1 Timothy 5 in Sunwar
1 शेंब खाल्पा आन कली महुइक्तो, तन्न आंम आफ कली खोदेंशो पा लोव़ पावो। ठिटा वोंइश मुर आन कली लोक्ब खोदेंशो मिम्तो। लेवी १९:३२; तीतस २:२
2 मीश मुर आन कली इम्मा खोदेंशो मिम्तो। ठिटी आन कली समी खोदेंशो मिम्तो। मोपा नेल्ले रिम्शो पावो।
3 आन वोंइश बेक्शो रिम्शो पाइब मीश मुर आन कली ठेयब सेलो।
4 आन वोंइश बेक्शो मीश मुर आ तमी तौ, चच युइ बाक्तेक्म हना, मेकोपुकीम आंम खिं ङा मुर आन कली रिम्शो गेय पा कोंइचा माल्नीम। आम आफ आस कली रिम्शो पचा माल्नीम। मेको परमप्रभु यावे आ ङोंइती शुश रिम्शो बाक्ब।
5 आ वोंइश बेक्शो मीश मुर रिम्शो बाक्त हना, परमप्रभु यावे कली ला मिम्ब। मेकोमी नाक्दो नाक्त प्रार्थना पा पुंइना पुंइन बाक्ब। लूका २:३७
6 आ दला दाक्स पाइब चहिं सेस बाक्त हना यो, बेक्शो खोदेंशो दुम्ब।
7 एको लोव़ शेंदीमी। मेकोपुकी दोस गेचा मपुंइसीब दुम्मल।
8 सुमी आ खिं ङा मुर आन कली मकोव़बा, मेको आ थमा सुइक्तीके जाम्शा लशा, थमा मसुइक्ब आन क्येङा यो मरिम्शो दुम्ब। मत्ती १५:५-६
9 वोंइश बेक्शो मीश मुर ६० बर्स दुम्ने थुम्शा ला, वारच पचा कली आ नें ब्रेक्सीब। मेको वोंइश का आ मीश ला दुम्चा माल्ब।
10 आ तमी तौ रिम्शो पा कोल्पाइश्शा, मुर आन कली बास बाक्चा गेशा, थमा सुइक्ब आन खोइली चिक्शा, श्येत जाइब आन कली वारच पशा, नेल्लेमी रिम्शो पना पन बाक्ब, दे मुरपुकीमी तुइश्शो मीश मुर आ नें ला ब्रेक्सीब। हिब्रू १३:२; यूहन्ना १३:१४
11 वोंइश बेक्शो ठिटी मीश मुर आन कली वारच पचा कली आन नें मब्रेक्चा। मारदे हना आन दला दाक्स पा ख्रीस्त कली प्रेंताक्म हना, ग्युंबे पचा ला मिम्नीम।
12 मिनु आन ङोंइती देंशो प्रोंइशा, दोस ताइब दुम्नीम।
13 मेकोपुकी मुर आन खिं खिं हिरथ लाइनीम। अल्सी ला ममाइ, मदेंचा ङा लोव़ यो शुश पाइनीम।
14 मोपतीके वोंइश बेक्शो ठिटी मीश मुरपुकीमी ग्युंबे पा, आल थिशा, आन खिं ङा गेय पामेक्ल। मो पाम्तेक्म हना, मरिम्शो पा गाक्चा मताइनीम। अरुमी यो थमा सुइक्ब आन पर्बम मरिम्शो लोव़ पचा मताइनीम। १तिमोथी २:१५; १कोरिन्थी ७:९
15 का निक्शीमी सैतान कली खोइक्चा गोम्तेक्म।
16 थमा सुइक्ब आन खिंमी वोंइश बेक्शो मीश मुरपुकी बाक्तेक्म हना, मेको आन कली वारच पामेक्ल। मिनु ग्रुम्तीके कली श्येत मदुम्थु, वोंइश बेक्शा, का ला लीशो मीश मुर आन कली वारच पचा ताइब। प्रेरित ६:१
17 ग्रुम्तीके खिंमी श्येत पा लोव़ पाइब नु शेंब खाल्पा आन कली निक्शी खेयप मान पा क्येट गेचा माल्नीम। प्रेरित १४:२३; रोमी १२:८
18 परमप्रभु यावे आ लोव़मी “ब्यफ कली दांइ पपाइश्शोनु, फुङला मपाइक्चा” मिनु “गेय पाइब आन गाल्च ताइब बाक्नीम” दे ब्रेक्शो बाक्ब। ब्यवस्था २५:४; १कोरिन्थी ९:९; लूका १०:७
19 मुर कामी ग्रुम्तीक ङा शेंब खाल्पा कली दोस गेप्तु हना, सांकछी निक्शी सां मबाक्थु, थमा मसुतो। ब्यवस्था १९:१५; मत्ती १८:१६
20 सु मरिम्शो पना पन बाक्मे, मेको कली थमा सुइक्ब आन ङोंइती हुइक्तो। मिनु मेको नेंब नेल्लेमी मरिम्शो पचा हिंनीम। गलाती २:१४; मत्ती १८:१५-१७
21 परमप्रभु यावे, ख्रीस्त येसु नु योव़शो परमप्रभु यावे आ स्वर्ग ङा गेय पाइब आन ङोंइती “मुर आन कुल मकोव़थु, आं देंशो नेल्ल पावो” दे इ कली अरेनुङ। मुर आन कुल कोव़शा, मारेइ मपावो।
22 मुर आन कली ब्रो थिशा, आन तार गुइ वोइश्शा, प्रार्थना मपावो। मुर आन मरिम्शो पतीकेमी मगरो। मरिम्शो रे ङोन बाक्को। १तिमोथी ४:१४
23 ङोंइती ङा खोदेंशो पा ब्वाक्कु ला मतूङो। इ कोव़ज रोइ पतीके इच्का अङगुर शांबु ब्वाइश्शा तूङो।
24 मुर का निक्शी आन मरिम्शो पशो तुंइसीब। सजाइ ताइनीम, दे यो तुंइसीब। का निक्शी आन मरिम्शो पशो चहिं नोले ला तुंइसीब।
25 मोपा मुर का निक्शी आन रिम्शो पशो मतुंइसाक्व हना यो, ख्रुइश्शा लीने मचाप्नीम।