2 Chronicles 2 in Sunwar
1 मिनु सोलोमनम परमप्रभु यावे कली मान पचा, दे खिं का नु आंम कली दरवार का सेल्चा थुं पवा बाक्त।
2 मिनु सोलोमनमी ७० हजार कुरब मुर, ८० हजार पहाडम फुल्लु ख्रोइक्चा कली नु मेको गेय पाइब आन कली कोव़ब हजार सां ६ सहे मुर आन कली योव़मी बाक्त।
3 मिनु सोलोमनम टायर ङा पिप हुराम कली “गे आं आफ दाऊद कली आ खिं सेल्चा कली लेबानोन ङा लाइश्शो रवा आ शी सोइश्शो बाक्तीनी। १इतिहास १४:१
4 मिनु मुल गो परमप्रभु यावे, आं परमप्रभु कली मान पचा, दे मेको कली खिं का सेल्चा दाक्नुङ। मिनु मेको खिं परमप्रभु यावे आ ङोंइती ब्रोव़शो रिना पाइश्शो धूप चोचा कली, मेकेर नाक्त किंत किंत ङा कोंइतीक शोब्ले हार हार पा चढ़ेचा कली, नाक्दो सुनी चोशा चढ़ेचा कली, नाइक्तीक नाक्ती, औंसी नाक्ती नु परमप्रभु यावेम, आंइ परमप्रभु गेना हना यो ‘मानेन’ दे इस्राएली आन कली गेशो चाड मानेचा कली जिम्मा गेचा दाक्नुङ।
5 गो आं सेल्चा चिक्शो खिं थम ठेयब नु रिम्शो खिं दुम्चा माल्ब। मारदे हना आंइ परमप्रभु देवी देवता नेल्ल आन क्येङा ठेयब बाक्ब।
6 तन्न सरीङ नु स्वर्गम मेको मरिक्ब हना, सुम मेको कली खिं सेल्ने चाप्बा ङा? मेको कली मार मार चढ़ेचा क्येङा लाक्शा, आ खिं सेल्ब गो सु नङा ङा? २इतिहास ६:१८; १राजा ८:२७
7 मोपतीके गे आं कली सेल्स जोक्ब तुइक्ब मुर का सोइक्तीन। मेको मुरुम सुन, चांदी, कांसा नु फलाम चेम्शा, मार मार सेल्स जोक्चा माल्ब। मेकोमी प्याजी, लल नु नीलो श्येले रे मार मार प्रोव़स जोक्चा माल्ब। मिनु मार मार मुशा, बुटा आप्चा शेंसीशो मुर दुम्चा माल्ब। मिनु मेकोमी आं आफ दाऊदम योव़शो मारेइ मारेइ पस जोक्ब यहूदा नु यरूसलेमम गो नु बाक्ब मुरपुकी नु गेय पचा माल्ब।
8 गे आं कली यो लेबानोन ङा लाइश्शो रवा आ शी नु लेबानोन ङा अरु रवा आ शी सोइक्तीनी। मारदे हना इन लेबानोन ङा मुरपुकीम रिम्शो पा शी ख्रोइक्स जोक्ब बाक्नीम, दे गो तुइक्नुङ। आं गेय पाइब इन गेय पाइब नु गेय पाइनीम।
9 आं कली शुश शी तिम्शा सोइक्तीन। मारदे हना गो ठेयब नु दारशो खिं सेल्चा दाक्नुङ।
10 गो इन गेय पाइब रवा तिम्ब आन कली २० हजार कोर हिल्शो चेरब, २० हजार कोर क्योव़ज, २० हजार बाथ अङगुर शांबु नु २० हजार बाथ तेल गेनुङमी” दे लोव़ कुरब मुर सोइक्ता बाक्त। कोर का २२० लिटर पुक्तीके बाक्ब। बाथ का २२ लिटर बाक्ब।
11 मिनु टायर ङा पिप हुराममी चिठी का ब्रेक्शा, सोलोमन कली सोइक्ता बाक्त। मिनु मेकोमी “परमप्रभु यावेमी आ मुर आन कली दाक्तीके, इन कली मेको आन पिप सेल्तु।
12 सरीङ नु रागी सेल्ब परमप्रभु यावे, इस्राएली आन परमप्रभु ठेयब बाक्ब। मेकोमी पिप दाऊद कली रुप्तीक नु तुइक्तीक थुं पाइश्शो तौ का गेप्तु। मेकोमी परमप्रभु यावे कली खिं का नु आंम कली दरवार का सेल्ब।
13 गो इन कली वारच पाइक्चा कली मार मार सेल्स शुश जोक्ब नु तुइक्ब हुराम-अबी कली सोइक्नुङ। १राजा ७:१३
14 मेको दान आ थर ङा मीश मुर आ तौ बाक्ब। मेको आ आफ चहिं टायर ङा बाक्ब। मेको सुन, चांदी, कांसा, फलाम, हीरा, शी नु प्याजी, लल, नीलो श्येले नु रिम्शो पा किरशो सुती श्येले रे प्रोव़शो वा रे मार मार सेल्ने चाप्ब। मुशा मार मार सेल्चा यो जोक्ब बाक्ब। इन कली मार मार ब्रेक्स माल्नीनी, मेकोमी पने चाप्ब। मेको मारेइ मारेइ जोक्ब मुरपुकी नु ठेयब पिप, इन आफ दाऊद आ मारेइ मारेइ सेल्बपुकी नु गेय पने चाप्ब। प्रस्थान ३१:२-६
15 इन ब्रेक्शो खोदेंशो पाइन गेय पाइब आन कली चेरब, क्योव़ज, तेल नु अङगुर शांबु सोइक्तीन।
16 गो इन माल्शो शी नेल्ल लेबानोनम तिम्नीकी। मिनु फ्रेंशा योप्पा सहर सम्म ठेयब समुन्द्र रे पा सोइक्नीकी। मिनु गे मेकेर रे यरूसलेम सम्म लतीन” दे चिठी ब्रेक्शा सोइक्ता बाक्त।
17 मिनु सोलोमनम इस्राएलम बाक्शो अर्को रागी ङा मुर आन कली हिक्पाइक्मी बाक्त। ङोंइती आ आफ दाऊदमी मुर आन कली हिक्पाइश्शो बाक्माक्त। मुल मेकोपुकी लाख का ५३ हजार ६ सहे वोंइश मुर बाक्मा बाक्त। १इतिहास २२:२
18 मेको रे ७० हजार आन कली कुरब, ८० हजार आन कली पहाडम फुल्लु ख्रोइक्ब नु हजार सां ६ सहे आन कली मेको गेय पाइब आन कली कोव़ब सेल्मी बाक्त।