2 Chronicles 20 in Sunwar

1 मिनु नोले मोआबी अम्‍मोनी नु का निक्‍शी सेइर डांडा रे अर्को जात ङा मेउनी माइश्‍शो मुरपुकी येहो-शाफात नु लडाइ पथ जाक्‍मा बाक्‍त।

2 मिनु मुरपुकीमी येहो-शाफात कली “थम ठेयब हुल का लडाइ पाइब एदोम रे इन कली लडाइ तोचा कली जाक्‍शो बाक्‍नीम। मेकोपुकी हिक्‍सी समुन्‍द्र आ आइक्‍ची हांबु रे पिना पिन बाक्‍नीम। मेको हासासोन-तामार जाक्‍दीत्‍तेक्‍म” दे लोव़ नेंपदमे बाक्‍त। मेको रागी कली एन-गेदी यो देंनीम।

3 मिनु येहो-शाफातम हिंशा, परमप्रभु यावे कली पुंइचा, दे थुं पवा बाक्‍त। यहूदा रागी ङा मुर नेल्‍ल कली “माइजा बाक्‍कीन” दे हुकुम पवा बाक्‍त।

4 मिनु यहूदा ङा मुरपुकी परमप्रभु यावे कली “वारच पाइक्‍की” दे पुंइचा कली बुक्‍मा बाक्‍त। यहूदा रागी ङा सहर नेल्‍ल ङा मुरपुकी परमप्रभु यावे कली पुंइथ जाक्‍मा बाक्‍त। २इतिहास १५:९-१५

5 मिनु येहो-शाफात परमप्रभु यावे आ खिं ङा नक लाङगामी यहूदा नु यरूसलेम ङा खुम्‍सीशो मुर आन ङोंइती राप्‍शा

6 “आंइ परमप्रभु यावे, आंइ किकी पिपी आन परमप्रभु गे स्‍वर्गम बाक्‍ब परमप्रभु मननी ङा? गे रागी रागी ङा राज्‍य सासन पाइब मननी ङा? सक्ति नु अधिकार नेल्‍ल इन के बाक्‍ब। गे इन क्‍येङा ग्राब सुइ मबाक्‍नीम। उत्‍पत्ती १८:२५; १इतिहास २९:१२

7 आंइ परमप्रभु, मार, गे इन मुर इस्राएली जाक्‍‍मानु, एको रागी ङा मुर आन कली मखेरनी ङा? इन वारच अब्राहाम नु आ चच युइ आन कली मेको रागी गेना हना यो कली गेशो मननी ङा?

8 मेकोपुकी मेकेर बाक्‍शो बाक्‍तेक्‍म। मिनु इन नें कली मान पचा, दे इन कली बाक्‍तीक खिं का सेल्‍शो बाक्‍तेक्‍म।

9 मेकोपुकीम ‘आंइ कली ठेयब श्‍येत दुम्‍त हना, लडाइ दुम्‍त हना, निसाफ पतीके, मुर बेक्‍तीक रोइ, अन्‍काल दुम्‍त हना, इन खिं इन ङोंइती राप्‍नीकी। मारदे हना इन नें कली मान पशो खिं रे आंइ श्‍येत जशा पुंइशो लोव़ नेंशा, आंइ कली प्रोंइनीनी’ दे पुंइतेक्‍म। २इतिहास ६:२८-३०

10 आंइ किकी पिपी इजीप्‍त रे जाक्‍मानु, गे इस्राएली आन कली ‘अम्‍मोनी, मोआबी नु सेइर डांडा ङा मुर आन रागी मओव़ङीन’ देंशो बाक्‍तीनी। मोपतीके मेकोपुकी एर ओंथ रे हिरशा, मेको आन कली खतम मसेल्‍थु लमा बाक्‍त। ब्‍यवस्‍था २:४,५,९,१९

11 तन्‍न मुल कोव़ङीन, एको मुरपुकीम आंइ कली दोदेंशो पा क्‍येक्‍क लेत्‍नीमी। गे आंइ कली गेशो आंइ थेरशो रागी रे आंइ कली खेरचा कली जाक्‍शो बाक्‍नीम।

12 आंइ परमप्रभु, गे मेको आन कली निसाफ मपाइनीनी ङा? मारदे हना गोपुकी एको शुश मुर आन ङोंइती मारेइ पने मचाप्‍ब बाक्‍नीकी। मुल गो मार पचा माल्‍नीकी मारेइ मतुइक्‍नीकी। तन्‍न गो इन गे कोव़नीकी” दे पुना बाक्‍त।

13 मिनु यहूदा ङा मुर नेल्‍ले, मेको आन मीशपुकी, आन आल ब्रेप्‍च नेल्‍ल परमप्रभु यावे आ ङोंइती राम्‍मा बाक्‍त।

