1 Samuel 28 in Sunwar
1 मेना पलिस्तीपुकीम इस्राएल नु लडाइ पचा, दे आन लडाइ पाइब मुर आन कली खुप्तमे बाक्त। मिनु अकीशम दाऊद कली “गे नु इ मुरपुकी लडाइ पचा कली गो नु लडाइ पतीकेम लचा माल्नीनी। देंशो लोव़ तुइश्शो बाक्ङे माइ” देंमाक्त।
2 मिनु दाऊदमी अकीश कली “दुम्ब इन गेय पाइबम मार पने चाप्बा, मेको गे तुइक्नीनी” देंमाक्त। मिनु अकीशमी दाऊद कली “गो इ कली बाक्ङे सम्म आं कली खाल पाइब सेल्नन” देंमाक्त।
3 सामुएल बेक्ने थुम्शो बाक्माक्त। मिनु इस्राएली नेल्लेमी मेको आ पर्बम रोंका पा मेको कली मेको आ सहर रामाहम थिम्शो बाक्मा बाक्त। सावलमी बेक्शो मुर रे लोव़ पाइब नु लिंक्यु कोव़ब आन कली मेको रागी रे ग्रुंइने थुम्शो बाक्माक्त। १सामुएल २५:१; प्रस्थान २२:१७
4 पलिस्तीपुकीमी नेल्ल क्येङा सक्ति पाइश्शो आन लडाइ पाइब आन कली ग्रुम्पाइश्शा, शुनेम सहरम आन बाक्तीक सेल्मे बाक्त। सावलम इस्राएली नेल्ल आन कली ग्रुम्पाइश्शा गिल्बोआम आन बाक्तीक सेल्शा बाक्मा बाक्त। यहोसु १९:१८
5 मिनु सावल पलिस्ती आन नेल्ल क्येङा सक्ति पाइश्शो लडाइ पाइब कली तशा, थाम्पा हिंशा ख्रिंख्रि पवा बाक्त।
6 मिनु सावलम परमप्रभु यावे कली हिल्लो पवा बाक्त। तन्न परमप्रभु यावेम ङोमुम, ऊरीम नु परमप्रभु यावे आ लोव़ पाइब आन रे लोव़ मलेत्ता बाक्त। १सामुएल १४:४१; प्रस्थान २८:३०
7 मोपतीके मेकोमी आ गेय पाइब आन कली “आं कली बेक्शो मुर नु लोव़ पाइब मीश मुर का मालीन। गो मेकेर लशा, मेको कली हिल्लो पाइनुङ” देंमाक्त। मिनु “एन-डोरम मोदेंशो मीश मुर का बाक्ब” दे आ गेय पाइबपुकीमी देंमा बाक्त। लेवी १९:३१
8 मिनु सावल अर्को वा फेक्शा, आ मुर निक्शी नु मेकेर लमाक्त। मिनु नाक्दो मेको मीश मुर आ बाक्तीक जाक्दीशा, मेको कली “आं कली मार दुम्बा बेक्शो मुर कली हिल्लो पा शेंदीनी। मिनु गो तेको बेक्शो मुर कली ब्रेत्चा देंनुङा, मेको कली ब्रेत्तीन” देंमाक्त।
9 मेको मीश मुरुम मेको कली “सावलम मार पवा मेको गे तुइक्नीनी। मेकोमी बेक्शो मुर नु लोव़ पाइब नु लिंक्यु कोव़ब नेल्ल कली रागी रे ग्रुंइशा खेरतु। मिनु गे मारदे आं कली साइक्पाइक्चा कली ओदेंशो गेय पपाइक्चा माल्नीनी?” देंमाक्त।
10 मिनु सावलमी परमप्रभु यावे आ नेंम कसम जशा, मेको कली “परमप्रभु यावे ब्रोंइशा बाक्शो खोदेंशो पा, गे एको गेय आ पर्बम मारेइ सजाइ मताइनीनी” देंमाक्त।
11 मिनु मेको मीश मुरुम “सु कली ब्रेत्चा” दे हिल्लो पवा बाक्त। मिनु सावलमी “सामुएल कली ब्रेत्चा” देंमाक्त।
12 मिनु मेको मीश मुरुमी सामुएल कली तशा ठेयब सेंदा पा ग्रीशा सावल कली “गे आं कली मारदे मरिम्शो पवी? गे सावल बाक्ङे बाक्त” देंमाक्त।
