1 Samuel 23 in Sunwar

1 मुरपुकीम दाऊद कली “पलिस्‍तीपुकीम कैलाह नु लडाइ पा अन्‍न वोइक्‍तीक रोइक्‍ना रोइक्‍न बाक्नीम” देंमा बाक्‍त। यहोसु १५:४४

2 मिनु दाऊदम परमप्रभु यावे कली “गो लशा पलिस्‍तीपुकी नु लडाइ पङ देय मपङ” दे हिल्‍लो पवा बाक्‍त। मिनु परमप्रभु यावेम “लशा, मेको आन कली लडाइ तोव़मी कैलाह कली प्रोनो” देंमाक्‍त।

3 तन्‍न दाऊद आ मुरपुकीम मेको कली “गो यहूदा रागीम बाक्‍शा ला यो हिंनीकी। कैलाह ङा पलिस्‍तीपुकी नु लडाइ पाइतय हना, मेको क्‍येङा शुश हिंनीकी” देंमा बाक्‍त।

4 मिनु लेंशा दाऊदमी परमप्रभु यावे कली हिल्‍लो पवा बाक्‍त। मिनु परमप्रभु यावेमी “कैलाहम लावो। गो पलिस्‍ती आन कली इन गुइमी गेनुङ” देंमाक्‍त।

5 मोपतीके दाऊद नु आ मुरपुकी कैलाहम लमा बाक्‍त। मिनु पलिस्‍तीपुकी नु लडाइ पामे बाक्‍त। मेकोपुकीम मेको आन बी ब्‍यफ रोइक्‍तमे बाक्‍त। मेको आन कली मरिम्‍शो पा फ्रूमे बाक्‍त। मिनु कैलाह ङा मुर आन कली प्रोन्‍मे बाक्‍त। १सामुएल २२:२०; न्‍यायाधीस ८:२७

6 अहीमेलेक आ तौ अबीयाथार दाऊद आ बाक्‍तीक, कैलाह सहर प्रोक्‍मेनु, निसाफ पतीक ऊरीम नु थुम्‍मीम बाक्‍शो झोला यो लाइश्‍शा लशो बाक्‍माक्‍त।

7 दाऊद कैलाह ओव़शो बाक्‍ब, दे का निक्‍शी मुरुमी सावल कली शेंदमे बाक्‍त। मिनु सावलमी “परमप्रभुम मेको कली आं गुइमी गेशो बाक्‍ब। मारदे हना मेको गारो हिरशो, आग्‍लो पाइश्‍शो, सहरम ओव़शो बाक्‍ब” दे मिम्‍ता बाक्‍त।

8 सावलम आ लडाइ पाइब नेल्‍ल आन कली कैलाहम लडाइ पा दाऊद नु आ मुर आन कली एर ओंथ रे पुम्‍चा नम, दे हुकुम पवा बाक्‍त।

9 मिनु दाऊदमी आंम पर्बम मरिम्‍शो पचा चिक्‍शो तुइक्‍ता बाक्‍त। मिनु मेकोमी अबीयाथार चढ़ेब कली “निसाफ पतीक ऊरीम नु थुम्‍मीम बाक्‍शो झोला चाक्‍को” दे मदा बाक्‍त। १सामुएल ३०:७-८

10 मिनु नोले मेकोमी “परमप्रभु यावे, इस्राएली आन परमप्रभु सावल कैलाहम जाक्‍शा, आं पर्बम एको सहर खतम पोक्‍चशो बाक्‍ब, देंशो लोव़ इन गेय पाइबम नेंशो बाक्‍नुङ।

11 मार, कैलाह सहरम बाक्‍ब मुरपुकीमी आं कली मेको आ गुइम गेनीमी? मार आं नेंशो खोदेंशो पा सावल एक जाक्‍बा? परमप्रभु यावे, इस्राएली आन परमप्रभु, इन गेय पाइब कली शेंदीन” देंमाक्‍त। मिनु परमप्रभु यावेम “थमा पा मेको एक जाक्‍ब” देंमाक्‍त।

12 मिनु दाऊदमी “मार कैलाह ङा मुरपुकीमी गो नु आं मुर आन कली सावल आ गुइम गेनीमी?” देंमाक्‍त। मिनु परमप्रभु यावेम “मो पाइ‍नीम” देंमाक्‍त।

13 मिनु दाऊदमी आ ६ सहे खोइ मुर लाइश्‍शा, कैलाह रे गाक्‍माक्‍त। मिनु तेइ तेइ हिरना हिरन बाक्‍मा बाक्‍त। दाऊद कैलाह रे प्रोक्‍त, देंशो लोव़ नेंशा, सावल लेम्‍माक्‍त।

14 दाऊद जीफ ङा पहाड ङा गोरशो रागीमी बोल्‍यो ख्रुइश्‍शा बाक्‍तीकेमी ख्रुइश्‍शा बाक्‍माक्‍त। सावल मेको कली नाक्‍त किंत किंत माल्‍शा गाक्‍बाक्‍माक्‍त। तन्‍न परमप्रभुम दाऊद कली मेको आ गुइमी मगेवा बाक्‍त।

