2 Chronicles 19 in Sunwar
1 मिनु यहूदा ङा पिप येहो-शाफात मारेइ मदुम्थु आ दरवार यरूसलेम लेश्शा जाक्माक्त।
2 मिनु परमप्रभु यावे आ नोले दुम्ब लोव़ पाइब हानानी आ तौ येहू मेको कली ग्रुम्थ जाक्माक्त। मिनु मेकोमी येहो-शाफात कली “मार, मरिम्शो पाइब कली वारच पाइश्शा, परमप्रभु यावे आ जोरी सत्रु कली दाक्चा ठीक बाक्बा? इन पशो तशा परमप्रभु यावे इन पर्बम गाइक्ताक्व।
3 मो हना यो गे का निक्शी रिम्शो गेय यो पशो बाक्नीनी। गे रागी रे मूर्ति थाम आन कली ग्रुंइताक्नी। मिनु परमप्रभु आ नोले खोइक्चा थुं पाइतीनी” देंमाक्त। २इतिहास १७:३,६
4 येहो-शाफात आ दरवार यरूसलेमम बाक्माक्त। मिनु मेको लेंशा बेयर-शेबा रे एफ्राइम ङा पहाड ङा मुर आन बाक्तीक लशा, मेको आन कली लेंशा परमप्रभु यावे, आन किकी पिपी आन परमप्रभु गे लेश्शा चाक्मी बाक्त।
5 मेकोमी यहूदा ङा बोल्यो सहर नेल्लेमी निसाफ पाइबपुकी वोदा बाक्त।
6 मिनु मेकोमी मेको निसाफ पाइब आन कली “गेपुकीम मार पाइनीनी, मेको मिम्तीन। गेपुकीम निसाफ नेंपाइक्नीनु, मुर आन कली ममाइ तन्न परमप्रभु यावे आ ङोंइती निसाफ पाइनीनी। गे निसाफ पची ना मेको गे नु बाक्ब। ब्यवस्था १:१७
7 परमप्रभु यावे कली मान पा हिनीन। होस पा निसाफ पने। मारदे हना परमप्रभु यावे, इं परमप्रभुमी दूली निसाफ मपाइब। मेको कुल मकोव़ब नु घूस मताक्ब निसाफ पाइब बाक्ब” देंमाक्त। प्रस्थान १८:२१; ब्यवस्था १०:१७; रोमी २:३१
8 येहो-शाफातम यरूसलेममी लेवीपुकी, चढ़ेबपुकी नु इस्राएल ङा खिं खिं आन ठेयब मुर आन कली परमप्रभु यावे आ ङोंइती निसाफ पचा कली नु जीब आन दातेमी गारपाइक्चा कली वोइश्शो बाक्माक्त। मिनु मेकोपुकी यरूसलेमम बाक्बाक्मा बाक्त। ब्यवस्था १७:८-९; ब्यवस्था १९:१७
9 मिनु मेकोमी मेको आन कली “इन गेय दोपा पचा देंशा हना, इन पशो नेल्लेमी परमप्रभु यावे कली मान पा हिंशा, थमा सुइक्चा ङा दुम्शा, इन थुं नेल्लेमी पचा माल्नीनी।
10 मिनु अरु सहर ङा आइक्च निसाफ पाइब इन लोक्ब, इन बाक्तीक सहरम इन कली हिल्लो पचा कली जाक्नीमी। मार बाक्त हना यो, मुर साइश्शो आ पर्बम बाक्त हना यो, परमप्रभु यावे आ अरेशो लोव़ आ पर्बम बाक्त हना यो, शेंतीक लोव़ आ पर्बम बाक्त हना यो, फुल्लुम मुशा ब्रेक्शो लोव़ नु निसाफ पतीक लोव़ बाक्त हना यो, गे मेको आन कली शेंचा माल्नीनी। मोपा मेकोपुकीमी दूली मपथु, परमप्रभु यावे आ ङोंइती पाप मपाइनीम। मेकोपुकीम मरिम्शो पाम्तेक्म हना, परमप्रभु इन पर्बम नु इन लोक्ब, आइक्च निसाफ पाइब आन पर्बम गाइक्ब। पाप मपथु, रिम्शो शेंदीने।
11 परमप्रभु यावे आ पर्बम तुइक्ब नु इन कली वारच पाइब ठेयब चढ़ेब अमारयाह बाक्ब। मिनु पिप नु राज्य आ पर्बम तुइक्ब यहूदा आ थर ङा मुर आन ठेयब मुर इश्माएल आ तौ जेबदीयाह इन कली वारच पाइब बाक्ब। लेवीपुकीम चहिं इन निसाफ पची ना ब्रेक्ब नु मार मार वारच पाइब बाक्नीम। महिंथु इन गेय पने। परमप्रभु यावे रिम्शो पाइबपुकी नु बाक्ल” दे अर्ती गेमी बाक्त।