14 मिनु परमप्रभु यावे आ सोक्‍तीम खुम्‍सीशो मुर नेल्‍ल आन दातेमी आसाफ आ खिं ङा लेवी याहासीएल कली सुमा बाक्‍त। मेको जकरिया आ तौ, बेनायाह आ चच बाक्‍माक्‍त। आ अरु किकी पिपी यिएल नु मत्तन्‍याह बाक्‍सा बाक्‍त।

15 मिनु मेकोमी “यहूदा नु यरूसलेमम बाक्‍ब मुर नेल्‍ले नु पिप येहो-शाफात नेनीन। परमप्रभु यावेमी इन कली मार देंब देंशा हना ‘गे एको लडाइ पाइब आन ठेयब हुल तशा महिनीन। इन थुं लुक्‍च मलल। मारदे हना एको लडाइ परमप्रभु के बाक्‍ब। इन के ममाइ। प्रस्‍थान १४:१३-१४

16 दीसा मेकोपुकी नु लडाइ पथ ब्रुपीन। मेकोपुकी जीज ङा ग्‍येत्‍थ ल‍तीक लां रे पा कुइनीम। मिनु गेपुकीम मेको आन कली येरूएल ङा गोरशो रागी ङा बरखे खोला क्‍येङा आइदी ग्रुम्‍नीनी।

17 यहूदा नु यरूसलेम ङा मुर, गेपुकीम एको लडाइ पचा ममाल्‍नीनी। आं देंतीकेम लने। मिनु रिम्‍शा बाक्‍कीन। इन पा ङा गो परमप्रभु यावेम लडाइ पा ग्राशो, कोव़ङीन। महिनीन। इन थुं लुक्‍च मलल। गे ग्रूशा, मेकोपुकी नु लडाइ पथ लने। मारदे हना परमप्रभु यावे गेपुकी नु बाक्‍ब’ ” देंमाक्‍त।

18 मिनु येहो-शाफातम खपीम बाप्‍शा सेउ पवा बाक्‍त। मिनु यहूदा नु यरूसलेमम बाक्‍ब मुर नेल्‍ल परमप्रभु यावे आ ङोंइती बाप्‍शा, परमप्रभु यावे कली ठेयब सेल्‍मे बाक्‍त।

19 मिनु लेवी, कोहाथ नु कोराह आन मुर बोक्‍शा परमप्रभु यावे, इस्राएली आन परमप्रभु कली ठेयब सेंदा पा ठेयब सेल्‍तीक कुम्‍सो पामे बाक्‍त।

20 मिनु मेकोपुकी सुनी कना बोक्‍शा, तेकोहा सहर ङा गोरशो रागीम लमा बाक्‍त। मिनु मेकोपुकी ग्रूशा लमानु, येहो-शाफातम “यहूदा नु यरूसलेमम बाक्‍ब मुर नेल्‍लेम आं लोव़ नेनीन। गे परमप्रभु यावे, इन परमप्रभु कली थमा सुतीन। मिनु गे ग्रानीनी। परमप्रभु यावे आ लोव़ पाइब आन लोव़ थमा सुइश्‍शा बाक्‍कीन” देंमाक्‍त। यसैया ७:९; यसैया १८:१६

21 मिनु मेकोमी मुरपुकी नु सल्‍ला पशा, लडाइ पाइब आन ङोंइती रिम्‍शो वा फेक्‍शा, परमप्रभु यावे कली ठेयब सेल्‍तीक कुम्‍सो पाइब योव़मी बाक्‍त। मिनु मेकोपुकीम “परमप्रभु यावे कली ‘गे रिम्‍शो पाइब बाक्‍नीनी। मारदे हना इन दाक्‍तीक गेना हना यो लीब’ ” दे कुम्‍सो पामे बाक्‍त। भजन संग्रह १०६:१

22 मिनु मेकोपुकीम कुम्‍सो पा परमप्रभु यावे कली ठेयब सेल्‍मे चोटीन परमप्रभु यावेमी बाप्‍ब हुल का वोदा बाक्‍त। मिनु यहूदा नु लडाइ पथ जाक्‍ब अम्‍मोनी, मोआबी नु सेइर डांडा ङा मुर आन कली क्‍याम्‍दा बाक्‍त।

23 मिनु मार दुम्‍माक्‍त देंशा हना, अम्‍मोनी नु मोआबी गारशा सेइर डांडा ङा मुर आन कली लडाइ पा सदमे बाक्‍त। मेको आन कली साइक्‍ने थुम्‍मे नोले, लीशो मुरपुकी आंम आंमा साइक्‍मुमा बाक्‍त।

24 मिनु यहूदा ङा मुरपुकी गोरशो रागी ङा कोव़तीक लाइश्‍शो खिं जाक्‍शा, लडाइ पाइब आन कली कोव़ङमेनु, मेको आन कली शोल्‍मो पा खपीम गोल्‍शा बेक्‍शो तामे बाक्‍त। मेको आन दाते ङा का सम्‍म यो प्रोक्‍ने मचाप्‍शो बाक्‍मा बाक्‍त।

