्ती मसुप्शो शोब्ले ङा चाड मानेमे बाक्त। मिनु लेवी नु चढ़ेबपुकीम ठेयब सेंदाम कुम्सो पा, ताप्तीक ताप्शा, नाक्त किंत किंत परमप्रभु यावे कली ठेयब सेल्मे बाक्त।
22 मिनु हिज्कीयाहम परमप्रभु यावे आ गेय रिम्शो पस जोक्ब लेवी आन कली लोव़ पा आन थुं बारपाइक्मी बाक्त। मिनु मुरपुकीम मेको चाड ङा जचा थोव़क ७ नाक्ती सम्म जना जन बाक्मा बाक्त। मेकोपुकीम दुशा बाक्चा आ पर्बम चढ़ेतीक चढ़ेशा, परमप्रभु यावे, आन किकी पिपी आन परमप्रभु कली “गे रिम्शो पाइब बाक्नीनी” दे ग्येरसीशा बाक्मा बाक्त।
23 मिनु खुम्सीशो मुर नेल्लेमी अर्को ७ नाक्त सम्म चाड मानेचा कली लोव़ गारपदमे बाक्त। मोपतीके मेकोपुकीम अर्को ७ नाक्ती सम्म यो ग्येरशा मेको चाड मानेमे बाक्त।
24 यहूदा ङा पिप हिज्कीयाहम मेको खुम्सीशो मुर आन कली हजार का ब्यफ नु ७ हजार भेडा चढ़ेचा कली गेमी बाक्त। मिनु सरकार ङा ठेयब मुरपुकीम मेको खुम्सीशो मुर आन कली हजार का ब्यफ नु १० हजार भेडा गेमी बाक्त। शुश चढ़ेबपुकीम यो आंम कली परमप्रभु यावे आ ङोंइती ठीक सेल्सीमा बाक्त।
25 मिनु यहूदा ङा खुम्सीशो मुर नेल्ले, चढ़ेब नु लेवीपुकी नेल्ल, इस्राएल रे जाक्शो मुरपुकी नु इस्राएल रे प्रोक्शो यहूदाम बाक्ब मुर नेल्ले ग्येरसीशो बाक्मा बाक्त।
26 मोपा यरूसलेमम थम ठेयब ग्येरसीतीक दुम्माक्त। मेको मोदेंशो इस्राएल ङा पिप दाऊद आ तौ सोलोमन आ पाला रे गेनायो मदुम्शो बाक्माक्त।
27 मिनु चढ़ेबपुकी नु लेवीपुकी बोक्शा मुर आन कली आसीक गेमे बाक्त। मेको आन पुंइशो लोव़ परमप्रभु यावे आ बाक्तीक स्वर्ग सम्म नेंसे बाक्त।