1 Samuel 22 in Sunwar
1 दाऊद मेकेर रे प्रोक्शा, अदुल्लाम ङा पुक्खीम लमाक्त। मिनु मेको आ लोक्ब नु आ खिं ङा मुर नेल्लेम मेको लोव़ नेंन्मे बाक्त। मिनु मेकोपुकी आ बाक्तीक जाक्दीम्मा बाक्त। भजन संग्रह ५७:१; यहोसु १५:३६
2 श्येत जशो, जेर दुम्शो नु आन थुं मनुशो मुरपुकी मेको आ बाक्तीकेम जाक्मा बाक्त। मिनु दाऊद मेको आन कप्तान दुम्माक्त। मेकोपुकी ४ सहे खोइ बाक्मा बाक्त। न्यायाधीस ११:३
3 मेकेर रे मेकोपुकी मोआब ङा मिस्पे लमा बाक्त। मिनु मोआब ङा पिप कली “परमप्रभुम आं पर्बम मार पाइबा, मेको मतुइक्तु सम्म आं आंम आफ आस कली इन बाक्तीकेम बाक्चा गेने” देंमाक्त। २सामुएल ८:२; रूथ १:३
4 दाऊदमी आ आम आफ आस कली मोआब ङा पिप नु वोदा बाक्त। मेको आ बोल्यो ख्रुइश्शा बाक्तीकेम बाक्ची ना सम्म आ आम आफ मोआब ङा पिप नु बाक्सा बाक्त।
5 मिनु परमप्रभु यावे आ लोव़ पाइब गादमी दाऊद कली “गे मेको बोल्यो ख्रुइश्शा बाक्तीकेम मबाक्कीन। रीब पा यहूदा रागी लने” देंमाक्त। मोपतीके दाऊद हेरेथ ङा ब्वाकीम लमाक्त। भजन संग्रह ६३:१
6 मिनु सावलमी दाऊद नु आ मुरपुकी ते बाक्शो बाक्मा मेको नेना बाक्त। सावल गिबा ङा डांडाम बाक्शो, ठेयब रवा आ पुंम, गुइम तूतीक शेशा बाक्शो बाक्माक्त। मेको आ गेय पाइब नेल्ल आ एर ओंथ राप्शा बाक्शो बाक्मा बाक्त।
7 मिनु सावलमी आ एर ओंथ बाक्शो मुर आन कली “गे बेन्यामीन आ थर ङा मुर, आं लोव़ नेनीन। मार, येस्से आ तौमी नेल्ल इन कली रू नु अङगुर रू गेबा कों? नेल्ल इन कली सहे का ङा नु हजार का लडाइ पाइब मुर आन कप्तान सेल्बा कों, दे आस पाइनीनी?
8 मोपतीके गे नेल्लेम आं कली मरिम्शो पशो बाक्तीनी। इन दातेमी सुइम आं कली आं तौ नु येस्से आ तौ कबल पमुशो मशेंदीनी। सुइम आं कली आं तौमीन आं गेय पाइब कली जोंब पोक्शा, आं कली बाप्पाइश्शो लोव़ मशेंदीनी” देंमाक्त। १सामुएल १८:३
9 मिनु सावल आ गेय पाइब नु राप्शा बाक्शो एदोम ङा दोएगमी “गो येस्से आ तौ कली नोब ङा अहीतुब आ तौ अहीमेलेक आ बाक्तीकेम जाक्शो ताता। भजन संग्रह ५२:२; १सामुएल २१:१-१०
10 अहीमेलेकम दाऊद आ पर्बम परमप्रभु यावे कली पुंइतु। मेको नोले जचा थोव़क नु पलिस्ती गोल्याथ आ तरवार यो मेको कली गेप्तु” देंमाक्त।
11 मिनु सावलमी नोब ङा चढ़ेब अहीतुब आ तौ अहीमेलेक नु नोबम बाक्ब आ खिं ङा चढ़ेब नेल्ल आन कली ब्रथ सोइक्तीमी बाक्त। मिनु मेको नेल्ल पिप आ ङोंइती जाक्मा बाक्त।
