1 Samuel 21 in Sunwar
1 मिनु दाऊद नोब ङा चढ़ेब अहीमेलेक आ बाक्तीक जाक्माक्त। मिनु अहीमेलेक ख्रिंख्रि पा दाऊद कली ग्रुम्शा “मारदे इन का ला जाक्नी? गे नु सुइ मबाक्मा” देंमाक्त। १सामुएल २२:९,१९
2 मिनु दाऊदम चढ़ेब अहीमेलेक कली “गो पिप आ हुकुममी जाक्ती। मेको गो सुइ आन कली शेंचा मदुम्नुङ। गो आं मुर आन कली सुइ मबाक्तीकेम ग्रुम्चा नङ, दे माइक्तामी।
3 मुल इन नु मार बाक्बा आं कली ५ ओटा शोब्ले कि दोशो बाक्मे, मोशो गेयीनी” देंमाक्त।
4 मिनु चढ़ेबम दाऊद कली “गो नु शोब्ले मबाक्ब। कोंइतीक शोब्ले ला बाक्नीम। तन्न मार, मेरे वोंइश मुरपुकी मीश मुर रे ङोन बाक्शो बाक्नीमी?” दे हिल्लो पवा बाक्त। लेवी २४:५-९; प्रस्थान १९:१५
5 मिनु दाऊदमी “गो इन कली थमा लोव़ पाइनुङ, गेना हना यो गो लां गाक्ची ना मीश मुर रे ङोन बाक्नीकी। एको वोंइश मुर ग्रांग्रा मदिशो बाक्नीम। मुल मेको क्येङा ग्रांग्रा मदिशो बाक्नीकी” देंमाक्त।
6 मोपतीके मेकेर अरु शोब्ले मबाक्तीके चढ़ेबमी मेको परमप्रभु यावे आ ङोंइती वोइश्शो कोंइतीक शोब्ले गेवा बाक्त। तेको नाक्ती कोंइतीक शोब्ले परमप्रभु यावे आ ङोंइती रे लदमे, मेको नाक्ती अर्को होश शोब्ले वोइक्चा माल्बाक्माक्त। मत्ती १२:३-४
7 सावल आ गेय पाइब आन दाते ङा गेय पाइब का यो मेको नाक्ती मेकेर परमप्रभु यावे आ ङोंइती दिक्शा, बाक्शो बाक्माक्त। मेको एदोम ङा दोएग बाक्माक्त। मेको सावल आ गोठला आन नेल्ल क्येङा ठेयब मुर बाक्माक्त। प्रस्थान २१:१३; लेवी १३:४,३१; १सामुएल २२:९,१८
8 दाऊदम अहीमेलेक कली “गे नु तूतीक तरवारपुकी बाक्नीमी? मारदे हना पिप आ गेय रीब पा पचा माल्तीके गो तरवार नु अरु या कुरचा मतङ” देंमाक्त।
9 मिनु चढ़ेबमी “एलाह ङा दिंमम इन साइश्शो पलिस्ती गोल्याथ आ तरवार एक बाक्ब। मेको निसाफ पतीक ऊरीम नु थुम्मीम बाक्शो झोला आ नोले वाम गिल्शा वोइश्शो बाक्ब। मेको लाइक्नीनी हना, लतीन। मेको ङा लाक्शा एक अर्को या मबाक्ब” देंमाक्त। मिनु दाऊदमी “मेको खोदेंशो रिम्शो अर्को तरवार मबाक्ब। आं कली मेकोन गेयीनी” देंमाक्त। १सामुएल १७:५०-५१; न्यायाधीस ८:२७
10 मेको नाक्ती दाऊद बोक्शा सावल रे प्रोक्माक्त। मिनु गाथ ङा पिप अकीश आ बाक्तीके जाक्माक्त। भजन संग्रह ५६:१
11 अकीश आ गेय पाइबपुकीम मेको कली “थमा पा रागी ङा पिप दाऊद एकोन बाक्ब। एको आ पर्बम सावलम हजार हजार आन कली साइक्तु। दाऊदम १० हजार हजार आन कली साइक्तीमी” दे कुम्सो मपामे ङा? १सामुएल १८:७
12 दाऊदम मेको लोव़ आ थुंम वोइश्शो बाक्माक्त। मिनु मेको गाथ ङा पिप अकीश तशा थाम्पा हिंमाक्त।
13 मोपतीके मेकोमी मेको आन ङोंइती आ निप्स ग्राइश्शो खोदेंशो दुम्खु पवा बाक्त। मेकोम ठेयब लाप्चोमी रेन्ना रेन्न नु आ राल आ गल शोक्रेम तोक्ना तोक्न बाक्माक्त। भजन संग्रह ३४:१
14 मिनु अकीशमी आ गेय पाइब आन कली “एको मुर आ निप्स ग्राइश्शो बाक्त। एको कली मारदे आं बाक्तीक चाक्नी?
15 गो अरु निप्स ग्राइश्शो मुर माल्नुङा? गे मारदे एको कली आं ङोंइती हेंथे पपाइक्चा कली चाक्नी। मेको आं खिंमी बाक्ल, दे मिम्नीनी?” दे माइक्मी बाक्त।