2 Chronicles 11 in Sunwar
1 मिनु रेहोबाम यरूसलेमम लेश्शा, आंम राज्य लेंशा ताक्चा कली यहूदा नु बेन्यामीन थर ङा लाख का ८० हजार बोल्यो लडाइ पाइब मुरपुकी इस्राएली नु लडाइ पचा कली खुप्ता बाक्त। १राजा १२:२१-२४
2 तन्न परमप्रभु यावे आ लोव़ परमप्रभु आ मुर शेमायाह कली जाक्माक्त।
3 मिनु परमप्रभुमी शेमायाह कली “सोलोमन आ तौ यहूदा ङा पिप रेहोबाम, इस्राएलम बाक्ब यहूदा ङा मुर नु बेन्यामीन ङा मुर नेल्ल आन कली,
4 परमप्रभु यावेमी मार देंब देंशा हना ‘गे इन लोक्बपुकी नु लडाइ पथ इर ङोइश्शा मलने। गे नेल्ल इन खिं लेश्शा लने। मारदे हना एको नेल्ल आं रे पा पिशो बाक्ब’ दे माइक्मी” देंमाक्त। मोपतीके मेकोपुकीम परमप्रभु यावे आ लोव़ टिशा, येरोबाम नु लडाइ पचा थुं मपामे बाक्त।
5 मिनु रेहोबाम यरूसलेमम बाक्शा, यहूदा ङा सहरपुकी बोल्यो सेला बाक्त।
6 मेकोमी बेथलेहेम, एताम, तेकोहा,
7 बेथ-सुर, सोको, अदुल्लाम,
8 गाथ, मारेशा, जीफ,
9 अदोरैम, लाकीश, आजेका,
10 सोराह, आइयालोन नु हेब्रोन बोल्यो सेला बाक्त। मेको सहरपुकी यहूदा नु बेन्यामीनम बाक्मा बाक्त।
11 मिनु मेकोमी मेको सहरपुकी थम बोल्यो सेला बाक्त। मिनु मेकेर कप्तानपुकी योव़शा वोदा बाक्त। मिनु जचा थोव़क, तेल, अङगुर शांबु खेक्शा वोइक्पदा बाक्त।
12 मिनु मेकोमी सहर नेल्लेम ठेयब तेक्तीक नु तूतीकपुकी, तेल्शा वोइक्पदा बाक्त। मिनु मेको सहर नेल्ल थम बोल्यो सेला बाक्त। मोपा मेकोमी यहूदा नु बेन्यामीन आ राज्य बोल्यो सेल्शा सासन पवा बाक्त।
13 इस्राएल रागीम ब्राशा बाक्शो चढ़ेब नु लेवीपुकी नेल्ल आन बाक्तीक रे रेहोबाम आ बाक्तीक जाक्मा बाक्त।
14 लेवीपुकीम आन बाक्तीक नेल्ले प्रोंइशा, यहूदा नु यरूसलेमम बाक्थ जाक्मा बाक्त। मारदे हना येरोबाम नु आ तौपुकीमी मेको आन कली परमप्रभु यावे कली चढ़ेतीक गेय पचा मगेमे बाक्त। २इतिहास १३:९
15 मिनु येरोबाममी डांडा ङा थानम आ सेल्शो क्यारश आ मूर्ति नु बाछा आन मूर्ति पूजा पचा कली आ चढ़ेब वोइक्पदा बाक्त।
16 मिनु सु सुमी परमप्रभु यावे, इस्राएली आन परमप्रभु कली खोइक्चा थुं पशो बाक्मा, मेको इस्राएली नेल्ल परमप्रभु यावे, आन किकी पिपी आन परमप्रभु कली चढ़ेथ यरूसलेम सहरम लमा बाक्त। मिनु लेवीपुकी मेको आन नोले खोदमे बाक्त। १राजा १२:२६-२७
17 मेकोपुकीम यहूदा ङा राज्य बोल्यो सेल्शा, बर्स सां सम्म सोलोमन आ तौ रेहोबाम कली वारच पदमे बाक्त। मारदे हना मेकोपुकी बर्स सां सम्म दाऊद नु सोलोमन आस रिम्शो लांम गाक्मा बाक्त।
18 मिनु रेहोबामम महलाथ कली ग्युंबे पा चाक्गा बाक्त। मेको आ आफ दाऊद आ तौ येरीमोथ नु मेको आ ममा चहिं येस्से आ तौ एलीआब आ तमी अबीहेल बाक्माक्त। १सामुएल १६:६
19 मेकोमी रेहोबाम कली येऊशा, शेमारयाह नु चाहम तौ थिवा बाक्त।
20 मेको आ नोले रेहोबाममी अब्सालोम आ तमी माकाह कली ग्युंबे पवा बाक्त। मेकोमी अबीयाह, अत्तै, जीजा नु शेलोमीथ थीमी बाक्त।
21 मिनु रेहोबाममी आ ग्युंबे पशो मीशपुकी नु अरु मीश आन क्येङा अब्सालोम आ तमी माकाह कली शुश दाक्बाक्माक्त। मेको के १८ जना ग्युंबे पशो मीश नु ६० जना अरु मीश बाक्मा बाक्त। मेको के २८ जना तौ नु ६० जना तमी बाक्मा बाक्त।
22 रेहोबामम आ तौ नेल्ल आन दाते ङा माकाह आ तौ अबीयाह कली आ नोले, आ पा ङा पिप सेल्चा कली मिम्ता बाक्त।
23 मिनु मेकोमी रुप्तीक थुं पा अर्को तौ आन कली यहूदा नु बेन्यामीन ङा रागी ङा बोल्यो सहरम सासन पाइब सेला बाक्त। मेको आन कली मार मार माल्मा, शुश गेशा, मेको आन कली शुश मीश आल, मीश सेल्चा कली चाक्शा गेवा बाक्त। २इतिहास २१:३