25 मिनु येहो-शाफात नु आ मुरपुकी मार मार रोइक्‍थ जाक्‍मा बाक्‍त देंशा हना, मार मार वासी, सुन चांदी के शोंप मार मार थोव़क थित्‍मे आंम कली कुरने मचाप्‍चा ङा पा रोइक्‍तमे बाक्‍त। मिनु मेको आन बस्‍तु भाव यो लदमे बाक्‍त। मेकोपुकीम नाक्‍त सां सम्‍म मेको रोइश्‍शो मार मार खुप्‍तमे बाक्‍त। मारदे हना मेको थम शुश बाक्‍माक्‍त।

26 मिनु ४ नाक्‍ती मेकोपुकी बेराकाह ङा दिंमम ग्रुम्‍मा बाक्‍त। मिनु मेकेर परमप्रभु यावे कली ठेयब सेल्‍मे बाक्‍त। मुल सम्‍म मेको आ नें बेराकाह ङा दिंम लीशो बाक्‍ब। बेराकाह आ अर्थ आसीक बाक्‍ब।

27 मेको नोले यहूदा नु यरूसलेम ङा मुर नेल्‍लेमी येहो-शाफात कली ङोंइती गाक्‍पाइश्‍शा, ग्‍येरसीशा यरूसलेम लेम्‍मा बाक्‍त। मारदे हना परमप्रभु यावेमी मेको आन कली आन जोरी सत्रु रे ग्रापाइश्‍शा, थम ग्‍येरसीशो बाक्‍मा बाक्‍त।

28 मिनु मेकोपुकीम ठेयब नु आइक्‍च तार पाइश्‍शो ताप्‍तीके नु तुराही ताम्‍ना ताम्‍न यरूसलेमम परमप्रभु यावे आ खिं जाक्‍मा बाक्‍त।

29 परमप्रभु यावेमी इस्राएल आ जोरी सत्रु नु लडाइ पा ग्रामाक्‍त देंशो लोव़ नेंशा, रागी रागी ङा राज्‍य ङा मुर नेल्‍ल परमप्रभु क्‍येङा हिंमा बाक्‍त।

30 मिनु येहो-शाफात आ राज्‍यम लडाइ मदुम्‍थु, नांइसे बाक्‍त। मारदे हना आ परमप्रभुमी मेको रागी कली एर ओंथ नेल्‍ल रे नाइक्‍पदा बाक्‍त। २इतिहास १५:१५

31 मोपा येहो-शाफातम यहूदाम सासन पवा बाक्‍त। मेको पिप दुम्‍मेनु, ३५ बर्स दुम्‍शो बाक्‍माक्‍त। मेकोमी यरूसलेम मी २५ बर्स सासन पवा बाक्‍त। मेको आ ममा आ नें अजुबाह बाक्‍माक्‍त। मेको शिल्‍ही आ तमी बाक्‍माक्‍त।

32 येहो-शाफात आ आफ आसा आ लांम गाक्‍माक्‍त। मिनु मेको लां रे ग्‍युरा पेरा मपवा बाक्‍त। मेकोमी परमप्रभु यावे आ ङोंइती मार ठीक बाक्‍मे, मेको पवा बाक्‍त।

33 मो हना यो मेकोमी डांडा ङा थानपुकी नेल्‍ल मप्रेदा बाक्‍त। मिनु मुरपुकीम आन थुं आन किकी पिपी आन परमप्रभु गे मलेत्‍मे बाक्‍त।

34 मिनु हानानी आ तौ येहूम येहो-शाफात आ पशो ङोंइती रे नोले सम्‍म नेल्‍ल इस्राएल ङा पिप आन इतिहासम ब्रेक्‍शा, वोइश्‍शो बाक्‍ब।

35 मिनु नोले यहूदा ङा पिप येहो-शाफात, इस्राएल ङा काइ मरिम्‍शो पाइब पिप अहाज्‍याह नु वारच्‍बु दुम्‍माक्‍त। मेको काइ मरिम्‍शो पाइब बाक्‍माक्‍त। १राजा २२:५२-५४

36 मेकोमी टारशीश लशा ग्‍याप्‍तीक लेयतीक गेय पचा कली जहाजपुकी सेल्‍चा कली अहाज्‍याह नु गारमाक्‍त। मिनु मेको ठेयब जहाजपुकी एस्‍योन-गेबेरम सेल्‍मे बाक्‍त।

37 मारेशा ङा दोदा-वाहु आ तौ एलीएजेरमी येहो-शाफात आ पर्बम परमप्रभु आ लोव़ पवा बाक्‍त। मेकोमी “गे अहाज्‍‍याह नु वारच्‍बु दुम्‍‍तीके, परमप्रभु यावेम इन गेय खतम सेल्‍ब” देंमाक्‍त। मिनु मेको ठेयब जहाजपुकी खतम दुम्‍मा बाक्‍त। टारशीश लचा मतामे बाक्‍त।