1 Samuel 26 in Sunwar
1 मिनु जीफ ङा मुरपुकी सावल आ बाक्तीक गिबाम जाक्शा “दाऊद येशीमोन आ आइक्ची हाम हाकीलाह डांडाम ख्रुइश्शा बाक्शो बाक्ब” दे शेंदमे बाक्त। १सामुएल २३:१९-२४:२३; भजन संग्रह ५४:२
2 मिनु सावलमी दाऊद कली माल्चा, दे हजार सां इस्राएल ङा योव़शो मुरपुकी लाइश्शा, रीब पा जीफ ङा गोरशो रागी गे लमाक्त।
3 येशीमोन आइक्ची हाम ङा हाकीलाह डांडा ङा लां आ नेक्था आन बाक्तीक सेल्मे बाक्त। मेना दाऊद चहिं गोरशो रागीमी बाक्माक्त। मिनु सावलम आ कली खेदा पचा कली गोरशो रागीम जाक्शो बाक्ब देंशो लोव़ नेंना चोटीन
4 दाऊदमी क्यारी पाइबपुकी सोइक्ता बाक्त। मिनु सावल आ बाक्तीके तुइश्शा लेम्मा बाक्त।
5 मिनु दाऊद सावल आ बाक्तीक गे लमाक्त। मिनु सावल नु आ लडाइ पाइब आन नेल्ल क्येङा ठेयब मुर, नेर आ तौ आब्नेर इप्शा बाक्शो थिदा बाक्त। आ मुर नेल्लेम एर ओंथ रे हिरतीकेमी सावल इप्शो बाक्माक्त। १सामुएल १४:५०
6 दाऊदमी हित्ती अहीमेलेक नु सेरूयाह आ तौ योआब आ लोक्ब अबीशै गे लेश्शा कोव़शा “सावल आ बाक्तीकेम गो नु सु लने चाप्बा” देंमाक्त। मिनु अबीशैमी “गो लाइनुङ” देंमाक्त।
7 मिनु नाक्दो दाऊद नु अबीशै सावल आ बाक्तीकेम ओव़सा बाक्त। मिनु सावल आ मुर आन दातेमी आ तूतीक आ पिया गे ख्रुक्शा, इप्शो थित्से बाक्त। आब्नेर नु आ मुरपुकी चहिं सावल आ एर ओंथ हिरशा इप्शो बाक्मा बाक्त।
8 मिनु अबीशैमी दाऊद कली “परमप्रभुम मुलाक्ती इन जोरी सत्रु आन कली इन गुइमी गेशो बाक्माक्त। तूतीकेम कालेमीन खप सम्म ग्रुक्सीचा ङा पा आप्चा कली हुकुम गेयीनी। गो खेयप निक्शी आप्चा ममाल्ङल” देंमाक्त। २सामुएल १६:९
9 तन्न दाऊदमी अबीशै कली “पिप कली साइक्चा ममिम्तो। परमप्रभु यावे आ तेल लुक्शो कली साइक्बपुकी सु चहिं सजाइ मतशो बाक्बा ङा?” देंमाक्त।
10 मिनु दाऊदमी लेंशा “परमप्रभु यावे ब्रोंइशा बाक्शो खोदेंशो पा, मेकोमीन मेको कली काबु साइक्ब कि आ बेक्ची नाक्त जाक्शा बेक्ब कि लडाइम लशा साइक्चा पुंइसीब। १सामुएल २४:१३
11 गो परमप्रभु यावे आ तेल लुक्शो पिप कली गेनायो मरिम्शो मपाइनुङ। तन्न मुल मेको आ पिया गे ख्रुक्शो तूतीक नु आ ब्वाक्कु तूतीक ग्योंब कुरशा गाक्स” देंमाक्त।
12 मिनु दाऊदम मेको आ पिया आ नेक्था बाक्शो तूतीक नु आ ब्वाक्क तूतीक कुरशा गाक्सा बाक्त। सुइमी मेको आस कली मतामे बाक्त। मिनु सुइ मसेंसीमा बाक्त। मारदे हना परमप्रभु यावेम मेको आन कली मारेइ मतुइक्चा ङा पा निन्द्रा पपदा बाक्त। उत्पत्ती १५:१२
13 मिनु दाऊद आइक्ची हाम लशा, डांडा ङोइश्शा मेको आन क्येङा ङोन राम्माक्त।