13 मिनु पिपम मेको कली “महिनो। गे मार तवी” देंमाक्त। मिनु मेको मीश मुरुम “गो स्वर्ग ङा गेय पाइब खोदेंशो खप रे ग्रूशो ताता” देंमाक्त।
14 मिनु सावलमी “मेको दोदेंशो बाक्मे” दे हिल्लो पवा बाक्त। मिनु मेकोमी “खूशो मुर का ग्रूशा कुत। मेकोमी दारशो वा फेक्शो बाक्त” देंमाक्त। मिनु सावलमी मेको सामुएल बाक्ब, दे तुइश्शा खुम्की पा बाप्शा सेउ पवा बाक्त।
15 मिनु सामुएलमी सावल कली “गे मारदे आं कली श्येत गेशा, ग्रुंइदीनी?” देंमाक्त। मिनु सावलमी “गो थम ठेयब श्येतम बाक्नुङ। पलिस्तीपुकीम आं कली लडाइ तोशो बाक्नीम। परमप्रभुम आं कली प्रोंइती। मेकोम आं कली आ लोव़ पाइब नु ङोमु रे लोव़ मलेत्ती। मोपतीके गो इन कली ‘मुल मार पचा माल्नुङा’ दे हिल्लो पचा कली ब्रेत्ताक्न्नी” देंमाक्त।
16 मिनु सामुएलमी “परमप्रभु यावेम इ कली प्रोंइशा, इ जोरी सत्रु दुम्शो बाक्ब, दे तुइश्शा यो, गे आं कली मारदे हिल्लो पयी।
17 परमप्रभु यावेम ङोंइती आं कली देंशो खोदेंशो पा पाप्तु। परमप्रभु यावेमी मेको राज्य इ गुइ रे लाइश्शा, इ नेक्था ङा मुर दाऊद कली गेशो बाक्ब। १सामुएल १५:२८
18 मारदे हना गे परमप्रभु यावे आ देंशो मटिवी। अमालेकी आन पर्बम परमप्रभु यावे आ गाइश्शो गे मखबी। मोपतीके मेकोम मोदेंशो पाप्तु। १सामुएल १५:१८-१९; प्रस्थान १७:१४,१६
19 मुल चिनु तेम्शा, परमप्रभु यावेमी इस्राएली नु इ कली पलिस्ती आन गुइमी गेब। दीसा गे नु इ तौपुकी गो नु बाक्नीनी। परमप्रभु यावेमी इस्राएल ङा लडाइ पाइब नेल्ल आन कली पलिस्ती आन गुइमी गेब” देंमाक्त। १सामुएल ३१:६
20 मिनु सावल सामुएल आ लोव़ नेंशा हिंशा, आ थुं ग्येत्थ लुक्च दुम्शा, खपीम गोल्माक्त। मिनु नाक्त रे नाक्दो रे मारेइ मजतीके मेको आ बोल नेल्ल जाम्माक्त।
21 मिनु मेको मीश मुर सावल आ नेक्था लशा, सावल शुश हिंशो तशा, सावल कली “गो बेक्चा आ पर्बम महिंथु, इन देंशो टीता।
22 मोपतीके मुल गे आं लोव़ नेनीन। गो इन कली जचा थोव़क गेनुङ। बोल्यो दुम्शा इन लां गाक्चा कली मेको जने” देंमाक्त।
23 मिनु सावलमी “गो मजाइनुङ” देंमाक्त। तन्न आ गेय पाइबमी यो मेको मीश मुर आ देंशो लोव़मी लोव़ तेम्दा बाक्त। मिनु मेको आन देंशो लोव़ बिश्शा, खप रे बोक्शा, खाटम निस्से बाक्त।
24 मेको मीश मुर आ खिंमी दोम्शो बाछा का बाक्माक्त। मेको मीश मुरुम मेको बाछा क्योरशा क्येशा, फस निवा बाक्त। मिनु बोरब ओख्ती मसुप्शो शोब्ले चोवा बाक्त। प्रस्थान १२:३९
25 मिनु मेकोमी, सावल नु आ गेय पाइब आन कली ख्रेत्तीमी बाक्त। मिनु मेकोपुकीम मेको जशा ब्वशा मेको नाक्दोन गाक्मा बाक्त।