2 Chronicles 1 in Sunwar

1 दाऊद आ तौ सोलोमन पिप दुम्‍शा, आ राज्‍य बोल्‍यो दुम्‍माक्‍त। मारदे हना परमप्रभु यावे, आ परमप्रभु मेको नु बाक्‍शा, मेको कली थाम्‍पा ठेयब मान ताइब सेला बाक्‍त। १राजा २:१२,४६

2 मिनु सोलोमनम इस्राएली नेल्‍ल, हजार हजार नु सहे सहे ङा लडाइ पाइब आन कप्‍तान, निसाफ पाइबपुकी, इस्राएली आन ठेयब मुरपुकी नु आन खिं खिं ङा ठेयब मुर नेल्‍ल खुप्‍शा लोव़ पवा बाक्‍‍त।

3 मिनु सोलोमन नु मेको मुर नेल्‍ल गिबोन सहर आ नेक्‍था बाक्‍शो लाइश्‍शो डांडाम लमा बाक्‍‍त। मारदे हना परमप्रभु यावे आ गेय पाइब मोसाम गोरशो रागीम सेल्‍शो परमप्रभु आ ग्रुम्‍तीक ताम्‍बु मेकेर बाक्‍माक्‍त। १इतिहास १६:३९

4 मिनु दाऊदम ङोंइती परमप्रभु आ कबल पशो सन्‍दोस कली किरयथ-यारीम रे आ ठीक पशो बाक्‍तीके यरूसलेमम चाक्‍शो बाक्‍माक्‍त। मारदे हना मेको कली मेकेर ताम्‍बु का कीशो बाक्‍माक्‍त। १इतिहास १३:६; १इतिहास १५:३,२; १इतिहास १६:१

5 मिनु हुर आ चच ऊरी आ तौ बेजालेलमी सेल्‍शो कांसा के चोशा चढ़ेतीके परमप्रभु यावे आ बाक्‍तीके आ ङोंइती गिबोनम बाक्‍शो बाक्‍माक्‍त। प्रस्‍थान ३८:३-८

6 मिनु सोलोमन नु आ खुप्‍शो मुर नेल्‍ल इर परमप्रभु यावे आ ङोंइती जाक्‍मा बाक्‍त। मिनु सोलोमन मेको कांसा के चढ़ेतीक सम्‍म ङोइश्‍शा लमाक्‍त। मेको ग्रुम्‍तीक ताम्‍बु आ ङोंइती बाक्‍शो बाक्‍माक्‍त। मेको आ तारी हजार का चोशा चढ़ेतीक चढ़ेवा बाक्‍त।

7 मेको नाक्‍दो परमप्रभुम सोलोमन कली तपांइसे बाक्‍त। मिनु सोलोमन कली “गो इ कली मार गेन? लो पुनो” देंमाक्‍त।

8 मिनु सोलोमनम परमप्रभु कली “गे आं आफ दाऊद कली ठेयब नु गेना हना यो दाक्‍तीक कोंइताक्‍नी। मिनु आं कली मेको आ पा ङा पिप सेल्‍शो बाक्‍नीनी।

9 मुल आं परमप्रभु यावे, गे आं आफ दाऊद कली गेशो इन लोव़ खाप्‍पीन। मारदे हना गे आं कली एको रागी ङा फुरक खोदेंशो पा हिक्‍ने मचाप्‍चा ङा शुश मुर आन पिप सेल्‍तीनी।

10 आं कली एको मुर आन कली सासन पाइब सेल्‍तीनी। मोपतीके आं कली रुप्‍तीक नु तुइक्‍तीक थुं गेयीनी। मिनु आं कली एको मुर नु रिम्‍शो पा बाक्‍चा गेयीनी। मारदे हना एको इश्‍का इन मुर आन कली सुम सासन पने चाप्‍बा ङा?” देंमाक्‍त।

11 मिनु परमप्रभुम सोलोमन कली “गे आं मुर आन पिप दुम्‍चा कली रुप्‍तीक नु तुइक्‍तीक थुं पुंइतीवी। तन्‍न गे शुश क्‍येट नु शोंप, मान ततीके, आंम जोरी सत्रु आन कली साइक्‍तीके नु आंम कली शुश ब्रोंइङल, दे मपुनी।

12 मोपतीके गो इ कली रुप्‍तीक नु तुइक्‍तीक थुं गेनन। मिनु गो इ कली शुश क्‍येट, शोंप नु मान ततीके यो गेनन। मेको इ क्‍येङा ङोंइती नु इ क्‍येङा नोले ङा तेकोइ पिपपुकीम मतशो बाक्‍नीम” दे मदा बाक्‍त।

13 मिनु सोलोमन गिबोन सहर आ नेक्‍था ङा डांडा ग्रुम्‍तीक ताम्‍बु आ बाक्‍‍तीक रे यरूसलेमम जाक्‍शा, इस्राएली आन कली सासन पवा बाक्‍त।

14 मिनु सोलोमनम शुश बग्‍गी नु शारापुकी खुप्‍तीमी बाक्‍त। मेको के हजार का ४ सहे बग्‍गी नु हजार का सहे निक्‍शी शारा बाक्‍मा बाक्‍त। मिनु मेकोमी आ बग्‍गी आन कली बग्‍गी वोइक्‍तीक सहरम वोइक्‍पदा बाक्‍त। तन्‍न का निक्‍शी चहिं आं सहर यरूसलेमम वोइक्‍पदा बाक्‍त।

15 सोलोमनम सुन नु चांदी यरूसलेमम बाक्‍शो फुल्‍लु खोदेंशो पा शुश तेला बाक्‍त। मिनु लेबानोन ङा लाइश्‍शो रवा आ शी, शेफेलाह ङा फोव़शी रवा खोदेंशो पा शुश तेला बाक्‍त।

16 सोलोमनम शारापुकी इजीप्‍त नु क्‍युए रे ग्‍याप्‍शा, चाक्‍पाइक्‍बाक्‍माक्‍त। मिनु मेको आ ग्‍याप्‍ब लेयबपुकीम क्‍युएम क्‍येट थाप्‍शा ग्‍याप्‍शा चाक्‍बाक्‍मा बाक्‍त।

17 मेकोपुकीम इजीप्‍त रे ग्‍याप्‍शा अर्को रागी कली लेयबाक्‍मा बाक्‍त। बग्‍गी का कली ६ सहे चांदी के शेकेल नु शारा का कली सहे का ५० चांदी के शेकेलम लेयबाक्‍मा बाक्‍त। मिनु सोलोमन आ ग्‍याप्‍ब लेयबपुकीमी मेको हित्ती नु अरामी पिप आन कली लेयबाक्‍मा बाक्‍त।