2 Chronicles 22 in Sunwar
1 मेको नोले यरूसलेम ङा मुरपुकीम मेको आ पा ङा मेको आ कान्छा तौ अहाज्याह कली पिप सेल्मे बाक्त। मारदे हना अराबी नु जाक्शोपुकीम मेको अरु तौ आन कली साइश्शो बाक्मा बाक्त। मोपतीके येहोराम आ कान्छा तौ अहाज्याह यहूदा ङा पिप दुम्माक्त।
2 अहाज्याह पिप दुम्मेनु, २२ बर्स दुम्शो बाक्माक्त। मेकोमी यरूसलेमम बर्स का सासन पवा बाक्त। मेको आ ममा आ नें अथाल्याह बाक्माक्त। मेको ओम्री आ चच बाक्माक्त।
3 मेको यो आहाब आ खिं ङा मुर खोदेंशो पा मेको आन लांम गाक्माक्त। मारदे हना आ ममामी मेको कली परमप्रभु यावे आ अरेशो मटिचा कली अर्ती गेवा बाक्त।
4 मेकोमी यो आहाब आ खिं ङा मुर खोदेंशो पा परमप्रभु यावे आ ङोंइती मार मरिम्शो बाक्मे, मेको पवा बाक्त। मारदे हना आ आफ बेक्म नोले मेको मुरपुकीमी अर्ती गेशा, मेको कली खतम सेल्मे बाक्त।
5 मेकोमी आन गेशो अर्ती रामोथ-गिलादम अराम ङा पिप हजाएल नु लडाइ पचा कली इस्राएल ङा पिप आहाब आ तौ येहोराम नु वारच्बु दुम्चा बिस्से बाक्त। मिनु अरामीपुकीम मेको कली गार सेल्मे बाक्त।
6 मिनु योराम रामाह सहरम अराम ङा पिप हजाएल नु लडाइम दुम्शो गार साचा कली येज्रेलम लेश्शा लमाक्त। मिनु यहूदा ङा पिप येहोराम आ तौ अहाज्याह, आहाब आ तौ, योराम कली ग्रुम्थ येज्रेलम लमाक्त। मारदे हना मेको रोइ पशो बाक्माक्त। येहोराम योराम यो देंनीम।
7 तन्न परमप्रभु आ मिम्शो खोदेंशो पा योराम नु अहाज्याह ग्रुम्सानु, अहाज्याह आ बेक्तीक दुम्माक्त। मेको ग्रुम्शा, अहाज्याह नु येहोराम निम्शी आ तौ येहू कली ग्रुम्थ लसा बाक्त। परमप्रभु यावेमी आहाब आ खिं ङा मुर आन कली थुम्पाइक्चा कली येहू कली योव़शो बाक्माक्त। १राजा १९:१६; २राजा ९:६-७
8 मिनु येहूम आहाब आ खिं ङा मुर आन कली सदानु, अहाज्याह आ गेय पाइब यहूदा ङा ठेयब मुरपुकी नु मेको नु पिशो आ लोक्ब आन तौ आन कली यो थिश्शा साइक्मी बाक्त। २राजा १०:१२-१४
9 मेको नोले मेकोमी अहाज्याह कली मला बाक्त। मिनु येहू आ मुरपुकीम मेको कली सामरीयाम थित्मे बाक्त। मिनु मेकोपुकीम अहाज्याह कली येहू आ बाक्तीक चाक्शा सदमे बाक्त। मिनु मुरपुकीम मेको आ पर्बम “आ थुं नेल्लेमी परमप्रभु यावे आ नोले खोइक्ब येहो-शाफात आ चच एकोन बाक्ब” दे थिम्मे बाक्त। मेको नोले अहाज्याह आ खिं ङा मुर सासन पाइब सुइ मलीमा बाक्त। २राजा ९:२७-२९
10 मिनु अहाज्याह आ ममा अथाल्याहम आ तौ साइश्शो तुइश्शा, मेकोमी यहूदा ङा पिप आ खिं ङा मुर नेल्ल आन कली साइक्चा कली बोक्माक्त।
11 तन्न पिप येहोराम आ तमी येहो-शबेआथम अहाज्याह आ तौ योआश कली साइक्चा चिक्शो पिप आ तौ आन दाते रे प्रेंइशा लदा बाक्त। मिनु मेको कली कोव़ब नु मेको आल आस कली इप्तीक कोठा कामी ख्रुइश्शा, वोइक्सी बाक्त। पिप येहोराम आ तमी येहो-शेबा चढ़ेब येहो-यादा आ मीश बाक्माक्त। मारदे हना अहाज्याह आ दिदी बाक्तीके, मेकोमी योआश कली अथाल्याह आ गुइ रे प्रोंइशा ख्रुइश्शा वोइक्पदा बाक्त। मिनु अथाल्याहम मेको कली साइक्चा मतवा बाक्त।
12 मेको रागीम अथाल्याहम सासन पवानु, योआश मेकोपुकी नु ६ बर्स सम्म परमप्रभु आ खिंम ख्रुइश्शा बाक्माक्त।