14 मिनु दाऊदम नेर आ तौ आब्नेर आ नें थिशा “ए आब्नेर, गे आं लोव़ लेत्ती” देंमाक्त। मिनु आब्नेरमी “गे पिप कली हुइश्शा लोव़ पाइब सु नवे” देंमाक्त।
15 मिनु दाऊदमी आब्नेर कली “मार गे मुर मनवे। मार इस्राएलमी अरु यो इ खोदेंशो मुर बाक्नीमी? गे मारदे इ प्रभु, पिप कली रिम्शो पा खाल मपवी? मारदे हना आं मुर का इ प्रभु, इ पिप कली साइक्चा कली मेकेर जाक्त।
16 इन पशो मरिम्शो बाक्ब। परमप्रभु यावे ब्रोंइशा बाक्शो खोदेंशो पा गे साइक्चा पुंइसीचा ङा बाक्नीनी। मारदे हना गे इन प्रभु कली खाल मपनी। परमप्रभु यावे आ तेल लुक्शो कली खाल मपनी। लो कोव़ङीन, मेको इन पिप आ पिया गे बाक्शो आ तूतीक नु ब्वाक्कु तूतीक ग्योंब ते बाक्म?” देंमाक्त।
17 मेना सावलमी दाऊद आ सेंदा नेंशा “आं तौ दाऊद, मेको इ सेंदा बाक्बा?” देंमाक्त। मिनु दाऊदमी “आं प्रभु, आं पिप, आं सेंदा बाक्ब” दे लोव़ लेत्ता बाक्त
18 मिनु दाऊदम “आं प्रभु, मारदे गे इन गेय पाइब, आं कली, खेदा पाइनीनी? गो मार पङा ङा? आं दोस मार बाक्बा?
19 मोपतीके आं प्रभु नु आं पिप, इन गेय पाइब, आं लोव़ नेनीन। परमप्रभु यावेमी इन कली आं कली खेदा पपाइक्चा कली पोक्शो बाक्त हना, मेकोमी चढ़ेतीक का ब्राइबा कों। तन्न बेक्शा लाइब मुरुम इन कली आं कली खेदा पचा कली पोक्शो बाक्त हना, मेको परमप्रभु यावे आ ङोंइती सराप रल। मारदे हना मेकोपुकीम मुलाक्त आं कली परमप्रभु यावे आ गेशो रू रे खेरशा ‘लावो, अरु देवी देवता आन कली सेउ पावो’ दे लोव़ पाम्तेक्म। उत्पत्ती ८:२१; ब्यवस्था ३२:९; २राजा ५:१७
20 मोपतीके परमप्रभु यावे क्येङा ङोन आं हुश मशाइक्पतीन। मारदे हना इस्राएल ङा पिप चुक्बे का कली माल्थ ग्रूशो बाक्ब। मेको पहाडम थेल्मी सिखार ग्यारशो खोदेंशो दुम्त” दे सावल कली देंमाक्त।
21 मिनु सावलमी “गो मरिम्शो पाता। आं तौ दाऊद, लेश्शा जाक्को। मुलाक्ती गे आं कली ब्रोंइचा गेती मुल रे गो इ कली गेनायो श्येत मगेनुङ। गो मूर्ख दुम्ती। गो थमा पा मरिम्शो पाता” देंमाक्त।
22 मिनु दाऊदमी “पिप आ तूतीक एक बाक्ब। इन ठिटा मुर का कुशा लदल।
23 परमप्रभु यावेम ठीक पाइब नु थमा सुइक्चा पुंइसीब मुर आन कली इनाम गेब। मिनु मुलाक्ती परमप्रभु यावेमी इन कली आं गुइमी गेप्तु। तन्न गो परमप्रभु यावे आ तेल लुक्शो कली साइक्ने मबिस्सीङ।
24 दोपा मुलाक्त गो इन ब्रोंइतीक ठेयब मिम्तु, मोपा परमप्रभु यावेम आं ब्रोंइतीक कली ठेयब मिम्तल। मिनु आं कली हिंचा ङा श्येत नेल्ल रे प्रोंइयील” देंमाक्त।
25 मिनु सावलमी दाऊद कली “आं तौ दाऊद, गे आसीक रवेल। गे शुश गेय पशा, नेल्ल रिम्शो पाइनेवे। मिनु गे ग्रानेवे” देंमाक्त। मिनु दाऊद आ लां खोदा बाक्त। सावल चहिं आ बाक्तीक मेर लेम्माक्त।