1 Samuel 29 in Sunwar
1 पलिस्तीपुकीमी लडाइ पाइब आन कली अफेकम पुक्गमे बाक्त। इस्राएलीपुकीम चहिं येज्रेल ङा ब्वाक्कु बुक्तीकेम आन बाक्तीक सेल्मे बाक्त। १सामुएल ४:१; यहोसु १५:५३
2 पलिस्ती आन ठेयब मुरुम आन नेल्ल क्येङा सक्ति पाइश्शो लडाइ पाइब आन कली सहे सहे नु हजार हजार ङा हुल पा कप्तान दुम्मा बाक्त। दाऊद नु आ मुरपुकी नोले ङा हुलमी अकीश नु गाक्शो बाक्मा बाक्त। यहोसु १३:३
3 मिनु पलिस्ती आन ठेयब मुरपुकीम “एको हिब्रूपुकी मारदे पिमा?” देंमा बाक्त। मिनु अकीशमी “एको इस्राएल ङा सावल आ गेय पाइब दाऊद बाक्ब। एको गो नु बर्स का क्येङा यो शुश बाक्त। एको गो नु बाक्म रे मारेइ मरिम्शो मतङ” देंमाक्त। १सामुएल २७:७
4 तन्न पलिस्ती आन ठेयब मुरपुकी गाइश्शा, अकीश कली “मेको मुर कली इन गेशो आ बाक्तीकेम सोइक्तीन। मेकोम आंइ कली वारच पा लडाइ मपवल। मो पाप्तु हना, मेकोम आंइ कली वारच पखु पा मरिम्शो पाइब। आंइ कली साइश्शा आ प्रभु आ शिशी तचा मेको कली नेल्ल क्येङा रिम्शो बाक्ब।
5 एको दाऊद बाक्ब। एको आ पर्बम ङोंइती मुरपुकीम ‘सावलम हजार हजार आन कली साइक्तीमी। तन्न दाऊदमी १० हजार हजार आन कली साइक्तीमी’ दे कुम्सो पना पन, सिल पाम्तेक्म” देंमा बाक्त। १सामुएल १८:७
6 मिनु अकीशमी दाऊद कली ब्रेश्शा “परमप्रभु यावे ब्रोंइशा बाक्शो खोदेंशो पा, गे थमा सुइक्चा पुंइसीब मुर बाक्नेवे। मिनु गे गो नु लडाइ पचा कली आं कली ठीक बाक्ब। मारदे हना इ जाक्शो रे मुल सम्म गेम मारेइ मरिम्शो पशो मतङ। तन्न मेको कप्तानपुकीमी इ कली थमा मसुइक्नीम।
7 मोपतीके गे रिम्शो पा लेश्शा खिं लावो। मेको पलिस्ती आन ठेयब मुर आन मिम्शो खोदेंशो पा मरिम्शो मपावो” देंमाक्त।
8 मिनु दाऊदमी अकीश कली “गो मार पङा ङा? गो इन गेय पचा गोङा रे गे आं कली मार मरिम्शो पशो तनी? गो आं प्रभु, आं पिप, आ जोरी सत्रु नु लडाइ पचा मताइक्नुङा?” देंमाक्त।
9 मिनु अकीशम दाऊद कली “गे आं पर्बम दोस मताइब नु परमप्रभु आ स्वर्ग ङा गेय पाइब खोदेंशो बाक्नेवे। तन्न पलिस्ती आन कप्तानम ‘गे मेकोपुकी नु लडाइ पथ लचा मदुम्नेवे’ देंतेक्म। २सामुएल १४:१७
10 मोपतीके दीसा सुनी कना बोक्शा, गे नु इ नोले खोइक्ब मुरपुकी आं गेशो सहरम लेतीन। दीसा सुनी कना बोक्कीन। मिनु नां सोव़म चोटीन लने” देंमाक्त।
11 मोपतीके दाऊद नु आ मुरपुकी पलिस्ती आन रागी लेत्चा कली सुनी कना बोक्मा बाक्त। पलिस्तीपुकी चहिं येज्रेल ङा लां खोदमे बाक्त।