1 Samuel 8 in Sunwar
1 सामुएल खूशो दुम्तीके, आ तौ आन कली इस्राएली आन कली निसाफ पाइब सेल्मी बाक्त।
2 मेको आ ङोंइती जरमेशो तौ आ नें योएल नु आ माइला तौ आ नें अबीयाह बाक्माक्त। मेको बेयर-शेबाम निसाफ पाइब बाक्सा बाक्त। १इतिहास ६:१३; आमोस ८:१४
3 तन्न मेको निक्शीमी आस आफोम पशो खोदेंशो मपाम्से बाक्त। क्येट पाइश्शो दुम्चा कली घूस जाम्से बाक्त। दूली निसाफ पाम्से बाक्त। ब्यवस्था १६:१९
4 मोपतीके इस्राएल ङा खाल्पा नेल्ल ग्रुम्शा, रामाहम सामुएल आ बाक्तीक जाक्मा बाक्त। १सामुएल ७:१७
5 मिनु मेकोपुकीमी “गे मुल खूशो दुम्तीनी। इन तौ निक्शी इन देंशो लांम मगाक्स। मोपतीके अर्को रागी रागी ङा मुर आन खोदेंशो पा आंइ कली सासन पचा कली पिप का सेल्शा, गेकी” देंमा बाक्त। ब्यवस्था १७:१४-२०; होसे १३:१०; प्रेरित १३:२१
6 तन्न सामुएलम सासन पचा कली पिप पुंइशो लोव़ नेंशा, काइ मदाक्ता बाक्त। मिनु सामुएलमी परमप्रभु यावे नु लोव़ पवा बाक्त।
7 मिनु परमप्रभु यावेमी सामुएल कली “मुरुम मार मार देंमा, मेको नेल्ल नेनो। मारदे हना मेकोपुकीम इ कली प्रोंइशो ममाइ, आं कली प्रोंइशो नम। मेकोपुकीम आं कली आन पिप दुम्शो मदाक्शो नम। प्रस्थान १५:१८; गन्ती २३:२१; ब्यवस्था ३३:५; भजन संग्रह २४:७-१०; भजन संग्रह ७४:१२; यसैया ६:५
8 इजीप्त रे ग्रुंइशो नाक्त रे आं कली मार मार पाइय्यीमी, मुल मेकोपुकीम इ कली यो मो पाइनीम। मेकोपुकीम अरु देवी देवता आन नोले खोइश्शा, आं कली प्रोंइशो बाक्नीम। मिनु मुल इ कली यो प्रोंइनीम।
9 मिनु मुल मार देंना देंन बाक्मा, मेको नेनो। मुल मेको आन कली हिंपाइश्शा शेंदीमी। आन सासन पाइब पिपम दोदेंशो पाइनीमी, मेको आन कली माइक्मी” देंमाक्त।
10 मिनु सामुएलमी पिप पुंइब मुर आन कली परमप्रभु यावेम देंशो लोव़ नेल्ल नेंपाइक्मी बाक्त।
11 मिनु सामुएलमी “इन कली सासन पाइब पिपमी मार पाइब देंशा हना, इन तौ आन कली लाइश्शा, आ बग्गी, शारा नु गेय पाइब सेल्ब। मेकोमी मेको आन कली आ बग्गी आ ङोंइङोंइती दोरपाइक्ब।
12 मिनु का निक्शी आन कली हजार का जना आन ठेयब मुर सेल्ब। का निक्शी आन कली ५० जना आन ठेयब मुर सेल्ब। मेको आ रू वाक्शा, आ बाली नाली रुप्ब सेल्ब। मिनु मेको आन लडाइ पतीक या नु बग्गी सेल्पाइक्ब।
13 मेकोमी इन तमी आन कली रांम ख्रेक्तीक तेल सेल्पाइक्ब। जचा थोव़क क्येब नु शोब्ले चोइब सेल्चा कली लाइक्ब।
14 मेकोमी इन नेल्ल क्येङा रिम्शो रू, अङगुर रू नु तेल रवा बाक्शो रू रोइश्शा, आ गेय पाइब आन कली गेब।
15 मेकोमी इन अन्न १० भागमी भाग का लाइक्ब। इन अङगुर यो मोपान लाइक्ब। मिनु आ कप्तान नु आ खिं ङा गेय पाइब आन कली गेब।
16 मेकोमी इन वाइलीम वाइल, इन नेल्ल क्येङा रिम्शो बी ब्यफ नु गधापुकी लाइश्शा आ गेय पपाइक्ब।
17 मेकोमी इन क्यारश भेडा रे १० भाग ङा भाग का लाइक्ब। मिनु गेपुकी यो मेको आ गेय पाइब दुम्नीनी।
18 मो दुम्मेनु, इन योव़शो पिप आ पर्बम ठेयब सेंदा पा पुंइनीनी। तन्न मेना परमप्रभु यावेम इन पुंइशो लोव़ मनेंब” देंमाक्त।
19 तन्न मुरपुकीम सामुएल आ लोव़ नेंने मबिस्समा बाक्त। मिनु मेकोपुकीम “ममाइ, आंइ कली पिप का माल्नीकी।
20 गो यो अर्को रागी ङा मुर खोदेंशो दुम्चा दाक्नीकी। आंइ कली सासन पाइब नु लडाइम आंइ ङोंइती गाक्ब पिप का माल्नीकी” देंमा बाक्त।
21 मिनु सामुएलम मेको मुर आन देंशो लोव़ नेल्ल नेंशा, परमप्रभु यावे कली नेंपदा बाक्त।
22 मिनु परमप्रभु यावेम “मेको आन देंशो खोदेंशो पावो। मेको आन कली पिप का गेमी” देंमाक्त। मिनु सामुएलमी इस्राएल ङा मुर नेल्ल आन कली आन खिं खिं सोइक्तीमी बाक्त।