2 Chronicles 3 in Sunwar

1 मिनु सोलोमनमी यरूसलेम ङा मोरीयाह डांडाम परमप्रभु यावे आ खिं सेल्‍चा गोवा बाक्‍त। ङोंइती परमप्रभु यावेमी आ आफ दाऊद कली मेको मोरीयाह डांडाम कोंइशो बाक्‍माक्‍त। मिनु दाऊदमी “परमप्रभु आ खिं यबुसी ओरनान आ चेरब तुप्‍तीकेम सेल्‍चा माल्‍ब” दे माइश्‍शो बाक्‍माक्‍त। १इतिहास २१:१८-२६

2 मिनु सोलोमन पिप दुम्‍शो आ ४ बर्स ङा महिना निक्‍शी ङा नाक्‍त निक्‍शीमी मेको खिं सेल्‍चा गोवा बाक्‍त।

3 सोलोमनम परमप्रभु आ खिं दोमो सेल्‍चा थुं पशो बाक्‍माक्‍त देंशा हना, माइत पुक्‍तीके रे आ लाइश्‍शो ६० कुबीत नु आ ब्रेम्‍शो २० कुबीत बाक्‍माक्‍त। कुबीत का ०.५ मिटर बाक्‍ब।

4 खिं आ ङोंइती २० कुबीत लाइश्‍शो, २० कुबीत ब्रेम्‍शो नु सहे का २० कुबीत ग्‍येत्‍थ लाइश्‍शो पिंडी बाक्‍माक्‍त। मेको आगा ङा गारोमी क्‍येख सुनम गिल्‍पदा बाक्‍त।

5 मेको खिं आ आगा नेल्‍ल सला के फलेक क्‍येप्‍पदा बाक्‍त। मिनु नेल्‍ल कली क्‍येख सुनम गिल्‍पदा बाक्‍त। मेको दारपाइक्‍चा कली मेको आ तार खजूर रवा नु सिक्रीपुकी बुटा आप्‍शा सेल्‍पदा बाक्‍त।

6 मेको खिं कली दारपाइक्‍चा कली हीरापुकी क्‍येप्‍पदा बाक्‍त। मेको आन माल्‍शो सुन पारवाइम माइक्‍तीके रे चाक्‍शो बाक्‍मा बाक्‍त।

7 मिनु मेको खिं आगा नेल्‍ले सुनम गिल्‍पदा बाक्‍त। मेको आ थाम, लाप्‍चो आ पुं ङा शी, गारो नु लाप्‍चो नेल्‍ल गिल्‍पदा बाक्‍त। आन गारोम करूबपुकी मुशा सेल्‍पदा बाक्‍त।

8 मिनु मेकोमी नेल्‍ल क्‍येङा चोव़खो कोठा सेल्‍पदा बाक्‍त। खिं आ ब्रेम्‍शो आ लाइश्‍शो यो खाल का ङा पा २० कुबीत लाइश्‍शो नु २० कुबीत ब्रेम्‍शो सेल्‍पदा बाक्‍त। मिनु मेकोमी आ आगा नेल्‍ल ६ सहे टलेन्‍ट क्‍येख सुनम गिल्‍पदा बाक्‍त। टलेन्‍ट का ३४ किलो बाक्‍ब।

9 मेको कांटी ङा सुन नाक्‍शोनु, ५० शेकेल बाक्‍मा बाक्‍त। मेकोमी आ इर गे ङा कोठा यो सुनम गिल्‍पदा बाक्‍त। शेकेल का ११.५ ग्राम बाक्‍ब

10 मिनु मेकोमी नेल्‍ल क्‍येङा चोव़खो कोठा कली करूब निक्‍शी मुशा, सुनम गिल्‍पदा बाक्‍त।

11 मेको करूब आस फ्रां नेल्‍ल प्राक्‍शा पुक्‍शोनु, २० कुबीत लाइश्‍शो बाक्‍मा बाक्‍त। मेको करूब आ फ्रां का ५ कुबीत लाइश्‍शो बाक्‍माक्‍त। मिनु मेको वोइश्‍शा, आ फ्रां काम परमप्रभु यावे आ खिं ङा गारो थिशो बाक्‍माक्‍त। मिनु मेको आ अर्को ५ कुबीत लाइश्‍शो फ्रांम चहिं अर्को करूब आ फ्रां थिशो बाक्‍माक्‍त।

12 मोपान अर्को करूब आ फ्रां खिं आ अर्को गे ङा गारो थिशा ५ कुबीत लाइश्‍शो बाक्‍माक्‍त। मिनु मेको आ अर्को फ्रांम अर्को ङोंइती ङा करूब आ फ्रांम थिशो बाक्‍माक्‍त, मेको यो ५ कुबीत लाइश्‍शो बाक्‍माक्‍त।

13 मेको करूब आस फ्रां नेल्‍ल पा २० कुबीत प्राक्‍शो बाक्‍मा बाक्‍त। मेको निक्‍शी राप्‍शो बाक्‍सा बाक्‍त। मिनु मेको निक्‍शीमी मेको खिं गे कोव़शो बाक्‍सा बाक्‍त।

14 मिनु सोलोमनम फारतीक वा नीलो, प्‍याजी नु लल श्‍येले नु रिम्‍शो पा किरशो सुती श्‍येले रे प्रोव़शो वा के सेल्‍पदा बाक्‍त। मिनु करूब आ बुटा आप्‍शा प्रोव़पदा बाक्‍त। प्रस्‍थान २६:३१

15 मिनु खिं आ ङोंइती ३५ कुबीत लाइश्‍शो कांसा के थाम निक्‍शी सेल्‍पदा बाक्‍त। मेको आस कली ५ कुबीत लाइश्‍शो गुप्‍तीके गुप्‍पदा बाक्‍त।

16 मेको थाम निक्‍शी आस गुप्‍तीके एर ओंथ हिरचा कली जाली खोदेंशो साङली निक्‍शी सेल्‍पाइश्‍शा, सहे का दारीम सेल्‍शा, मेको दारीम साङलीम क्‍युक्‍पदा बाक्‍त।

17 मेको थाम निक्‍शी परमप्रभु यावे आ खिं आ ङोंइती का ग्‍युरा गे, का पेरा गे राप्‍पदा बाक्‍त। मिनु ग्‍युरा गे ङा थाम आ नें याकीन वोदा बाक्‍त। पेरा गे ङा थाम आ नें बोआज वोदा बाक्‍त। याकीन आ अर्थ “थुं बारपाइक्‍ब” बाक्‍ब। बोआज आ अर्थ “मेकोमी सक्ति गेब” बाक्‍ब।