15 दाऊद जीफ ङा गोरशो रागी ङा होरेशम बाक्‍मेनु, सावलम थमा पा आ कली साइक्‍चा कली ग्रूशा पिशो बाक्‍ब, दे तुइक्‍ता बाक्‍त।

16 मिनु सावल आ तौ योनाथन दाऊद आ बाक्‍तीक होरेश जाक्‍दीम्‍माक्‍त। मिनु मेको कली परमप्रभु आ नेंमी आ थुं बारपदा बाक्‍त।

17 मेकोमी “गे महिनीन। गे आं आफ आ गुइ रे मबेक्‍नीनी। मेकोम इन कली मथिप्‍ब। गे इस्राएल ङा पिप दुम्‍नीनी। गो इन दी ङा दुम्‍नुङ। मेको लोव़ आं आफोम तुइश्‍शो बाक्‍ब” देंमाक्‍त। १सामुएल २०:३०-३१; १सामुएल २४:२१

18 मिनु नोले मेको निक्‍शीमी परमप्रभु यावे आ ङोंइती कबल पाम्‍से बाक्‍त। मिनु दाऊद होरेशम बाक्‍माक्‍त। योनाथन चहिं आ खिं लेम्‍माक्‍त। १सामुएल १८:३

19 मिनु जीफ ङा मुरपुकीम सावल गिबाम बाक्‍मेनु “दाऊद आंइ दाते ङा बोल्‍यो ख्रुइश्‍शा बाक्‍तीक होरेशम बाक्‍ब। मेको हाकीलाह डांडा रे येशीमोन आ दक्‍खिन गे बाक्‍ब। १सामुएल २६:१; भजन संग्रह ५४:२

20 मुल गे गेना ब्रुप्‍चा दाक्‍नीनी, मेना ब्रुपीन। मिनु गो मेको कली इन गुइम गेनीकी” दे लोव़ पामे बाक्‍त।

21 मिनु सावलमी “थमा पा परमप्रभु यावेम इन कली आसीक गेवल। मारदे हना गो आं कली शिशी पाइतीनी।

22 मुल लशा, चिनु रु‍पीन। मिनु मेको ते बाक्‍मे? मेको कली सुम तवा तुइक्‍तीन। मेको मुर आन मिक्‍च सिल्‍ब बाक्‍ब।

23 मेको तेको ख्रुइक्‍तीकेम बाक्‍मे, रिम्‍शो पा रु‍पीन। मिनु आं बाक्‍तीक जाक्‍शा शेंदीनी। मिनु गो गेपुकी नु लाइ‍नुङ। मेको एको रागीम बाक्‍त हना, गो यहूदा आ खिं खिं ङा मुर आन दाते रे माल्‍शा ग्रुंइनुङ” देंमाक्‍त।

24 मिनु मेकोपुकी रीब पा सावल क्‍येङा ङोंइती जीफ गे लमा बाक्‍त। दाऊद नु आ मुर चहिं अराबाह ङा माओनम बाक्‍मा बाक्‍त। मेको येशीमोन आ दक्‍खिन गे ङा गोरशो रागीम बाक्‍ब। यहोसु १५:५५

25 सावल आ मुरपुकी नु मेको आन कली माल्‍थ गाक्‍माक्‍त। दाऊदम मेको लोव़ नेंशा, रोंगु लुक्‍च लशा, माओन ङा गोरशो रागीम बाक्‍मा बाक्‍त।

26 सावल मेको डांडामी लमाक्‍त। दाऊद नु आ मुर मेको डांडा आ अर्को पटटी बाक्‍मा बाक्‍त। दाऊद नु आ मुरपुकी प्रोक्‍चा माल्‍ना माल्‍न बाक्‍मा बाक्‍त। सावल नु मेको आ नोले खोइक्‍बपुकीम चहिं मेको आन कली ग्‍याइक्‍चा कली आन नेक्‍था जाक्‍दीम्‍मा बाक्‍त।

27 मिनु लोव़ कुरब मुर का सावल आ बाक्‍तीक जाक्‍शा “रीब पा जाक्‍कीन। मारदे हना पलिस्‍तीपुकीम इन रागीम मारेइ मारेइ रोइक्‍ना रोइक्‍न श्‍येत गेशो बाक्‍नीम” देंमाक्‍त।

28 मोपतीके सावल, दाऊद कली खेदा पचा प्रोंइशा, पलिस्‍तीपुकी नु लडाइ पथ लेम्‍माक्‍त। मोपतीके मेको कली “प्रोक्‍पाइक्‍ब रोंगु” देंनीम।

29 मेको नोले दाऊद डांडा ङोइश्‍शा एन-गेदी ङा बोल्‍यो ख्रुइश्‍शा बाक्‍तीक मेर बाक्‍माक्‍त।