1 Samuel 7 in Sunwar
1 मिनु किरयथ-यारीम ङा मुर जाक्शा, परमप्रभु यावे आ कबल पशो सन्दोस लाइश्शा, डांडाम बाक्ब अबीनादाब आ खिंम चाक्दीत्मे बाक्त। मिनु मेको आ तौ एलाजर कली परमप्रभु यावे आ कबल पशो सन्दोस कोव़चा कली ठीक सेल्मे बाक्त। लेवी ८:-
2 मिनु मेको सन्दोस किरयथ-यारीमम वोइश्शो, शुश नाक्त दुम्शा, २० बर्स मेकेर बाक्माक्त। मिनु इस्राएली नेल्लेमी “परमप्रभु यावेम इं कली प्रोंइतु” दे सुर्ता पामे बाक्त। १सामुएल ६:२१; १सामुएल ४:२२; १इतिहास १३:६
3 मिनु सामुएलमी इस्राएली नेल्ल आन कली “गे इन थुं नेल्लेमी परमप्रभु यावे गे लेत्चा दाक्ताक्नी हना, इन दाते रे अर्को रागी ङा देवी देवता नु अश्तारोथ माइश्शो मूर्ति पाइश्शो थाम नेल्ल ग्रुंइदीन। मिनु इन थुं नेल्लेमी परमप्रभु यावे कली ला ठेयब सेलीने। मिनु मेकोम इन कली पलिस्ती आन गुइ रे प्रोंइब” देंमाक्त। उत्पत्ती ३५:२; यहोसु २४:२३
4 मिनु इस्राएलीपुकीमी बाल देवता नु मूर्ति पाइश्शो थाम नेल्ल ग्रुंइदमे बाक्त। मिनु परमप्रभु यावे कली ला ठेयब सेल्मे बाक्त। न्यायाधीस १०:१६
5 मिनु सामुएलमी इस्राएली नेल्ल आन कली “मिस्पाम बुक्कीने। मिनु गो परमप्रभु यावे कली इन पर्बम पुंइनुङ” देंमाक्त। १सामुएल १०:१७; यहोसु १८:२६; न्यायाधीस २०:१
6 मिनु मेकोपुकी मिस्पाम बुक्मा बाक्त। मिनु ब्वाक्कु चाक्शा, परमप्रभु यावे आ ङोंइती मोदमे बाक्त। मिनु मेको नाक्ती माइजा बाक्शा, मेकोपुकीमी “गो परमप्रभु यावे आ ङोंइती पाप पाइतक” देंमा बाक्त। मिनु सामुएलम इस्राएली आन कली मिस्पा सहरम ब्रेश्शा निसाफ पवा बाक्त। २सामुएल २३:१६
7 मिनु पलिस्तीपुकीमी इस्राएली मिस्पाम बुक्तेक्म देंशो लोव़ नेंन्मे बाक्त। मिनु मेको आन ठेयब मुरपुकी इस्राएली नु लडाइ पचा कली लमा बाक्त। मिनु इस्राएलीपुकी मेको नेंशा, पलिस्ती आन कली तशा शुश हिंमा बाक्त।
8 मिनु इस्राएलीपुकीम सामुएल कली “आंइ कली पलिस्ती आन गुइ रे प्रोंइचा कली परमप्रभु यावे, आंइ परमप्रभु कली पुंइचा मप्रोनीन। मिनु मेकोम पलिस्ती आन गुइ रे प्रोंइबा कों, दे पुनीन” दे सामुएल कली देंमा बाक्त। १सामुएल १२:२३; उत्पत्ती २२:१७; १राजा १३:६; येरमीया ३७:३; येरमीया ७:१६
9 मिनु सामुएलमी परमप्रभु यावे कली दूध तूब पाठा का चोशा चढ़ेवा बाक्त। मिनु इस्राएली आन पर्बम ठेयब सेंदा पा परमप्रभु यावे कली पुना बाक्त। मिनु परमप्रभु यावेम मेको आ पुंइशो लोव़ नेना बाक्त।
10 सामुएलम चोशा चढ़ेना ढ़ेन बाक्मेनु, पलिस्तीपुकी इस्राएली नु लडाइ पचा कली आन नेक्था जाक्मा बाक्त। मिनु मेको नाक्ती परमप्रभु यावेमी पलिस्ती आन तारी ठेयब बुंबु पपदा बाक्त। मिनु पलिस्तीपुकी वाम ग्याम दुम्शा, इस्राएली आन ङोंइती रे प्रोक्मा बाक्त। उत्पत्ती ३५:५; प्रस्थान १४:२४; प्रस्थान २३:२७; यहोसु १०:१०; न्यायाधीस ४:१५
11 मिनु इस्राएलीपुकीम मेको आन कली मिस्पा रे खेदा पना पन, बेथ-कर आ दी सम्म साइक्ना साइक्न खेदा पामे बाक्त।
12 मिनु सामुएलमी फुल्लु का लाइश्शा, मिस्पा नु येशाना आस दातेमी ख्रुक्गा बाक्त। मेको कली एबेन-एजेर नें वोइश्शा “परमप्रभु यावेम आंइ कली एक सम्म वारच पाप्तु” देंमाक्त।
13 मोपा पलिस्ती ब्रुशा, इस्राएली आन रागी लेंशा मओव़मा बाक्त। मिनु परमप्रभु यावेम सामुएल बाक्म सम्म पलिस्तीपुकी रे इस्राएली आन कली श्येत मगेपदा बाक्त।
14 मिनु पलिस्ती आन ङोंइती ग्राशो सहर एक्रोन रे गाथ सम्म नु आन एर ओंथ ङा गाउं नेल्ल इस्राएलीपुकीमी पलिस्ती आन गुइ रे ताक्गमे बाक्त। मिनु इस्राएली नु एमोरीपुकी गारमा बाक्त।
15 मिनु सामुएल बाक्म सम्म इस्राएली आन कली निसाफ पवा बाक्त। न्यायाधीस १०:१-५; न्यायाधीस १२:७-१४
16 मेकोमी बर्स बर्सम बेथेल, गिल्गाल नु मिस्पाम हिरशा, इस्राएली आन कली निसाफ पाइक्बाक्माक्त।
17 मिनु मेको रामाह लेप्बाक्माक्त। मारदे हना मेको आ खिं मेकेर बाक्माक्त। मिनु मेकोमी मुर आन कली निसाफ पा, परमप्रभु यावे कली चढ़ेतीक का सेला बाक्त। यहोसु १८:२५