12 मिनु सावलम “ए अहीतुब आ तौ नेनो” देंमाक्त। मिनु मेकोमी “दुम्ब, आं प्रभु” देंमाक्त।
13 मिनु सावलम मेको कली “गे नु येस्से आ तौमी आं पर्बम मारदे मरिम्शो पसी? गे मेको कली शोब्ले नु तरवार गेप्तीवी। मेको आ पर्बम परमप्रभु नु पुंइतीवी। मेको आं पर्बम मरिम्शो पचा कली ठीक दुम्शो बाक्ब। मुल आं कली बाप्शा बाक्चा कली मोदेंशो पाइतीनी” देंमाक्त।
14 मिनु अहीमेलेकमी “इन गेय पाइब नेल्लेमी थमा सुइक्चा पुंइसीशो इन चांइवा, इन गेय पाइब दुम्शो, इन खिंम मान पाइक्चा पुंइसीब दाऊद बाक्ब। १सामुएल १८:२२,२७
15 मोदेंशो मुर आ पर्बम परमप्रभु नु ङोंइती ङा खेयप सल्ला पुंइशा, मार मरिम्शो पङा ङा? मोदेंशो लोव़ आं रे ङोन बाक्ल। गो नु आं खिं ङा मुर आन कली दोस मगेकी। मारदे हना, गो एको आ पर्बम मारेइ मतुइश्शो बाक्नीकी” देंमाक्त।
16 मिनु पिपम “अहीमेलेक गे थमा पा साइक्चा पुंइसीनेवे। गे नु इ खिं ङा मुर नेल्ल साइक्चा पुंइसीनीम” देंमाक्त।
17 मिनु सावलम आ नेक्था उइ राप्शा बाक्शो आ कली खाल पाइब कली “लशा परमप्रभु यावे कली चढ़ेब आन कली सतो। मारदे हना, मेकोपुकी दाऊद नु गारशो बाक्नीम। मेकोपुकीमी दाऊद प्रोक्शो बाक्ब, दे तुइश्शा यो, आं कली मशेंदीमी” देंमाक्त। तन्न पिप कली खाल पाइबपुकीमी परमप्रभु यावे कली चढ़ेब आन कली साइक्चा थुं मपामे बाक्त।
18 मोपतीके पिपम एदोम ङा दोएग कली “ए दोएग लशा चढ़ेब आन कली सतो” देंमाक्त। मिनु दोएग लशा, चढ़ेब आन कली सदा बाक्त। मिनु मेकोमी मेको नाक्ती ८५ जना निसाफ पतीक ऊरीम नु थुम्मीम बाक्शो झोला फेक्शो मुर आन कली साइक्मी बाक्त।
19 सावलमी चढ़ेब आन सहर नोब ङा वोंइश मुर, मीश मुर, आलपुकी, ब्यफ गधा नु भेडा नेल्ल आन कली तरवारमी क्योरशा साइक्मी बाक्त। १सामुएल २१:२
20 अहीतुब आ तौ अहीमेलेक आ तौ का अबीयाथार चहिं प्रोक्शा दाऊद आ बाक्तीक जाक्दीम्माक्त। १सामुएल २३:६; मर्कूस २:२६
21 मिनु अबीयाथारमी सावलम दोपा परमप्रभु यावे कली चढ़ेब आन कली सदा, मेको नेल्ल दाऊद कली शेंदा बाक्त।
22 मिनु दाऊदमी अबीयाथार कली “मेको नाक्ती एदोम ङा दोएग मेकेर बाक्त। मेकोम सावल कली शेंब, दे गो तुइश्शो नङ। इ आफ नु आ खिं ङा मुर नेल्ल आन कली साइक्पाइक्ब दोस ताइब गो दुम्ती। १सामुएल २२:९
23 गे एक गो नु बाक्को। महिनो। इ कली साइक्चा माल्बम आं कली साइक्चा माल्शो बाक्ब। गे गो नु मारेइ मदुम्थु बाक्नेवे” दे मदा बाक्त। १राजा २:२६-२७